Mar 6 | KjiSC | STEP | Zisas neke kave kaini malau ianimu taremehadi ira nona mane ta nonofoi, neke leghu lao ghu aianihi Nazareti ka ia torai malauna.

Mark 6

Ira Nonidi Nazareti Dike Sokei Zisas

Matiu 13:53-58

1 Zisas neke kave kaini malau ianimu taremehadi ira nona mane ta nonofoi, neke leghu lao ghu aianihi Nazareti ka ia torai malauna. ^{▼▼Zisas nia ira nona mane nonofoi e ghua, haeba dike kave kaini ia malau leghaha Kapaniumu, ba ka ia kobosona gheremena mo aianimu, ta ghuara e ghua. Taghe aiahi lamu ne ghua neke auna ia suga ka Zaerusi. (Maki 5:21).} 2 Ka ia keha Ravata Mala Maghoso ira Ziu, manei neke tataniga vari va kakahe ghini ia saorona God, ka ia suga mala varighara ira Ziu. ^{▼▼Iahi lama mu va nonoghana fafata ne kaheina Maki, ghinina ia vari va kakahei ka Zisas, ka ia suga mala varighara ira Ziu.} Ira tehi noni dike nonomohoro dike nodi fere dike vari nonotoho ghu, “?Hae mo neke hiorira manei leghu avoavoho irahi nga nia mana nga mala riva ghidira hahaima irahi?” dike ghua. 3 “Mane iahi mu ia ta avohoa ghini ia rivana suga lama, ia tuuna Mere. Tahina manera ghu manei mu Zemesi, Zosepu, Zudasi nia Saemoni e ghua. Tahina ghasera tuna ta au tada irahi ma ghita, e ghua.” dike ghua dike sokei ghu, pake ghedina va hohoghonaina.

4 Va kahe ghidi tuna neke ghua Zisas, “Ia mane porofeti mu edi heluhelu ghini hae ghe hae ghu, nga eka ghua ghu ka ira noni ka ia torai malauna, nia ka ira taremehana, nia ka ia sugana, e ghua.” 5 Vununa maneri dike deori va hohoghona ka Zisas, neke deo ghu boka riva ghidira manei keha leghahai hahaimara aianimu, nga neke posiri ma keha noni teri ta fogarari, neke va vehari ghedi ghu. 6 Neke nona fere ghu Zisas, ta deorina va hohoghona maneri ka taghona.

Zisas Neke Tuhu Kaveri Ira Tazoi Palu Nona Mane Nonomoho, Mala Va Ongahina Ka Ira Noni, Ia Ravutu Ka God

Matiu 10:1-42; Luku 9:1-6

Ianimu tuna ghe neke kave lao nga Zisas ka ira rekahadi malau ta au liloho, neke la vari va kakahei ghu. 7 Ke kudo varighara ghidi tuna ira tazoi palu nona mane ta nonofoi, ge va ghahe palupaluri ghu taremehana vanadi mana mala tavusu kairira ira tarunga ta muko, neke ghua. 8 Manei neke va kahe ghidi taka hioina ghu kaike leghutau ghu, nga edi sopa kaike totongono ma, deo ia beoi mahai, deo ia mogoha nanapisi nia deo ia rongo, e ghua. 9 Manei neke va kahe ghidi haro ta va vona sadolona nia taka hio va paluna sotena ghu, e ghua. 10 “Noto la haghele la ghau ka kaike malau, o la au ma ka kaike suga mo o vuhai ke ghahe ghu,” neke ghua ghidi. 11 “Nga rekahana malau neto deo la gedi hio namaha ghau ghu, ba nomoho ghau ghu, o vuvusu kai hinaeri sotadi ghahemu nira ka ia kave kainimu, taghe mala va fini ghidina ta age va kilasarira ghatu God, dito deo la gedi taghuru kairi ghu ira muko ka maneri.”

