Mat 10 | KjiSC | STEP | Zisas neke kudo varighara ghidi ira tazoi palu nona mane ta nonofoi neke vanadi mana ghu mala tavusu kai tarunga ta muko nia mala va veharira leghu kokolodi lelemeana nga, nia fogara nga, e ghua.

Matthew 10

Zisas Ne Tuhu Kaveri Ira Tazoi Palu Mane Nonomoho

Maki 6:7-13; Luku 9:1-6; 12:2-10

1 Zisas neke kudo varighara ghidi ira tazoi palu nona mane ta nonofoi neke vanadi mana ghu mala tavusu kai tarunga ta muko nia mala va veharira leghu kokolodi lelemeana nga, nia fogara nga, e ghua.

2 Irahi mu babaolodira ghu ira tazoi palu mane nonomoho: Ta kenuna mu, Saemoni (Pita ia ta ghua ghini haro) nia Aduru ia tahina mane; ira palu tatahina Zemesi ghe Zone ira tuunamane Zebedi; 3 Filipi ghe Bafolomiu; Tomasi ghe Matiu ia ta mala hio takisi; Zemesi ia tuunamane Alofiasi nia Tadiasi; 4 Saemoni (neke magara ghinio ia tetu kakaike ka Isiraeli, ka ia gaumanina Romu) nia Zudasi Isikarioti, ia neke namaha seboio Zisas, e ghua.

5 Zisas neke tuhu kaveri tazoi palu mane nonomoho irahi taremehadi ungene babatu irahi: “Oka lao ghu ka ira noni taka Ziu ghu, ba, ka ira noni Samaria, 6 nga o lao ma ka ira noni Ziu ta ghahe va zea taghe sipisipi ira ta ghua ani Isiraeli. 7 ‘Ia Ravutu ka malauo God fate mu to namo,’ o la ghua ghu tuturi vanadi beanana. 8 O va vehari ira ta fogara, ke va doli leghuri ira ta leme, va vehari ira ta auri lepa, nia tavusu kairi ira nazahi, e ghua. !Taghe ta hihio kakato niala o ghua, o tufa kakato ghu molamo! 9 Oka hio rongo taremehamu ghu. 10 Oka hio mogoha nanapisi ghu, ba va paluna sote ghu, ba sadolo ghu, ba geta totongono ghe, e deo haroma, vununa heiri ira ta riva mu geala e mala valihari ghedi.

11 “Noto hagheli la ghau kaike malau leghaha, ba kaike rekahana malau, o hadui kaike mane ta boka ohoꞌoho hio sute ghauna. O la au ma ka suga ani manei, o vuhai ke kave lao ghu ka keha malauna. 12 Dito hio haghele ghau la keha nonira ka kaike suga, o vanadi ia nomu va beanana bule. 13 Dito hio namaha ghau la ira noni ta au ka suga ianimu, veha mo e au ghu ka maneri nomu va beanana bule ianimu. Nga dito deo la gedi hio namaha ghau ghu ira noni, ghe goke hio leghui nga ia nomu va beanana bule. 14 Malau ba suga neto deo la ge hio namaha ghau ghu, ba nomoho ghau ghu, o vuvusu kairi ira sotana malau ianimu ka ira ghahemu ka ia ghahe kainimu. Iahi mu taghe kaike ngengene mala balau ka maneri. 15 A va kahe ghini ghau ghu ka ia hohoghona, ia dudumana ka God ta vanadi ira nonidi Sodomu nia Gomora mo, ta faa fuludu laoina ia ta age vanani manei malau ianimu ghatu ka ia ravatana varifate. 16 !Nonomoho ko! Ara na tuhu kave ghau lao taghe ira sipisipi ka hoataidi ira wulufu. O banabana taghe ira adogho nia au taghe ira babahulu bora taka lelemeana ghu, o ghua.

17 “!Ghe o balau! Vununa ira noni edi age hio vona ghau ghatu ka vari sukutuai, edi age ruza ghau ghu ka giliodi ira suga mala varighara ira Ziu. 18 Vununa ka ia ghinagu ara, edi age hio vona ghau ghu ghatu ka kenudi ira ta babatu nia ira mane ginitaukela e ghua, mala va kahe ghidina ghau maneri nia ira noni taka Ziu ghu e ghua, ghinina ia Nonomoho Ta Veha. 19 Dito sakomo hio ghau la maneri, oka hangapuaha ghu anga ghinina heve ngengene ta mala kaheina mala tetu kaputu ghauna taghomu, vununa God e vanamu mo ghatu ira lotorodi ngengene ta mala kaheri ghau ka toraina fafata ianimu. 20 Vununa eka ghua ghu ghau mu ta age ngengenena ghatu, nga ia Tarunga Ta Maduana ka God ia nomu Mama mo, ta age va kahe ghini ghauna heve ta mala kaheina.

