Matthew 20

Ungene Talevaradi Ira Ta Riva Ka Ia Nunuma Gerepi

1“Ia Ravutu ka malauo God fate mu, taghe ia ta kutamai kava neke magali kave fufugho la hadu noni mala rivai tabarao ka ia nona nunuma gerepi, e ghua. 2Leghuna variveha ghini maneri ia tabara ta fani hioi ka kaike ravata, manei neke va ghahe kave laori ta la rivana ka ia nona nunuma gerepi.

3“Ka nakele leghaha ghu ka fufugho ianimu, manei neke la fini fatari keha noni ta tetu kakato ka ia makete peghuru, deona ta riva ghinina. 4Va kahe ghidi tuna neke ghua manei, ‘Ghau haro o lao o la riva ghu ka nunuma gerepi ani, a tabara ghau ghu ara ghatu taghe niha ghu ta fatana ka ghau.’ 5Lao mamu tuna dike ghua maneri. Ka ia hoatai ravata nia ka fafatana nakele lito ghu leghuna ia hoatai ravata e ghua, manei neke riva ghini haroni ianimu ka kehara. 6Ka nakele gaha ghu ka saighona ianimu, manei neke leghu laoni, neke la finiri ghu keharani ta tetu lamehara aianimu. ‘?Ne heve ghe no pepesana ghini nga ghau kamotona ravata ini deona ghe ta riva ghinina?’ neke la ghua ghidi.

7“‘Vununa ne deo hei ta boka la rivai tabarana ghai,’ dike ghua ghini.

“‘Neto ghua la, ghau haro o lao ka ia nunuma gerepi o la riva ghu,’ neke ghua ghidi ghu.

8“Ka saighona ianimu, ia mane ta kutamai nunuma gerepi, neke va kahe ghini ia mane ta kopuna ghidi maneri ta kudo haghelerira ta vanadina ghu ira tabaradi, tatanigaina ka dike riva va leleghuro ta va nonoghana ghu ka dike kusu rivaro. 9Di la hio tabara ghu ira noni dike tatanigai rivaro ka nakele gaha ghu, maneri dike la hioi haroma ia tabara malana kaike ravata kamotona. 10Ianimu tuna ghe, dike la meha nga tuna ira dike kusu rivaro ka ia fufughona. Ka ira nganganadi maneri mu, taghodi edi hio va faa laoni dike ghua. Ghe maneri dike age hioi haro molamo ia tabara malana kaike ravata kamotona. 11Di hiori ghu ira tabaradi, maneri dike age halari, dike la ngenengene ghu ka ia ta kutamai kava. 12‘Noni dike riva va leleghu irahi mu, dike riva kaike aoa ma, ghe agho no tabara va varifatari ma ka ghai nake riva ravata kamotonao ka ia sisitona taunu,’ dike ghua ghini.

13“‘Nonomohona ko, mane baere agho,’ neke ghua ia ta kutamai nunuma, ungene tughuina kaike ghu ka maneri, ‘!Ara e deo gake sebo ghau ghu! Ghita dake kusu variveha ghini mo ta mala riva ta hioina ghu ghau ia tabara ta fani hioi ka kaike ravata kamotona. 14Hioi ghu ma nou tabara nia o ghahe ghu. Ara na kabai vanani mane neke riva va leleghu iahi, ia tabara ta varifata ka tabaramu nira ghau. 15?Heve, e deo au mana ara ka heve ta boka va riva ghinina nogu rongo ini, no ghua? ?Ba, agho no kakabai, vununa na namaha ara?’”

16Kahe ghua tuna iahi neke ghua Zisas, “Heiri ira ta va nonoghana ghatunaina mu, edi ke age kenu ghatu, nia heiri ira ta kenu ghatunaina, gedi ke va nonoghana ghu ghatu, e ghua.”

Va Litona Kahe Kenui Zisas Ia Leme Ka Taghona

Maki 10:32-34; Luku 18:31-34

17Ka ia ghahe ta vona lao ghu Zisas aianihi Zerusalemu, manei neke hio nenemari ira tazoi palu mane ta nonofoi neke turi vanadi kakaike ghu. 18“Ghita mu dato ghahe vai vona age Zerusalemu, ka ta age namaha seboio maneri ghatu ia Tuuna ia Noni, ta nai laoi ghu ka ira kamedi ira hiama ta kenu nia ka ira ta vari va kakahe ghini ia vetula beana ka God, e ghua. Maneri edi age fatei ghu manei mala va lemeina, 19edi vanadi lao ghu ira noni taka Ziu ghu mala vela ghinina, puruasiminina nia mala tupila ghinina ka hekefalahata, e ghua. Ghe ka ia va litona ravata, manei e ke age tetu leghu ghatu ka ia leme.”

