Matthew 14

Ia Leme Ka Zone Ia Ta Rivai Sesele Beana

Maki 6:14-29; Luku 9:7-9

1Ne nomohori ghu Herodi Anitipasi ia gavanana Galili heve neke riva ghidiro Zisas, 2manei neke kahe ghua iahi ka ira nona maneriva, “!Mane iahi mu toraina Zone Ia Ta Rivai Seselebeana lama neto ke doli leghu ghu ka ia leme. Ne ghua mamu ghe, ne kurui mana mala rivai hahaima nga!”

3Herodi neke sakomo hioi Zone sepao neke nakai hagheli ghu ka pipiliga taghe mala hadu vehana ka Herodiasi ia ghaseborona Filipi ia tahina mane Herodi. 4Zone neke va kahe ghini tudu ma neke au ghu Herodi, “E deo ge lotoro ghu ka ia vetula ta varihiona agho ka Herodiasi,” e fani ghua ghini. 5Herodi mu neke to kabai atungi ghu Zone, ghe ira noni haroharo dike va hohoghonai, Zone mu kaike porofeti ta ghuana, neke maughini ghena ghu manei heve tadi age riva ghinina maneri ghatu.

6Ka ia ravata ngana leghuna ia dolina Herodi, ia rekaha tuunaghase Herodiasi neke ragi vanadi ira noni dike la holararo ka sarumahai ianimu. Neke toraina va manemane ghu Herodi, 7naiungene tuna, ge va bebereana ghu mala vananina heve leghutau ta fangaina rekaha ghase ani, neke ghua. 8Ka ia va hugahuga nona uke, neke la fanga ghua ghu iahi rekaha ghase ini, “!O va fara vanagu meha aiahi ghatunaina ka kaike leghahai peleita ia pauna Zone Ia Ta Rivai Seselebeana!” neke la ghua.

9Ia mane ginitaukela neke age muko hihingona, ghe vununa ka ia va bebereana neke kaheio ka kenudi ira leghu noni dike la holararo nga, neto ke varituhu ma ghu manei mala vanani laona ta kabai ghini ani manei. 10La kodaka kaini tuna ia pauna Zone gilio ka ia malau pipiliga, 11gedi hio vanani lao ghu ia rekaha ghase va faraina ka kaike peleita leghaha, ghe neke hio vanani lao nga tuna manei nona uke, neke ghua. 12Ira nona mane ta nonofoi Zone dike la hioi ia tinina, dike la gilu ghini ghu. Ianimu tuna ghe dike la va kahe ghini nga Zisas heve neke dufuna ka manei.

Zisas Ne Valihari Gaha Togha Noni

Maki 6:30-44; Luku 9:10-17; Zone 6:1-14

13Nomohi ne ghua ghu Zisas tuturina iahi Zone, manei neke haghe ka kaike koaka neke kave lao ghu ka kaike malau ghouna, ta boka la au kakaike taghonai. Ghe ira varigharadi noni dito ke nomohi hae neke vai laona manei, dito ke bazo ghu sipadira ka ira nodi malau, la ghahe leghuina manei. 14Ka ia la sabarana ta zoghu hinae ghu ka ia koaka, Zisas neke finini ia leghahai varigharana noni aianimu, neke dudumana ghidi ghena ghu, va vehari ghedi tuna ira leghu noni dike fogarariro nga, neke ghua.

15Ka saighona ianimu, ira mane ta nonofoi dike la meha ka Zisas dike kahe ghua ghu iahi, “Malau ghouna mu iahi, nia to puina age namo nagoromo, e ghua. Tuhu ghaheri varigharadi noni irahi, edi lao ghu ka malau teri ari la tabara ghedi ghanona taghodi.”

16Ghe Zisas neke ungene tughuri, “Maneri edika ghahe ghu. Ghau o valihari ghedi.”

17“!Ta au ghaina ghai aiahi mu, gaha bereti tetepele nia palu namari, e ghua ma!” dike ghua ghini lao.

