Mat 16 | KjiSC | STEP | Keha Farisira nia Sadiusira e ghua, dike meha mala seke ghini Zisas, dike fangai ghu ta va podolo vanadina kaike hahaima va ghilaghila sipa mehana ka malauo God fate.

Matthew 16

Ia Fanga Hahaima Va Ghilaghila

Maki 8:11-12; Luku 12:54-56

1 Keha Farisira nia Sadiusira e ghua, dike meha mala seke ghini Zisas, dike fangai ghu ta va podolo vanadina kaike hahaima va ghilaghila sipa mehana ka malauo God fate.

2 Ghe Zisas neke ungene tughuri, ^{▼▼Ka ira keha kusu kakangava dike auro e deo ge au ghu kamotona papaguaina 2 nia kamotona papaguaina 3 e ghua.}“Neto lomulomu la ia kolanga ka ia saighona, ghau ta kaheina, ‘Fugho nga e bule,’ o ghua. 3 Nia neto lomulomu nia nagoromo la ia kolanga ka ia fufughona, ‘Ravata ini nga e age nanare,’ o ghua ghau. Ghau no puina avohoa ghini fuludu izumina ia bule nia ia mukoinare ka kolangana, ghe ghau e deo ma go boka va fafahakari ghu ira va ghilaghila ghidi fafata irahi ghatunaina! 4 Ira noni ta muko ta deori va hohoghona lama mu ta fanga hahaima va ghilaghilana, ghe va ghilaghila ta age vanadina ara ghatu mu, ia va ghilaghila neke dufuio lama porofeti Zona,” ne ghua ghidi, ghe neke ghahe kairi nga tuna.

Ia Isi Ka Ira Farisi Nia Sadiusi

Maki 8:14-21

5 Ka ia fera kadolodi ka keha pelona loka ani mo, ira mane ta nonofoi dike ngana kai ta hio beretina. 6 “O banabana,” neke ghua ghidi Zisas. “O balau ghini ia isi ka ira Farisi nia ira Sadiusi e ghua.”

7 Nganganadina maneri mu, vununa ta deo ani gedi ke hio bereti ghu taghodi, ghe neke kahe ghua nga Zisas, dike ghua. 8 Zisas neto avoho laoi heve dike nganaina maneri, neke kahe ghua ghu iahi, “!Ka rekahanara va hohoghona iamu ka ghau. ?Heve mo no anga ghini ghemuna ghau ka ta deo ghau bereti ini? 9 ?E deo ngama ta va fafahakina ghau? ?E deo ma go ngana avohi ghu ghau mu ira gaha togha noni nake valihariro ara ka ira gaha bereti tetepele, nia ira leghu foududi maka ghano nga ka dike kunuro, e ghua? 10 ?Ba, noto ngana kaini ghemu haroma ghau mu ira rodana togha mane nake valihariro ara ka ira vitu bereti tetepele, ka neke kunuro ira keha foududi maka ghano? 11 ?Heve no ghua ghe, no deo nga go ngana avohi ghu nake deona gake turighi bereti ghu ara? Ara a ke va kahe ghini ghauni, ‘Balau ghini ia isi ka ira Farisi nia ira Sadiusi.’”

12 Ka ianimu ghe, dike age va fafahaki nga tuna maneri mu Zisas deo geke turighi isi ghu, ba bereti ghu ta ghuana, nga neke turi ghidi ira vari va kakahei ta sesebo ka ira Farisi nia ira Sadiusi mo.

Va Gahana Pagahaina: Ia Va Tanari Ira Mane Ta Nonofoi Ka Ia Mane Ginitaukela 16:13–20:28

Pita Ne Kahe Kavei Zisas Mu Ia Mesaea Ta Ghuana

Maki 8:27-30; Luku 9:18-21

13 Di meha dufu ghu ka ia kobosona gheremena ia malau leghaha Sesaria Filipae, Zisas neke notohori ira nona mane ta nonofoi, “?Hei di ghua mu ira noni ghinaguna ara, ia Tuuna ia Noni?”

14 “Di kaheina kehara mu, Zone Ia Ta Rivai Seselebeana di ghua, kehara mu Ilaiza di ghua, kehara tuna Zeremaea, ba kaike ghu ka ira keha porofeti gedi ghua ghu, di ghua.”