21 “Ira noni taka va hohoghona ghu ka ara, edi age nai laori ira tahidi mane ta va hohoghona ka ara ka ira ta kana ghinagu ara mala va lemerina, nia ira nodi mama ira rekaha gedi age ghua ghidi haro ghu ira tuudi e ghua; ira rekaha edi age magarari haro molamo nodi ukeri nodi mamari edi vanadi lao ghu ira kana mala atungurira. 22 Leghu noni nga edi age kikipana ghini ghau ghatu vununa ghau no riva vanagu ara. Ghe hei ia ta au va gima ta dufu ghu ka ia va nonoghana mu, God e age hio va dolini ghatu. 23 Dito ngovala ghau la ka kaike malau, o pelo lao ka keha malauna. A va kahe ghini ghau ghu ka ia hohoghona, ghau e deo nga go age va nonogha riva ghu ka ira leghu malau nga Isiraeli, eto la meha ghu ghatu ia Tuuna ia Noni.

24 “Ia rekaha sikolu mu eka veha fuludu laoi ghu ia nona mane vari va kakahei. Ia maneriva tuna mu, eka veha fuludu laoi ghu ia nona faghina, e ghua. 25 E fata mo ka ia rekaha sikolu mu taghe ia nona mane vari va kakahei ta ke meha ghuana nia ia maneriva tuna taghe ia nona faghina ta ke meha ghuana, e ghua. !Ara ia faghinana ia suga mu Belezibolo, ia faghinadi ira nazahi dito ghua ghinagu la maneri, ge heve soni mu, va kudo ghidi babaolo ta mukona maneri heiri ira ta au varighara ghai ka kaike suga mo!

26 “Ghe oka maughidi ghemu ghu noni iranimu. Vununa heve ira ta poika mu edi ke age podolo kave mo, nia ira leghu popoika nga tuna edi ke age fini avohori mo ira noni, e ghua. 27 Heve ta va kahe ghini ghauna ara ka ia nagoromo, ghau o toraina ke kahe kavei ka ia fegala, nia heve nake ngangau ghini agena ara ka talingamu nira, ghau o toraina kudo kave va vehai, mala nomohina ira noni haroharo. 28 Oka maughidi ghemu ghu heiri ira ta boka atunguri ira tinimu, ghe taka boka atunguri ghu ira tarungamu; nga o maughini ghemu God mo, ia ta boka ngovali haro ia tinina nia ia tarungana ia noni ka ia totoina gehena. 29 Ka kaike rekahana kunegelena rongo tei mo e boka tabarari ghu mu palu memeha rio, ghe e deo kaike rio ta riufu hinae ghu ka kavana ta deona ge avohi ghu nomu Mama. 30 God e avohori haro ghe niha ghu kalaura agho ka pau nia. 31 Oka maugheu la ghu; ka manei mu, agho mo ta tongovona fuludu laona ka tehi memeha rio.

32 “Hei neto kahe kavei la ka ira noni, ta noguna ara mu manei, ara a age kahe kavei haroma ka nogu Mama ka malaunao fate, ta noguna ara noni ianimu. 33 Nga hei ne zea ghinagu ara neto ghua la ka malau iahi peka mu, ara a age kahei haroma ghatu ka kenuna nogu Mama ka malaunao fate ta zea ghini gheguna noni ianimu.

34 “Go nganai la meha iahi ka ara mu mala hio meha bule ka malau iahi peka, ta ghuana. Deo, ara e deo gake meha mala hio meha bule ghu, nga vari fotai mo. 35 Ara mu nake meha mala
“‘fihikini ia mane ta mala taga tetuina nona mama,
nia ia fotati ta mala taga tetuina nona uke,
nia ia fotati ta mala taga tetuina nona vasagha, e ghua.
36 !Noni ta toraina kana ghinighora agho mu, edi la meha ka giliona ia fototatamana taghou!’ ^{▼▼Maeka 7:6}

37 “Noto namaha ghini la agho nou mama, ba nou uke fuluduauna ara, agho e deo go fata ghu ta nogu noni mala nonofoauna ara; ba noto namaha ghini la agho ia tuu mane ba ia tuu ghase fuluduauna ara, agho e deo go fata ghu ta nogu noni mala nonofoauna ara. 38 Noto pake gheu la agho hure vonaina ia nou hekefalahata ta leghuauna ghu ara, agho e deo go fata ghu ta nogu noni mala nonofoauna ara. 39 Noto ngana hetai la agho ia doliu taghou, agho o age siana ghini ghatu; nga noto siana ghini la agho ia doliu taghou, vununa ka ia ghinagu ara, agho o age hioi ghatu ia doli soduai.

40 “Hei neto hio namaha ghau la ghau, manei ne hio namahau ara, nia hei neto hio namahau la ara, manei ne hio namahi ia neke tuhu mehauo ara. 41 Hei neto hio namahi la kaike porofeti, vununa manei mu ia porofeti ta ghuana, manei e age hioi haroma ghatu ia tabara taghe ta hioi la ia porofeti. Nia hei neto hio namahi la kaike noni ta veha, vununa noni ianimu ne veha ta ghuana, manei e age hioi haroma ghatu ia tabara taghe ia ta hioi la kaike mane ta veha. 42 Nia hei neto vanani lao la kaike panikeni ketuhu kapo ka kaike ghu ka ira ta torai au unuhu taka tongovona ghu ka ira noni ta nonofoau ara, manei e toraina age hioi ghatu ia tabarana.”