Mat 19 | KjiSC | STEP | Leghuna turi ghidi Zisas leghutau irahi, manei neke ghahe kaini Galili neke ghahe vai lao ghu pelopeka mo ka ia hori Zudia, ka ia kobosona visi pelovonana mo ia Ketuhu Zodani.

Matthew 19

Ia Tatangana Ghinina Ia Varikai

Maki 10:1-12

1 Leghuna turi ghidi Zisas leghutau irahi, manei neke ghahe kaini Galili neke ghahe vai lao ghu pelopeka mo ka ia hori Zudia, ka ia kobosona visi pelovonana mo ia Ketuhu Zodani. 2 Leghahai varigharadi noni dike ghahe leghuina manei aianimu, neke va vehari ghu manei ira ta fogarari.

3 Keha Farisira dike meha va sisiva seke ghini Zisas ka notoho iahi: “?Heve, e malumu mo ka ia vetula ta tetuna ia mane ta sunare kainina mo ghu ia ghaseborona?” dike ghua ghini.

4 “?E deo goke izumuri ghu ghau mu ira Kakangava Ta Maduana ta kahe ghua iahi, ‘God neke va vuhari ira noni ta meha mane, ghasena,’ ^{▼▼Tatanigaina 1:27} ia ta ghua?” neke ghua ungene tughurina Zisas. 5 “Nia God neke kahe ghua iahi, ‘Ka va fafahaka iahi lamu ta age ghahe kairira nona mama ghe nona uke ia mane, ta age pareketena ghu manei ka ia ghaseborona, ta age kaikena ghu maneri palu.’ ^{▼▼Tatanigaina 2:24} 6 Maneri palu ghu mu, to deo ghu ke paludira, nga kaike mo. Heve neke vari parekete varighara ghidira God mu, e deo ghu hei noni ta ke age fotarira.”

7 “?Heve ghu ghe neke ungene va gigimai nga Mosese mu, ia mane e suna kangava vanani pepana varikai ma ia ghaseborona e va ghahei ghu, neke ghua nga?” dike ghua notohodira.

8 Zisas neke ungene tughuri, “Ghe neke va malumi nga Mosese ta kairira ghau ira ghaseboromu ghu mu, vununa ghau no toraina marutana fuludu tatangana ghauna, nga ka ia tatanigaina mu, eka ghua mo ianimu. 9 Nia a va kahe ghini ghau ghu iahi, ia mane ta kaini ia ghaseborona ta ke la hioi ghu ia keha fotati mu, ne zave kunui ia kusu ghaseborona neto kalasa ghena la manei ka kokolona sasake haro ianimu.”

10 Kahe ghua tuna iahi dike ghua ira nona mane ta nonofoi, “!Neto ghua la ianimu auna ka ia mane nia ia ghaseborona, eto mala heve ma ghe geto varihio nga ira noni!”

11 “Vari va kakahei iahi mu, e deo boka hioina heiri haroharo, nga e maladi ma heiri neke vanadiro God lama,” neke ghua Zisas. 12 “Ka ira sopai va fafahaka mu ta deona gedi boka varihio ghu ira mane. Kehara mu vununa dike doli muko audi meha; kehara mu vununa ira mane dike riva ghua ghidi ianimu; nia kehara tuna edika varihio ghu maneri, edi boka riva vanani va veha laoni ghu God, e ghua. Hei ia ta boka hioi vari va kakahei iahi mu, geala e riva ghini ghu.”

Zisas Ne Va Beanari Ira Rekaha

Maki 10:13-16; Luku 18:15-17

13 Keha rekahara dike hio mehari maneri ka Zisas, mala e boka posiri ghu manei ka paudi ari nia mala tarai toka ghidira, e ghua. Ghe ira mane ta nonofoi Zisas dike va kahe ghidi taka la va rugusinina ghu manei. 14 Ghe Zisas neke kaheina, “!Va malumuri rekaha nira edi meha ghu ka ara, oka va nodori ghu! Vununa ia Ravutu ka malauo God fate mu, e nodi mamu ira noni taghe rekaha irahi, ira ta ghua.” 15 Posi laori tuna ira paudi ka ira kamena ge va beanari ghu neke ghua Zisas, ghe neke ghahe kairi nga.

