Mar 4 | KjiSC | STEP | Kaike fafatani, Zisas neke tatanigai vari va kakahei ka ia tapuruna Lokana Galili. Vununa ira tehi noni dike au ka tapuruna loka ani, neke la haghe ghu Zisas ka kaike koaka, ghe neke la nohe hinae nga, neke tuturi vanadi lao ghu.

Mark 4

Ia Ungene Talevarana Kaike Mane Ta Fusai Subu

Matiu 13:1-23; Luku 8:4-15

1 Kaike fafatani, Zisas neke tatanigai vari va kakahei ka ia tapuruna Lokana Galili. Vununa ira tehi noni dike au ka tapuruna loka ani, neke la haghe ghu Zisas ka kaike koaka, ghe neke la nohe hinae nga, neke tuturi vanadi lao ghu. 2 Ianimu tuna ghe, neke tataniga va kakahe ghidi nga Zisas ira noni, ghidi ira tehi ungene talevara, taghe iahi la:

3 “!O nonomoho meha! Kaike mane ponogara neke la numa ghidi keha subudi witira. 4 Ka ia fafata la fusa ghidi manei ka ia nona galahena kava ta mala numa witi, kehara dike zoghu ka ia hangana, dike meha ghu ira memeha dike mahairi haroharo ghu. 5 Keha subudira dike zoghu ka ia kava ta parimisi, ta puina ghahipai ia pekana. Ira witi magali ma dike kodolo ghu, vununa ia kava neke parimisi. 6 Ghe ka ia ngizalana ia taunu, ira witi dike to karango dike age leme ghu, vununa ira zagharadi dike deo ge haghele lao va veha ghu ka giliona ia kava ta ghahipai. 7 Keha subudira dike zoghu ka hoataidi ira rekahadi heke ta kekere dike kodolo vonaro dike age panauku kaputuri ghu nia deo tuna gedi ke fua ghu dike ghua. 8 Keha subudirani, dike zoghu ka ia kava ta veha, dike seseghara kodolo vona ghu nia fua tuna dike ghua. Ira pighadi maneri, keha fafatara dike litofulu fuadi ka kaike witi, keha fafatara dike onomo ngavulu fuadi, nia keharani mu, dike dufu ka kaike ghobi fuadi, e ghua.” 9 Ianimu tuna ghe neke kahe ghua nga iahi Zisas, “!Heiri ira ta au talingadi mala nonomoho, ta kabai va fafahaka ghu, maneri geala edi nonomoho va veha meha ghu ka ara!”

Zisas Neke Va Fafahaka Vanadi Ira Nona Noni Ta Nonofoi Lama, Ghidi Ira Ungene Talevara, Nga Eka Ghua Ghu Ka Ira Tehi Noni Peghuruo

10 Leghuna iahi, ka ia fafata au kakaikena Zisas taremehadi ira tazoi palu mane ta nonofoi nia keharani ka dike varighararo e ghua, maneri dike fangai Zisas ta va fafahaka vanadira ira ungene talevara.

11 Turi vanadi tuna neke ghua manei, “Sepao God e deo geke va fafahaka va hokoti ghu, ghini heve e ghua age kopu ghidira manei ira nona noni ghatu, nga ghatunaina mu God neto va podoli ka ghau. Nga ka heiri ira ta au peghuruna ia kopu ka manei mu, ara na turi vanadi leghu irahi nga ka ia ungene talevara, 12 e mala age ghorevura ghu ira Kakangava Ta Maduana, mala:
“‘Maneri edi finiri tudu ghu heve ta riva ghidira ara,
ghe e deo kalasu kai gedi boka va fafahakari ghu.
Maneri edi nomohori tudu ghu ira ngengenegu,
ghe e deo kalasu kai gedi va fafahaki ghu nogu nonomoho ini.
Vununa gedi ke ghua la, maneri geala edi taghuru kairi ira sasakedi edi fihiki lao ghu ka God,
nia God tuna ge kai hazari ghu ira sasakedi maneri e ghua.’” ^{▼▼Aesaea 6:9, 10}

