Mat 23 | KjiSC | STEP | Ianimu tuna ghe neke kahe ghua nga iahi Zisas ka ira varigharadi noni, nia ka ira nona mane ta nonofoi e ghua,

Matthew 23

Zisas Ne Kahe Ghidi Va Gigima Ira Ta Babatu Ka Ira Ziu

Maki 12:38-40; Luku 11:43, 46; 20:45-47

1 Ianimu tuna ghe neke kahe ghua nga iahi Zisas ka ira varigharadi noni, nia ka ira nona mane ta nonofoi e ghua, 2 “Ira mane ta vari va kakahei ghini ia vetula beana nia ira Farisi e ghua mu, ta kururi mana mala va fafahakaina ia vetula ka Mosese. 3 O ungene nonomoho nia leghuri o ghua ghu vahina leghutau nga ta va kahe ghini ghaura maneri. Ghe oka riva ghidi ghu ira ta riva ghidi maneri, vununa maneri edika riva leghuri ghu ira ta kaheri taghodi. 4 Maneri edi piliga varighara ghidi ira hure ta tahu, ghe gedi va hure ghidi lao nga ka ira rafadi ira noni, ghe toka ghidi laona tuna ka kaike kilo tei ge toraina deo ghu, edi ghua.

5 “Leghu ta riva ghidi nga maneri mu, suna mala hadu varanga ma ka kenudi ira keha noni. Ira bokese ta kuru lilihitidi ta va vonari maneri ka ira raedi nia kamedi, ta au lao gilio ira papaguaidi ka ira Kakangava Ta Maduana mu, edi va faari. Nia ira naroho ta rekete hinae ka ira va kukurudi poko sodu maneri mu, edi toraina va soduri haroma. 6 Maneri edi puina kabai ghidi tudu ma ira nonohe ta toraina veveha ta au kenu ka ira mahai varighara nia ka ira suga mala varighara ira Ziu, e ghua. 7 Maneri edi va ghazaghaza ghini ta ungene veharira nia ta va vonavonarira ka ira makete peghuru nia ta va kudo ghidi ‘mane vari va kakahei’ harona, e ghua. 8 Nga ghau mu eka mala va kudo ghini ghau ‘mane vari va kakahei’ ghu, vununa kaike mo mu mane vari va kakaheina ka ghau, nia ghau haroharo tuna go tatahina ghemu ghu, e ghua. 9 Nia ‘Mama’ oka ghua ghini ghu hei noni ka malau iahi peka, vununa God ka malaunao fate lama mu, nomu Mamana ghau. 10 Nia oka va malumi ghu hei noni ta va kudo ghini ghau ‘Faghina’ na, vununa kaike mo mu faghinamuna ghau, ia Mesaea lama. 11 Hei ka ghau neto kabai meha varanga la, manei mu e toraina mala nomu noniriva ghu ghau. 12 Vununa ira noni haroharo ta va vonavonari taghodi mu, e ke age nai hinaeri nia heiri ira ta nai va hinaeri taghodi tuna gedi ke age nai vonari ghu ghatu, e ghua.

