Mar 9 | KjiSC | STEP | Zisas neke kahe ghua laoni iahi, “!A toraina va kahe ghini ghau ghu ara, kehara ka ghau ta tetu aiahi ghatunaina, e deo go boka leme ghu, o vuhai fini ghu ia Ravutu ka God sabaranana ka leghahaina mana!”

Mark 9

1 Zisas neke kahe ghua laoni iahi, “!A toraina va kahe ghini ghau ghu ara, kehara ka ghau ta tetu aiahi ghatunaina, e deo go boka leme ghu, o vuhai fini ghu ia Ravutu ka God sabaranana ka leghahaina mana!”

Ia Holara Ka Ia Tinina Zisas

Matiu 17:1-13; Luku 9:28-36; 2 Pita 1:17-18

2 Leghuna onomo ravata, Zisas neke hiori Pita, Zemesi nia Zone e ghua, dike vona ghu ka ia vuhuku fate. E deo heini neke auna aianimu. Di mato lao ghu ira mane, neto holara ghu Zisas, 3 nia ira pokona gedi ke age pelara ghiho ghu dike ghua, ghighiho fuluduri ira ta tapalari hei noni ka malau iahi peka. 4 Ianimu tuna ghe dike podolo nga Ilaiza ghe Mosese, dike tatanigai turi taremehana ghu Zisas.

5 “!Mane Vari Va Kakahei Agho, ka namanama fuludura ta au ini ghai aiahi! Ghai a riva ghidi ghu lito suga tapole, kaike ghu ka agho, kehana ka Mosese, nia kehana ka Ilaiza e ghua,” neke ghua Pita. 6 Pita neke kahe taono, vununa maneri lito ghu dike puina maughedi fuludu.

7 Ianimu tuna ghe neke la meha nga ia toba toufu hinaerina ka ia kakapona, neke la kahe ghua meha ghu iahi ia leo ka tobani, “Iahi mu ia Tuugu ta namaha ghinina ara. O nomohi ghu manei.” 8 Selu laoi ma dike mato lilohono maneri, dike to deo ghidi ghu Mosese ghe Ilaiza, nga Zisas lama neke to au taremehadina.

9 Ka ia fafata ke hinaedi ka ia tabafena vuhuku, Zisas neke va kahe ghidi va gigima taka va kahe ghinina ghu kaike noni ghu, heve dike fininio, e vuhai ke age tetu leghu ghu ka ia leme taghonai ia Tuuna Noni. 10 Dike sutei ghu ma ka taghodi lama heve dike fininio, ghe ke vari nonotoho mo dike fani ghua, ghini heve mo fafahakanana ka Zisas mu “ke tetu leghu ka ia leme,” ta ghua ini.

11 Ke tatanigai notohini tuna, dike ghua, “?Heve di ghua ira mane ta vari va kakahe ghini ia vetula ta maduana ghe, di va gigimai tudu nga, Ilaiza e kusu la leghu meha tudu ma ghe, ge la meha nga ia Mesaea, ta ghua ini, ghe agho mu to kusu meha ini?”

12 Zisas neke ungene tughuri, “Puina hohoghona mamu, Ilaiza e kusu mala meha tudu ma, mala pakarai ghidi va vehara ira vahina leghutau nga. ?Heve ne ghua ghu ghe, ne kangavi nga ka ira Kakangava Ta Maduana mu, ia Tuuna Noni e toraina age vavahagala, nia edi age toraina sokei ghatu e ghua, ne ghua nga? 13 Ghe a va kahe ghini ghau ghu ara, Ilaiza mu to kusu meha, ghe maneri dike toraina ngovala va mukoi ma, taghe neke kusu kaheio lama ka ira Kakangava Ta Maduana.” ^{▼▼Ta turi ghini iahi Zisas mu, ghini Zone Ia Ta Rivai Sesele Beana, taghe Ilaiza la ia ta ghua manei.}

Zisas Neke Va Vehai Ia Rekaha Mane Ta Sukui Nazahi

Matiu 17:14-21; Luku 9:37-43a

14 Ka ia fafata ke hinae leghu mehadi Zisas, nia ira lito nona mane ta nonofoi e ghua, ka ia tatanigaina vuhuku peka, maneri dike finini ia varigharana noni, dike la au lilohorina ira keha noni ta nonofoi Zisas. Ka fafata ianimu, ira mane ta vari va kakahe ghini ia vetula ta maduana ka God, dike vari tuufuai taremehadi ira mane ta nonofoi Zisas. 15 Ira noni dike varighararo, dike nodi fere fuludu fini laoina Zisas ta ghaghahe ta mehana ghu kenudi mo, dike purudu lao ghu mala hio namahina.

