Mark 8

E Fuludi Rodana Togha Noni Neke Valiharira Zisas

Matiu 15:32-39

1Keha fafatana, kaike leghahai varigharana nonini, neke la mehani ka Zisas, ghe neke to age deo ghano kunudi mala mahaina. Zisas neke kudori ghu ira nona mane ta nonofoi, neke va kahe ghidi ghu, 2“Na dudumana ghidi ghegu ngama noni irahi. Lito ravata dike to meha au tagura maneri aiahi, to deori ghu ghano ta kununa. 3Nato tuhu surari la ara deona valiharira, edi la oromao nia kudoko edi ghua ka hanganani, vununa kehara ka maneri dike sipa mehadi varihauni.”

4“?Heve da ghua ghu ngaini, gada boka hio mahai nga ghita ka malau ghouna iahi, mala valiharira tehi noni irahi?” dike ghua notohodira ira nona mane ta nonofoi.

5“?Niha bereti tetepele ne aura ka ghau aiahi?” neke ghua Zisas notohona.

“Vitu ghu,” dike ghua ungene tughuina.

6Ianimu tuna ghe neke va kahe ghidi nga Zisas ira tehi noni, ta nohe hinae harona ka kavana. Hiori tuna neke ghua manei ira vitu bereti tetepele, neke kudo vehai ghu God ghidira ira mahai, ghe neke kipekiperi nga neke vanadi ghu ira nona mane ta nonofoi, mala tufarira ka ira noni. 7Keha rekahadi namari terira dike auri haroma, neke kudo vehai ghu molamo God manei, ghe neke va kahe ghidi nga ira nona mane ta nonofoi ta tufari harora.

8Ira noni dike mahai ma dike age pote ghedi haroharo ghu. Sene hiori tuna ira kipedi ghano ta kunu, va foudurira vitu leghahai maka dike ghua. 9Taghe rodana togha noni dike aura ka ravata ianimu. Leghuna ia mahai ghedi, manei neke tuhu surari ka sugadiro. 10Leghuna iahi lama, neke to la haghe ghu Zisas ka ia koaka taremehadi ira nona mane ta nonofoi, dike kadolo lao ghu ka ia hori Dalamanuta.

Ira Farisi Dike Fanga Hahaima Va Ghilaghila Ka Zisas

Matiu 16:1-4

11Di nomohi ghu ira Farisi neke to sabarana Zisas, maneri dike lao dike la vari tuufuai taremehana ghu. Maneri dike kabai hadu kavei neke sipana mamu manei ka God, ba deo ta ghuana, dike fangai ghu, “O vanamai kaike hahaima taghe mala va ghilaghilana noke sipana mamu agho ka malauo God fate, ta ghuana” dike ghua ghini.

12Ne nomohi ghu Zisas iahi, manei neke hingo kai, ghe neke kahe ghua nga iahi, “?Heve di ghua ira noni ka fafata irahi ghe, di fanga hahaima va ghilaghila tudu nga? A torai va kahe ghini ghau ghu ara, ta deona ga age vanani ghu ara ubalana noni iahi kokolona va ghilaghila ianimu,” neke ghua ghidi. 13Ke ghahe kairi tuna ira Farisi dike ghua Zisas nia ira nona mane ta nonofoi e ghua, dike la haghe ghu ka ia koaka, tatanigai kadolo laona ka ia keha pelona ia Lokana Galili.

Zisas Neke Torai Kahe Ghidi Va Gigima Ira Nona Mane Ta Nonofoi, Ghinina Ia Vari Va Hugahuga Ta Muko Ka Ira Farisi, Nia Herodi Anitipasi E Ghua

Matiu 16:5-12

14Ghe ira mane ta nonofoi dike age hadu kavei dike ngana kaina maneri hiorira keha mahai, nga kaike kamotona bereti ma neke aurina maneri ka ia koaka. 15Ka ia fafata fera kadolodi ka ia loka, Zisas neke kahe ghidi va gigima, “O banabana ghini ghau ka ia isi ira Farisi nia Herodi, e ghua,” neke ghua ghidi.

16Ira mane ta nonofoi dike turi ghua iahi ka vari taghodighi, “Ghe neke kahei nga iahi Zisas mu, vununa ghita deo gada ke hio bereti ghu,” dike ghua.

17Zisas to avoho laori nganganadi ari, neke kahe ghua ghu iahi, “?Ne heve ghe no nonogele ghini nga ia deo mahai? ?E deo ngama go boka fifini ghu nia va fafahaka ghu, e ghua? ?To puina kaputuri ma hihingomu nira? 18‘?Ghau mu kuru hibamu, to deo ma boka fifinimuna? ?Ghau mu kuru talingamu, to deo ma boka nonomohomuna?’ ?Nia to deo ma go ngana lao ghu ghau, 19ka ia fafata nake valihariro ara ira gaha togha noni ka ira gaha bereti tetepele? ?Niha leghahai kunudi maka ghano ka ira noni noke sene vonarira?”

“Tazoi palu,” dike ghua.

20“?Nia ka ia fata valihari ara ira rodana togha noni ka ira vitu bereti tetepele mu, niha leghahai kunudi maka ghano, noke sene vonarira?”

“Vitu ghu,” dike ghua.

21“?Deo ngama ghau go va fafahaka ghu?” neke ghua notohorira.

