Mar 5 | KjiSC | STEP | Ianimu tuna ghe, dike sabara lao nga Zisas nia ira nona mane ta nonofoi e ghua, visi fateo mo ka ia keha pelona Lokana Galili, ka ia horina Gerasa.

Mark 5

Zisas Ne Tavusu Kai Laori Ira Nazahi Ka Ira Vadu

Matiu 8:28-34; Luku 8:26-39

1 Ianimu tuna ghe, dike sabara lao nga Zisas nia ira nona mane ta nonofoi e ghua, visi fateo mo ka ia keha pelona Lokana Galili, ka ia horina Gerasa. ^{▼▼Keha kakangavaraGadara; Keha kakangavaraGagasa} 2 Ka ia fata zoghu hinaena Zisas ka ia koaka, ia mane ta sukui tehi tarunga ta muko neke la purudu kave meha ka ira lianga mala nai noni ta leme, ghe neke la meha nga ka manei. 3 Mane iahi mu neke au ka lianga iranimu, e deo ghu hei neke boka piliga va gimaina, geta ghua ghu ka ira seni. 4 Maneri dike fani piliga va gimai ka ira seni nia ka ira aeana mala posi va gigima. Ghe taghe ta fani ghua lama, manei e ke soni ukuhuri mo ira seni, nia va birakari ira aeana mala va gigima ka ira kamena ghahena, e ghua. E deo hei noni neke gigima fuludu laona, neke boka va au tokeina manei. 5 Leleghu redu ravata, manei neke suku sasalapari ira lianga nia ira voruhu e ghua, ghe ge azili akeake nga, va bakobakoraina taghonai ka ira ghahipa.

6 Ghe ka ia fini laoi Zisas manei varihau, manei neke purudu lao neke la riufu maimanihi hinae ghu ka kenuna Zisas. 7 Manei neke azili ghe neke kudo nga, “?Zisas, agho ia Tuuna God ta Varanga Sughavona, heve no kabai va riva ghinaguna ara? !Ara na torai fangaigho ka ia babaolona God, taka va vavahagalauna ghu!” 8 Ghe neke kahe ghua nga iahi ia tarunga ta muko mu, vununa Zisas neke kusu va kahe ghini manei, “O kave kaini mane iahi agho ia tarunga ta muko,” neke ghua ghini.

9 Notohi tuna neke ghua Zisas, “?Hei mu babaolouna agho?”

Ianimu tuna ghe neke ungene tughu nga ia nazahi, va kahe ghinina Zisas, “Babaologuna ara mu Ia Punugara Mane Magara, vununa ghai tehini ta auna ka giliona mane iahi.” 10 Ira tarunga ta muko di fanga va gigimai ghu Zisas, taka va ghahe varihau laorira ghu ka ira keha malau. 11 Neke au molamo ka fafata ianimu, kaike leghahaina hoghara totopa vadu dike hukiti mahai ghediro ka ia tabafena voruhu. 12 Ira nazahi dike papadi Zisas, “O va haghele ghai lao ka giliodi vadu iranihi,” dike ghua ghini. 13 Zisas neke va malumu kaveri dike la haghele ghu ira tarunga ta muko ka ira vadu. Ia kamotona hoghara totopa vadu, fatana palu togha varigharadira, dike rurutu hinae ka ia pegu ta didighili, dike la zoghu ghu ka ia loka, la lomohodira.

14 Ira mane ta kopunai vadu dike pelo purudu lao ka ia malau leghaha nia ka ira keha rekahadi malau peghuruo ta namo lao, dike la va ongahi ghu ia nonomoho. Ira tehi noni dike rurutu lao aianimu, mala boka la fifini nodina taghodi ka heve leghutau neke riva ghinio Zisas. 15 Ira noni dike magali ma dike meha varighara lilohi ghu Zisas, dike fini laoi ghu ia mane neke sukuio ira nazahi. Manei neke nohe aianimu poko nona va veveha nia toke toraina lotorona ira nganganana e ghua, dike maughedi fuludu ghu maneri haroharo. 16 Heiri dike fini hibadiro ka heve neke dufuno ka ia mane neke sukuio nazahi, dike lao dike la turi vanadi ghu ira keha noni, ghinina ia mane nia ira vadu, e ghua. 17 Ira noni, dike papadi Zisas ta ghahe kainina ia nodi hori tataladi.

18 Ka ia fafata ke va tanai leghuna Zisas ka ia koaka, ia mane neke sukuio tehi nazahini, neke papadi molamo Zisas ta mala leghuina. 19 Ghe Zisas neke va kahe ghini, “E deo, agho o ke sura ka ira noni taghou, o la va kahe ghidi ghu heve leghutau ta namanama ta va riva ghinigho ini ia Lod, nia ia dudumana neto ke vananighono, e ghua.” 20 Ianimu tuna ghe neke ghahe kaini nga Zisas mane iahi, neke lao ghu ka ira Tazo Malau Fafaadi ka hori ianimu, neke la tataniga turi vanadi ghu ira tehi noni, ghidi ira leghutau leghaha neke va riva ghinio Zisas. Ira noni haroharo dike nomohio, dike nodi fere fuludu ka heve neke turi vanadiro manei.

