Matthew 25

Ungene Talevaradi Ira Tazo Ghase Foforu Ta Kupi

1“Ka fafata ianimu, ia Ravutu ka God mu taghe iahi e age ghua. Kaike fafata, tazo ghase foforu dike hiori ira nodi zuta dike kave lao ghu mala la dufuina kaike mane ta va tanai varihio. 2Gaha ghu ka maneri mu dike noni kingodi, nia ira keha gaha ghu tuna gedi noni avoavohodi ghu, dike ghua. 3Ira gaha fotati ta kingo mu deo gedi ke hio va kunu oele ghu maladira ira nodi zuta, 4ira keha gaha fotati ta avoavoho tuna, gedi ke hio botolo oele taremehadi lao ghu ira nodi zuta, dike ghua. 5Ne mamahuge ghu la sabaranana ia mane ta mala varihio, maneri haroharo dike to age epu doka dike epu hinae ghu.

6“To age hoatai redu ghe, neke la kudo nga tuna kaike noni, ‘!To meha iahi ia mane ta mala varihio! !Kave meha o dufui ghu!’ neke la ghua.

7“Baghunu vona haro tuna gedi vidulu va faa vonari ghu ira nodi zuta dike ghua ira tazo fotati. 8Ianimu tuna ghe, dike fanga lao nga ira gaha fotati ta kingo ka ira keha fotati, ‘O vanamaina ko keha birusudi ka nomu oele nira, vununa nomai zuta idi dito age namo leme,’ dike ghua.

9“Ghe ira gaha ta avoavoho dike kahe ghua iahi, ‘E deo ge fata ghu ka ghita haro, nga o lao, o la tabarari ghu keha nomu taghomu.’

10“Ghe dike ghahe la tatabara oele ngama maneri, to sabara ghu ia mane ta mala varihio. Ira gaha dike va tanaro di age haghele taremehana lao manei ka ia mahai varihio, ghe neke bakisi nga tuna ia makatana.

11“Leghuna ianimu, ghe dike sabara nga tuna ira keha gaha fotati, dike la kudo ghu, ‘!Faghina agho, faghina agho! Tobehe vanamai ko makatana ini!’ dike ghua.

12“Ghe manei neke kudo leghu lao, ‘!Ara e deo ga avoho ghau ghu!’ neke ghua ghidi.”

13Neke ghua ghu iahi Zisas, “O au va tana ghu, vununa ghau e deo go avohi ghemu ghu ia ravata, ba ia fafata ta dufu leghu irahi nga.

Ia Ungene Talevaradi Ira Lito Noniriva

Luku 19:11-27

14“Ia Ravutu ka malauo God fate mu, taghe kaike mane neke kave laono ka kaike ghaghahe e ghua haroma. Manei neke kudori ira nona noniriva neke vanadi rongo ghu mala va tehi vananina ka ia fafata ta ghahe taghonai. 15Ia mane neke sopai vanadi rongo ira nona maneriva leghurira ira sopai avoavoho ka maneri. Ka ia kusu maneriva, manei neke vanani lao gaha togha kunegele ta golu; ka ia va paluna, manei neke vanani palu togha, nia ka ia va litona tuna ge vanani lao ghu kaike togha, neke ghua. Ianimu tuna ghe, neke kave lao nga ka ia nona ghaghahe. 16Ia maneriva neke posirio gaha togha kunegele ta golu, magali ma neto mala riva ghu ia rongo ka manei neke va podolori ghu keha gaha toghani. 17Taghe iala neke ghua molamo ia va paluna maneriva neke va podolori ghu keha palu toghani. 18Nga ia maneriva neke posi kaike togha kunegeleo mu, neke la toha korosa ka ia kava, ghe neke la poikari nga ira nona rongo ia manefaana.

19“To age sepa fuludu leghuna ianimu, ghe neke la leghu meha nga ia manefaa ka ia nona ghaghahe. Kudori tuna ge notohori ghu kabai avohina heve dike va riva ghidira ira nona rongo, neke ghua. 20Ia maneriva neke hiorio gaha togha rongo, neke hio laori keha gaha togha rongoni ka fatena ira keha gaha togha neke posirio. ‘Manefaa agho, agho noke vanagu gaha togha kunegele, nia irahi keha gaha toghani nake va podolorira ara, e ghua,’ neke la ghua.

21“‘!Toraina Veha fuludu, agho nogu maneriva ta veha nia hohoghona!’ neke ghua ia manefaana. ‘!Agho no leghu puhi nia hohoghou ka ia riva agho, no posi va vehai ghu birusuna rongo iahi, ghatunaina ara a nakaigho ghu mala kopuna ghidira keha leghahai rongo! !Meha da va manemane varighara ghu!’

22“Ianimu tuna ghe neke la haghele meha nga ia maneriva neke vananio palu togha kunegele. ‘Manefaa agho, agho noke vanagu palu togha kunegele, nia irahi keha palu toghani nake va podolorira ara ka nake riva ghidiro, e ghua.’

23“‘!Toraina Veha fuludu, agho nogu maneriva ta veha nia hohoghona!’ neke ghua ia manefaana. ‘!Agho no leghu puhi nia hohoghou ka ia riva agho, no posi va vehai ghu birusuna rongo iahi, ghatunaina ara a nakaigho ghu mala kopuna ghidira keha leghahai rongo! !Meha da va manemane varighara ghu!’

