Matthew 11

Zisas Ghe Zone Ia Ta Rivai Sesele Beana

Luku 7:18-35

1Ne age nogha ghu Zisas va kakahe ghidira ira tazoi palu nona mane ta nonofoi, manei neke kave kaini malau ianimu, neke la vari va kakahei ghu nia tuturi beana ghu e ghua ka ira malau leghaha aianihi Galili.

Va Rodanana Pagahaina: Ia Mane Ginitaukela Di Sokei Ma Di Au Ghu 11:2–16:12

2Ka giliona ia au pipiliga Zone Ia Ta Rivai Seselebeana, manei neke nomohori leghutau neke riva ghidiro ia Mesaea. Tuhu laori tuna ira nona mane ta nonofoi taghonai Zone gedi la notohi ghu Zisas dike ghua kahe ghuana iahi, 3“?Agho lamu ghu mu ia toraina Mesaea nake afa ghinio ghai, ba, kaikeuni mu geala ta ke afa ghinini ghai?”

4Va kahe ghidi lao tuna neke ghua Zisas, “Ke leghu lao ka Zone, o la va kahe ghini ghu heve no meha nomohorira nia finirira: 5ira ta kivi dito ke boka fifini, ira ta memelu ghaghahe dito ke boka ghaghahe, ira ta dufuri lepa dito ke veha ghedi, ira ta melu nonomoho dito ke boka nonomoho, ira dike lemero dito ke doli leghu, nia ia Nonomoho Ta Veha tuna geto va ongahi ghu ka ira noni ta kuma, e ghua. 6Nia va kahe ghini haroni iahi, e ghua: ‘God e va beanari ira ta deo gedi nodo ghu va hohoghonana ka ara.’”

7Ka ia fafata tato age ghahe ghedi ira nona mane ta nonofoi Zone, Zisas neke age tatanigai tuturi ghini Zone ka ia varigharana noni: “?Ka ia fafata kave laomu ka Zone ka ia malau koroghana ta karango, heve mo noke nganai la fininina ghau? ?Taghe kaike sesehu ta dafe va egholo lamehai neke ghua manei? 8?Ba ia mane ta va vonari ira poko ta puina vona tabaradi mo, noke nganai la fininina ghau? Deo, ira noni ta va vonari ira poko ta veveha, ta au va veha ghu mu, edi au ka ira tolimadi ira mane ginitaukela, nga eka ghua ghu ka ia malau koroghana ta karango. 9?Heve ghu ngania noke kave la fininina ghau? ?Kaike porofeti? Uve, ghe manei mu e ke fuludu laoini kaike porofeti. 10Zone lamu ghu mu ia toraina mane neke kahe ghuao iahi God ka ira Kakangava Ta Maduana ghinina manei,
“‘Fini, ara na kusu tuhu agei ia nogu mala hio nonomoho kenuu agho,
e kusu mala age va tana vananigho ghu manei ia nou hangana.’ ▼

▼Malakae 3:1

11Ara a torai va kahe ghini ghau ghu, e deo kaike noni neke doli meha ghu, ta varanga fuludina Zone Ia Ta Rivai Seselebeana. !Geta ghua mo ianimu ghe, hei ia ta va nonoghana ka ia Ravutu ka malauo God fate mu, e ke varanga fuludu lao ka manei! 12Ka ia tatanigaina rivai tuturi beana Zone Ia Ta Rivai Seselebeana ta dufu ghu ka torai ravata iahi, ira noni ta ngongovala dike magari ia Ravutu ka malauo God fate, va sisiva huarina. 13Ghe neke meha nga Zone, ira leghu porofeti nga nia ia vetula ka Mosese e ghua, dike kusu kahe kenui mo heve ta age dufuna ghatu ka ia Ravutu. 14Nia noto lao hihingomu la ta va hohoghonaina nonomoho ani ka maneri, Zone lamu Ilaiza na, ia mane e mala meha dike ghua ghinio ira porofeti. 15!Hei neto kuru talingana la, geala e nonomoho ghu.

16“?Ka heve mo ta va fata ghidi laona ara mu ira nonidi ghatunaina? Noni irahi mu taghe kaike pukuna rekaha ta nohe gilio ka ia malau mala makete peghuru ta kudo ghua lao ghu iahi ka ira keha,
17“‘Na hilava vanamu koze varihio ghu ghai,
ghau e deo ma go ragi ghu;
na hilava vanamu koze giugilu ghu ghai,
ghau e deo ma go muko hihingo mu ghu.’

