Mar 14 | KjiSC | STEP | Palu ravata mo ta aura nga, ghe ge au nga ia varighara mala ngana leghuina ia Ghahe Fuludu nia Ia Mahai Varighara Va Manemanena Ia Bereti Ta Falao Kakato, e ghua. Ira hiama ta kenu nia ira mane ta vari va kakahe ghini ia vetula ta maduana ka God e ghua, dike hadui hae fafata ta veha mala sakomo poikaina Zisas edi atungi ghu, dike ghua.

Mark 14

Ira Mane Babatu Dike Hadu Ghini Vato, Mala Va Lemeina Zisas

Matiu 26:1-5; Luku 22:1-2

1 Palu ravata mo ta aura nga, ghe ge au nga ia varighara mala ngana leghuina ia Ghahe Fuludu nia Ia Mahai Varighara Va Manemanena Ia Bereti Ta Falao Kakato, e ghua. Ira hiama ta kenu nia ira mane ta vari va kakahe ghini ia vetula ta maduana ka God e ghua, dike hadui hae fafata ta veha mala sakomo poikaina Zisas edi atungi ghu, dike ghua. 2 “Daka torai riva ghini ghu ghita ka ia fafata mahai varighara va manemane, ghatu edi age magara ira noni,” dike ghua ghu.

Mere Neke Va Oranga Ghini Sedi, Ia Belehuna Zisas Aianihi Betani

Matiu 26:6-13; Zone 12:1-8

3 Ka fafata ianimu, Zisas neke au aianihi Betani ka suganao Saemoni, ia mane neke dufuio lepa sepao. Ka ia fafata va sasaighona maneri, kaike fotati neke haghele meha taremehana kaike rekahana botolo ta parimisi, ta riva ghini ka ghahipa ta va kudo ghini alabasita, ta foudui sedi ta torai vona tabarana ta riva ghini ka zagharana nadi kakato. Ia fotati neke piata kaini ia taniana botolo, ghe neke oranga laoi kamoto nga ia sedi ka belehunao Zisas. 4 Keha nonira aianimu, dike age halari dike kahe ghua ghu iahi ka vari taghodighi, “?Ka pepesana ghinira sedi ta toraina vona tabarana ini?” dike ghua. 5 “Nga geala e fuludu laoi 300 ta tatabara ghinina ka kunegele ta siliva, fuludu laoina ia tabarana kaike maneriva ka kaike komuhu, nia vanadi lao tuna ira ta kuma ia rongona, geala e ghua!” dike ghua, dike toraina kahe va mukoi ghu.

6 Ghe Zisas neke ungene tughuri, “O nai kaini fotati nia. ?Heve no ghua ghe no gorai nga ka leghutau ta veveha ta va riva ghinagu ini manei? 7 Ghau mu edi au tamu tudu ma ira ta kuma, o boka toka ghidi tudu ma ghu ka ia fafata ta kabai toka ghidi ghau. Nga ara mu, birusuna fafata tei ma ta au tamuna. 8 Manei neke riva ghini heve neke bokaina, neke va oranga ghini sedi ghu tinigu ini mala kusu va tana ghinina ia giugilu ka ara. 9 A toraina va kahe ghini ghau ghu ara, hae ghe hae ta tuturi ghinina maneri ia Nonomoho Ta Veha ka malau iahi peka, ia tuturina heve neke riva ghinio fotati iahi, edi age tuturi ghini tudu ma, ka ia merumeruna manei.”

Zudasi Neke Va Uveri Ira Ta Babatu Ka Ira Ziu, Ta Mala Namaha Sebo Vanadina Zisas

Matiu 26:14-16; Luku 22:3-6

10 Ianimu tuna ghe neke lao nga ka ira hiama ta kenu Zudasi Isikarioti, kaikeu ka ira tazoi palu mane ta nonofoi, mala toka ghidina sakomo vanadina Zisas. 11 Ira hiama ta kenu, dike va manemane ghini ia ngangana neke lao ghinino Zudasi, dike naiungene ghu ta mala vanani tabarana. Ianimu tuna ghe neke tatanigai hadui nga Zudasi ia toraina fafata nia kaike malau ta veha e ghua, ta mala la namaha seboina Zisas.

