Mat 18 | KjiSC | STEP | Ka fafata ianimu, ira mane ta nonofoi dike lao ka Zisas dike la notohi ghu, “?Hei mo mu ta varanga sughavonana ka ia Ravutuna ia malau ka God fate?” dike la ghua.

Matthew 18

?Hei Mo Ta Toraina Varanga Sughavonana?

Maki 9:33-37; Luku 9:46-48

1 Ka fafata ianimu, ira mane ta nonofoi dike lao ka Zisas dike la notohi ghu, “?Hei mo mu ta varanga sughavonana ka ia Ravutuna ia malau ka God fate?” dike la ghua.

2 Kudo laoi tuna kaike rekaha ta la tetuna ka kenudi ari maneri, neke ghua Zisas. 3 Kahe ghua tuna iahi neke ghua manei, “Ara a toraina va kahe ghini ghau ghu, ghau o fihiki kairi ira sasake ka ghau, taghe ira rekaha o ke meha ghua ghu, ghe go boka age hagheli nga ia Ravutu ka malauo God fate. 4 Hei ia ta au unuhu taghe rekaha iahi ia ta ghua mu, ta age varanga sughavonana ka ia Ravutuna ia malau ka God fate. 5 Hei neto hio namahi la kaike rekaha taghe iahi ka babaologu ini ara, manei ne hio namahau ara. 6 Nga hei neto batu ghini va zea la kaike ghu ka rekaha teri irahi, ta age deona ghu manei ge va hohoghona ghu ka ara, e veha fuludu lao ka noni ianimu, ta va piliga ghini lao ghahipa mala bibiraka witina ka tanianao, ta fera ghini kai laona ghu ka rokasao.

7 “Ka mamaghuanara ka heiri ira ta hio va mukori ira keha noni. Kokolodi leghutau irahi mu edi toraina la meha mamu, ghe ka mamaghuanara ka hei ia ta riva ghini ia vari auau. 8 Neto va sasakeigho la kameu nia, ba ghaheu nia, kodaka kaini o sakomo kai laoi ghu. Ta la haghelina ia doli ta au toghunai ka kaike kameu, ba kaike ghaheu mo, ta veha fuludu laoina ia ta kamoto ira kameu, ba ghaheu, ta kai laoighona ghu ka ia totoi ta deo ge boka leme ghu. 9 Nia neto va sasakeigho la hibau nia, o ziloko kavei o sakomo kaini ghu. Ta kaike hibau ta haghelina ghu ia doli ta au toghunai mo, ta veha fuludina ia ta palu hibau ta sakomo kai laoighona ghu ka ia totoina gehena.

10 “O banabana, oka fini va hinaei la ghu hei ka rekaha teri irahi. A va kahe ghini ghau ghu ara, ira nodi engizeli maneri edi au taremehana tudu ma nogu Mama ka malaunao fate. ^{▼▼Keha kakangava separa ka Giriki e nakai hagheli haro papaguaina 11: “Ia Tuuna Noni neke meha mala hio va doliri ira noni ta ghahe va zea.”}

Ia Ungene Talevarana Ia Sipisipi Ta Ghahe Va Zea

Luku 15:3-7

11 – 12 “?Ge taghori la kaike mane ta kopunai sipisipi kaike ghobi sipisipi, ge ghahe va zea tana ghu kaikeu, heve mu ta age riva ghinina manei ghatu? Manei e age nai kairi ghatu ira keha leghaha ngavuluai leghaha sipisipi ka ia tabafena vuhuku, e la hadu leghui ghu ia keha ta ghahe va zea. 13 A va kahe ghini ghau ghu ara, ka ia fafata la finini manei, ia va manemane ka manei ghinina kaike sipisipi iahi, e fuludi ia va manemane ta vanadi manei ira keha leghaha ngavuluai leghaha sipisipi dike deoro gedi ghahe va zea ghu. 14 Taghe iala e ghua molamo nomu Mama ka malaunao fate, ta deona ge kabai ghini ghu hei kaikeu ka rekaha teri irahi ta age ghahe va zeana.

Dito Sasake La Kehara

15 “Neto va sasakeigho la kaike noni kiloau, o lao kakaike ka manei, o la va podoli ghu heve neke va zeaina manei ka vari hoataimu ghau palu. Neto nomohigho la manei, agho noto ke hio leghui noni ianimu. 16 Nga neto deo la ge nomohigho ghu manei, o ke hio taremehau laoni kaikeu, ba palu nonini, ‘mala ira palu, ba lito noni ta holara edi toraina kahe kavei ghu di hohoghodi ba sesebodi ta ghuana ira leghu neke kaheriro nga manei,’ ^{▼▼Ngengene 19:15} taghe ia ta kahei la ka ira Kakangava Ta Maduana. 17 Neto deo soni la nga manei ge nonomoho ghu, o hio vonai puhi iahi ka ia kiloau. Neto deo haro la ge nonomoho ghu manei ka ia kiloau, taghe kaike mane taka va hohoghona ghu ka God, ba taghe kaike mane ta muko mala hio takisi, oto ghua ghini ma. 18 A va kahe ghini ghau ghu ara, heve ta deona go va malumi ghu ghau ka malau iahi peka mu, e deo ge age malumu ghu ka malauo God fate, nia heve ta va malumina ghau ka malau iahi peka, ge age malumu ghu ka malauo God fate, e ghua.