Zisas Ne Kahe Tonori Ira Farisi

13 “Ka age mamaghuana fuludura ka ghau ira ta vari va kakahe ghini ia vetula beana nia ka ghau ira Farisi. !Ghau ta tatangana kobiri! Ghau ta bakisi va gimai ia makatana mala haghele ka ia Ravutu ka Malaunao God fate. Taghomu go deo ghu boka haghelemuna no ghua, ghe go va gogohari nga ira keha noni ta va sisiva haghele ghedi. ^{▼▼Keha kakangava separa ka Giriki e nai hagheli papaguaina 14 ia ta kahe ghua iahi, “Ka age mamaghuana fuludura ka ghau ira ta vari va kakahe ghidi ira vetula beana nia ka ghau ira Farisi. !Ghau ta tatangana kobiri! Ghau deo go haghava ghemu ghu seke ghidira ira fotati ta lemekai mala hio tadira ira nodi leghutau, geta ghua ghu ira nodi suga haro. Ianimu tuna ghe go rivai tarai ta sodu nga ka ira kenudi ira noni, mala noni lotorodi edi ghua ghu ira nganganadi ira noni, o ghua. Vununa ghini iahi, e age faa fuludu laoni ghu ghatu ia vavahagala ka ghau.” Fini Mk 12:40} 14 – 15 Uve, ka age mamaghuana fuludura ka ghau ira ta vari va kakahe ghini ia vetula beana, nia ka ghau ira Farisi. !Ghau ta tatangana kobiri! Ghau ta ghahe va noghari leghu pelodi nga ka ia tahi nia ka ia kava mala hio haghelina kaike noni taka Ziu ghu ka ia nomu va hohoghona, ianimu tuna ghe, go va muko laoi ghemuni nga tuna manei taghe palu fafata muko fuludu lao ghauna taghomu mala haghelena gehena.

16 “!Ka mamaghuanara ka ghau mane babatu ta kivi! Vununa ghau no kahe ghua iahi, ‘E deo fafahakana ma ta va bebereana laona ka ia Ringifota ta Maduana God; nga ia ta va bebereana lao ka ia golu ka giliona ia Ringifota ta Maduana God mo, ta toraina deona ge mala buhuti ghu,’ no ghua. 17 !Ghau ira ta kivi nia kingo! ?Heve mo ta tongovona fuludu laona? ?Ia golu, ba ia Ringifota ta Maduana ka God ia ta va maduanai golu ani? 18 !Nia ghau no kahe ghua haro iahi, ‘Noto va bebereana lao la ka ia sopebeana, e boka ke buhuti mo, nga noto va bebereana lao la ka ia veala ka ia fatena sopebeana mu, ta toraina deona ge mala buhuti ghu,’ no ghua. 19 !Ka kivira ghau! ?Hae mo mu ta tongovona fuludu laona, ia veala, ba ia sopebeana ta va maduanai ia veala? 20 Noto va bebereana lao la ghau ka sopebeana ani, ghau noto va bebereana lao haroma ka vahina leghutau ta au ari nga ka fatena sopebeana ani. 21 Nia noto va bebereana lao la ghau ka ia Ringifota ta Maduana God, ghau noto va bebereana lao haroma ka God, ia ta au aianimu. 22 Nia noto va bebereana lao la ghau ka malaunao God fate, ghau noto va bebereana lao haroma ka ia nonohe ginitaukela God, nia ka hei ta nohe ani ka nonohe ginitaukela ianimu, e ghua.

23 “Ka age mamaghuana fuludura ka ghau ira ta vari va kakahe ghini ia vetula beana nia ka ghau ira Farisi. !Ghau ta tatangana kobiri! Ghau no vanani God kaikeu ka ira tazo tufa ka ira vahina leghutau ta taghori nga ghau, geta ghua ghu ka ira leghutau teri ka ia nunuma ta mala va ghanoghanori ira mahai, ghe ghau e deo go leghuri ghu ira leghutau ta tongovodi fuludu lao ka ia vetula, taghe ia va totonu, ia vari dudumanai nia ia hohoghona. Irahi mu geala o riva ghidi tudu mamu ghau, ghe oka ngana kai ghu riva ghidira ira keha leghutau ta tongovodi fuludu lao. 24 !Ghau mane babatu ta kivi! Ghau no banabana fuludu leghurira ira puhi teri, taghe eka puina au lao ghu kaike lalango ghu ka ira ghemu ketuhu, ira ta ghua, ianimu tuna ghe goke huhughuri nga tuna ira tongovodi ungene va gigima ka God. Ianimu ghu mu, taghe ta vaigulinia kaike kamotona kamele, ghe ta deo nia nga go avohi ghu, e ghua.