16 “?Heve mo mu leghudi vari tuufuai irahi nga?” neke ghua notohonana Zisas.

17 Kaike mane ka ia varigharana noni neke ngengene vona kahe ghuana iahi, “Mane Vari Va Kakahei Agho, ara nake hio mehai tuugu mane ini mala va vehaina agho. Manei e deo ge boka ngengene ghu, vununa neke sukui tarunga ta muko. 18 Neto ke raza ghini la nazahi ini, manei e fani fera pisena ghini hinae ka kavana va kudoko nanazarina, ge va ngorongoroi nga tuna ia mangana ge ghani va ghiriti ghu, va gagahetaina ia tinina. Nake fangari ghu ara ira nou mane ta nonofoigho, ta tavusu kainina nazahi ini, ghe dike deo bokaidina.”

19 Kahe ghua ghidi tuna iahi, neke ghua Zisas, “!Ghau noni ta deo ghau va hohoghona! ?Niha nare ta au vanemoho ghinina ara deo va hohoghona iamu ka ghau? O hio mehai ko rekaha mane nia ka ara,” neke ghua ghidi Zisas.

20 Di hio vanani lao tuna ia rekaha mane, dike ghua. Ghe ia nazahi ne fini laoi ghu Zisas, neke fera pisena ghini hinae ia rekaha mane ka kavana, va nanazara pilakuina ta va ngorongoroina ghu ia mangana.

21 “?Nihaoni mu dufuina manei iahi?” neke ghua Zisas notohina ia nona mama ia rekaha mane.

“Neke tataniga ka ia rekahanani,” neke ghua nona mama. 22 “Tarunga ta muko iahi, e fani fera ghini lao ka totoi, ba ka kolo, va sisiva atungina rekaha ini. O dudumana ghini ghai ghu toka ghini ghaina, noto boka la.”

23 “?Heve fafahakanana mu ‘Noto boka la’ ta ghua ini agho?” neke ghua notohona Zisas. “Vahina leghutau nga mu, e boka mo neto va hohoghona la ia noni.”

24 Magali ma neto kudo lao ghu nona mama, “!Ara na va hohoghona mo, ghe toka ghinagu taka ngana palupaluna ghu ara!”

25 Ne fini ghu Zisas ta tehi laonani ira noni ta purudu lao ka taghonai, manei neke ungene va gigimai ia tarunga ta muko, “!Agho ia nazahina melongo nia melu ngengene, ara a toraina ungene va gigimaigho ta kave mehana ka rekaha mane iahi, nia oka ke meha haghele leghui ghu, e ghua!”

26 Ianimu tuna ghe neke azili nga ia nazahi, pisena va nanazarina neke ghahe kaini ghu. Ia rekaha mane neke to libo ma aianimu, ghe neke to deo nga ge ngalimu ghu, taghe tato fifini lemena, ta ghuana. “Neto leme,” dike ghua ngunungunudira ira noni. 27 Ghe Zisas neke posi vonai ia kamena ia rekaha mane, mala toka ghinina ta tetu vonana manei ka ghahenari, neke tetu vona ghu.

28 Leghunana, ka tato ke au kakaikeo Zisas nia ira nona mane ta nonofoi e ghua ka ia suga, ghe dike notohi nga, “?Ne heve ghai ghe, naka boka tavusu kaini nga ia nazahi?” dike ghua ghini.

29 “Kokolona nazahi iahi mu, tarai lama ghe ge boka tavusu kaini nga,” neke ghua Zisas.

Zisas Neto Ke Kahe Kenuini Ia Leme Nia Tetuleghu Ka Taghonai

Matiu 17:22-23; Luku 9:43b-45

30 Zisas nia ira nona mane ta nonofoi dike ghahe kaini hori ianimu, dike haghele fuludu ghu Galili. Zisas e deo geke kabai ghini ghu ta avohina ira noni, hae ne auna taghonai, 31 e mala aui fafata ghu ta mala au taremehadina ira nona mane ta nonofoi, mala va kakahe ghidina. Neke ghua ghu iahi neke kaheina Zisas, “Ia Tuuna Noni, edi age hio laoi ghatu ka ira ta kana ghini, edi atungi ghu, ghe leghuna lito ravata, manei eke tetu leghu ghu ka ia leme.” 32 Ira nona mane ta nonofoi, e deo gedi ke avoho va fafahaki ghu heve neke kaheio manei, ghe dike maughedi notohina.

?Hei Mo Mu Ta Varanga Sughavonana Ka Ia Ravutu God?

