Matthew 12

Ia Vari Tuufuaina Ia Ravata Mala Maghoso Ka Ira Ziu

Maki 2:23-28; 3:1-6; Luku 6:1-11

1Ka fafata ianimu, Zisas nia ira nona mane ta nonofoi e ghua, dike ghahe fuludu ka ia hangana giliodi ira galahedi kava ta numa ghidi witi. Ira nona mane ta nonofoi dito ke age nodi liha dike tataniga pisuri ghu ira fuadi witi, nia mahairi tuna dike ghua. 2Keha Farisira dike finiri riva ghinina ianimu maneri, dike kahe ghua ghu iahi ka Zisas, “!Fini ko nou mane ta nonofoigho nira agho, ta riva ghini ani ia ta beana ka ia Ravata Mala Maghoso ira Ziu!”

3Ghe Zisas neke ungene tughuri, “?E deo ngama goke izumi ghu ghau ka ira Kakangava Ta Maduana heve neke riva ghinio Deveti ia Mane Ginitaukela nia ira nona mane ka ia fafata nodi liha maneri? 4Neke beana mo ka ia vetula ghe, manei neke la haghele ka ia giliona suga God, dike la mahaini ghu maneri ia bereti ta maduana neke maladio ma ira hiama lama. 5?Nia deo goke izumi ghu ghau ka ia vetula Mosese mu, ta malumuna mo ka ira hiama ta rivana ka ia Ravata Mala Maghoso ira Ziu ka ira nodi fafata mala riva maneri ka ia Sugana God? 6A va kahe ghini ghau ghu ara, kaike ghu aiahi ta tongovona fuludu laoinani ia Sugana God. 7Ira Kakangava Ta Maduana di kaheina mu, ‘Ia varisute mo na kabai ghinina ara, nga eka veala ghu.’ ▼

▼Hosea 6:6

Goke toraina avohori la ghau ira fafahakadi, ghau deo go boka fateri ghu ira noni ta kalasa ghedi, no muko ta ghua ghidira. 8Vununa ara ia Tuuna ia Noni mu, e kuruau mana mala vato ghinina heve ta boka riva ghinina ka ia Ravata Mala Maghoso.”

9Ianimu tuna ghe neke sipa nga Zisas ka malau ianimu neke lao ghu ka kaike suga mala varighara ira Ziu, 10ka neke auo kaike mane ta peleku ia kamena. Ira Farisi dike kabai makuti Zisas dike notohi ghu, “?E totonu mo ka ia vetula mu ta riva va veha nonina ka ia Ravata Mala Maghoso?” dike ghua ghini.

11Zisas neke ungene tughuri, “?Ge kurui la kaike sipisipi kaike ghu ka ghau, ge riufu lao ghu ka ia golava ka ia Ravata Mala Maghoso, heve, agho e deo go la koroho kavei ghu? 12Ge heve soni ghu mu ia noni tongovona fuludu laoina ia sipisipi. Neto ghua la ianimu, e lotoro mo ghu ka ia vetula mu ta riva ghinina ia veha ka ia Ravata Mala Maghoso.” 13Ianimu tuna ghe neke kahe ghua nga iahi Zisas ka ia mane, “Va tuhu kavei kameu nia.” Va tuhu kavei tuna ia kamena geto ke age veha varifata ghu ka ia keha kamena, neke ghua ia mane. 14Ianimu tuna ghe dike kudoi nga kaike haedu ira Farisi, dike va puhipuhi ghini ghu mala atungina Zisas.

Zisas Ia Nona Faetaina Noniriva God

Maki 3:7-12

15Ne age avohi ghu Zisas ta ghuana ianimu maneri, manei neke ghahe kaini malau ianimu, dike ghahe leghui ghu ira tehi noni. Manei neke va vehari ira leghu fogara nga ka noni iranimu, 16ghe manei neke kahe ghidi va gigima maneri taka va kahe ghidira ghu ira keha noni ghinina taghonai. 17Iahi mu neke va ghuduvi heve neke kaheio God ka porofeti Aesaea:
18“Iahi mu ia nogu noniriva, nato ke faetio ara,
ia ta namaha ghini nia ia ta va manemane ghini ara.
Ara a vanani manei ghatu ia nogu Tarunga,
mala manei e va ongahi ghu ia nogu totonuna ka ira noni haroharo.
19Manei e deo ge age vari tuufuai ghu, ba kudo kai ghu;
manei e deo ge age turi va varavaranga ghu ka ira hangana leghaha peghuru.
20Manei e age dudumana ghidi ghena ira noni ta paeke ba ta ngovalari,
nia manei e age hio suteri ghatu ira noni ta mamarutana toka ghidira taghodi.
Manei e riva ghidi ma e lao ghu iranimu, e vuhai age finini ghu ia veha ta paufina ia muko.
21Ka ia babaolona manei ta age nai laorira ghatu ira nodi rangerange ira leghu noni nga.” ▼

