Mat 21 | KjiSC | STEP | Ka ia tato age namo dufu lao Zerusalemu Zisas nia ira mane ta nonofoi e ghua, maneri dike lao ka ia malau Betifeizi ka ia Vuhukuna Olivi. Ianimu tuna ghe neke kusu tuhu kenu laori nga Zisas keha palu mane ka maneri,

Matthew 21

Ia Haghele Va Manemane Ka Zisas Ani Zerusalemu

Maki 11:1-11; Luku 19:28-38; Zone 12:12-19

1 Ka ia tato age namo dufu lao Zerusalemu Zisas nia ira mane ta nonofoi e ghua, maneri dike lao ka ia malau Betifeizi ka ia Vuhukuna Olivi. Ianimu tuna ghe neke kusu tuhu kenu laori nga Zisas keha palu mane ka maneri, 2 taremehadi ngengene irahi, “O lao ka malau ianihi kenu mo, o la finini ghu kaike dongiki ta sugori maneri aianimu taremehana kaike tuuna. O la fudahari o hio mehari ghu ka ara. 3 Hei neto notoho ghau la, o va kahe ghini nga, ‘Ia Lod ne kabai ghidi,’ o ghua ma, eto va malumu mehari ghu manei.”

4 Iahi mu ne age va ghuduvi ghu heve neke kaheio ia porofeti kahe ghuana iahi:
5 “Va kahe ghidi ira nonidi Isiraeli,
‘!Fini, ia nomu mane ginitaukela tato meha ini ka ghau!
Manei mu e unuhu, nia haghe ka kaike dongiki,
mehana ka kaike rekahana tuuna dongiki.’” ^{▼▼Zakaraea 9:9}

6 Lao tuna dike ghua ira palu mane ta nonofoi, dike la riva ghini ghu heve neke va kahe ghidio Zisas. 7 La hio mehai mamu tuna dongiki ani nia ia rekahana tuuna e ghua, gedi va kifara ghidi lao poko ghu ira taghurudi dike ghua, ghe neke nohe lao nga tuna Zisas ka fatena manei.

8 Ia leghahai varigharana noni dike kifara ghini koti ia hangana, nia kehara tuna gedi taraha hinae balatadi taghe balatadi tubo gedi ghua ghu mala kifarina hangana ani, dike ghua. 9 Ira tehi noni dike ghaghahe dike agero ghu kenuna mo nia leghuna mo Zisas, dike tataniga kudokudo,
“!Helahela ghini ia Tuuna Deveti!
!God, o va beani manei ia ta meha ka ia nou mana! ^{▼▼Samu 118:26}
Helahela ghini God ka malaunao fate!”

10 Ka ia haghele laona manei, ia malau kamoto Zerusalemu dike purudu la fifini taremehana ngilingoele dike la notoho ghu, “?Hei baini mu iahi?” dike ghua ghu.

11 “Iahi mu Zisas ia porofetina Nazareti aianihi Galili,” dike ghua ungene tughuna ira varigharadi noni.

Zisas Ne Va Kalasi Ia Sugana God

Maki 11:15-19; Luku 19:45-48; Zone 2:13-22

12 Zisas neke haghele ka ia Sugana God, neke la bozo kaveri haroharo ghu ira dike maketero nia dike tatabararo aianimu. Manei neke la va koputuri ira tevo ka ira ta hoholara rongo nia ira nonohe ka ira ta tatabarai babahulu bora, e ghua. 13 Va kahe ghidi tuna neke ghua Zisas, “God neke kahe ghua iahi ka ira Kakangava Ta Maduana, ‘!Ia nogu Suga mu, e age va kudo ghini kaike suga mala tarai.’ ^{▼▼Aesaea 56:7} Ghe ghau noto fihikini ka malau mala poika ira ta sisiko!” ^{▼▼Zeremaea 7:11} neke la ghua.

14 Ka fafata ianimu, ira ta kivi nia ira ta paheku, dike lao ka Zisas ka giliona ia Sugana God, neke va vehari ghu manei. 15 Ghe ira hiama ta kenu nia ira ta vari va kakahe ghini ia vetula beana ka God e ghua, dike age halari ka ia fafata finiri maneri ira leghutau ta namanama neke riva ghidiro manei, dike kudokudo ghuaro ghu iahi ira rekaha teri ka giliona ia Sugana God, “Helahela ghini ia Tuuna Deveti,” ta ghuana. 16 Notohi tuna Zisas dike ghua, “?No nomohi mo agho heve dike kaherira rekaha irahi?” dike ghua.

“Uve,” neke ghua Zisas. “?E deo ngama go izumi ghu ghau mu ia Kakangava ta Maduana ta kahe ghua iahi? ‘Agho noto ke va kakahe ghidi ira rekaha nia ira rekaha gogoso, ta helahela ghinighona,’” ^{▼▼Samu 8:2} ia ta ghua. 17 Ianimu tuna ghe neke ghahe kairi nga manei kave kainina malau leghaha ani, neke lao ghu Betani, la epuna aianimu ia redu.