Matiu 18:1-5; Luku 9:46-50

33 Leghuna ia sabara laodi Kapaniumu, Zisas nia ira nona mane ta nonofoi e ghua dike la au ka ia suga dike mala la auro. “?Heve mo mu noke nonogele ghinio ghau ka hangana ani?” neke ghua Zisas notohorira. 34 Ghe maneri e deo gedi ke ungene tughui ghu, vununa maneri dike vari tuufuai ghini hei mo ta varanga sughavonana ka taghodi.

35 Zisas neke nohe hinae ghe neke kudo laori nga ka taghonai ira tazoi palu mane ta nonofoi, neke turi vanadi ghu, “Hei neto kabai meha kenu la, e naini taghonai ka ia va nonoghana, e noni mala riva ghu ka ira noni haroharo.”

36 Ianimu tuna ghe neke hioi nga kaike rekaha manei, neke va tetui ghu vari hoataidi. Manei neke ebete vonai ka ira kamena, ghe neke va kahe ghidi nga, 37 “Hei neto hio sutei la kaike rekaha taghe iahi ka babaologu ini ara, noni ianimu ne hio suteau ara. Nia hei neto hio suteau la ara, manei ne hio sutei nogu Mama neke tuhu mehauo ara.”

Hei Ia Taka Huha Ghita Ghu Mu E Au Ka Ghita Mo.

38 Zone neke kahe ghua iahi ka Zisas, “Mane Vari Va Kakahei Agho, ghai nake finini kaike mane mala rivana babaolou nia agho mala tavusu kairira ira nazahi, ghe nake va kahe ghini ta nodona, vununa manei eka au ghu ka pukuna ini ghita.”

39 “!Oka va nodoi ghu!” neke ghua Zisas. “E deo hei ta rivai hahaimana ka babaologu ini ara, ta boka ke age kahe va mukoauna ara ghatu. 40 Hei ia taka huha ghita ghu ka ia riva mu, e au ka ghita mo. 41 A toraina va kahe ghini ghau ghu ara, geta panikeni ketuhu ma ghu ta vanamuna hei noni ghe, vununa ghau mu nogu ara, e toraina age hio tabara ghu ghatu, noni ianimu.”

Ira Leghutau Ta Batu Ghidi Va Zea Ira Noni Mala Taghuru Kairira Ira Nodi Va Hohoghona

Matiu 18:6-9

42 Zisas neke kahe ghuani iahi, “Nga hei neto babatu ghini va zea la kaike ghu ka rekaha ta va hohoghonau irahi ara, ta deona ghu ke age va hohoghonana ka ara manei mu, geala e puina veha fuludu ka noni ianimu, ta va piliga ghini lao ghahipa leghaha mala bibiraka witina ka ia taniana, ghe gedi fera ghini kai lao nga ka rokasao, vununa heve ta vananina God ghatu mu, e vari vahagala laoni. 43 Neto va sasakeigho la kameu nia, kodaka kaini. E puina veha fuludu ta lao kaike kameuna ka malauo God fate, ta la haghele palu kameuna ghu gehena, ka ia ta deo ge boka leme ghu ia totoi. ^{▼▼Keha kakangavara ka Giriki, edi ke nai hagheleri papaguaina 44 nia 46 e ghua, edi varifata ma ghu ka hori 9 papaguaina 48.} 44 – 45 Neto va sasakeigho la ghaheu nia, kodaka kaini. E puina veha fuludu ta lao kaike ghaheuna ka malauo God fate, ta age kai laoighona ghu ghatu taremehana palu ghaheu nira aianihi gehena. 46 – 47 Nia neto va sasakeigho la hibau nia, ziloko kavei. E puina veha fuludu ta haghele kaike hibauna ka malauo God fate, ta age kai laoighona ghu ghatu taremehadi palu hibau nira aianihi gehena, 48 ka ia ta
“‘deo ge boka leme ghu ira saku,
nia ia totoi, e ghua.’ ^{▼▼Aesaea 66:24}

49 Vununa ira noni haroharo mu, edi age va mamalahuri ka totoi. ^{▼▼Ka ira ngengene Giriki mu “va kuratahini ka totoi” e ghua. Ka keha kakangavarani ka Giriki mu, edi nai hagheleri ngengene irahi, “nia leghu veala nga mu, maneri edi nai lao ghidi kuratahi ira fatedi” e ghua.}

50 “Ia kuratahi mu, e vehana leghutau mala va lingilingi. ?Ghe neto age kakai la ia lingilingina, heve o ghua ghe, goke boka age va kuratahi leghui nga? Taghe kuratahi niala, o toraina ghua ghu molamo ghau ka vari taghomughi, o au haroharo ghu ka ia bule.”