Mar 13 | KjiSC | STEP | Ne ghahe kaini ghu Zisas ia Sugana God, kaike ghu ka ira nona mane ta nonofoi, neke kahe ghua iahi, “!Mane Vari Va Kakahei Agho, fini laori ko suga ta riringi ghahipa leghaha, ta namanama irani!”

Mark 13

Zisas Neke Kusu Kahe Kenui Ia Huara Ka Ia Suga Va Totoana

Matiu 24:1-3; Luku 21:5-7

1 Ne ghahe kaini ghu Zisas ia Sugana God, kaike ghu ka ira nona mane ta nonofoi, neke kahe ghua iahi, “!Mane Vari Va Kakahei Agho, fini laori ko suga ta riringi ghahipa leghaha, ta namanama irani!”

2 Zisas neke ungene tughui, “?No finiri mo agho leghahai suga irahi? E deo kaike ghahipa ghu aiahi, ta ke age vari papataina, ghatu edi age huara kai hinaeri haroharo.”

3 Leghuna ianimu, Zisas nia ira nona mane ta nonofoi dike nohe ka ia tabafena Vuhukuna Olivi, ka kadolona lao mo ia lovete ta sipa ka ia Sugana God. Meha tuna Pita, Zemesi, Zone, nia Aduru, gedi meha notoho kakaikei ghu, dike ghua, 4 “?Taghe niha ghe ge la dufu meha nga mu, leghu irahi nga? ?Nia heve mu va ghilaghilana ghatu, mala va fini ghini ghaina to namo age ghuduvu mamu leghu irahi nga, ta ghuana?”

Ia Fafatana Vavahagala Ta Toraina Mamaghuana

Matiu 24:4-25; Luku 21:8-24

5 Zisas neke kahe ghua iahi ka maneri, “O banabana, nia oka va malumi ghu hei noni ta meha sebo va zea ghauna. 6 Tehini ta la mehara ghatu ka babaologu ini ara ta age kahe ghuana ghu iahi, ‘Ara lamu manei,’ edi ghua, edi age sebo va zeari ghu tehi nonini ghatu. 7 Nia oka maughemu ghu noto nomohori la ira magara ta vari namo, nia ira keha ta varihau. Leghutau irahi mu edi toraina la meha, ghe fafahakanana ia va nonoghanana malau iahi peka to dufu, eka ghua ghu. 8 Ira soloso edi magarari ira keha soloso, nia ira ravutu edi magarari ira keha ravutu, e ghua. Ira kuzo edi age au ghatu ka ira tehi malau, nia e age au ira songe, e ghua. Leghutau irahi mu, taghe ia tatanigaina vavahagala ka ia va doli rekaha, e ghua ma.

9 “!Ghau o toraina banabana taghomu! Maneri edi age sakomo ghau edi hio ghau ghu ka varifate. Maneri edi age puruasimi ghau ka ira mala vari bota, ka giliodi ira suga mala varighara ira Ziu. Vununa ghinagu ara, o age tetu ghu ghau ghatu ka kenudi ira ta babatu nia mane ginitaukela, mala va kahe ghidira maneri ia Nonomoho Ta Veha. 10 Ghe ge la meha nga ia va nonoghana, ia Nonomoho Ta Veha e toraina kusu tuturi ghinina, ka ira leghu kokolodi butubutu noni nga ka malau iahi peka. 11 Nia dito sakomo ghau la dito hio ghau ghu ka varifate, oka kusu anga ghini ghemu ghu, heve ta mala kaheina. O suna kahei ma heve ta vanamu mehana ka fafata ianimu, vununa ira ngengene ta kaheri ghau ghatu mu, eka nomu ghu ghau, nga edi la meha ka ia Tarunga Ta Maduana.

12 “Ira tatahina mane, edi age nai laori ghatu ira tahidi mane ka ira kana mala va lemerira, nia ira mama gedi age ghua ghidi haro ghu ira nodi rekaha, e ghua. Ira rekaha gedi age magarari ghu nodi ukeri nodi mamari e ghua, mala va lemerira. 13 Ira leghu noni nga edi age kikipana ghini ghau ghatu, vununa ghau no leghuau ara. Ghe heiri ira ta tetu va gigima ta dufu ghu ka ia va nonoghana mu, God e hio va doliri ghatu.