Zisas Neke Va Vehai Kaike Mane Ta Kivi Aianihi Betiseida

22Di dufu lao ghu aianihi Betiseida, keha nonira dike hio mehai ka Zisas kaike mane ta kivi, dike papadi ghu ta posi laoina ta ke va vehaina ghu. 23Zisas neke posini ia kamena ia mane ta kivi, neke batu ghini kave ghu ka ia rekahana malau. Ianimu tuna ghe neke kamusuri nga ira hibana neke posi laoi ghu, ghe neke notohi nga, “?Noto boka finiri mo agho keha leghutaura ghatunaina?” neke ghua ghini.

24Ia mane neke mato liloho ghe neke kahei nga, “Uve, na boka fini noni mo, ghe e deo ga boka fini va vehari ghu. Taghe fifinidi heke ta ghaghahe liloho di ghua ma.”

25Zisas neke posi leghurini ira hibana ia mane. Ianimu tuna ghe dike age tobehe nga ira hibana ke hio leghurira manei ira va fifinina, neke boka age fini va vehari haro ghu manei ira vahina leghutau nga. 26Zisas neke tuhu surai ia mane ka suganao, ghe neke va kahe ghini nga, “O torai ghahe va lotoro lao ma ka sugauo, nga oka ke leghu lao ghu ka rekahana malau ani, go la turi ghu,” neke ghua ghini.

Pita Neke Kahe Kavei Zisas Mu Ia Mesaea

Matiu 16:13-23; Luku 9:18-21

27Zisas nia ira nona mane ta nonofoi, dike ghahe kaini Galili dike vona lao ghu ka ira rekahadi malau gheremena ia malau leghaha Sesaria Filipae. Ka ia fafata ghaghahe ta lao ghu maneri, manei neke notohori, “?Hei di ghua ghinagu ara mu ira noni?”

28Dike ghua iahi ungene tughuina, “Kehara di kaheina mu, agho mu Zone Ia Ta Rivai Seselebeana, neto ke doli leghu ghu ka ia leme, di ghua; kehara tuna mu Ilaiza di ghua; nia kehara tuna, agho mu kaike ghu ka ira keha porofeti, di ghua.”

29Ianimu tuna ghe neke notohorini nga Zisas, “?Nga ghau mu, ara mu hei, no ghua ghinagu?”

“Agho mu ia Mesaea,” neke ghua Pita.

30Ghe Zisas neke kahe ghidi va gigima, mala edika turi ghini la ghu ka hei noni, ghinina taghonai.

Zisas Neke Kusu Kahe Kenui Ia Leme Nia Ia Tetuleghu Ka Taghonai

Matiu 16:21-28; Luku 9:22-27

31Ianimu tuna ghe neke tatanigai va kahe ghidi nga Zisas, taghe ghinina taghonai ia Tuuna Noni ta age vavahagala ghidina ghatu tehi leghutau ta mamaghuana, nia ta age sokeina ira ta babatu, ira hiama ta kenu, nia ira mane ta vari va kakahe ghini ia vetula ta maduana ka God, e ghua. Maneri edi age va lemei ghatu, ghe leghuna lito ravata mo, e ke age tetu leghu ghu manei. 32Ka ia fafata turi vanadi va lotoro lao ira nona mane ta nonofoi ghini iahi, Pita neke hio nenemai Zisas, ghe neke va kahe ghini nga taka mala kaherina ghu manei, kokolodi leghutau iranimu.

33Zisas ne fihiki, ghe neke mato laori nga ira nona mane ta nonofoi, neke ngengene va gigima lao ghu ka Pita, “!O ghahe kaiau Satana! Ngangana iramu ka agho mu, nona ngangana ia noni, nga eka ngangana ghu ka God.”

Heiri Ira Ta Kabai Leghui Zisas Mu, Edi Va Tana Tudu Ma, Ta Mala Vavahagalana

Matiu 16:24-28; Luku 9:23-27

34Ianimu tuna ghe neke kudori nga manei ira nona mane ta nonofoi nia ia varigharana noni e ghua, ta meha nonomohona. “Hei ka ghau neto kabai meha noni mala nonofoau la ara, agho o torai kai hazari ira doliu ta luluto, nia va tana tuna ta vavahagalana ta lemena ghu ka kaike hekefalahata e ghua, ghe go meha leghuau nga ara,” neke ghua ghidi. 35“Hei neto kabai sutei la ia dolina taghonai, manei e age siana ghini ghatu. Nga hei neto siana ghini la ia dolina taghonai malaguna ara nia ia Nonomoho Ta Veha e ghua mu, manei e age hioi ia doli ta au toghunai. 36?Heve ghu mu veha ta age hioina agho, noto hiori la vahina leghutau nga ka malau kamoto iahi peka, ghe siana ghini tuna ia doli ta au toghunai, ta ghuana? 37?Heve ghu mu ta boka tabarina agho ta mala ke hio leghuina ghu ia doli ta au toghunai ka agho? 38Hei noni neto haghava ghinagu la ara nia nogu nonomoho ini e ghua, ka hoataidi noni ta deori va hohoghona ta auri muko irahi, ara ia Tuuna Noni, a age haghava ghini ghegu molamo noni ianimu, ka ia ke leghu mehagu ka ia pelarana varanga nogu Mama taremehadi ira engizeli ta beana.”