Mat 24 | KjiSC | STEP | Ne kave kaini ghu Zisas ia Sugana God, ira mane ta nonofoi dike lao ka manei dike va kahe ghini ghu ta mato laorira ira suga ka ia Sugana God.

Matthew 24

Ia Sugana God E Age Huara Ghatu Ne Ghua Zisas

Maki 13:1-2; Luku 21:5-6

1 Ne kave kaini ghu Zisas ia Sugana God, ira mane ta nonofoi dike lao ka manei dike va kahe ghini ghu ta mato laorira ira suga ka ia Sugana God. 2 Ghe manei neke va kahe ghidi, “?No finiri mo ghau leghu suga irahi nga? !A toraina va kahe ghini ghau ghu ara, e deo kaike ghu ka ghahipa irahi ta ke age auna ghatu ka dike auro; maneri haroharo edi age huara hinae ghatu!”

Ira Lelemeana Nia Ira Vari Kikipanai

Maki 13:3-13; Luku 21:7-19

3 Ne nohe ghu Zisas ka ia tabafena Vuhukuna Olivi, ira nona mane ta nonofoi dike lao kakaike ka manei dike la notoho ghu, “?Niha ghe ge la dufu meha nga mu leghu irahi nga, nia heve mu va ghilaghila ta auna ghatu ka ia la leghu meha agho, nia ka ia va nonoghana malau iahi peka, e ghua?”

4 Va kahe ghidi tuna neke ghua Zisas, “Oka va malumi ghu hei noni, ta meha babatu va zea ghauna. 5 Vununa tehini ta la mehara ghatu ka babaologu ini ara, edi meha kahe ghua ghu iahi, ‘Ara lamu ia Mesaea,’ edi meha ghua, edi age hio va zeari ghu tehi nonini. 6 Nia ghau o age nomohori haroma ghatu ira gurumadi magara gherememu mo nia ira nonomohodi magara ta la au meha varihau e ghua, ghe oka naologhabili ghu. Uve, leghutau irahi mu edi toraina meha mamu, ghe ia va nonoghana e deo nga ge la meha ghu. 7 Ira soloso nia ira ravutu, edi age vari magara ghatu, nia e age au tuna ia lemei mahai nia ira kuzo e ghua ka ira leghu pelodi nga ka malau iahi peka. 8 Ghe leghu irahi nga mu, suna tatanigaidi ma ira leghu lelemeana ta la meha nga ghatu.

9 “Ianimu tuna ghe gedi age sakomo ghau nga, gedi ngovangovala va muko ghau ghu, nia atungu ghau tuna, edi ghua. Leghu noni nga ka ira leghu pelodi nga ka malau iahi peka edi age kikipana ghini ghau ghatu, vununa ghau no leghuau ara. 10 Ka fafata ianimu tehi nonini edi age taghuru kaiau ara, edi age vari namahai sesebo ghu nia vari kikipanai ghu, e ghua. 11 Tehi porofeti ta seseboni ta age podolora ghatu, edi age babatu va zeari ghu tehi nonini. 12 Ia sasake age riraha ghatu, e age va kaporo hinaei ghu ia vari namahai ka ira tehi noni. 13 Ghe heiri ira ta tetu va gima ta dufu ghu ka ia va nonogahana mu, ta age hio va dolirira ghatu God ka ia va kilasa maladi ira sasake ka maneri. 14 Nonomoho Ta Veha ghinina Ravutu iahi mu, e age tuturi ghini beana ghu ghatu ka malau kamoto iahi peka, edi nomohi haro ghu ira leghu soloso nga; ianimu tuna ghe ge la meha nga tuna ghatu ia va nonoghana.