14 “Ia fafata e la meha mo ghatu, ta age finini ghau ‘ia toraina leghutau ta muko ta mumukoi God,’ ^{▼▼Daneli 9:27; 11:31; 12:11} tetu haghelena ta va sotaina ghu, ia Sugana God taka mala la au ghu manei.” (!Agho ia ta izuizu, va fafahaka va vehai!) “Ira ta au Zudia tuna gedi toraina pelo lao ghu ka voruhu ari, e ghua. 15 Hei ia ta au ka ia fatena nona suga mu, eka ke nai fafata ghu mala hinae la borozana ka giliona ia suga. 16 Hei ia ta au ka ia galahena kava mala numa mu, eka ke puina leghu lao ghu ka ia suga, mala la hioina ia nona koti. 17 Ka mamaghuanadi ravatara ka fafata iranimu, ka ira fotati ta pote, nia ka ira uke ta boroi rekaha gogoso. 18 O tarai ghini ghu ia pelo ka ghau, mala eka au la ghu ka ia fafata ta kaporo ka ia rabongi. 19 Vununa ravata iranimu mu, edi age vavahagaladi fafata, fuludu laorini ira keha fafata ka ia tatanigaina va vuhai God malau iahi peka ta dufu ghu ghatunaina. Kokolona vavahagala iahi mu, e deo kalasu kai ke age dufu leghunani ghatu. 20 Geke deo la ia Lod kodaka va ponoerira ravatadi vavahagala iranimu, geala e deo hei ta dolina. Ghe mala ghidi ira nona noni neke faeteriro, neke va ponoeri ghu manei ravata iranimu. 21 Ka fafata ianimu, hei neto kahei la ka ghau, ‘!Fini, iahi ia Mesaea!’ ba, ‘!Fini, ianihi manei!’ dito ghua la, oka va hohoghonai ghu. 22 Vununa ira mesaea ta sesebo nia ira porofeti ta sesebo, edi age tetu vona ghatu, edi riva ghidi ghu ira hahaima ta fefereana mala vari sebona dito boka la, geta ghua ghu ira noni faetaidi ka God. 23 !O banabana ghu! Ara nato kusu va kahe ghini ghau vahina leghutau irahi nga, ghe ge dufu nga ia fafata.”

Ia Va Paluna Meha Ka Ia Tuuna Noni

Matiu 24:29-31; Luku 21:25-28

24 Zisas neke kahe ghuani iahi, “Ka ira ravata leghuna fafata ta mamaghuana ianimu,
“‘ia taunu e age nagoromo,
nia ia hihile e deo ge va meha fegala ghu,
25 ira babaghunu edi age riufu hinae ka kolangana fate,
nia ira vahina leghutau nga ka kolangana fate e age kuzori.’ ^{▼▼Asaea 13:10; 34:4}

26 “Ianimu tuna ghe gedi fini nga heiri haroharo ia Tuuna Noni la mehana ka ira toba, ka ia mana nia ia pelarana varanga. 27 Nia manei e age tuhu laori ira nona engizeli, ta mala hio varighara ghidira ira nona noni faetaidi hae ghe hae ghu ka malau kamoto iahi peka.”

Ia Hio Avoavoho Ka Ia Vununa Heke Figi

Matiu 24:32-35; Luku 21:29-33

28 “O hio avoavoho ka ia vununa heke figi,” neke ghua Zisas ka ira nona mane ta nonofoi. “Neto ke age sekere va veha la ira hobodi, to ke age tatanigai fedara leghu ghu ira kaladi, to avohi ma ghau, ia komuhu ba neto ke namo, ta ghuana. 29 Taghe iala molamo, noto finiri la leghu vavahagala nga dufudira, ghau oto boka avohi mo ia leghu meha ka ia Tuuna Noni, tato namo dufuna ka ia torai makatana. 30 A torai va kahe ghini ghau ghu ara, e deo ge boka age leme haroharo ghu ubalana noni iahi ghatunaina, e vuhai age dufu ghu leghu irahi nga. 31 Ia kolanga fate nia malau iahi peka mu, edi age nogha, nga ira ngengenegu ara mu, edi age au toghunai.

O Va Tana Ghini Ia Leghu Meha Ka Zisas

Matiu 24:36-51; Luku 21:34-36

32 “E deo hei noni ta avohina ia ravata ba fafata ta ke leghu mehana ia Tuuna Noni, geta ghua ira engizeli ka malauo God fate, nia taghonai ia Tuuna Noni ghe, e deo. Nga taghonai ia Mama lama ta avohina. 33 !O banabana nia va tana ghu! Ghau e deo go avohi ghemu ghu, niha ta la mehana fafata ianimu.

34 “Ia meha ka ia Tuuna Noni mu, taghe ta ghua nia lama ia mane ta ghahe kaini ia malauna, ta lao ghu ka kaike ghaghaheo. Manei neke sopai va kahe ghidi ira nona maneriva heve geala ta mala riva ghidira maneri, nia va kahe ghini tuna ia ta kopui makatana ta kakae ghini tuduna ia leghu meha ka taghonai, neke ghua. 35 !O mato va veveha tudu ghu! Vununa ghau deo go avohi ghemu ghu niha ta ke la leghu mehana ia ta kutamai malau. Haeba ka ia saighona ba, ka ia hoatai redu ba, ka ia fufugho redu ba, ka ia ghalaghalana fufugho ba, ta ghuara, e ghua. 36 Oka va fini ghini ghu ta epuna agho neto vari va kakazara la ia meha ka manei. 37 Heve ta va kahe ghini ghau ini ara mu, na va kahe ghidi haroma ira noni haroharo: !O kakae ghini tudu ghu ia leghu meha ka manei!”