Ia Va Tanai Ia Mahai Va Sasaighonana *Ghahe Fuludu

Matiu 26:17-19; Luku 22:7-13

12 Ka ia ravata va kenuna ka Ia Mahai Varigharana Ia Bereti Ta Falao Kakato, ia ravata ta mala veala ghidi haro maneri ira rekahadi sipisipi malana ia Ghahe Fuludu, ira nona mane ta nonofoi Zisas, dike notohi, “?Hae mo no kabai ghini ghaina ta laona, ta la va tana vananighona ghu ia mahai va sasaighonana ia Ghahe Fuludu?” dike ghua ghini.

13 Va ghahe laori tuna keha palu nona mane ta nonofoi aianihi Zerusalemu neke ghua Zisas, mala la vato ghinina ia mahai va sasaighona, kahe ghuana iahi, “Ka ia haghele laomu ka giliona malau leghaha ani, kaike mane ta hure zagi ketuhu ta la dufu ghauna. O leghu laoi manei,” neke ghua ghidi. 14 “O va kahe ghini iahi ia kutamana ia suga ta la haghele ani manei, ‘Ia Mane Ta Vari Va Kakahei ne notoho meha: ?Hae mo ringifota ta boka meha mahainina ara ia mahaina Ghahe Fuludu taremehadira ira nogu mane ta nonofoau, neke ghua manei?’ o la ghua ghini. 15 Ghatu manei e hio ghau lao fate ka ia ringifota leghaha tato kusu pakara ghini va veha. O la va tanai ghu ia va sasaighona ka ghita aianimu.” 16 Ianimu tuna ghe dike kusu ghahe kenu lao nga ira palu mane ta nonofoi ka giliona malau leghaha ani, dike la finiri ghu ira vahina leghutau nga taghe neke to va kahe vanadio lama Zisas. La va tanai ma tuna dike ghua ia mahai va sasaighonana Ghahe Fuludu aianimu.

Ia Mahai Va Sasaighonana *Ghahe Fuludu

Matiu 26:20-25; Luku 22:14,21-23; Zone 13:21-22

17 Ka ia saighonana, Zisas neke sabara lao taremehadi ira tazoi palu mane ta nonofoi. 18 Ka ia fafata mahai maneri ka tevo ani, Zisas neke kahe ghua iahi, “A torai va kahe ghini ghau ghu ara, kaike ghu ka ghau ta mahai taremehagu ini ara ghatunaina, e age namaha seboau ara ghatu, nai laoauna ara ka ira ta kana ghinagu.”

19 Maneri dike to puina muko hihingodi, dike tatanigai sopai notohi ghu Zisas, “?Eka ghua ghu ara, ba heve?”

20 Ungene tughuri tuna neke ghua manei, “Kaike mane ma ka ghau tazoi palu ghu, ta va tihi lao bereti taremehagu ara ka sosa ini. 21 Ara ia Tuuna Noni mu, a toraina mala leme mamu, taghe dike kahe kaveio la ira Kakangava Ta Maduana sepaoni. !Ka puina age mamaghuana fuludura ghatu ka ia noni ta namaha seboi ia Tuuna Noni! E puina veha fuludu ma ka mane ianimu, geke deo lama doli mehanana, vununa manei e age vavahagala laoni ghatu.”

Ia Tatanigaina Va Sasaighona Ka Ia Lod

Matiu 26:26-30; Luku 22:17-20

22 Ka ia fafata mahai ghedi, Zisas neke hioi kaike kamotona bereti, ghe neke kudo vehai nga God. Ianimu tuna ghe ne kipekipei nga, ne vanadi lao ghu ira mane ta nonofoi, ne kahei ghu, “Hioi iahi, vununa iahi mu tinigu ara.”

23 Ianimu tuna ghe neke hioi nga manei ia panikeni waeni, neke kudo vehai ghu God ghe neke vanadi lao nga, dike vari ketuhu ghini haroharo ghu. 24 Ke kahe ghua tuna iahi, neke ghua, “Iahi mu ia busakagu ara ta oraha vanadi ira tehi noni haroharo, mala zago fuludainina ia varivehai vari hoataina God nia ira nona noni. 25 A toraina va kahe ghini ghau ghu ara, e deo ke age ketuhu waeninani ara, e dufu ghu ia ravata ta ke age ketuhi ara ia foforuna waeni, ka malauo God fate.”