25 “Ka age mamaghuana fuludura ka ghau ira ta vari va kakahe ghini ia vetula beana nia ka ghau ira Farisi. !Ghau ta tatangana kobiri! Ghau no tihi va mamalahuri ira peghurudi ira nomu panikeni nia peleita, ghe ira giliodi tuna ge foudu ghu ka kabakabai leghutau nia luluto, e ghua! 26 !Ghau Farisi ta kivi! Kusu tihi va mamalahuina nga giliona panikeni nia, ghe ge age mamalahu nga molamo ia peghuruna.

27 “Ka age mamaghuana fuludura ka ghau ira ta vari va kakahe ghini ia vetula beana nia ka ghau ira Farisi. !Ghau ta tatangana kobiri! Ghau taghe ira lianga beku ta pedi va ghihori, ta veveha mato laorira ira peghurudi no ghua, ghe ka ira giliodi edi fouduai huma nia vahina kokolodi boe nga, e ghua. 28 Taghe ianimu, no ghua ghau. Peghuru mu, o fifini noni vehamu, ghe gilio ka hihingomu nira tuna, go fouduai tatangana kobiri ghu, nia muko ghu, no ghua.

29 “Ka age mamaghuana fuludura ka ghau ira ta vari va kakahe ghini ia vetula beana nia ka ghau ira Farisi. !Ghau ta tatangana kobiri! Ghau no riva ghidi va veha ira bekudi ira porofeti, nia va ridiradangari tuna ira bekudi ira noni ta lotoro, no ghua. 30 Ianimu tuna ghe go kahe ghua nga iahi, ‘Gake au taremehadi meha la ghai ira faamai, geala ghai e deo ma ga boka holara taremehadi ghu maneri atungurira ira porofeti,’ no ghua. 31 Ghau mu, noto kahe kave ghau ghu taghomu ta pagusu mehana ka maneri dike atunguriro ira porofeti sepao. 32 Lao ba ghau. Va ghuduvi heve dike tataniga ghini mehao maneri ira faamu. 33 !Ghau adogho minga, nia ira tuudi ira adogho! ?Heve o ghua ghe, go boka peholo ghini nga ghu ia vavahagalana gehena? 34 Ara a tuhu vanamu age ghatu ira porofeti, ira mane ta avoavoho, nia ira mane ta vari va kakahei ghini ia vetula beana, e ghua. Ghe ghau o age atunguri kehara, tupila ghidi ka hekefalahata kehara, nia puruasimiri kehara ka giliodi ira suga mala varighara ira Ziu o ghua ghatu, bozo kairira ka ira leghu malau leghaha nga. 35 Leleghonana mu, e riufu age ka ghau ghatu ia vavahagalana ia atunguri ira ta lotoro ghedi, tataniga ka Ebolo ia mane ta lotoro e dufu ghu ka Zakaraea ia tuunamane Berakaea noke atungio ghau ka varihoataina ia Ringifota ta Maduana God nia ia sopebeana, e ghua. 36 A toraina va kahe ghini ghau ghu ka ia hohoghona, ghau ira noni ka ubalana noni iahi ghatunaina mu, ta age zoghu ghauna ghatu ira vavahagaladi leghu vari atungu irahi nga.

Ia Namaha Ka Zisas Vanani Zerusalemu

Luku 13:34, 35

37 “!Kei Zerusalemu, Zerusalemu! Agho ta atunguri ira porofeti nia ta roborobo ghidi ghahipa ira nona noni ta hio nonomoho neke tuhu ageriro God ka agho. Tehi fafatani ara nake kabai hio varighara ghidi ira nou rekaha, taghe ta ghua nia ia kokorako ta varighara ghidi nira ira tuuna ka ira pekana laena a ghua, ghe ghau e deo goke va malumuau ghu ta ghua ghini ghauna ianimu. 38 Fini, ia Sugana God ka ghau mu, e age ghahe kaini, e korogha ghu ghatu. 39 A va kahe ghini ghau ghu ara, ghau e deo boka ke age fini leghuaunani ara, o vuhai kahe ghua ghu iahi, ‘God va beani manei ia ta meha ka ia babaolona ia Lod!’” ^{▼▼Samu 118:26}