▼Aesaea 42:1-4

Zisas Nia Ia Faghinadi Ira Nazahi

Maki 3:22-30; Luku 11:14-23

22Ianimu tuna ghe dike la hio mehai nga ka Zisas keha nonira kaike mane neke sukui nazahi neto ke kivi ghu nia melu ngengene ghu, e ghua. Zisas neke va vehai mane ianimu neto ke age boka ngengene ghu nia fifini ghu, e ghua. 23Ira varigharadi noni dike age nodi fere fuludu dike notoho ghua ghu iahi, “?E boka meha mo ka ia pagusu Deveti baini mu manei?” dike ghua.

24Ghe di nomohi ghu iahi ira Farisi, dike kahe ghua iahi maneri, “Ghazai ghua mo ge boka tavusu kai nazahi manei, vununa manei ne hio mana ka Belezibolo, ia faghinadi ira nazahi,” dike ghua.

25Zisas neke to avoho laori ira nganganadi neke va kahe ghidi lao ghu, “Ia soloso ta vari magara ma taghodi lama mu e age huara, nia ia malau leghaha ba suga, dito age fota la ka sopai pukudi dito vari magara ghu, e age huara ikasa. 26Neto Satana la ta tavusu kai nazahina ka ira noni, taghe Satana mu neto magari ma ghu taghonai. Ia ravutu ka manei, e deo ghu boka age tetuna. 27?Nato mala riva la ara ia mana ka Belezibolo mala tavusu kai nazahina, ka ia mana hei ghu mu di tavusu kai nazahina ira noni ka ghau? Maneri di tavusu kai nazahi molamo, edi age fate ghau ghu ghatu ka heve noke kaheriro ghau. 28Nga nato tavusu kai nazahi la ara ka ia mana ia nona Tarunga God mu, ianimu ghu mu ia Ravutu ka God to la meha ka fatemu ghau. 29!E deo hei ta boka haghele sikona ka ia sugana ia maneheta, ta la hio tanara ghu ira nona leghutau, nga e kusu lilighoina nga, ghe ge boka la sikori nga vahina leghutau nga ka suga ani manei!

30“Hei ia ta deo ge au ghu ka keha pelona ini ara mo mu, e kana ghinagu ara, nia hei ia ta deo ge toka ghinagu ghu ara batu ghidi laora ka God ira noni mu, ne batu ghidi maneri ta ghahe kainina God. 31Vahina sasake nga, ba lausasaba nga mu, e boka kai hazari mo, nga ia lausasaba ta va kahe ghini ia Tarunga Ta Maduana mu, e toraina deo hohoghona ge boka kai hazai ghu. 32Hei neto lausasaba ghinagu la ara ia Tuuna ia Noni, God e boka kai hazari mo ira sasake ka manei, nga hei ia ta lausasaba ghini ia Tarunga Ta Maduana mu, God e toraina deo ge age kai hazari ghu ira sasake ka manei ka doli iahi, ba ka ia doli ta la meha.

33“Ia heke mu neto doli va veha la, ghe ge veha nga ia fuana. Nga heke neto deo la ge doli va veha ghu mu, ia fuana e deo haroma ge veha ghu. Ia heke mu e boka fini avohi mo ka ia fuana ta fua ghini manei. 34!Ghau pukuna adogho minga! ?Heve e ghua ghau ira ta muko, ghe go boka kaheri nga ira leghutau ta veha? Vununa heve ia ta foudu ka ia hihingo lama mu, ta boka kaheina ia noni. 35Ia noni ta veha mu, e va meha leghutau ta veha ka ia hihingo ta veha, nia ia noni ta muko tuna ge va meha leghutau ta muko ghu ka ia hihingo ta muko, e ghua. 36Ghe a va kahe ghini ghau ghu iahi. Ka ia ravata ta mala age fateri God ira noni, ghau o toraina age turi ghidi kave ghatu ira leghu ngengene ta muko ta deo lighorodi nga noke kaheriro ghau. 37Vununa ka ngengene iranimu lamu ghau mu, mala dedekena ka ia age fate ghau ghatu, ta mala avoho ghauna ghu no veha, ba muko, ta ghuana.”