24“Ianimu tuna ghe, neke la meha nga ia maneriva neke nai vananio kaike togha kunegele, neke la kahe ghua ghu iahi, ‘Manefaa agho, ara na avohigho agho mu kaike mane ta puina marutana; o hio ghano ghu ka noke deono go numa ghidi ghu nia o varigharai ghano ghu ka noke deono go fusai subudi ghu, e ghua. 25Ara nake maughegu ta kai tauna nou rongo idi, nake kave la poikari ghu noura ka ia giliona kava. Irahi la ghu nou rongora agho.’

26“Ghe ia manefaa ka manei neke kahe ghua iahi, ‘!Agho maneriva ta muko nia toali! Agho to avohi ta hio ghanona ara ka nake deono ga numa ghidi ghu, nia ta varigharai ghanona ara ka nake deono ga fusai subudi ghu, e ghua. 27Agho mu geala o nakai hagheleri nogu rongo idi ka ia banga e mala tehi ghu maneri, ghe gake leghu meha hiori nga ara.

28“‘Hio kai tana rongo iamu ka manei, o vanani lao ghu ta kurui tazo togha kunegele nia. 29Ka heiri ta riva va vehari heve ira ta vanadi mu, e tehi laoni ta ke vanadira, edi toraina age tehiri fuludu ghu ghatu. Nga ka ira taka hohoghodi ghu ka ira nodi riva mu, geta heve tei ta aurira maneri ghe, e age hio kai tadi ghatu. 30Nga maneriva ta deo lighorona iahi mu, o sakomo kai laoi peghuruo ka ta nagoromo ani; aianimu ta la nakelena manei, la ghani va ghiritina hinganari.’

Ia Varifate Va Nonoghana

31“Ka ia mehana ia Tuuna Noni ka ia nona mana ta pelara, taremehadi ira nona engizeli haroharo, manei e la nohe ghatu ka ia nonohe ginitaukela. 32Ira noni ka ira leghu soloso nga edi la varighara ghatu ka kenuna manei, mala fotarira ka sopai pukudi, taghe ta ghua niala ia mane ta kopunai sipisipi ka ia fotari manei ira sipisipi ka ira gouti. 33Manei e age nakairi ghatu ira ta lotoro ka ia mautuna mo, nia ira ta muko tuna ka ia mairina mo, e ghua.

34“Ianimu tuna ghe, ge age kahe ghua nga iahi ghatu ia mane ginitaukela, ka ira ta au mautuna mo, ‘!Meha, ghau ira ta va beana ghau nogu Mama! Meha o hioi ghu ia hio kadolona ia ravutu neke va tana vanamuo ka ia tataniga vuha mehanaoni malau iahi peka. 35Vununa ara nake nogu liha, noke valihau ghu ghau. Ara nake parangoso, noke va ketuhuau ghu ghau. Ara nake noni mehagu, noke hio hagheleau ghu ghau ka ira sugamu. 36Ara nake poko pereu, noke tufau poko ghu ghau. Ara nake fogarau, noke hio suteau ghu ghau. Ara nake au ka pipiliga, noke sigho ghinagu ghu ghau.’

37“Ghe ira noni ta lotoro dike notohi, ‘?Lod, nihao nake finighona nou lihana agho nake valihaighona ghu ghai, ba parangosona agho, nake va ketuhighona ghu ghai? 38?Ba, nihao nake finighona ta noni mehauna agho, nake hio suteighona ghu ghai, ba poko pereuna agho, nake tufaigho pokona ghu ghai? 39?Nihao nake fini fatighona fogarighona, ba auna agho ka pipiliga, nake age sigho ghinighona ghu ghai?’

40“Ia Mane Ginitaukela e age ghua iahi ghatu ungene tughurina, ‘!A toraina va kahe ghini ghau ghu ka ia hohoghona, heve leghutau tei noto ke riva ghini la ghau ka kaike ghu ka ira noni taka suri tongovodi ghu, ghau noke riva ghini ianimu vanagu ara!’

41“E age kahe ghua tuna iahi ghatu ia Mane Ginitaukela ka ira noni ta au ka ia mairina mo, e ghua, ‘!Ghau ira ta au ka ia pekana tibiri God, o ghahe ghini ghau lao ka ia totoi ta doli fuludai neke va tana vananio ia Faghinadi ira nazahi nia ira nona engizeli, e ghua! 42Vununa ara nake nogu liha, ghe ghau deo goke valihau ghu. Ara nake parangoso, ghe ghau deo goke vanagu ketuhu ghu. 43Ara nake noni mehagu, ghe ghau e deo goke hio hagheleau ghu ka ira sugamu. Ara nake poko pereu, ghe ghau e deo goke tufau poko ghu. Ara nake fogarau nia nake au ka pipiliga, ghe ghau e deo goke hio suteau ghu.’

44“Ianimu tuna ghe, dike ungene tughui nga maneri, ‘?Lod, nihao nake finighona ghai kovorona, ba parangosona agho, ba noni mehauna, ba malangai pokona agho, ba fogarighona nia auna agho ka pipiliga, ghe nake deona ghai gake toka ghinigho ghu?’

45“Manei e age ghua iahi ungene tughurina, ‘A va kahe ghini ghau ghu ka ia hohoghona, noto ke deo la go toka ghidi ghu ghau heiri ira noni taka suri tongovodi ghu, ghau e deo goke toka ghinagu ghu ara.’

46“Noni iranimu ghu mu, edi age hioi ghu ghatu ia vavahagala ta deo va nonoghana, nga ira noni ta lotoro mu edi lao ghatu ka ia doli ta au toghunai.”