15 “Ghau o age finini ghatu ‘Ia Leghutau Ta Mumukoana’ ^{▼▼Daneli 9:27; 11:31; 12:11} neke ghua ghinio Daneli ia porofeti. Manei e age tetu ghatu ka giliona ia malau ta maduana.” !Heiri haroharo ta izumi iahi, va sisiva fafahaki ghu! 16 “Heiri dito au la Zudia ka fafata ianimu, edi toraina pelo lao ka ira voruhu. 17 Hei ia ta au ka ia fatena nona suga mu, eka ke hinae la boroza ghu ka ia giliona suga. 18 E ghua haroma ka hei ia ta riva ka ia nona galahena nunuma, manei eka ke leghu lao ghu, ge la hioi ghu ia nona koti. 19 Ka mumukoanara ka ravata iranimu ghatu ka ira fotati ta potei rekaha nia ka ira uke ta boroi rekaha gogoso, e ghua. 20 Ara na Tarai fangai God eka mala age au la ghu ka ia rabongi, ba, ka ia Ravata Mala Maghoso, ia pelo ka ghau. 21 Vununa ia lelemeana ka fafata ianimu ghatu mu, e puina age mamaghuana fuludu laoi heve neto ke dufuna sepao ka malau iahi peka, nia e deo haroma leghutau ta varifata laona ka ianimu ta ke age dufunani ghatu, e ghua. 22 Ghe God neto ke kusu kodaka va ponoeri ravata iranimu. Geke deo la manei riva ghinina ianimu, geala eto deo hei ta dolina. Ghe vununa ghidi ira nona fafaetedi noni taghonai, e age kodaka va ponoe hinaeri ghu God ghatu ira ravata.

23 “Ghe neto kahe ghua la iahi kaike noni, ‘Fini, iahi ia Mesaea,’ ba ‘Ianihi mu maneina,’ dito ghua la maneri, oka va hohoghonari ghu. 24 Vununa ira mesaea ta sesebo nia ira porofeti ta sesebo e ghua, ta age podolora ghatu. Maneri edi age riva ghidi ghatu ira leghahai hahaima va ghilaghila ta fefereana, mala geta ghua ghu ira nona noni faetaidi taghonai God ghe, edi sebo va mukori haro ghu to boka la, edi ghua. 25 !O nonomoho ghu! Ara nato kusu va kahe ghini ghau heve ta dufuna ghatu.

Ia Va Paluna Meha

Maki 13:24-27; Luku 21:25-28

26 “Dito ghua ghini ghau la iahi kehara ‘Fini, ia Mesaea neto kave lao ka malau koroghana ta karangona ani,’ dito ghua la maneri, oka lao ghu aianimu. Ba, ‘!Fini, manei ta poika iahi,’ dito ghua la maneri, oka va hohoghonari ghu! 27 Vununa, taghe kapi ta va fegala kamoti niala ia kolanga fate sipa mehana fateo mo ta laona ghu pakao mo, e age ghua molamo ghatu ia meha ka ia Tuuna ia Noni. 28 Taghe ia varighara la ka ira aoao ta va podoli kaike tini lemena ne au gherememo ia ta ghua, e ghua molamo ghila irahi, e va podoli haro ghu ia va nonoghana neto namo, ta ghuana.

29 “Selu laorina ravata ta mamaghuana iranimu,
‘ia taunu e age nagoromo,
ia hihile e age deo ge va meha fegala ghu,
ira babaghunu edi age riufu ka kolangana fate,
nia God e age kuzo va rizuri vahina leghutau nga ka kolangana, e ghua.’ ^{▼▼Aesaea 13:10; 34:4}

30 Ianimu tuna ghe, ge la podolo meha nga tuna ka kolangana fate, ia va ghilaghilana ia meha ka ia Tuuna ia Noni, ta age au ghu ghatu ia nakele adoꞌado ka ira leghu soloso nga ka malau iahi peka, ka ia age finini maneri ia Tuuna ia Noni, la mehana ka ira toba ka kolangana, taremehana mana nia pelara ta varanga. 31 Ianimu tuna ghe, ge tuhu laori nga tuna manei ira nona engizeli taremehana ia kigolona kufili, mala varighara ghidi mehara ira nona noni faetaidi ta au hae ghe hae ghu ka kaike va kukuruna malau iahi peka ta dufu ghu ka ia keha va kukuruna.”