12 Ianimu tuna ghe dike kave lao nga ira mane nonomoho, dike la va kahe ghidi ghu ira noni haroharo dike dufuriro, ta mala taghuru kairira ira sasakedi. 13 Maneri dike la tavusu kairi ghu tehi nazahi nia dike la va vehari tehi noni ta fogarari e ghua, va oranga ghidi oelena olivina.

Herodi Neke Kodaka Kaini Ia Pauna Zone Ia Ta Rivai Sesele Beana

Matiu 14:1; Luku 9:7-9

14 Herodi Anitipasi ia mane ginitaukela, neke nomohi molamo ia tuturina Zisas, vununa ira noni hae ghe hae ghu, dike turi ghini ma manei. Kehara dike kaheina mu, “Ge ghua la Zone Ia Ta Rivai Seselebeana ngama ini, geto ke doli leghu ghu ka ia leme. Ne ghua mamu ghe, ne boka riva ghidi nga kokolodi hahaima ta ghuara irahi,” dike ghua. 15 Nganganadira kehara mu, “Zisas mu Ilaiza, ia porofeti,” dike ghua. Nga nganganadira keharani mu, “Manei mu kaike ghu ka ira keha porofeti leghaha sepao”, dike ghua ghini. 16 Ne nomohori ghu Herodi leghutau irahi, manei neke kahe ghua iahi, “Zone, ia mane nake kodaka kainio ara ia pauna, neto ke doli leghu ka ia leme,” neke ghua. 17 Vununa sepao, Herodi neke to tuhu va ghahe laori keha mane magara mala la sakomo hioina Zone, ta piligaina ghu, nia nai hagheli tuna ka pipiliga neke ghua, leghuina ia lao hihingo ka Herodiasi. Fotati iahi mu keranau Filipi ia tahina mane Herodi, ghe Herodi neke soni varihio mo ka manei. 18 Zone neke va kahe ghini tudu ma Herodi taghe iahi, “E deo ge lotoro ghu ka ia vetula, ta hioina agho ia keranau tahiu mane nia,” e fani ghua ghini. 19 Herodiasi neke puina hali fuludu, neke kabai ghini ghu ta atungina Zone taghe raghe leghunana ianimu, ghe manei neke deoi mana, ka ia ta deo ge va malumi ghu Herodi. 20 Ghe Herodi mu neke heluhelu ghini Zone, neke kagara kaputi ghu, vununa manei neke avohi Zone mu kaike mane ta lotoro nia beana, e ghua. Herodi e fani faa vanani ngangana e pisipasa ghu ka fafata ke nonogele ta ghua idi maneri palu Zone. Geta ghua mo ianimu ghe, manei neke kabai nonomoho ngama ka Zone.

21 Va nonoghanana neke to dufu tuna ia fafata ta veha ka Herodiasi mala atungina Zone. Ka ia ngana leghuna ia ravata dolina Herodi, Herodi neke vanadi kaike mahai varighara ira nona maneriva ta au ka ira papala ta vona nia ira mane magara ta posi papala ta vona ka ia punugara, nia ira mane babatudi Galili e ghua. 22 Meha tuna ia tuunaghase Herodiasi, babaolonana Herodiasi molamo, ge meha riva ghini ghu kaike ragi ta puina veha vanani fuludu Herodi nia ira mane neke fangariro mala la mahai taremehanana, neke ghua. Ia mane ginitaukela neke kahe ghua ghu iahi ka ia rekaha ghase, “Heve leghutau ta kabai ghinina agho, o fangau a vananigho ghu ara,” neke ghua ghini. 23 “!Ara a vananigho heve ta fangaina agho, geta ghua ghu fotana, ka ira leghu ta taghori nga ara!” neke ghua naiungene taremehana va bebereanana Herodi.

24 Kave lao tuna neke ghua ia rekaha ghase neke la notohi ghu nona uke, “?Geala heve mo ta fangaina ara uke?” neke ghua ghini.

“!O la fanga mehai ia pauna Zone Ia Ta Rivai Seselebeana!” neke ghua ghu nona uke.