Ia Mane Foforu Ta Taghotagho

Maki 10:17-31; Luku 18:18-30

16 Kaike mane neke lao ka Zisas neke la notohi ghu, “?Mane Vari Va Kakahei Agho, heve leghutau ta veha mu ta toraina riva ghinina ara, ghe ga hioi nga ia doli soduai?” neke la ghua ghini.

17 “?Heve ghe no notohoau nga ara ghinina heve mo ta vehana?” neke ghua ungene tughuna Zisas. “Kaike God lama mu ta vehana. O leghuri ira nona ungene va gigima noto kabai hioi la ia doli soduai.”

18 “?Ira ta heve mo?” neke ghua notohonana ia mane.

Zisas neke ungene tughui, “‘Oka vari atungu ghu. Oka zave kunui ghu kerauau. Oka sisiko ghu. Oka turi ghidi sebo ghu ira keha noni. 19 O heluhelu ghidi nou mama ghe nou uke.’ ^{▼▼Kave 20:12-16; Ngengene 5:16-20} Nia ‘o namaha ghidi ira keha noni taghe ta ghua ghinigho niala taghoughi,’ ^{▼▼Hiama 19:18} ira ta ghua.

20 “Leghu ungene va gigima irahi nga mu, nato leghuri ara,” neke ghua ungene tughuna ia mane foforu. “?Heveni keha ta torai mala riva ghinina ara?”

21 Zisas neke va kahe ghini, “Noto kabai torai veha fuludu la agho, o la tatabara ghidi ira vahina leghutau ta taghori nga agho, o la vanadi ghu ira ta kuma ira rongodi, ghe go age kuruigho taghotagho nga ka malauo God fate. Meha tuna go leghuau ghu ara, o ghua.” 22 Ne nomohi ghu mane foforu ini ianimu, manei neke ghahe ka ia muko hihingo, vununa neke puina taghotagho fuludu.

23 Kahe ghua tuna iahi neke ghua Zisas ka ira nona mane ta nonofoi, “A va kahe ghini ghau ghu ara ia hohoghona, e puina mamarutana fuludu ka ia noni ta taghotagho ta haghelina ia Ravutu ka malauo God fate. 24 Ara a ke kaheini, ia kamele ta la haghele ka ia korosana nila pitipiti mu, e ke nanamo fuludu laoi ia noni ta taghotagho ta la haghelina ia Ravutu ka malauo God fate!”

25 Di nomohi ghu ira nona mane ta nonofoi ta ghuana ianimu, dike puina age nodi fere fuludu. “?Hei ghu ngaini ta boka age hio va dolinina?” dike ghua notohodira.

26 Zisas neke mato dodoghohoto laori, ghe neke kahe ghua nga iahi, “Ka ia noni mu e deo mamu ge boka ghu, nga ka God mu, vahina leghutau nga e boka mo.”

27 Ianimu tuna ghe neke ngengene vona nga Pita, “Fini, ghai nato nai kairi vahina leghutau nga, nato leghuigho ghu agho. ?Heve tuna ta age hioina ghai ghatu?” neke ghua ghini.

28 Va kahe ghidi tuna, neke ghua Zisas, “A toraina va kahe ghini ghau ghu ia hohoghona, ka ia age va foforuri God vahina leghutau nga, ta age nohe ghu ara ia Tuuna Noni ka ia nogu nonohe ginitaukela ta varanga ka ia Ravutu, ghe go age nohe haro nga molamo ka tazoi palu nonohe ginitaukela ghau ira noke leghuauo ara, mala kopuna ghidira ira tazoi palu butubutudi Isiraeli. 29 Nia heiri haroharo ta ghahe kairi ira sugadi, ba ira tahidi mane ba keradi fotati, ba nodi ukeri ba nodi mamari, ba ira nodi rekaha, ba ira nodi kava, ta meha leghuauna ghu ara mu, edi age hioi ghatu kaike ghobi fafata fuludu laorina leghutau iranimu, nia edi age hio kadoli ghatu ia doli soduai, e ghua. 30 Ghe tehini ka ira ta kenu ghatunaina mu, edi ke age va nonoghana ghatu, nia tehini ka ira ta va nonoghana ghatunaina tuna, gedi ke age kenu ghu ghatu, e ghua.”