18“!Hio mehari aiahi ka ara!” ne ghua ghidi. 19Va kahe ghidi tuna ira noni ta nohe hinaena ka ira sesehu, neke ghua. Ianimu tuna ghe ne hiori nga manei ira gaha bereti nia ira palu namari, ne mato vona ghu ka malauo God fate, neke kudo vehai ghu God. Kipekiperi tuna ira bereti tetepele ge vanadi lao ghu ira nona mane ta nonofoi gedi tufari ghu ira noni, dike ghua. 20Maneri haroharo dike mahaina, dike age toraina hoviri ghu. Ira mane ta nonofoi dike sene va fouduri tazoi palu maka ka ghano dike kunuro. 21Deona ge tahori ghu ira fotati nia ira rekaha mu, e nona au ka gaha togha mane dike mahaira.

Zisas Ne Ghaghahe Ka Ia Fatena Kolo

Maki 6:45-52; Zone 6:15-21

22Magali ma, neto ke kusu va kenu laori ghu Zisas ka ia koaka ira nona mane ta nonofoi ka ia keha pelona ia loka. Nga taghonai mu neke au hinae mo neke vuhai ke va ghaheri ghedi ghu ira noni. 23Leghuna ianimu, manei neke vona lao kakaike ka kaike vuhuku neke la tarai ghu. Ka ia saighona mehana, manei neke au ma aianimu taghonai kakaike. 24Ka fafata iahi, ia koaka neke to age hauai ka kavao, toghari ta laona ghu ia dafe va bilibokitinina ira geo.

25Ka ia age namo fughona, Zisas neke ghaghahe neke lao ghu ka maneri ka ia fatena kolo. 26Di fini laoi ghu ghaghahe ta laona ghu manei ka fatena kolo ani, ira nona mane ta nonofoi, dike age azili maughedina, vununa tarungana noni bana dike ghua ghini.

27Ghe Zisas mamagali ma neto ke ngengene laori ghu. “!Hioi hetamuna! Ara lama koini. Oka maughemu ghu,” neke ghua ghidi.

28Kudo lao tuna neke ghua Pita, “!Lod, neto torai agho la mamu, va kahe ghinagu meha ta ghaghahe agena ara ka agho ka fatena kolo ini.”

29“!Meha,” neke ghua Zisas.

Deke kave tuna ka koaka ani, ge ghaghahe vai lao ghu ka Zisas ka fatena kolona, neke ghua Pita. 30Ghe Pita ne fini ghu ta puina gigimana ia dafe, manei neke age maughena neto ke tatanigai luduru hinae ghu. “!Lod hio va doliau!” neke ghua kudonana.

31Magali ne ghua ma Zisas neto ke haghara lao ghu ia kamena sakomo laoina manei. “Ka rekahanara va hohoghona ini ka agho. ?Neke heve ghe no ngana palupalu nga agho?” neke ghua Zisas. 32Dike vona la haghe ghu ka koakana maneri palu, neto leme hinae ghu ia dafe.

33Ianimu tuna ghe dike va totoana ghini nga Zisas ira keha mane ta nonofoi dike auro ka ia koaka, dike kahe ghua ghu iahi. “!Hohoghona mamu, agho mu torai Tuuna mamu God!”

Zisas Ne Va Doliri Tehi Noni Ta Fogara Aianihi Genesareti

Maki 6:53-56

34Leghuna fera kadoli ia loka Galili, maneri dike la sabara hinae aianihi Genesareti. 35Ia nonomohona sabara ka manei to magali ongaha kamoto ma ka ira leghu kobosodi malau nga aianimu. E deo ma sepana, dito ke la hio mehari ghu ira noni ta fogarari mala ke va veharira Zisas. 36Maneri dike papadi Zisas ta va malumurira ira noni ta fogara ta suna posi laoina ma ia va kukuruna poko sodu ka manei. Maneri haroharo dike riva ghinio ianimu dike age veha ghedi haroharo.