Mar 2 | KjiSC | STEP | Leghudi keha ravatara, Zisas neke leghu aianihi Kapaniumu. Ia nonomohona ia sabara ka manei, magali ma neke to ongaha ghu ka ia malau fafaana kamoto.

Mark 2

Zisas Neke Va Vehai Ia Mane Dolina Ta Leme Kamoto Ia Tinina

Matiu 9:1-8; Luku 5:17-26

1 Leghudi keha ravatara, Zisas neke leghu aianihi Kapaniumu. Ia nonomohona ia sabara ka manei, magali ma neke to ongaha ghu ka ia malau fafaana kamoto. 2 E deo ma ge sepa ghu, neto foudu ghu ka ira noni dike la meharo ia suga neke auo manei, deona hae ta kalasana ta boka ke haghelenani kaike noni ghu, geta ghua ghu ka ia peghuruna makatana ghe, neke to fouduai noni haroma. Ianimu tuna ghe, ne tuturi beana vanadi nga Zisas ghinina ia saorona God. ^{▼▼Fini ka Mk 1:15 va fafahakina ia nonomoho neke tuturi ghinio Zisas ka ira noni.} 3 Keha nonira dike sabara meha taremehadi rodana mane ta hurei ka ia natu kaike mane ta doli nga, ghe tato leme kamoto ia tinina. 4 Di deo boka fuludu laodira ka Zisas ka ira tehi noni, dike vona ghu ka ia rangana peghuru mo, ka ia fatena suga ta sare. Ianimu tuna ghe dike rivai korosa podolo nga ka ia kava kiriufu ka ia fatena suga fafatana fatena Zisas. Tokeni tuna gedi va hinaei ghu ia mane ta fogara, ka ia nona natu, ka ia torai kenuna Zisas, dike ghua. 5 Ka ia fafata finini manei ia va hohoghona ka mane irahi, Zisas neke kahei ka ia mane ta leme kamoto ia tinina, “Tuuguo, ira sasakeu nato kai hazari,” neke ghua ghini.

6 Ghe kehara ka ira mane ta vari va kakahe ghini ia vetula ta maduana ka God dike nohero aianimu, dike hadu ngangana ka giliodi ira hihingodi, dike kahe ghua ghu iahi, 7 “?Heve ne ghua mane iahi ghe ne kahe ghua nga iahi? !Torai hohoghona mamu ngaini, mane iahi mu lausasaba ghini mamu God, vununa manei ne ngengene taghe God mu taghonai, ne ghua! !E deo heini ta boka kai hazarira ira sasake, nga God lama!” dike ghua.

8 Zisas to avohi heve nganganadira maneri ka ira hihingodi, neke va kahe ghidi lao ghu, “?Heve no ghua ghau ghe, iahi mu ne lausasaba ghini God no ghua nga ka nganganamu nira? ^{▼▼God lama ta avohorira ira hihingodi ira noni. Fini 1 Samueli 16:7; Riva 1:24. Iahi mu ne age va podoli ia hohoghona, Zisas mu God ta ghuana.} 9 ?Heve mo ta nanamona ta kahe laoina ka mane ta leme kamoto ini ia tinina, ‘Ira sasakeu to kai hazari’ a ghua ba, ‘O tetu vona, hio vonai ghu nou natu nia, o ghaghahe ghu,’ a ghua ghini? 10 A va fini ghini ghau ghu ta kuruauna mana ara, ia Tuuna Noni, mala kai hazarira ira sasake ka malau iahi peka.” Fihiki lao tuna neke ghua Zisas, ka ia mane ta leme kamoto ia tinina, neke kahe ghua ghu iahi, 11 “!Tetu vona, o hioi ghu nou natu nia, o leghu gheu ghu ka sugauo!” neke ghua ghini.

12 Ia mane neke tetu vona, neke hioi ghu ia nona natu, ghe neke ghahe kave nga ka ira kenudi ira tehi noni. Ira noni dike puina nodi fere fuludu, dike helahela ghini ghu God kahe ghuana iahi, “!Ghai toraina deo ma ghe gake fani finiri ghu leghutau ta ghuara irahi sepao!” dike ghua.

Zisas Neke Fangai Matiu Mala Nona Mane Nonofoina

Matiu 9:9-13; Luku 5:27-32

13 Ianimu tuna ghe, neke leghu laoni nga Zisas ka ia tapuruna Lokana Galili, neke la va kakahe ghidi ghu ira tehi noni dike varighara lilohio manei. 14 Ka ia fafata ta ghaghahe ta lao ghu Zisas, manei neke fini fata laoi Livae, ia tuuna Alofiasi, nohe neke auna ghu ka ia nona suga mala riva, ta hio takisi ghu. “O meha, o nogu mane mala nonofoau ghu,” neke ghua ghini. Ianimu tuna ghe neke tetu vona nga Livae, neke la leghui ghu Zisas.