25 Magali ma neto ke leghu lao ghu rekaha ghase ini, neke la fanga va gigimai ghu ia mane ginitaukela, “!Na kabai ghini ghatunaina lama ta va fara mehaina ka kaike leghahai peleita, ia pauna Zone Ia Ta Rivai Seselebeana!” neke la ghua.

26 Ia mane ginitaukela neke age puina muko hihingona, ghe vununa ka ia va bebereana neke riva ghinio manei ka kenudi ira mane neke kudo mehariro neke deo ghu boka ke hio kainina ia fanga ka ia rekaha ghase. 27 Ka fafata ianimu lama neke to tuhu laoi ghu ia ghonona mane magara mala vari atungu ka ia suga pipiliga, ta la kodakina ia pauna Zone, ta hio mehaina ghu ka taghonai. Lao tuna neke ghua ia mane magara neke la kodaki ghu ia pauna Zone ka ia suga pipiliga, 28 neke la hio mehai ghu ka ia leghahai peleita. La vanani tuna ia rekaha ghase, ge hio laoi ghu ka nona uke, neke ghua. 29 Ira nona noni ta nonofoi Zone, di nomohi ghu heve neke dufuina Zone, dike lao dike la hioi ghu ia tinina, dike la gilu ghini ghu ka kaike lianga.

E Fuludi Gaha Togha Noni Neke Valiharira Zisas

Matiu 14:13-21; Luku 9:10-17; Zone 6:1-13

30 Ira mane nonomoho dike leghu meha ka Zisas leghuna ia ghahe rivadi, dike va kahe ghini ghu heve dike la riva ghidira nia heve dike la vari va kakahe ghidira ka ira noni. 31 Kahe ghua tuna iahi neke ghua Zisas, “Dake ghahe kairina varigharadi noni irahi, da age ghu ka kaike malau ghouna birusuna fafata tei, dake maghoso lao ghu.” Ka fafata ianimu, dike tehi fuludu ira noni ke meha nia ke ghahe, dike ghuaro, to deori ghu ghe fafata, ta mala mahai ghedira. 32 Maneri dike haghe kave lao ghu ka kaike koaka, laona ka kaike malau ghouna, ta boka la au kakaike. 33 Ghe tehi nonini ka ira leghu malau fafaadi nga dike finiriro ghahedira maneri dike fini avohori, dike purudu kenu lao ghu kusu la sabarana aianimu. 34 Ne zoghu hinae ghu Zisas ka ia koaka, manei neke finini kaike leghahai varigharana noni, neke puina dudumana ghidi ghena ghu, vununa taghe ira sipisipi ta deo hei ta babatu ghidira dike ghua. Ianimu tuna ghe, neke tatanigai va kakahe ghidi nga tehi leghutauni.

35 Ka ia tato namo saighona ka ravata ianimu, ira nona mane ta nonofoi dike meha ka Zisas dike kahe ghua ghu iahi, “Aiahi mu malau ghouna nia to vai age saighona, e ghua. 36 Tuhu ghaherina nga bana agho tehi noni irahi, edi boka lao ghu ka ira rekahadi malau ta nanamo, la tatabara ghedi mahaina taghodi,” dike ghua ghini.

37 “Ghau o vanadi keha ghano mala mahai ghedina,” neke ghua ghidi Zisas.

“?A va valiha ghidi heve ghu ghai, no ghua?” dike ghua ghini. “!Tabarana kaike mane ka hana hihile ghe, ge boka fata nga koini! ?No kabai ghini ghai ta la kairira taghe faana rongo ianimu ka bereti, mala valiharira? Torai deo bokana.”

38 “?Niha bereti tetepele di aura ka ghau? O lao o la hadu kavei ghu,” neke ghua Zisas.

Di la hadu kavei ghu, dike leghu lao dike la kahe ghua ghu iahi, “Ghai nato hiori gaha bereti tetepele nia palu namari hetadi,” dike la ghua ghini. 39 Ianimu tuna ghe neke va kahe ghidi nga Zisas ira nona mane ta nonofoi, ta va kahe ghidira ira noni, ta nohena maneri ka sopai pukudi ka ira sesehu ta dodoli. 40 Nohe tuna maneri ka ira sopai pukudi ta gahafulu nia ta kaike ghobi, dike ghua.