13 Ianimu tuna ghe neke va kahe ghidi nga Zisas ira ta nonofoi, “?Noto deo la go va fafahaki ghu ungene talevara iahi, e deo haroma ka ira keha? 14 Heve neke fusa ghidiro ia mane ponogara mu ia torai saorona God. 15 Ira subudi dike zoghuro ka ia hangana mu, ghidi ira noni ta nomohio ia saorona God, ghe Satana ne magali ma ne meha hio kai tadi ghu. 16 Ira subudi dike zoghuro ka ia kava ta ghahipai mu, ghidi ira noni ta va manemane nomohina ia saorona God ta magali hioi ghu. 17 Ghe di deo zagharadi deo ghu gedi doli soduai ghu. Vununa maneri di va hohoghonai ia saorona God, e la dufu meha ghu ka maneri ira mamarutana nia ira vari ngovala. Ianimu la ghe di kave kaini nga maneri ia va hohoghona. 18 Ira subudi dike zoghuro ka hoataidi ira rekahadi heke ta kekere mu, ghidi ira keha noni ta nomohi ia saorona God. 19 Ghe ka ia age ngare ghidi ira ta kabai ghidi ka doli iahi, ta gogosu ghini ghu ia hagalai taghotagho, nia ia kuhana ghini kururira vahina kokolodi leghutau nga e ghua, neto age panauku kaputu va lemei ghu ia saorona God, deona gedi boka fua ghu. 20 Nga ira keha noni mu taghe ira subudi dike zoghuro ka ia kava ta veha, edi ghua. Maneri mu taghe ghidi heiri ira ta nomohi nia ta va hohoghonai ia saorona God, ta pigha ghu ira fuadi. Kehara edi litofulu fuadi ka kaike witi, kehara edi onomo ngavulu fuadi, nia keharani mu edi dufu ka kaike ghobi fuadi, e ghua.”

Zisas Neke Kahe Ghidi Ira Noni, Ta Banabanana, Edi Nonomoho Va Veha Ghu Ka Taghonai

Luku 8:16-18

21 Ianimu tuna ghe neke notohori nga Zisas ira noni ta varighara, “?Heiri mu ta fani va dolinina ia zuta, ghe ta va rokomo ghini togilaina nga, ba ta nainina nga ka ia pekana vavage ta mala kaputina ghu ia fegalana? !Toraina deo! Ia zuta mu e va nohei tudu ma ka ia fatena mala nonohena, ghe ge pelara kave nga ia fegalana. 22 Taghe iala molamo e ghua, a va podolo kaveri ghu ara vahina leghutau nga dike deoro geke kahe va hokotori ghu sepao, ghinina ia Ravutu ka God. 23 !Heiri ira ta au talingadi mala nonomoho, ta kabai va fafahaka ghu, maneri geala edi nonomoho va veha meha ghu ka ara!”

24 “O hadu ghidi ngangana va veha ghu heve ta nomoho mehari nira ka ara. Taghe noto va melongo va veha nia leghuri noto ghua la ta va kakahe ghini ghau idi ara, God e vanamu ia toka ta mala avohi ghau ghinina ia nona Ravutu. !Uve, God e torai vanamu tehi avoavohoni! 25 Ka heiri ira ta tobehe ka nogu vari va kakahe idi, tehini avoavoho ta vanadina. Nga ka ira taka nonomoho ghu mu, geta ghua ghu ira birusudi teri ta auri ghe, God e ke hio kai tadi.”