Ia Fanga Ka Kaike Uke

Maki 10:35-45

20Ianimu tuna ghe, neke la meha nga ka Zisas nodi uke Zemesi ghe Zone, ira palu tuunamane Zebedi, neke la torongaghituturu hinae ghu ka ia va vonavona, fangaina kaike leghutau.

21“?Heve no kabai ghinina agho?” ne ghua notohona Zisas.

Ungene tughui tuna neke ghua ia fotati, “Noto meha la agho ka ia nou Ravutu, va malumuri ko palu tuugu mane idi ta nohena kaikeu ka mautuu nia mo nia kehana ka mairiu nia mo, ta ghuana.”

22Ghe Zisas neke va kahe ghidi, “Ghau e deo go avohi ghu heve no fangaina. O boka ketuhi mo ghau ia panikenina vavahagala ta va tanai ketuhi ini ara?”

“Ghai a boka mo,” di ghua ungene tughuina.

23Ke va kahe ghidi lao tuna neke ghua manei, “Torai hohoghona mamu ta age ketuhuna ghau ghatu ka panikeni ini ara, ghe ara e deo au mana ta mala kaheina, hei mo ta mala nohena ka mautugu ini mo nia ka mairigu ini mo, e ghua. Nogu Mama neto ke va tanari malau iranimu ta maladira heiri neke faeteriro taghonai.”

24Ira keha tazo mane ta nonofoi di nomohi ghu iahi, dike age halari ka palu tatahina mane idi. 25Ghe Zisas neke kudo varighara ghidi, neke va kahe ghidi ghu, “Ghau to avohori ira faghinadi ira noni taka Ziu ghu edi puina kabai va podoli ia mana ka maneri fatedi ira noni. Nia ira nodi noni babatu ta kenu tuna gedi puina kabai va rivari ghu ira leghu nodi mana mala kopu nga e ghua. 26Nga ka vari hoataimu ghau mu, e deo ge ghua ghu ianimu. Hei ka ghau neto kabai meha varanga la, manei lamu ta toraina mala manerivana ka ghau haroharo, 27nia hei neto kabai meha kenu la, manei lamu ta toraina mala mane varituhuna ka ghau haroharo. 28Taghe ia Tuuna ia Noni la, manei deo geke meha mala riva vanani ghu taghonai, nga neke meha mala riva nia vanadi ia dolina mala hio va dolirira ira tehi noni.”

Va Onomona Pagahaina: Ia Va Podoli Nia Ia Sokei E Ghua Ia Mane Ginitaukela 20:29–27:66

Zisas Ne Va Vehari Palu Mane Ta Kivi

Maki 10:46-52; Luku 18:35-43

29Di ghahe kaini ghu Zeriko Zisas nia ira nona mane ta nonofoi e ghua, ia leghahai varigharana noni dike ghahe leleghuri maneri. 30Keha palu mane ta kivi dike nohe dike au ghu ka gheremena hangana ani. Di nomohi ghu ta vai laona Zisas aianimu mo, dito tatanigai kudokudo ma, “!Lod, Tuuna Deveti, dudumana ghini ghai!”

31Ia varigharana noni dike va kahe ghidi mo maneri palu ta vanemohona, ghe ianimu tuna ghe dike kudokudo va fafaa laoni nga, “!Lod, Tuuna Deveti, dudumana ghini ghai!” dike ghuani.

32Zisas neke nodo, ghe neke kudo laori nga, “?Heve no kabai ghinaguna ta riva vanamuna ara?” neke ghua ghidi.

33“!Lod, na kabai ke vovoho fifini!” dike ghua ghini.

34Zisas neke dudumana ghidi ghena neke posi laori ghu ira hibadi. Selu laoi ma ianimu, to ke age vovoho fifini ghu maneri palu, nia to leghui ma tuna manei, dike ghua.