Zisas Ne Tibirini Ia Heke Figi

Maki 11:12-14, 20-24

18 Ka ia torai fufughona, ka ia ke leghu laona Zisas aianihi Zerusalemu, manei neke nona liha. 19 Fini fata laoi tuna kaike heke figi ka gheremena hanganana ani ge lao ghu neke ghua, ghe deo fuana figi ma neke la finina, nga ira kalana kakato lama. Neke kahe ghua lao ghu iahi ka manei, “!Agho e deo boka ke age kuru fuaunani!” neke ghua ghini. Selu laoi ma ianimu, to age leleme ghu heke figi ani.

20 Di finini ghu ira mane ta nonofoi ianimu, maneri dike age nodi fere fuludu dike notoho ghu, “?Neke heve mu heke figi ani ghe, neto magali leleme hinae nga?” dike ghua.

21 Va kahe ghidi tuna neke ghua Zisas, “A va kahe ghini ghau ghu ara ka ia hohoghona, noto va hohoghona la ghau deona go ngana palupalu ghu, ghau o boka age riva ghini molamo heve nake riva ghinino ara ka heke figi iahi. Ghau o boka kahe ghua lao haroma ka vuhuku iahi, ‘O kai laoigho taghou ka tahio,’ o ghua ma, eto riva ghini ghu manei. 22 Noto va hohoghona la ghau, heve leghutau ta fangaina ghau ka ia tarai, e age vanamu mo ghatu.”

Notoho Ghinina Ia Mana Ka Zisas

Maki 11:27-33; Luku 20:1-8

23 Neke leghu lao ghu Zisas ka ia Sugana God, ke la tatanigai vari va kakaheina gilio, ira hiama ta kenu nia ira keha mane babatu e ghua, dike vona lao ka manei, dike la notohi ghu, “?Mana heve mu ta kuruighona agho, ghe no riva ghidi nga leghutau irahi? ?Hei neke vananighona mana iahi?” dike la ghua ghini.

24 “Ara a va kahe vanamu mo hei neke vanagu mana mala riva ghidira leghutau irahi, noto ungene tughui la ghau notoho iahi,” neke ghua ungene tughurina Zisas. 25 “?Hei mu neke vanani mana mala rivai seselebeanana Zone? ?God neke vananina, ba, noni?” neke ghua ghidi.

Vari turi ghua ghini tuna iahi, dike ghua maneri, “Dato kahei la ghita, ‘Neke meha ka malauo God fate,’ ta ghuana, manei e ke kahe ghua iahi ghatu, ‘Neto ghua la ianimu, neke heve ghe noke deo nga go va hohoghonai ghu Zone,’ e ghua ghini ghita ghatu. 26 Nga dato kahei la ghita ‘Neke meha ka noni,’ ta ghuana, da maugheda ka heve ta age riva ghinina ghatu ira noni, vununa ira leghu noni nga edi va hohoghonai Zone mu neke kaike porofeti, ta ghuana.” 27 Kahe ghua lao tuna iahi dike ghua, “Na zea ghini ghemai.”

Neke kahe ghua ghu iahi Zisas, “Neto ghua la, e deo ghu molamo ara va kahe ghini ghauna, hei neke vanagu mana mala riva ghidira ara leghutau irahi.”

Ungene Talevaradi Ira Palu Tatahina Mane Nia Nodi Mama

28 “?Nga heve mu nganganamuna ghau ka tuturi iahi? Kaike fafata neke au kaike mane ta au palu tuunamane. Manei neke lao ka ia tuunamane ta faa neke la kahe ghua ghu iahi, ‘Tuugu maneo, agho o lao ka ia nunuma gerepi ravata ini, o la riva ghu,’ neke ghua ghini.

29 “Ghe manei neke kahe ghua iahi, ‘Ara e deo ga lao ghu,’ neke ghua ghini. Ghe leghunana manei neke holari ia nganganana neke lao ghu.

30 “Ianimu tuna ghe, neke laoni nga ia mama ka ia keha tuunamane, neke la va kahe ghini ghu ngengene haro iranimu la. ‘Veha mo mama,’ neke ghua ghini, ghe leghunana, manei deo ma geke lao ghu.

31 “?Hei mo ka palu tuunamane irahi, neke nomohina nodi mama?”

“Ia tuunamane ta faa mo,” dike ghua ghini.