19 “Nia ara a ke va kahe ghini ghauni iahi: Taghe keha palu noni ka ghau ka malau iahi peka dito tarai fangari la keha leghutau ka kaike lao hihingo mo, nogu Mama ka malaunao fate e age riva vanamu mo ghatu. 20 Vununa hae ta varigharana ghau palu, ba lito ghu ka babaologu ini ara, aianimu ta au taremehamuna ara.”

Ungene Talevarana Ia Maneriva Ta Deoi Dudumana

21 Ianimu tuna ghe neke meha nga Pita ka Zisas neke notohi ghu, “?Lod, niha fafata geala ta boka kai hazarira ara ira sasakena ia keha noni neto va mukoau la ara manei? ?Vitu fafata?”

22 “Deo, eka vitu fafata ghu,” neke ghua Zisas, “!nga vitu ngavuluai vitu fafata!

23 “Vununa ia Ravutu ka malauo God fate mu, taghe iahi e ghua. Kaike fafata kaike mane ginitaukela neke kabai ke kudo hagheleri ira nona maneriva, e mala hadu kaveri ghu taghe niha ghu dike kaoni tanara maneri. 24 Ne riva ghini ngama manei ianimu, to hio haghele laoi ghu kehara kaike maneriva neke kaoni tanao gahafulu feferi kunegele ta siliva. 25 Maneriva ianimu neke deoi rongo ta fata mala boka lifurira ira kaoni ka manei, neke kahe va gigimai ghu ia mane ginitaukela ta tatabara ghinina mane iahi taremehana keranau, ira tuuna nia ira leghu ta taghori nga manei e ghua, mala ke lifu leghurira kaoni iranimu ka manei.

26 “Ghe ia maneriva neke torongaghituturu hinae ka kenuna ia mane ginitaukela neke papadi ghu, ‘O afa ghinagu laona birusuna tei, a ke lifu vananigho leghu haro ghu ara,’ neke ghua ghini. 27 Ia mane ginitaukela neke ngana dudumana ghini ghena neke hio kai tana ghu ira kaoni ka manei, ghe neke va malumi nga tuna ta ke ghahena manei.

28 “Ghe ka ia kave laona maneriva iahi, manei neke la dufu fati kaike ghu ka ira mane ta riva taremehana neke kaoni tanao kaike ghobi kunegele ta siliva. Manei neke sakomi neke kumuhi ghu mane ianimu, kahe ghuana iahi, ‘O ke lifu leghuri ira rongo noke hio taguro,’ neke ghua ghini.

29 “Ia maneriva neke riva taremehanao neke torongaghituturu hinae ghe neke papadi nga, ‘O afa ghinagu laona birusuna tei a ke lifu vananigho leghu haro ghu ara,’ neke ghua ghini. 30 Ghe manei deo ma geke dudumana ghini ghena ghu, nga neke hioi neke kai laoi ghu ka ia pipiliga e vuhai boka lifu va noghari ghu ira kaoni ka manei.

31 “Di finini ghu ira keha maneriva ta ghuana ianimu manei, dike age dudumana ghini ghedi ia mane neke kai haghelio ka pipiliga dike la va kahe ghini ghu vahina leghutau nga ia mane ginitaukela. 32 Kudo hagheli tuna ia maneriva neke ghua ia mane ginitaukela. ‘!Agho maneriva ta muko!’ neke ghua ghini. ‘Vununa agho noke papadau ara, nake hio kai tau ghu ara ira kaoni ka agho. 33 Agho geala o ke dudumana ghini gheu haro ghu maneriva neke riva taremehau iahi, taghe nake dudumana ghinighono la ara.’ 34 Ia mane ginitaukela neke toraina hali fuludu neke va kahe ghidi ghu ira maneriva ta hio laoina ia mane ka pipiliga mala va kilasina, e vuhai age lifu va hokotori ghu ira kaoni ka manei.

35 “E ghua ianimu ta age va riva ghini ghauna ghatu nogu Mama ka malaunao fate, noto deo la ghau go dudumana ghidi ghu ira keha noni taremehamu ka ira hihingomu.”