Mar 16 | KjiSC | STEP | Ka ia saighonana Sarere, ta nogha ia Ravata Mala Maghoso ka ira Ziu, Mere ia tanina Magidala, Salome, nia Mere ia nona uke Zemesi e ghua, dike la tabara bosoboru ta hurangi vevehana, mala la nakainina ka ia tinina Zisas.

Mark 16

Ia Tetuleghu Ka Zisas Ka Ia Leme

Matiu 28:1-8; Luku 24:1-9

1 Ka ia saighonana Sarere, ta nogha ia Ravata Mala Maghoso ka ira Ziu, Mere ia tanina Magidala, Salome, nia Mere ia nona uke Zemesi e ghua, dike la tabara bosoboru ta hurangi vevehana, mala la nakainina ka ia tinina Zisas. 2 Ka ia torai fufughona Sade ka ia vona mehana ia taunu, maneri dike lao ka ia lianga. 3 Ka ia fafata ghahe ta lao ghu, maneri dike nonogele ghini hei mo ta boka va pidu ghaheina ia ghahipa ka ia makatanana ia lianga.

4 Ghe ka ia la dufudi ta mato vona lao ghu, ia ghahipa ta faa leghaha, neke to kusu va pidu laoi ghereme mo. 5 Ka ia haghele laodi ka ia lianga, dike la finini kaike mane foforu ta va vona poko sodu ta ghiho, neke nohe visi mautu mo. Ira fotati dike puina age maughedi, 6 ghe ia engizeli neke va kahe ghidi ghua iahi, “Oka maughemu ghu,” neke ghua ghidi. “Ghau mu no hadui Zisas ia tanina Nazareti, dike tupila ghinio ka ia hekefalahata. !Manei e deo ge au ghu aiahi! !Manei mu neke to tetu leghu ka ia leme! O fini ba ghau, aiahi lamu dike va epuino ia tinina. 7 O la turi vanadi ghu nonomoho iahi ira nona mane ta nonofoi, sughavona ghu Pita: ‘Zisas e kusu kenu age mo ka ghau aianihi Galili. Aianimu ta la fininina ghau ghatu, taghe neke kusu va kahe ghini ghauo, ghe neke lemeo nga manei.’”

8 Ira fotati dike nanazara taremehana nodi fere fuludu, dike purudu kave ghu ghahe kainina ia lianga. To deo haro turidira ka hei noni, vununa dike to maughedi fuludu. ^{▼▼Ta kuru lighorona sughavonana ka ira sesepadi kakangava ka Giriki mu, e nogha ma ka papaguaina 8 ghu ka ia buka Maki, nga eka au lao ghu papaguaina 9-20. Ira noni ta puina avoho fikifokoi ia Baebolo mu, edi auri sopai ngangana ghini, heve di ghua ira sesepadi kakangava ka Maki ghe, ne nogha nga ka papaguaina 8 ghu, edi ghua. Nganganadira kehara mu, iahi lamu torai va nonoghanana buka ini, edi ghua. Va hohoghonana ka keharani mu, kaike leghutau neke va nodoina Maki, ghe neke deo nga ge va noghai ghu buka ini, edi ghua. Nganganadira kehara mu, ia kusu va nonoghana mu neke kakai, vununa ia sesepana buka ta vividuhu ka Giriki mu, haeba neke reku, ba muko. Neke ghua mamu ianimu ghe, dike nai haghele laori nga ira noni ta kangava va tehiri ira Baebolo sepaoni ira sopai kokolodi va nonoghadi, ta finiri maneri ka ira keha kakangava Giriki, malanana buka iahi. Palu va nonoghadi ta torai tongovonana mu ta kangavari irahi; ia va nonoghana ta ponoe nia ia va nonoghana ta sodu, e ghua.}

[Tuturi Iahi Peka Mu Ia Va Nonogha Ta Sodu Ka Maki]

Zisas Ne Podolo Ghidi Ira Nona Noni Ta Nonofoi

Luku 24:13-49; Zone 20:1-10

9 Ka ia torai fufughona Sade mu, neke tetu leghuna Zisas ka ia leme. Kusu noni neke fininina Zisas mu, Mere ia tanina Magidala ia fotati neke sukuio ira vitu nazahi, neke tavusu kairiro ghu Zisas. 10 Mere neke lao neke la finiri ghu ira noni dike nonofoio, nakele nia muko hihingo ghuadira. 11 Ghe ne la va kahe ghidi ghu manei neto ke doli leghu Zisas neke to finini haro ghu taghonai ta ghuana, maneri e deo ma gedi ke va hohoghonai ghu.

12 Leghunana, Zisas neke la podolo ghidi ira palu mane dike ghaghahe sipadiro Zerusalemu dike kave laoro ghu ka ia malau peghuruo, ghe e deo ma gedi ke fini avohi ghu ka ia tatanigaina, vununa manei neke to age holara ia hihilina. 13 Di age fini avohi ghu Zisas lamu ta ghuana, magali ma dito ke leghu la va kahe ghidi ghu ira keha noni ta nonofoi, ghe e deo ma hei ka maneri dike va hohoghonarira.

14 Leghuna iahi, ka ia fafata mahai varighara ta au ghu ira tazoi kaike mane ta nonofoi, Zisas neke la podolo ghidi. Manei neke buruari ka ira nganganadi ta va kioto maneri, vununa dike pake ghedi va hohoghonarira ira noni dike fininio manei, ka leghuna neke to tetuleghuo manei.

15 Ianimu tuna ghe neke va kahe ghidi nga, “O lao ka ira leghu malau nga ka malau iahi peka, o la tuturi ghini ghu ia Nonomoho Ta Veha ka ira noni haroharo hae ghe hae ghu. 16 Hei ia ta va hohoghona ta seselebeana ghu mu, ta age doli ghenana ghatu, nga hei ia ta pake ghena va hohoghonana mu, God e age va kilasi ghatu. 17 Heiri ira ta va hohoghona mu, e vanadi ia mana mala rivai hahaima: Maneri edi age tavusu kairi ira nazahi ka babaologu ini ara, nia edi age boka turi haroma ka ira keha ngengene haza ta foforu, e ghua. 18 Geta posi vona adogho, ba ketuhu ta huhungu ghu maneri ghe, e deo gedi boka age leme ghidi ghu. Maneri edi boka age posi va doliri haroma ira noni ta fogarari.”

Ia Vonaleghu Ka Zisas Ka Malauo God Fate

Luku 24:50-53; Ira Riva 1:9

19 Ne nogha ghu ia Lod Zisas turi taremehadina maneri, neke to hio vonai ma ka malauo God fate, neke la nohe ghu ka ia nonohe va vonavona ka ia kame mautuna God. 20 Ira mane ta nonofoi dike lao hae ghe hae ghu dike la tuturi beana ghu, au taremehadina ia Lod ka ia Tarunga Ta Maduana, neke va podoli ghu, ta hohoghonana ia nodi nonomoho ka ira hahaima dike riva ghidiro.