26 Ianimu tuna ghe dike koze ghini nga kaike koze beana, dike kave lao ghu ka ia Vuhukuna Olivi.

Zisas Neke Kahe Kenui, Ne Deo Ge Avohi Ghu Manei, Ta Age Ghuana Pita Ghatu

Matiu 26:31-35; Luku 22:31-38; Zone 13:37-38

27 “Ghau haroharo o age pelo kaiau ara ghatu,” neke ghua ghidi Zisas, “vununa ka ira Kakangava Ta Maduana neke kaheina,
‘God e age atungi ia ta kopunai sipisipi,
edi age sopai riraha ghu ira sipisipi.’ ^{▼▼Zakaraea 13:7}

28 Ghe leghuna ke tetu leghu ara ka ia leme, ara a kusu kenu age mo Galili mala dufu ghauna aianimu.”

29 Pita neke kahe ghua iahi ka Zisas, “Geta pelo kaigho ghu maneri haroharo ghe, ara mu ta deo kalasukaina.”

30 Zisas neke ungene tughui Pita, “A torai va kahe ghinigho ghu ara. Ghe ge va paluna fafata nakele nga ia kokorako ka toraina redu iahi, agho o age kahei ghatu lito fafata, ta deona go avohoau ghu ara.”

31 “!Deo!” neke ghua Pita tuufunana. “!Ara e deo ga age kahei ghu iamu ghatu, geta leme taremehau ghu agho ara!” Ira keha mane ta nonofoi dike va bebereana haroma.

Zisas Neke Tarai Ka Ia Luru Heke Ani Getisemeni

Matiu 26:36-46; Luku 22:39-46

32 Meha tuna maneri ka ia malau ta va kudo ghini Getisemeni, ta au ia luru heke olivi dike ghua, neke kahe ghua iahi Zisas ka ira nona mane ta nonofoi, “O nohena nga aiahi, a la tarai ghu ara,” neke ghua ghidi. 33 Manei neke hio taremehana Pita, Zemesi nia Zone e ghua. Ka fafata ianimu, manei neke to age tatanigai faa vanani muko hihingo nia vavahagala, e ghua. 34 Neke va kahe ghidi ghu manei, “Ara na toraina muko hihingogu fuludu, nato namo age leme ghini ghu. O au aiahi, o baghunu taremehagu ghu.”

35 Manei neke ghahe varihau lao birusuna tei, ghe neke la fera ghini hinae nga taghonai, la habara kokopona ka ia kava. Manei neke tarai fangai God, ge boka la ge hio kaini ghu ia fafata mala vavahagala, ta la meha ka taghonai ghatu, neke ghua. 36 “Mama, nogu Mama,” neke ghua, “vahina leghutau nga mu, e boka mo ka agho. O hio kaini ghu panikenina vavahagala iahi ka ara. Ghe ia lao hihingo ka agho mo na kabai ghinina, nga eka ghua ghu ia ta kabai ghini ara.”

37 Ianimu tuna ghe, neke leghu lao nga manei, neke la finiri ghu ira mane ta nonofoi dike to epuna. “?Saemoni,” neke ghua ghini lao Pita, “agho mu no epu? ?To deo ma ghe go boka au baghunu ghu agho ka kaike aoa tei ghu? 38 Baghunu o tarai ghu, mala e deo ghu boka riufumuna ka ia auau. Ne ohoꞌoho mo ia tarunga, ghe ia vilahi ne paeke.”

39 Ke ghahe kairini tuna neke ghua Zisas la taraina, ke kahe leghurirani neke kusu kaheriro lama. 40 Manei neke leghu laoni ka maneri neke la finiri ghu ke epudira maneri, vununa maneri dike malasa. Maneri deo heve dike avohina ta mala ke kahe laoina ka manei.

