Mar 10 | KjiSC | STEP | Ianimu tuna ghe dike ghahe kaini nga Kapaniumu Zisas nia ira nona mane ta nonofoi e ghua, dike lao ghu pelopeka mo ka ia hori Zudia, nia ka ia kobosona fateo mo ka ia Ketuhu Zodani, e ghua. Ira varigharadi noni dike to auni aianimu, neke va kakahe ghidi ghu Zisas, taghe ta fani ghua tudu lama.

Mark 10

Ia Tatangana Ka Zisas Ghinina Ia Varihio Nia Ia Varikai

Matiu 19:1-9

1 Ianimu tuna ghe dike ghahe kaini nga Kapaniumu Zisas nia ira nona mane ta nonofoi e ghua, dike lao ghu pelopeka mo ka ia hori Zudia, nia ka ia kobosona fateo mo ka ia Ketuhu Zodani, e ghua. Ira varigharadi noni dike to auni aianimu, neke va kakahe ghidi ghu Zisas, taghe ta fani ghua tudu lama.

2 Keha Farisira dike meha va sisiva seke ghini Zisas ka notoho iahi, e mala kaheri ghu Zisas keha leghutau ta zea ka ia vetula, dike ghua. “?E malumu mo mu ia mane ta kainina ia keranau?” dike ghua ghini.

3 “?Heve mu neke ungene va gigimaina Mosese ka giliona vetula ianimu?” neke ghua Zisas notohorina.

4 “Mosese neke va malumi mo ia mane ta kangava vanadi laona ira ta babatu kaike letana varikai, nia va ghahei ma tuna manei e ghua,” dike ghua ghini.

5 Ghe Zisas neke va kahe ghidi iahi, “Vununa ghidi ira hihingomu ta puina va kioto ghau, ghe neke kangava vanamu nga Mosese ungene va gigima iahi. 6 Ghe ka ia tatanigaina va vuvuhani, neke to avoavohoana mo mu ia vatovato ka God, vununa ‘manei neke va vuhai ia noni, ta mala mane, ghasena.’ ^{▼▼Tatanigaina 1:27} 7 ‘Iahi lamu ghu mu fafahakanana ghe, ne ghahe kairi nga nona mama ghe nona uke ia mane, ne la parekete taremehanana ghu ia keranau, ^{▼▼Keha kakangavara ka Giriki mu e deo ge au ghu “ta age parekete taremehanana ghu ia keranau” ta ghua iahi.} 8 e mala age kaike ghu maneri palu.’ ^{▼▼Tatanigaina 2:24} Nia vununa maneri palu ghu mu to age kaike, 9 eka puina ke mala kaini la ghu ia ghaseborona mu ia mane, vununa God to vari parekete ghidi.”

10 Ka ia fafata ke au kakaikena Zisas ka ia giliona suga taremehadi ira nona mane ta nonofoi, maneri dike notohi ta va fafahaka vanadira, ira heve neke kaheriro manei ghinina ia varikai. 11 Neke ghua ghu iahi, neke va kahe ghidina manei, “Hei mane ia ta kaini ia keranau take varihio ghu ka ia keha fotati mu, ne zave kunui ia kusu keranau. 12 Nia ia fotati neto varikai la neto ke varihio ghu ka keha manena mu, manei ne zave kunui haroma ia kusu keranau.”

Zisas Neke Va Beanari Ira Rekaha

Matiu 19:13-15; Luku 18:15-17

13 Kaike ravata, keha nonira dike hio laori ira nodi rekaha ka Zisas ta mala la posirira ta va beanarira ghu manei, ghe ira nona mane ta nonofoi dike buruari ira noni. 14 Ne finini ghu Zisas dike ghuana ianimu maneri, manei neke age hali ghena, neke va kahe ghidi lao ghu, “Va malumuri edi meha ghu ka ara rekaha nira. !Oka va nodori ghu! Vununa Ia Ravutu ka God mu, e mala nodi mamu kokolodi noni taghe rekaha irahi ira ta ghua ira doli ka maneri. 15 A toraina va kahe ghini ghau ghu ara, hei neto deoi la ia kokolona va hohoghona ta au ka ira rekaha, e deo kalasu kai ge boka age hagheli ghu ia Ravutu ka God.” 16 Ianimu tuna ghe neke ebeteri nga ira rekaha manei, neke posiri ghu ira paudi ka ira kamena, va beanarira.

Ia Mane Ta Taghotagho Neke Notohi Zisas Ghinina Ia Doli Toghunai

Matiu 19:16-30; Luku 18:18-30

17 Neke tatanigai ghahe kave lao ghu Zisas ka ia hangana, kaike mane neke purudu lao, neke la torongaghituturu hinae ghu ka manei, ghe neke fangai nga, “?Mane Vari Va Kakahei Ta Veha Agho, heve mo ta riva ghinina ara ghe, ga boka hio kadoli nga ia doli toghunai?” neke la ghua.