15 Leghudi iranimu, Zisas nia ira nona mane ta nonofoi, dike mahai va sasaighona ka ia sugana Livae. Ira tehi mane ta mala hio takisi, nia ira tehi noni ta kuru sasakedi e ghua, dike meha mahai taremehadi haroma. Tehi noni taghe irahi dike au haroma ka ira tehi noni dike leghuio Zisas. 16 Ghe ka fafata ianimu, kehara ka ira Farisi ta vari va kakahe ghini ia vetula ta maduana ka God, dike fini laoi manei ta mahai taremehadira noni iranimu, dike notohori ghu ira nona mane ta nonofoi, “?Heve ne ghua manei ghe, ne la mahai taremehadi nga ira ta hio takisi, nia ira noni ta kuru sasakedi, e ghua?”

17 Ka ia fafata nomohi Zisas iahi, manei neke va kahe ghidi taghe iahi, “Ira noni ta doli veha mu, edika kuhanai dokita ghu, nga ira ta fogarari lama. Ara mu aka meha ghidi mo ira noni ta lotoro, nga nake meha mala kudori ira noni ta kuru sasakedi, mala edi taghuru kairi ghu ira puhidi ta muko.”

Ia Vari Va Kakahei Ka Zisas Neke Huhari Ira Puhi Sepa Ka Ira Ziu

Matiu 9:14-17; Luku 5:33-39

18 Ira noni ta nonofoi Zone ia ta Rivai Seselebeana nia ira noni ta nonofori ira Farisi e ghua, dike filui mahai mala boka ngana hetaina maneri ghinina ia tarai. Kaike ravatao maneri dike meha ka Zisas, dike notohi ghu, “?Heve di ghua ira noni ta nonofoi Zone nia ira noni ta nonofori ira Farisi ghe, di filui mahai nga, nga ira noni ta nonofoigho agho mu, ta deo idi gedi filui mahai ghu?” dike ghua.

19 Zisas neke ungene tughuri, “?Heve, ira noni ta lao ka ia varihio mu, edi la filui mahai taremehana muko hihingo ka ia fafata mahai varighara taremehana ia mane ta mala varihio? Toraina deo. Maneri e deo boka la filui mahai taremehana muko hihingona ka ia fafata ta la au taremehana ia mane ta mala varihio. 20 Ghe kaike ravata ia mane ta mala varihio, edi age hio kai tadi mala va lemeina. Ka fafata ianimu ghe, gedi boka age filui mahai taremehana muko hihingo nga maneri.

21 “Iahi mu kaike va ghaghaoni. E deo hei ta boka hioina ia rekuna poko ta foforu, ta sikata laoina ghu ka ia poko ta sesepa. Vununa neto ghua la ianimu, ia rekuna poko foforu ta deo nga ge va karangoi ghu, e age koroho va ghiritini, e la reku kave ghu ka ia poko ta sesepa, va faa laoinani ia kusu rekuna. 22 Niala, e deo hei ta nai lao waeni foforunana ka ira giliodi kafudi gouti ta sesepa nia gagaheta, e ghua. Vununa neto ghua la ianimu, e age pote nia pohopo tuna ge oranga ghu ia waeni e ghua, va mukorira ira kafudi gouti. Nga ia waeni ta foforu mu, e nai laoi tudu ma ka ira kafudi gouti foforu ta mamaluse, ghe ge deo nga boka age pohopodira.”

Ira Farisi Dike Makuturi Ira Mane Ta Nonofoi Zisas Ta Huhughurira Ira Puhi Mala Leghuri Ghinina Ia Ravata Mala Maghoso Ka Ira Ziu

Matiu 12:1-8; Luku 6:1-5

23 Kaike Ravata Mala Maghoso ka ira Ziu, ka ia fafata la ghahe fuludu Zisas ka giliodi ira galahedi nunuma witi, ira nona noni ta nonofoi dike tataniga pisu kaveri ira heludi witi ta kuru fuadi. 24 Ira Farisi dike kahe ghua ghini iahi Zisas, “!Geala maneri edika riva ghini ghu iahi! E deo ge malumu ghu ka ia vetula, ta la habu hiorira ira fuadi witi, ka ia Ravata Mala Maghoso ira Ziu,” dike ghua ghini.

25 Ghe Zisas neke ungene tughuri, “?Deo ma goke izumi ghu ghau sepao ka giliodi ira Kakangava Ta Maduana, heve neke riva ghinio Deveti nia ira nona mane e ghua, ka ia fafata nodi liha? 26 Deveti neke la haghele ka ia sugana God, ka ia fafata neke hiama paunao Abiata, neke la mahaini ghu ia bereti fifiluana ta mala ghedi ma ira hiama, nia tufari haroma tuna ira nona mane, neke ghua. Ianimu e deo geke leghui haroma ghu ia vetula, ghe Deveti e deo geke zea ghu ka ia mato God.” 27 Ke va kahe vanadini tuna iahi neke ghua Zisas, “Ia Ravata Mala Maghoso mu neke va vuhai mala va vehadi ira noni, nga noni mu eka va vuhai mo mala leghurira ira puhi mala leghuri ka ia Ravata Mala Maghoso. 28 !Ara mu ia Tuuna Noni, e kuruau ghu mana ta mala vato ghinina heve ta boka riva ghinina ka ia Ravata Mala Maghoso!”