Ia Ungene Talevarana Ia Heke Figi

Maki 13:28-31; Luku 21:29-33

32 Kahe ghua tuna iahi neke ghua Zisas, “O hio avoavoho ghu ka ia heke figi ghatunaina. Neto sekere vona la ira hobona to age tatanigai kuru kalana ghu, to avohi ma ghau mu ia hoatana komuhu ta torai dangava ba neto ke namo, ta ghuana. 33 Taghe iala molamo, noto finiri la ghau tatanigai dufudira leghutau nake kaheri nake meha idi ghu ara, o boka age avohi mo ghau ghatu tato puina namona ia leghu meha ka manei ka ia torai makatana. 34 A toraina va kahe ghini ghau ghu ka ia hohoghona, malau iahi peka e deo ge age nogha ghu, e vuhai age dufu ghu leghu irahi nga. 35 Ia kolanga nia malau iahi peka mu, edi age nogha, nga ira ngengene ka ara mu, edi age au toghunai.

E Deo Hei Ta Avohina Ia Ravata, Ba, Ia Fafata

Maki 13:32-37; Luku 17:26-30, 34-36

36 “E deo ghu hei ta avohina mu ia ravata, ba ia fafata ta age dufu ghatu leghutau irahi, geta ghua ghu ira engizeli ka kolangana, ba taghonai ia Tuuna. Taghonai ia Mama lama ta avohina. 37 Taghe neke ghuao la ka ia fafata Noa, e age ghua molamo ghatu, ka ia ke la leghu mehana ia Tuuna ia Noni. 38 Ka ira kusu ravata, ghe neke dufuno nga ia ologho, ira noni dike au va manemane ma mahai ketuhuna nia varihiona e ghua, neke vuhai dufu ghu ia torai ravata neke haghe laono Noa ka ia nona zaghimaha. 39 Ira noni e deo ma ghe gedi ke ngana avohi ghu heve ta age dufuna ghatu, to la vuhai hio kairi haroharo ghu ia ologho. Taghe ianimu e age ghua ghatu ka ia la leghu mehana ia Tuuna ia Noni. 40 Ka fafata ianimu, palu mane edi age riva varighara ghatu ka kaike galahena nunuma mo; kaike ghu e age hio ghahei, ia keha ge age nai hinaei ghu, e ghua. 41 Palu fotati edi age va namuku falao varighara ka kaike mala va namunamuku mo; kaike ghu e age hio ghahei, ia keha ge age nai hinaei ghu, e ghua.

42 “O va tana ghu, vununa ghau e deo go avohi ghu ka ravata heve ta ke la mehana ghatu ia nomu Lod. 43 Ghe o avohi iahi: Ia ta kutamana suga ta avohi niha ta la torai mehana ia noni ta sisiko mu, e au va tana, deona ghe ge va malumi ghu noni ianimu ta la haghele sisikona ka nona suga ani. 44 Ghau o torai au va tana tudu ghu molamo leleghu fafata. Vununa ia Tuuna ia Noni, e la meha ghatu ka ia fafata ta deo go ngana fati ghu ghau.

Ungene Talevaradi Ira Palu Kokolodi Noniriva

Luku 12:35-48

45 “?Hei ghu mu ia noniriva ta avoavoho nia hohoghona ne nai va kenuina ia faghina, mala fini kopu ghidira ira keha noniriva ka ia nona suga, mala vanadira ira ghedi ghano ka ia torai fafatana? 46 Ka veha ghenara noniriva ianimu neto meha fini fati la ia faghina ka manei riva ghidi va vehara manei riva iranimu ka ia la leghu mehana. 47 A va kahe ghini ghau ghu ara ka ia hohoghona, ia faghina e age nai va kenui ghatu noniriva ianimu, mala kopuna ghidira ira vahina nona leghutau ta taghori nga manei. 48 Nga neto mukona noniriva la manei, neto ngana ghua ghu iahi, ‘Ia faghinagu mu e deo ge age magali leghu meha ghu,’ neto ghua la, 49 neto age tatanigai botari ghu ira keha noniriva, nia mahai ketuhu taremehadi tuna ira ta ketuhu gogosu ta ghuana, 50 ia manefaa e age leghu meha ghatu ka ia fafata ta au va memelukai manei. 51 Manei e age kodaka va paparomoti ghatu noniriva ianimu, e kai kave taremehadi lao ghu ira ta tatangana kobiri, ka ia malau ta age au ia nakele adoꞌado nia ghani va ghiriti, e ghua.