God Neke Va Ongahi Ia Nona Ravutu, Taghe Ira Subudi Witi La, Ta Fusa Ghidi Ta Kodolo Ghu

26 Zisas neke kahe ghua molamo iahi ka ira noni ta varighara, “Iahini kaike totoghale. Taghe iahi e ghua mu ia Ravutu ka God. Kaike mane ponogara neke fusa ghidi keha subudi witi ka kaike galahena kava. 27 Ka ira redu nia ravata ta epu, ba baghunu manei, ira subudi di kodolo vona geta deo ghu manei va fafahakina, heve di ghua kodolodira maneri. 28 Ghe ia kava mo mu ne va kodolo va faa vonarira ira subudi witi di age fuana ghu maneri. 29 Ka ia tato ghano ira witi ghe, ne meha nga ia mane ponogara, ne meha kodaka hiori ghu ka ia nona leboto ta peleku.”

Ia Ravutu Ka God Mu, E Ongaha Taghe Ia Subuna Masitadi Ta Ite Ta Kodolo Ta Vuhai Age Faa Ghu

Matiu 13:31-35

30 Notohori tuna neke ghua Zisas ira noni ta varighara, “?Heve a ghua ara va fafahakina ia Ravutu ka God, ba heve ungene talevara mo ta boka turi vanamuna, ta mala va fata ghini laona ghu. 31 Ia Ravutu ka God mu taghe ia subuna masitadi ta rekahana tei, e ghua. Ia subuna masitadi mu kaike ghu ka ira subudi ta torai ite fuludu, 32 ghe ka ia leghuna numa ghini agho ta age kodolo ghu manei, e age faa fuludu laori ira leghu heve ta kodolo ari nga ka nunumana. Manei e tehi ira hobona ta sodu, ta boka mala meha ira memeha, ta meha rivai sugadi ghu, ka kakapona heke masitadi ani.”

33 Zisas neke tuturi ghidi tehi ungene talevarani taghe iahi, ta mala turi vanadina ira noni, edi boka va fafahaki ghu maneri ghinina ia Ravutu ka God. 34 Taghe ka ira vari va kakahei manei peghuruo mu, manei neke suna va kakahe ghidi ma ka ira ungene talevara. Ghe leghuna ka ia ta ke au kakaike taremehadi manei ira nona ta nonofoi taghona, ghe neke va kahe ghidi nga fafahakadira ira leghu ungene talevara nga.

Zisas Ne Va Bulei Ia Tapaoho Ka Ia Lokana Galili

Matiu 8:23-27; Luku 8:22-25

35 Ka ia saighona mehana, Zisas neke va kahe ghidi ira nona mane ta nonofoi, “Aria, da kadolo age ghu visi fateo mo ka keha pelonani mo.” 36 Manei neke kusu au mo ka ia koaka, dito kave lao ma ghu ghahe kairira ira tehi noni leghu. Ghe keha koakara dike leghu laori molamo. 37 E deo ma sepana neto la meha ghu ia tapaoho ta mamaghuana. Ira leghahai oloꞌolobaghe dike to tatanigai posa haghele ka ia giliona koaka, neke to namo foudui kolo ghu manei.

38 Ghe Zisas mu neke epu ghena ka leghuna koaka ani, ka ia vavahelu. Maneri dike puina maughedi, dike kudo va baghuni ghu Zisas, “?Mane Vari Va Kakahei Agho, e deo ghe hagala nga la mo ta ghuana agho, tato namo lomoho ini ghita?” dike ghua ghini.

39 Ka ia baghunu vonana, manei neke buruai ia dafe nia kahe ghua tuna iahi ka ira oloꞌolobaghe, neke ghua, “!O bule hinae!” Magali ma neke nodo ghu ia dafe, neke au ghu ia leghahaina bule. 40 Ianimu tuna ghe neke notohori nga manei, “?Ne heve ghe no puina maughemu nga? ?E deo ngama ghau go va hohoghona ghu ka ara?” neke ghua ghidi.

41 Maneri dike puina maughedi fuludu, dike vari nonotoho ghu taghodi, “?Mane hevena mamu baini mane iahi, ia dafe nia ira oloꞌolobaghena ghe, ta nomohini manei?” dike ghua.