18Ka ia fafata mehana Zone Ia Ta Rivai Seselebeana, manei neke filui mahai nia e deo geke ketuhu waeni ghu e ghua, ghe ghau haroharo noke kahe ghua iahi, ‘Manei ne sukui nazahi,’ noke ghua ghini. 19Ghe vununa ara ia Tuuna ia Noni nake meha mahai, ketuhu, no kahe ghua ghu iahi ghau, ‘!Manei mu ne vavara mahai, ketuhu gogosu nia baereri tuna ira ta hio takisi nia ira noni ta auri sasake, e ghua!’ no ghua ghu. Ghe ira noni di age ngana avohi ta lotorona mo God ka ia finini maneri ia ghaghahena ta riva ghini ira nona noni.”

Varifate Maladi Ira Taka Va Hohoghona Ghu

Luku 10:13-15

20Ianimu tuna ghe neke tatanigai ungene tonori nga Zisas ira noni ka ira malau leghaha ka neke la torai riva va tehi hahaimao manei, vununa maneri deo gedi ke taghuru kairi ghu ira sasakedi ta fihiki laona ghu ka God. 21“!Ghau ira nonidi Korazini, God e age toraina va vavahagala va muko ghau ghatu! !Ghau ira nonidi Betiseida, God e age toraina va vavahagala va muko ghau haro molamo ghatu! Vununa ira hahaima nake riva ghidiro ara ka ghau mu, gake riva ghidi la ara ka ira malau ta muko aianihi Taea nia Saedoni e ghua, ira noni aianimu geala sepaoni edito ke va vona pokona muko hihingo ghu nia va kefuruai ghidi kofele ghu ira paudi e ghua, mala va podolina dito kai hazari mamu ira sasake ka maneri ta ghuana. 22!Ghe a toraina va kahe ghini ghau ghu ara; ka ia age fateri God ira noni, manei e age vanamu ghau ghatu ia va vavahagala ta faa fuludu laoi ia ta age vanadi manei ira nonidi Taea nia Saedoni, e ghua! 23?Nia ghau ira nonidi Kapaniumu, oka nganai ghu e age hio vona ghau mo ghatu God ka nona malauo fate, ta ghuana. Deo, manei e age kai hinae ghau lao ghatu ka ia totoina gehena. Ira hahaima nake riva ghidiro ara ka ghau, gake riva ghidi la ara aianihi Sodomu, geala malau ianimu e tetu ngama ghatunaina. 24Ghe ara a toraina va kahe ghini ghau ghu, ia dudumana ta age vanadi ghatu God ira nonidi Sodomu mo, ta faa fuludu laoina ia dudumana ta age vanamu ghau manei ghatu ka ia ravata mala varifate.”

Meha Ka Ara O Maghoso Ghu

25Ianimu tuna ghe neke tarai ghua nga iahi Zisas ka fafata ianimu: “Mama, agho ia Lod kakaputuna ia kolanga fate nia malau iahi peka, ara na kudo vehaigho agho vununa agho noke va podolo vanadi ira tare noni ghedi mo, ira leghutau noke va poika ghidiro ira noni ta auri vahina kokolodi avoavoho nga. 26Uve, Mama, e age ghua mamu iahi noke kabai ghinina agho.

27“Nogu Mama neto vanagu meha ara vahina mana nga nia avoavoho nga e ghua. E deo ghu hei ta torai avohina mu ia Tuuna, nga ia Mama lama, nia e deo haro hei ta torai avohina ia Mama e ghua, nga ia Tuuna nia heiri neke faeteriro ia Tuuna mala avohina ia Mama, e ghua lama.”

28Kahe ghua tuna iahi neke ghua Zisas, “Meha ka ara, ghau haroharo ta baelu hurerira ira gapa ta tahu, a vanamu ghu ara ia maghoso. 29O hioau ara taghe mala babatu ghini ghauna, o hio avoavoho ghu ka ara, vununa ara mu a unuhu nia bule, mala leleghonana o age hadu dufui ghu ia maghoso. 30Vununa leghuauna ara mu e nanamo nia namanama e ghua, nia ia gapa ta va hure ghini ghau ara tuna ge sasanano ghu, e ghua.”