Va fafahaka vanadi tuna neke ghua Zisas, “A va kahe ghini ghau ghu ara ka ia hohoghona, ira ta hio takisi nia ira ta kikirasei tabara mo, ta kusu kenu ghauna ghau haghelena ka ia Ravutu God. 32 Vununa Zone ia ta rivai seselebeana neke to meha neke va podolo vanamu ghu mala hioina ia hangana ta lotoro, ghe ghau e deo goke taghuru kairi ghu ira sasakemu ta va hohoghonaina ghu manei, nga ira ta hio takisi nia ira ta kikirasei tabara mo mu, dike va hohoghonaina manei. Ghau noke finini mo ianimu, ghe leghunana ghau e deo ma goke kairi ghu ira sasakemu ta va hohoghonaina ghu manei.

Ungene Talevaradi Ira Mane Ponogara Ta Muko Ta Kopunai Nunuma Gerepi

Maki 12:1-12; Luku 20:9-19

33 “Nomoho mehaini keha ungene talevara iahi,” neke ghua Zisas. “Kaike noni ta kutamai kava neke numa ghini kaike nunuma gerepi, riva liloho ghini babara hidi tuna neke ghua, ghe ne toha va korosai nga tuna kaike gagama mala piriki kave kolona gerepi, nia hidi vonai tuna kaike koku mala kakae, neke ghua. Ianimu tuna ghe, neke va malumi nga manei nunuma gerepi ani mala riva ghini rongona keha nonira, ta mala hio ghini tufa harona ghu taghonai. Ianimu tuna ghe neke ghahe kaini nga rekahana malauna, neke kave lao ghu ka ia keha soloso. 34 Ka ia fafata mala pisu fuana gerepi, manei neke tuhu laori ira nona maneriva ta la hio vananina ira tufana ka fuadi gerepi ari. 35 Ghe ira mane ta kopunai nunuma dike sakomori ira nona maneriva, dike botai ghu kaikeu, atungi kehana nia va fera ghini ghahipa tuna kehanani, dike ghua. 36 Ia ta kutamai kava neke va ghahe laoini kaike pukuna noniriva ta tehi fuludu laoini ia pukuna neke kenu laono, ghe varifata haroma dike la va riva ghidira.

37 “Va nonoghanana, ia ta kutamai kava neke tuhu laoi tuna ia tuunamane taghonai, vununa ka ia nganganana manei, maneri edi boka age va vonavonai mo tuunamane ani, neke ghua.

38 “Ghe ira ta kopunai nunuma gerepi, di fini laoi ghu ia tuunamane mehanana, dike kahe ghua iahi, ‘!Ta meha ani ia ta mala ke hio kadoli kava iahi. Meha da atungi gheda ghu, e noda ghu tuna taghodai kava hio kadolo iahi ka manei!’ dike ghua. 39 Sakomi tuna gedi fera ghini kave lao ghu ka peghuruna nunuma gerepi ani, gedi atungi ghu, dike ghua.

40 “?Ka ia ke la leghu mehana ia ta kutamai nunuma gerepi, heve mu ta age va riva ghidira ghatu manei ira mane ta kopunai nunuma?” neke ghua notohona Zisas.

41 “Manei e toraina age va vavahagalari mane ta muko iranimu e atunguri ghu ghatu, nia ke va kopu ghidi tuna keha nonira nunuma gerepi ani mala ke riva ghini rongona maneri ta boka age hioina ghu ia tufana ka ia fafata pisu fuana gerepi, e ghua,” dike ghua ira hiama ta kenu nia ira ta babatu, e ghua.

42 Ke notohori tuna neke ghua Zisas, “?E deo ngama goke izumuri ghu ghau ka ira Kakangava Ta Maduana ia ta kahe ghua iahi?:
‘Ia ghahipa dike sokeio ira ta rivai suga
neto ke toraina meha ghahipa tongovonana. ^{▼▼Samu 118:22,23}
Iahi mu riva ghu ka ia Lod,
e puina namanama fuludu ghu fini laoina.’

43 “E ghua ghu iahi,” neke ghua Zisas, “ia Ravutu ka God mu, e age hio kai tamu ghatu, e ke age vanadi lao ghu ira keha noni ta age leghui ia nona lao nanafa taghonai. 44 Hei ia ta la tutu ghini fata ka ghahipa ianimu ghu mu, e age guto paparomoto ghatu, nia ghahipa ianimu neto zoghu lao la ka hei noni, noni ianimu e age biraka namunamuku ghatu, e ghua.” ^{▼▼Ka keha kakangavara e deo ge au ghu papaguaina 44}

45 Ka ia fafata nomohi ungene talevara iahi ira hiama ta kenu nia ira Farisi e ghua, maneri dike age avohi ne turi ghidi ma taghodi manei, ta ghuana. 46 Hadu ghini puhi tuna ta mala sakomina Zisas dike ghua, ghe dike maughedi ka ira varigharadi noni, vununa Zisas mu kaike porofeti, dike ghua dike nganaina maneri.