18 Zisas ne ungene tughui, “?Ne heve agho ghe, no va kudo ghinagu veha nga ara? God lama mu ta toraina veha hohoghonana. 19 Taghe ghinina ia notoho ka agho mu, agho to avohori ira ungene va gigima ka God: ‘Ka vari atungu ghu. Ka zave kunui ghu kerauau. Oka sisiko ghu. Ka turi ghini sebo ghu ia keha noni. Ka rivai sekesekei mala sisiko ghu. O heluhelu ghidi nou mama ghe nou uke,’ ^{▼▼Kave 20:12; Ngengene 5:16-20} ira ta ghua.”

20 “Mane Vari Va Kakahei Agho, leghu ungene va gigima irahi nga nato ke leghuri nake mehara ghu ara, taniga ia rekahaguni,” neke ghua ia mane.

21 Zisas neke mato va gigima laoi manei ka ia namaha, ghe neke kahe ghua nga iahi, “Kaike leghutauni, no deona nga go riva ghini ghu agho. O lao o la tatabara ghidi ghu ira vahina leghutau ta taghori nga agho, o la vanadi rongo ghu ira noni ta kuma, ghe ge age auigho taghotagho nga ka malauo God fate. Ianimu tuna ghe go meha leghuau nga ara.” 22 Ia mane ne nomohi ghu iahi, neke age dofu ira hihilina zea vananina, neke ghahe muko hihingona ghu, vununa manei neke taghotagho fuludu.

23 Zisas neke fihiki lao ka ira nona mane ta nonofoi, ghe neke kahe ghua nga iahi, “!E toraina mamarutana vanadi fuludu ira noni ta taghotagho ta haghelina ia Ravutu ka God!” 24 Ira mane ta nonofoi dike age nodi fere fuludu ka ira tuturi manei, ghe Zisas neke va kahe ghidini, “!Tuguro, e puina mamarutana fuludu mamu haghelina ia Ravutu Ka God! 25 !Ia kamele ta haghele ka ia korosana nila pitipiti mo mu, ta nanamo fuludu laoina ia mane ta taghotagho mala haghelina ia Ravutu God!”

26 Ira nona mane ta nonofoi Zisas dike age nodi fere laoni, dike vari nonotoho ghu taghodi, “?Neto ghua la ianimu, hei ghu mu ta boka age hioina ia doli ta toghunai?”

27 Zisas neke mato va gigimari ghe, neke va kahe ghidi lao nga, “Ka ia nganganana ia noni mu, e deo mamu ge boka ghu ta hioina ia doli ta au toghunai, nga ka God mu e boka mo, vununa vahina leghutau nga mu, e boka tudu ma ka manei.”

28 Ianimu tuna ghe neke notoho nga Pita ka Zisas. “?Heve e ghua ghu mu ghai, tato nai kairi haro idi ira vahina nomai leghutau nga, tato leghuigho ini ghu agho?” neke ghua ghini.

29 Zisas neke va kahe ghidi iahi, “A toraina va kahe ghini ghau ghu ara, hei noni neto ghahe kaini la ia sugana, ira tahina mane, ira tahina ghase, nona uke, nona mama, ira nona rekaha, ba nona kava malau, vununa ka ia ghinagu ara nia ia Nonomoho Ta Veha e ghua mu, 30 e age hioi ghatunaina ka malau iahi peka, kaike ghobi fafata ka fatedi lao ira nona suga, ira tahina mane, ira tahina ghase, ira nona uke, ira nona rekaha nia ira nona galahedi kava, e ghua. Ira noni edi age ngovali molamo noni ianimu, ghe ka fafata ta meha ani nga, manei e age hioi ia doli ta toghunai. 31 Nga ira tehi noni ta kenu ghatunaina mu, edi ke meha va nonoghana leghuni, nia heiri ira ta va nonoghana ghatunaina mu, edi ke age kenu.”

Va Litona Fafata Ta Kahe Kenuina Zisas Ia Leme Nia Ia Tetuleghu Ka Taghonai

Matiu 20:17-19; Luku 18:31-34

32 Maneri dike to au ka ia hangana ghahe vai vona laona Zerusalemu, ghe Zisas neke kusu ghahe kenu lao ka kenudi maneri. Ira mane ta nonofoi dike to age nodi fere fuludu, nia ira noni dike leghu mehariro, gedi puina maughedi ghu, dike ghua. Zisas neke hio nenemari ira tazoi palu mane ta nonofoi, neke la turi vanadi va veha ghu kaike fafatani, ghinina heve leghutau tato namo age dufuna ka taghonai ghatu aianihi Zerusalemu. 33 Va kahe ghidi lao tuna iahi, neke ghua Zisas, “Dato age dufu la ghita aianihi Zerusalemu, ia Tuuna Noni edi age namaha seboi ghatu, nai laoina ka ira kamedi ira hiama ta kenu nia ka ira ta vari va kakahe ghini ia vetula ta maduana ka God, e ghua. Maneri edi age variveha ghini ta mala va lemeina manei, ghe gedi vanadi lao nga tuna ira nonidi Romu. 34 Maneri edi age vela ghini, kamusi nia puruasimini ka ira nodi mala vari bota, ghe gedi age va lemei nga. Ghe leghuna lito ravata, manei e ke age tetu leghu.”