41 Ka ia ke leghu laona Zisas ka maneri, leghuna ia va litona fafata tarai, manei neke kahe ghua iahi, “?No epu maghoso ngama? !To fata! To dufu ia fafata ta meha mala namaha seboau ara ia Tuuna Noni, mala nai laoauna ka ira kamedi ira noni ta auri sasake. 42 !Tetu, aria dato ghahe ghu! !Fini, ia mane ta meha namaha seboau ara, tato dufu iahi ghatunaina!”

Zudasi Neke Vanadi Lao Zisas, Ira Ta Kana Ghini, Mala Sakomo Hioina

Matiu 26:47-56; Luku 22:47-53; Zone 18:1-11

43 Ka fafata neke kahe ghuao ianimu lama manei, neke to sabara ghu Zudasi, ia ta kaikeu ka ira tazoi palu mane ta nonofoi, taremehana ia leghahai varigharana noni ta posi leboto sisilufu mala magara, nia papakure, e ghua. Varigharana noni iahi mu neke varituhu ghu ka ira hiama ta kenu, ira ta vari va kakahe ghini ia vetula ta maduana ka God, nia ira keha mane babatu, e ghua. 44 Zudasi neke kusu va totonu vanadi ia va ghilaghila, ta mala riva ghini taghonai, kahe ghuana iahi: “Ia mane ta angohi ara lamu, mane ta kabai ghinina ghau. Sakomi o hio ghahe laoi ghu ka pekana ia kopu taghomu,” neke ghua ghidi.

45 Ka ia sabara laodi maneri, Zudasi neke ghahe vona lao ka Zisas. “!Mane Vari Va Kakahei Agho!” neke ghua ghini, ghe neke angohi nga. 46 Ianimu tuna ghe dike rauku laoi nga Zisas maneri, dike sakomi ghu. 47 Ka ianimu lama, neke to koroho kavei ghu ia nona leboto sisilufu mala magara, kaike mane ta nonofoi Zisas neke tetuno aianimu, neke salo kaini ghu ia talingana ia nona maneriva ia hiama pauna.

48 Zisas neke notohori, “?Heve, ara mu kaike mane ta muko puhigu, ghe no posi meha leboto sisilufu mala magara nia papakure no ghua nga mala sakomo hioauna? 49 Heve no ghua ghe noke deo nga sakomo hioauna ka ia giliona Sugana God? Ara nake au tamuno ma aianimu leleghu ravata vari va kakaheina. Ghe leghutau irahi mu e toraina mala dufu mamu mala va ghuduvudira heve ia ta kahei ka ira Kakangava Ta Maduana ghinaguna ara.”

50 Ka fafata ianimu, ira nona mane ta nonofoi dike pelo kaini haroharo. 51 Kaike mane foforu ta titivi poko lineni kakato, neke ghahe leghui haroma Zisas. Ka ia va sisiva sakomo va gimai maneri rekaha mane ini, 52 dike reku kakai tana ia nona poko lineni, neke to purudu sosole ghu pelonana.

Ia Nonohe Faghina Kamoto Ka Ira Ziu, Dike Fatei Zisas

Matiu 26:57-68; Luku 22:54-55,63-65; Zone 18:12,18,24

53 Maneri dike hio laoi Zisas ka ia sugana ia hiama pauna, ka dike au varighararo ira hiama ta kenu, ira keha mane babatu, nia ira ta vari va kakahe ghini ia vetula ta maduana ka God, e ghua. 54 Pita neke leghu mehari leghuni, nia haghele lao tuna ka ia tatalana ta babara ia hiama pauna, neke ghua. La nohe taremehadi tuna ira mane ta kopu, ge la farai nona ghu ka ia gheremena totoi, neke ghua.

55 Ira hiama ta kenu nia ia Nonohe Faghina kamoto ka ira Ziu e ghua, dike kabai va sisiva haduri keha muko ka Zisas, mala va lemeina, ghe neke deo ma heve dike boka fininina. 56 Tehi nonini di tetu vona dike turi ghini sebo ghu, ghe ira turi ka maneri deo gedi ke varifata ghu. 57 Va nonoghanana keha manera dike tetu vona dike turi ghini sebo ghu, kahe ghuana iahi: 58 “Ghai nake nomohi ta kahe ghuana iahi manei, ‘Ara a huara kaini ghatu ia Ringifota ta Maduana ka God neke riva ghini iahi noni, ghe ka giliona lito ravata mo, a ke va tetu vonai ghu ara kaikeuni, ia taka riva ghini ghu noni,’ neke ghua.” 59 Ne ghua mo ianimu ghe, dike deo gedi boka va varifatari ghu ira nodi turi.