Ia Va Ghilaghila Taghe Neke Dufuo La Ka Zona

Luku 11:24-26, 29-32

38Kaike ravata, kehara ka ira ta vari va kakahe ghini ia vetula beana, nia keha Farisira e ghua dike lao ka Zisas dike la kahe ghua ghu iahi, “Mane Vari Va Kakahei Agho, ghai na kabai ghinigho ta va fini ghini ghaina kaike hahaima va ghilaghila, mala va podolina noke sipa meha mamu agho ka God ta ghuana,” dike ghua ghini.

39Ghe Zisas neke ungene tughuri, “Ia ubalana noni ta muko taka va hohoghona ghu lama ta boka fanga hahaima va ghilaghilana; ghe va ghilaghila ta vanadira ara ghatu mu, ia va ghilaghila neke dufuo lama ka Zona. 40Vununa taghe Zona la neke auo ka ia giliona leghahai namari lito ravata nia lito redu, a ghua molamo ara ia Tuuna ia Noni, a age au ghu ka ia giliona beku lito ravata nia lito redu. 41Ira nonidi Nineve edi tetu vona ghatu ka ia ravata mala varifate edi makuti ghu ubalana noni iahi ghatunaina, vununa noni Nineve irahi dike age taghuru kairi ira sasakedi ka ia fafata nomohi maneri ia tuturi beana ka Zona, ghe ghatunaina mu, kaike ta varanga fuludi Zona ta auna aiahi. 42Ia ghase ginitaukelana Seba e age tetu vona molamo ghatu ka ia ravata mala varifate makutina ubalana noni iahi ghatunaina, vununa manei neke sipa meha ka ia nona malau varihauni mala meha nomohina ia avoavoho ta veha ka Solomone ia Mane Ginitaukela, ghe ghatunaina mu kaike ta varanga fuludi Solomone ta auna aiahi.

43“Ka ia kave kaini ia noni ia tarunga ta muko, manei e lao ka ia giliona malau koroghana ta karango hadu malau mala la maghosona. Ghe neto deo la ge dufui ghu malau ianimu, 44manei e kahe ghua iahi, ‘Ara a ke leghu lao ma ka ia suga nake la sipa mehao,’ e age ghua. Ke leghu lao tuna manei ka ia kusu malauna, ge la finini ghu ta koroghana, takusu va fegalina, nia torai riva va vehaina, e ghua. 45Ianimu tuna ghe geke kave laoni nga tuna manei, geke la hio mehari ghu keha vitu tarunga ta muko ta muko fuludu laoini taghonai, gedi la au haro ghu aianimu, e ghua. Va nonoghanana mu, noni ianimu to age muko fuludu laoini ia kusu auna sepao. Ianimu lamu ghu mu ta age dufuna ghatu ka ubalana noni ta muko iahi ghatunaina.”

Ia Nona Uke Nia Ira Tahina Mane Zisas

Maki 3:31-35; Luku 8:19-21

46Ne ngengene ngama ne au ghu Zisas ka ia varigharana noni, to meha tetu ghu peghurudi mo, nona uke nia ira tahina mane, kabai turi taremehanana manei. 47Kaike noni ka maneri, neke lao neke la va kahe ghini ghu Zisas, “Nou uke nia ira tahiu mane e ghua ta tetu ari peghuru mo, di kabai turi ka agho,” ▼

▼Ka keha kakangavara e deo ge au ghu papaguaina 47

neke la ghua.

48Notoho tuna neke ghua Zisas, “?Hei mu nogu ukena ara nia heiri mu tahigu manera ara?” neke ghua ghini. 49Ianimu tuna ghe neke tuhu lao nga manei ka ira nona mane ta nonofoi, neke kahe ghua ghu iahi, “Irahi lamu nogu ukena nia tahigu manera ara. 50!Hei ia ta riva ghini ia lao nanafa ka nogu Mama ka malaunao fate lamu, ta tahigu manena, tahigu ghasena, nia nogu ukena ara!”