15 “?Nga ghau mu; hei no ghua ghinagu ara?” neke ghua notohorina Zisas.

16 “Agho mu ia Mesaea, ia Tuuna God ia ta au toghunai,” neke ghua ungene tughuna Pita.

17 “Ka beana gheura agho Saemoni, ia tuunamane Zona,” neke ghua Zisas, “vununa iahi mu, e deo geke va podolo vananigho ghu ia noni, nga neke va podolo vananigho nogu Mama ka malaunao fate. 18 A va kudo ghinigho Pita ghu ara ghatunaina babaolouna agho; fafahakanana mu ‘ghahipa mafara toghunai’ e ghua ghu. Ka fatena ghahipa mafara iahi, ta age va tetuina ghu ara ghatu ia nogu kiloau. Geta ghua ghu ia leme ghe, e deo ge boka age paufi ghu. 19 Ara ta age vananighona ira kii malana ia Ravutu ka malauo God fate. Heve leghutau taka va malumina ghu agho ka malau iahi peka, e deo ge age malumu ghu ghatu ka malauo God fate, nia heve leghutau ta va malumina agho ka malau iahi peka, ge age malumu haroma ghu ka malauo God fate, e ghua.” 20 Ianimu tuna ghe neke kahe ghidi va gigima nga ira nona mane ta nonofoi taka turi vanadira ghu hei noni, ghinina taghonai mu ia Mesaea, ta ghuana.

Zisas Ne Turi Ghini Ia Vavahagala Nia Ia Leme Ka Taghona

Maki 8:31–9:1; Luku 9:22-27

21 Ka fafata ianimu ta vai vona ghu, Zisas neke tatanigai turi vanadi va fafahaka ghinina ta toraina mala laona taghonai aianihi Zerusalemu, ta mala la vavahagala ghidira ghu tehi leghutauni ka ira kamedi ira ta babatu, ka ira hiama ta kenu nia ka ira ta vari va kakahe ghini ia vetula beana, e ghua. Manei neke va kahe ghidi haroma, ta toraina mala atungina maneri ghatu manei nia ta ke age tetu leghuna manei ka ia leme ka ia va lito ravata, e ghua.

22 Pita neke hio nenemai Zisas, ghe neke buruai nga, “Toraina deo Lod,” neke ghua ghini. “!E toraina deo ge boka age dufuigho ghu agho ghatu leghutau ta ghuana ianimu!”

23 Zisas neke fihiki lao ka Pita, ghe neke kahe ghua nga iahi, “!O ghahe lao leghugu mo Satana! Agho mu kaike babara mala va gogohau ara, vununa ngangana irahi ka agho mu e deo ge la meha ghu ka God, nga sipa mehadi ka noni.”

24 Ianimu tuna ghe, neke kahe ghua nga iahi Zisas ka ira nona mane ta nonofoi, “Hei ka ghau neto kabai leghuau la ara, agho o toraina ngana kaigho taghou o hurei ghu ia nou hekefalahata, ghe go leghuau nga ara. 25 Vununa hei neto kabai sutei la ia dolina taghonai, manei e age siana ghini ghatu. Nga hei neto siana ghini la ia dolina taghonai malaguna ara, manei e age finini ghatu ia doli ta au toghunai. 26 ?Heve veha mu ta age hioina agho noto tagho kamoti la malau iahi peka, ghe siana ghini tuna ia doli ta au toghunai, ta ghuana? ?Heve ghu mu ta boka tabarina agho ta mala ke hio leghuina ghu ia doli ta au toghunai ka agho? 27 Vununa ara ia Tuuna ia Noni, a meha ghatu ka ia pelarana mana ta meha ka God ia nogu Mama taremehadi ira engizeli ka taghonai God, mala vanadi tabarana ira noni haroharo, leleghuna ka heve dike riva ghidiro maneri. 28 A toraina va kahe ghini ghau ghu ara, kehara ka ghau ta tetu aiahi ghatunaina, e deo nga go age leme ghu, o finiau ghu ara ia Tuuna ia Noni, mehana ka ia nogu Ravutu.”