Nai Va Hinaeigho, O Riva Vanadi Ghu Ira Keha Noni

Matiu 20:20-28

35 Ianimu tuna ghe dike meha nga Zemesi ghe Zone ka Zisas ira palu tuunamane Zebedi, dike kahe ghua ghu iahi, “Mane Vari Va Kakahei Agho, na kabai ghinigho ta va uveina agho nomai fanga ini.”

36 “?Heve mo no kabai ghinina ta vanamuna ara?” neke ghua notohorina Zisas.

37 “Ka ia meha nohe agho ka ia nou nonohe ginitaukela ka ia nou Ravutu ta varanga, ghai palu na kabai ghinigho ta va noheina kaike ghu ka mautuu nia mo, nia kehana ka mairiu nia mo, ta age ghua ghini ghaina,” dike ghua ghini.

38 Ghe Zisas neke ungene tughuri, “!Ghau palu ghu e deo go avohi ghu, heve no fangaina! ?O boka mo ghau palu ghu ta ketuhuna, ka ia panikenina vavahagala ta minga tato namo ketuhi ini ara? ?O bokai mo ghau palu ghu ta age seselebeana ghinina, ia seselebeanana ia vavahagala ta toraina mala age seselebeana ghini ara?”

39 “!Uve, a boka mo ghai palu!” dike ghua.

Ghe Zisas neke va kahe ghidi leghu, “E hohoghona mamu ta age ketuhina ghau palu ia panikeni ta toraina mala ketuhi ara, nia ta seselebeanana ka ia ghaghahena ta toraina age seselebeana ara, e ghua, 40 ghe ara e deo au mana ta mala faetina, hei mo ta age nohena ka ia nonohe ginitaukela ka ia mautugu nia ka ia nonohe ginitaukela ka ia mairigu, e ghua. God to kusu va tanari malau iranimu, maladira heiri neke faeteriro taghonai.”

41 Di nomohi ghu ira keha tazo mane ta nonofoi heve dike fangaina Zemesi ghe Zone, dike age halari. 42 Ianimu tuna ghe, neke kudo varighara ghidi nga Zisas, neke va kahe ghidi ghu, “Ta avohina ghau mu, heiri ira ta mala babatu ka ira noni taka Ziu ghu mu, edi auri mana fatedi ira nodi noni nia edi ginitau kaputuri ira nodi noni, e ghua. 43 Nga ka vari hoataimu ghau mu, e ke toraina haza lao. Hei ia ta kabai babatu ka ghau mu, e toraina nomu noni mala riva, 44 nia hei ia ta kabai kenu tuna, ge toraina noni mala varituhu ghu ka heiri haroharo, e ghua. 45 Ara, ia Tuuna Noni na ghe, aka meha mala riva vanagu mo ira noni, nga nake meha mala riva vanadi nia leme vanadi e ghua, mala togoronana ia leme neke to nakainio God, maladira ira sasake dike riva ghidiro ira noni haroharo.”

Zisas Neke Va Vehai Batimeasi, Ia Mane Ta Kivi

Matiu 20:29-34; Luku 18:35-43

46 Ianimu tuna ghe, dike meha dufu nga Zeriko Zisas nia ira nona mane ta nonofoi e ghua. Di ghahe kaini ghu maneri malau ani taremehana ia leghahai varigharana noni, kaike mane ta kivi ta fafanga, babaolonana Batimeasi, ia tuunamane Timeasi, neke nohe ka ia gheremena hangana. 47 Ka ia fafata nomohi Batimeasi tato namona Zisas ia tanina Nazareti, manei neke tataniga kudo ghua iahi, “!Zisas, agho ia Tuuna Deveti, dudumana ghinagu!” neke ghua.

48 “!O vanemoho!” dike ghua kudo kainina ira keha noni.

Ghe ianimu tuna ghe, neke kudo va fafaa laoni nga manei, “!Tuuna Deveti, dudumana ghinagu!” neke ghuani manei.

49 Ka ia fafata nomohi Zisas kudonana Batimeasi, Zisas neke nodo, ghe neke kahe ghidi lao nga ira noni, “O va kahe ghini e meha ghu aiahi,” neke ghua ghidi.

Ianimu tuna ghe, dike kudo laoi nga ia mane ta kivi. “!O va manemane, o tetu vona ghu. Zisas to kudoigho ani,” dike ghua ghini. 50 Batimeasi neke kai laoi gheremena mo ia nona koti, neke paraku vona ghu laona ka Zisas.

51 “?Heve no kabai ghinina agho ta riva vananighona ara?” neke ghua notohona Zisas.

“!Mane Vari Va Kakahei Agho, ara na kabai vovoho fifini!” neke ghua manei.

52 Zisas neke va kahe ghini, “Ghahe gheu tuna. Ia va hohoghona ka agho ne age va vehaighona.” !Ka fafata ianimu lama neto ke age vovoho fifini ghu ia mane! Ianimu tuna ghe, neke leghu hinaei nga Zisas ka ia hangana.