60 Ianimu tuna ghe neke tetu vona nga ka kenudi ira keha mane ia hiama pauna, neke notohi ghu Zisas. “?Heve, e deoigho ungene tughu agho? ?To deoigho ungene tughu ma ka tehi turi ta va hoto ghinigho idi mane irahi?” 61 Ghe Zisas neke vanemoho ma neke au ghu deona kaike ngengene ta kahei ghu. Ianimu tuna ghe neke tetu vona nga ia hiama pauna neke notohi ghu Zisas, “?Agho lamu ghu mu ia Mesaea, ia Tuuna ia God ta helahela ghini ghai?”

62 “Ara lamu,” neke ghua Zisas. “Nia ghau e ghua, o age finiau ara ghatu, ia Tuuna Noni, ta nohena ka ia kame mautuna God ia ta toraina mana, nia la mehana ka ira toba ka kolangana fate, e ghua.”

63 Ia hiama pauna neke age hali neke rekui ghu ia nona poko kahe ghuana iahi, “E deo heini ta kabai ghinina ghita mala vanada turina! 64 Vununa ghau haroharo noto nomohi ta kaheina manei, taghonai mu e varifata ka God ta ghuana. ?Heve ghu mu lao hihingona ka ghau?” Maneri haroharo dike variveha ghini ta mala va lemeina Zisas.

65 Kehara ka maneri dike age tatanigai kamusi nia piha kaputuri ira nahalina Zisas, ghe dike dupai nga ia hihilina. “?Hei mu ne dupaighona, mane porofeti agho?” dike ghua ghini nga. Hioi tuna ira mane ta kopu, gedi tapali ghu, dike ghua.

Pita Neke Kahei, Ta Deona Ge Avohi Ghu Zisas

Matiu 26:69-75; Luku 22:55-62; Zone 18:15-18,25-27

66 Ka fafata ianimu, Pita neke au peka ka ia tatalana ta babara. Kaike ghu ka ira ghaseriva ia hiama pauna, 67 neke finini Pita faraina ka gheremena totoio. Fotati ini neke mato va gigima laoi ghe, neke kahei nga, “Agho haro lamu kaike ghu noke au taremehanao Zisas ia tanina Nazareti,” neke ghua ghini.

68 Ghe Pita neke kaheina, “Ara e deo ga avohi ghu, ba va fafahaki ghu, heve mo no turi ghinina agho,” neke ghua ungene tughuina. Ghahe lao tuna ka gheremena ia mala haghele, neke ghua. Ka fafata ianimu lama, neke to nakele ghu ia kokorako.

69 Ia ghaseriva neke fini laoio tetuna manei aianimu, neke tatanigai turi vanadi ira keha noni, “!Mane ianihi mu toraina kaike ghu ma ka maneri!” 70 Ghe Pita neke kaheini ta deona ge avohi ghu Zisas taghonai.

Birusuna fafata leghuna ianimu lama, dike to tataniga ngengene lao ghu ka Pita ira keha noni dike teturo aianimu, “Agho mu toraina kaike ghu mamu ka maneri, vununa agho mu taniu Galili,” dike ghua ghini.

71 Kahe ghua tuna iahi neke ghua Pita, “!Ara a va bebereana ta toraina hoghoguna! !Ara na va malumi God ta va vavahagalauna nato sesebo la ara! !Ara deo ga avohi ghu mane ta turi ghini iamu ghau!” neke ghua ghidi.

72 Selu laoi ma ianimu to va paluna fafata ghu nakelena ia kokorako. Ianimu tuna ghe neke ngana leghui nga Pita, heve neke va kahe ghinio Zisas, “Ghe ge va paluna fafata nga ta nakelena ia kokorako, agho o age kahei lito fafata, ta deona go avohoau ghu ara,” neke ghua ghinio. Nakele dudumana ghena tuna, neke ghua.