41 Zisas neke hiori ira gaha bereti nia ira palu namari hetadi, ghe neke mato vona nga ka kolangana fate, neke kudo vehai ghu God. Manei neke kipekiperi ira bereti, ghe neke kadolo ngama tuna manei vanadi laona ira nona mane ta nonofoi, va ghaheina ia tufa ka ira noni haroharo. Manei neke tufari molamo ira palu namari hetadi ka maneri haroharo. 42 Maneri haroharo dike mahai dike toraina hoviri ghu. 43 Ianimu tuna ghe dike sene va fouduri nga tazoi palu leghahai maka ira mane ta nonofoi, ka ira kipedi dike kunuro ka ira bereti nia namari hetadi, e ghua. 44 !Gaha togha mane ka ia varigharana noni dike holara mahaira ka gaha bereti tetepele iranimu!

Zisas Neke Ghaghahe Ka Ia Fatena Kolo

Matiu 14:22-23; Zone 6:14-21

45 Selu laoi ma leghuna ia mahai, neke to kahe ghidi ghu Zisas ira nona mane ta nonofoi ta la haghena ka ia koaka, ta tatanigai kadolo vai laona ghu ka ia malau fafaana Betiseida. Nga manei mu, neke au ma neke vuhai ke va ghahe laori ghedi ghu ira noni ka ira rekahadi malau maneri. 46 Leghuna kubaeri ira noni ghe, neke vona lao kakaike nga Zisas ka kaike voruhu, neke la tarai ghu.

47 Ka ia dufu mehana ia saighona, ia koaka neke to age hoatai kolo ka ia loka. Nia Zisas geke au kakaike ghu taghonai ka kavao kalae, neke ghua. 48 Manei neke finiri ira mane ta nonofoi dike marutana vanadi gelugeluna, vununa maneri dike toghari ia dafe. Fatana nakelei lito ghu ka ia fufugho redu, Zisas neke ghaghahe neke lao ghu ka maneri ka fatena ia kolo. Manei neke to namo ghaghahe fuluduri maneri, 49 ka ia dike fininio maneri ta ghaghahena manei ka ia fatena kolo. Tarungana noni dike ghua ghini, dike azili ghu maughini ghedina. 50 Maneri haroharo dike puina maughini ghedi fini laoidina. Ka fafata ianimu lama neke to ngengene lao ghu Zisas ka maneri, kahe ghuana iahi, “!Hioi hetamuna! Ara ko ini. Oka maughemu ghu,” neke ghua ghidi. 51 Ianimu tuna ghe neke haghe vona lao nga manei ka ia koaka taremehadi maneri, neke nodo ghu ia dafe. Maneri dike puina nodi fere ka heve dike to finiriro. 52 Maneri e deo ngama gedi ke avohi ghu toraina fafahakanana ia hahaimana va tehiri ira gaha bereti, vununa ira nganganadi e deo ngama gedi ke hololo ghu, dike deo ghu va hohoghonadira.

Zisas Neke Va Vehari Tehi Noni Ta Fogara Aianihi Genesareti

Matiu 14:34-36

53 Ka ia fafata la sabaradi aianihi Genesareti ka ia keha pelona ia loka, maneri dike la sighoti ia koaka. 54 Kave meha di ghua ghu maneri ka ia koaka, ira noni dike to fini avoho laoi ma Zisas. 55 Maneri dike purudu va hokoti ia hori kamoto, hure laorira ka natu ira noni ta fogarari, hae tei dike nomohina maneri neke auna Zisas. 56 Hae tei ta ghahe laona manei ka ira rekahadi nia fafaadi malau, maneri dike va epuri ira noni ta fogara ka ira makete peghuru. Ira noni ta fogarari dike papadi Zisas ta va malumurina ta suna posi laoina ma ghu maneri ia va kukuruna nona poko sodu. Heiri dike posi laoio ia poko sodu ka Zisas mu, dike age veha ghedi haroharo ghu.