Zisas Neke Va Vehai Ia Fotati Ta Dufui Kolotibo, Nia Va Doli Leghui Ia Tuuna Ghase Zaerusi Ka Ia Leme, E Ghua

Matiu 9:18-26; Luku 8:41-56

21 Ka ia ke kadolo leghu laodi visi pakao mo ka ia keha pelona Lokana Galili, Zisas nia ira nona mane ta nonofoi, ira tehi noni dike la varighara lilohi manei ka gheremena loka ani. ^{▼▼Ka ia ke leghu lao Zisas nia ira nona noni ta nonofoi e ghua, ka ia keha pelona Loka Galili visi pakao mo, haeba dike leghu lao ani Kapaniumu nia ka ia kobosona liloho gheremena mo, e ghua.} 22 Zaerusi, ia mane babatu ka ia suga mala varighara ira Ziu, neke meha riufu maimanihi hinae ka kenuna Zisas, 23 neke fangai ghu, “Ia tuugu ghase neto namo leme ghena, o meha posini ghu agho e ke doli ghena ghu,” neke ghua ghini.

24 Leghui tuna Zaerusi neke ghua Zisas, dike ghahe vai lao ghu ka ia sugana manei. Ira noni dike ghahe leghuio dike tehi fuludu dike izui ghu maneri Zisas. 25 Ghe kaike fotati ta dufui fogara kolotibo giliona tazoi palu komuhu, neke holara haro molamo. 26 Fotati iahi mu neke toraina vavahagala ghena fuludu ka ira tehi komuhu dike kopuro ira tehi dokita, neke tabarariro ghu manei ka ira nona rongo va nonoghadi, ghe deo ma geke age veha ghu, nga ia fogara neke age faa fuludu laoni. 27 Vununa manei neke nomohi ia tuturina Zisas, neke vona lao ghu leghuna mo ka vari hoataidi ira tehi noni, ne la posini ghu ia va kukuruna ia nona poko sodu ta va peghuri manei. 28 Ka ia nganganana manei neke ghua iahi, “Ga posi laoi lama ara pokonari, ara ato ke age veha ghegu ma,” neke ghua. 29 Magali ma neke to age nodo ghu ia kolotibo ka manei. !Ianimu tuna ghe neke torai va ghilaghilai nga manei toke age veha ghena ka ia vavahagala neke dufuio, ta ghuana!

30 Selu laoi ma ianimu, neke to avohi ghu Zisas ta kavena mana ka taghonai, neke fihiki leghu ghu ka ira noni, neke notohori ghu, “?Hei mo neke posirina nogu poko idi?” neke ghua ghidi.

31 Kahe ghua tuna iahi dike ghua ira nona mane ta nonofoi, “Tehi noni ko ta varighara ghinigho idi agho. ?Heve no ghua ghe no kahei nga agho, ‘?Hei mo neke posiauna?’ no ghua nga.”

32 Ghe Zisas neke soni fihiki leghu mo neke hadui ghu hei mo neke posinina. 33 Ghe fotati iahi neke avohi heve neke to dufuna ka taghonai neke nanazara taremehana maughena ghu, neke la meha torongaghituturu ghu ka kenuna Zisas, ghe neke turi vanani lao nga ira leghu hohoghodi nga. 34 Va kahe ghini tuna neke ghua Zisas, “Tuugu ghaseo, ia nou va hohoghona taghou ne to va vehaighona. Ghahe gheu ghu ka ia bule. Agho mu to veha gheu,” neke ghua ghini.

35 Ne turi vanani ngama fotati ini Zisas, dito la meha ghu keha noni ta hio nonomohora, sipadi ka ia suga Zaerusi ia mane ta babatu ka ia suga mala varighara ira Ziu. “Ia tuu ghase to leme ghena. Oka va rugusini la ghu Mane Vari Va Kakahei nia,” dike ghua ghini.

36 Ghe Zisas deo ge va ghunaghuna laori ghu nodi turi ari, neke turi vanani lao ghu Zaerusi, “Oka maugheu ghu. Nga o va hohoghona ma ka ara.” 37 Ianimu tuna ghe neke va nodori nga Zisas ira tehi noni, taka leghuina ghu taghona, nga Pita nia ira palu tatahina Zemesi ghe Zone, e ghua lama. 38 Ka ia la dufudi ka ia sugana Zaerusi, maneri dike la finiri ira noni nakele beana va fafaadira. 39 Haghele lao tuna Zisas ge la notohori ghu ne ghua, “?Heve mo mu leghu ngilingoele nga nia nakele irahi nga ka ghau? Rekaha iahi mu e deo ma ge leme ghu, nga ne suna epu ghena ma,” neke ghua ghidi.

40 Ira tehi noni dike paghoi, ghe manei neke va kahe ghidi haroharo ta kave laona peghuru mo. Ianimu tuna ghe neke hiori nga nona mama ghe nona uke nia ira lito mane ta nonofoi e ghua, dike haghele lao ghu ka ringifota ta au ani ia rekaha ghase. 41 Manei neke posini ia kamena ghe, neke ngengene lao nga ka manei ka ia ungene Erameiki, “!Talita kum!” fafahakanana mu, “!Tetu vona goi!” e ghua. ^{▼▼Maki lama, ka ira rodana Nonomoho Ta Veha ka ia Baebolo, neke kangavarira ira ngengenena Zisas ka Erameiki, neke va kahe ghinio ia rekaha ghase neke lemeo. Irahi mu eka ngengene basa ghu, nga ira ngengene ta fani ngengene ghidi tudu lama Zisas ka ia ungene Erameiki. Haeba Zisas, nia ira nona mane ta nonofoi e ghua, edi fani ngengene bana ka Hiburu nia Giriki, e ghua.} 42 Magali ma neke tetu vona ghu ghahe lao mehana ia rekaha ghase ta tazoi palu komuhuna. Ka iahi dito age nodi fere fuludu ghu maneri. 43 Zisas neke kahe ghidi va gigima maneri, taka turina ghu ka hei noni ghinina iahi, nga neke va kahe ghidi ma ta valihai ghenana.