Mat 17 | KjiSC | STEP | Leghuna onomo ravata Zisas neke hioi Pita nia ira palu tatahina mane Zemesi ghe Zone e ghua, neke batu ghidi vona lao ghu ka kaike vuhuku ta vona, dike la au kakaike ghu.

Matthew 17

Ia Holara Ka Ia Tinina Zisas

Maki 9:2-13; Luku 9:28-36; 2 Pita 1:17-18

1 Leghuna onomo ravata Zisas neke hioi Pita nia ira palu tatahina mane Zemesi ghe Zone e ghua, neke batu ghidi vona lao ghu ka kaike vuhuku ta vona, dike la au kakaike ghu. 2 Di mato lao ghu lito mane idi, ia hihilina Zisas neke holara taghe pelarana taunu neke ghua, nia ira pokona tuna gedike age ghiho palamu ghu, dike ghua. 3 Heve ba ne ghua ma, dito fini laori ghu tetudira Mosese ghe Ilaiza, turi taremehana ta auna ghu Zisas. 4 Kahe ghua tuna iahi ka Zisas neke ghua Pita, “!Lod, ka puina veha fuludura ta au ini ghai aiahi! Veha mo noto ghua la agho, a riva ghidi ghu ara lito suga tapole, kaike ghu ka agho, kaike ghu ka Mosese nia kehana ka Ilaiza, e ghua.”

5 Ghe ne kahe ghua ngama manei ianimu, to la meha toufu hinaeri ghu fatedi ia toba ta pelara. Ianimu tuna ghe, neke la kahe ghua meha nga tuna iahi ia leo ka tobana, “Iahi mu toraina Tuugu ara, na toraina va manemane ghini ghu. !O nonomoho ka manei!”

6 Di nomohi ghu leo ianimu lito mane ta nonofoi idi, dike age puina maughedi fuludu, dike riufu habara kokopo hinae ghu ka kavao. 7 Ghe Zisas neke lao neke la posiri ghu. “!Tetu vona, oka maughemu ghu!” neke ghua ghidi. 8 Edi ke mato vona lao di ghua ghu maneri litou, taghonai Zisas lama neke to auna. 9 Dike la hinae meha ghu ka ia vuhuku, Zisas neke ungene va gigimari, “Oka turi vanani ghu hei noni heve noke fininino, a vuhai ke age tetu leghu ghu ka ia leme ara ia Tuuna ia Noni,” neke ghua ghidi.

10 Notohi tuna dike ghua ira mane ta nonofoi, “?Heve di ghua ira mane ta vari va kakahei ghini ia vetula beana ghe, Ilaiza mo ta toraina kusu ke la leghu mehana, ghe ge la meha nga ia Mesaea, di ghua nga?”

11 Zisas neke ungene tughuri, “E hohoghona mamu ta kusu kenu mehana Ilaiza mala nai va lotororira vahina leghutau nga. 12 Ghe a va kahe ghini ghau ghu ara, Ilaiza mu neke to kusu meha, ghe ira noni e deo gedi ke fini avohi ghu, dike leghu ma ta va riva ghini ghu ngovali ghedina. Taghe iala e ghua molamo, e age vavahagala ghu ghatu ia Tuuna ia Noni ka ira kamedi maneri.” 13 Ianimu tuna ghe dike age va fafahaki nga ira mane ta nonofoi mu, Zisas neke turi ghini Zone Ia Ta Rivai Seselebeana, ta ghuana.

Zisas Ne Va Vehai Ia Rekaha Mane Ta Sukui Kaike Nazahi

Maki 9:14-29; Luku 9:37-43a

14 Dike leghu lao ghu maneri ka ia varigharana noni, kaike mane neke la meha ka Zisas neke la torongaghituturu hinae ghu kenuna mo. 15 “Lod, dudumana ghini tuugu mane ini,” neke la ghua. “Manei e dufui fogara kudoko nanazara, e toraina vahagali ghena ghu neto ke raza ghini la. Keha fafatara manei e fani riufu lao ghu ka ia totoi, ba ka ia giliona ketuhu. 16 Ara nake hio mehai mo ghu ka nou mane ta nonofoigho idi, ghe maneri dike deo gedi boka va vehai ghena ghu.”

17 Zisas neke ungene tughuri, “Ghau noni taka ungene nonomoho ghu ta deo ghau va hohoghona. ?Taghe niha nare ta au tamuna ara, ghe go va hohoghona nga ghau? ?Niha fafata ta au afa ghini ghau ma ta auna ghu ara? Hio vanagu meha aiahi rekaha mane nia.” 18 Ianimu tuna ghe neke buruai nga Zisas ia nazahi neke kave kaini ghu ia rekaha mane. Ka fafata ianimu lama neke to age veha ghena ghu tuna manei.

19 Leghunana, ira mane ta nonofoi dike lao ka Zisas dike la notoho poikai ghu, “?Ne heve ghe, ne deo nga boka tavusu kainina ghai mu ia nazahi?” dike la ghua ghini.

20 “Vununa ia va hohoghona ka ghau ne rekahana fuludu,” neke ghua ghidi Zisas. “A va kahe ghini ghau ghu ka ia hohoghona, taghe faana subuna masitadi geta ghua ghu ia va hohoghona ka agho ghe, agho o boka kahei mo ka vuhuku iahi, ‘Rizu ghahe aiahi, o lao ghu aianihi,’ o ghua ma, eto lao ghu manei. E deo heve leghutau ta deona go boka riva ghini ghu agho.” ^{▼▼Keha kakangava separa ka Giriki e nakai hagheli haro papaguaina 21: “Ghe kaike ghaghahena ta torai mala tavusu kainina kokolona nazahi ianimu ghu mu, ka tarai nia filui mahai e ghua.”}

Zisas Ne Turi Ghini Leghu Ia Leme Ka Taghona

Maki 9:30-32; Luku 9:43b-45

21 – 22 Kaike ravata ka ia ke meha au varigharadi haro ira mane ta nonofoi aianihi Galili, Zisas neke va kahe ghidi, “Ia Tuuna ia Noni mu, edi age namaha seboi maneri ghatu. 23 Maneri edi age atungi ghatu, ghe ka ia va litona ravata manei e ke age tetu leghu ka ia leme.” Ira mane ta nonofoi dike to puina age muko hihingodi fuludu.

Ia Kai Takisina Ia Sugana God

24 Dike meha dufu ghu aianihi Kapaniumu, ira mane ta hio takisina ia Sugana God dike meha notohi Pita, “?E kai takisina mo ia Sugana God mu mane vari va kakahei iamu ka ghau?” dike ghua ghini.

25 “Nga heve, manei e kakai mo,” neke ghua Pita.

Ne la haghele ghu Pita ka ia suga, Zisas neke kusu ngengene lao ka manei. “?Heve no ghua nganganauna agho Saemoni? Heiri mo mu ta kai lao takisina ka ira mane ginitaukeladi ka malau iahi peka, ira nodi noni taghodi, ba, ira noni mehadi peghuruo?”

26 “Edi hio takisi ka ira noni mehadi peghuruo mo,” neke ghua Pita.

“Neto ghua la ngania, ira noni ka taghodi mu edi kalasa ghedi ghu,” neke ghua Zisas. 27 “Ghe ghita deo gada kabai va mukori ghu maneri, o hinae lao ghu agho ka loka ani, o la tutusa ghu. O kapeti ia mangana namari ta kusu korohi agho, o finini ghu ghatu kaike rongo kunegelena. Hioi kunegelena rongo ianimu, o la tabarari ghu ira takisi ka ghita palu.”