Mat 26 | KjiSC | STEP | Ne age nogha ghu Zisas kaherira leghu irahi nga, manei neke kahe ghua iahi ka ira nona mane ta nonofoi,

Matthew 26

Ia Vatovato Mala Atungi Zisas

Maki 14:1, 2; Luku 22:1, 2; Zone 11:45-53

1 Ne age nogha ghu Zisas kaherira leghu irahi nga, manei neke kahe ghua iahi ka ira nona mane ta nonofoi, 2 “Ia ngana leghuna ia Ghahe Fuludu mu, palu ravata mo ta au mehana ghatunaina e age tataniga ghu, taghe ta avohi niala ghau. Ka fafata ianimu lamu ta age nai laoina maneri ghatu ia Tuuna Noni, ka ira kamedi ira kana, ta tupila ghini ghu ka hekefalahata.”

3 Ka fafata haro ianimu la, ira hiama ta kenu nia ira keha mane babatu e ghua, dike haedu ka ia sugana Kaefasi, ia hiama ta pauna, 4 dike va puhipuhi ghini ghu mala sakomo poikaina Zisas, ta va lemeina ghu. 5 Dike kahe ghua ghu iahi, “Ghe ghita daka toraina riva ghini ghu ka ia ngana leghuna Ghahe Fuludu, vununa ira noni edi age va vuvuha magara ghatu.”

Mere Ne Oranga Ghini Sedi Ia Belehuna Zisas

Maki 14:3-9; Zone 12:1-8

6 Ka fafata iahi, Zisas neke au aianihi Betani ka ia sugana Saemoni, ia mane ta dufui lepa. 7 Ka ia fafata va sasaighona maneri, kaike fotati neke haghele meha taremehana kaike rekahana botolo ta parimisi, ta riva ghini ka ghahipa ta va kudo ghini alabasita, ta fouduai sedi ta torai vona tabarana, neke la oranga ghini lao ghu ka ia belehuna Zisas. 8 Ira mane ta nonofoi di finini ghu ta ghuana ianimu, dike age halari. “Ka pepesanai rongora, 9 sedi iahi mu geala e boka tatabara ghini mo ka keha leghahai rongo, e vanadi lao ghu ira ta malanga,” dike ghua.

10 Ghe Zisas neke ungene tughuri, “?Heve no ghua ghe, no fufu ghini nga fotati iahi? Heve ta va riva ghinagu iahi manei mu kaike leghutau ta namanama. 11 Ira noni ta malanga mu, edi au taremehamu tudu ma ghau ghatu, nga ara mu, e deo ga age au taremehamu tudu ghu ghatu. 12 Ka ia va oranga ghinagu sedi manei, manei ne va tanai tinigu ini malana ia giugilu ka ara. 13 A toraina va kahe ghini ghau ghu ka ia hohoghona, hae ghe hae ta la tuturi beana ghinina ia Nonomoho Ta Veha ka malau iahi peka, heve neke riva ghinio fotati iahi, edi age turi ghini ghatu maneri mala ngana leghuina manei.”

Zudasi Ne Va Uvei Ta Namaha Seboina Zisas

Maki 14:10, 11; Luku 22:3-6

14 Ianimu tuna ghe, neke lao nga ka ira hiama ta kenu Zudasi Isikarioti, kaike ghu ka ira tazoi palu mane ta nonofoi, 15 neke la notohori ghu, “?Niha ghu tabara ta vanaguna ghau, nato toka ghini ghau la ara mala namaha sebo vanamuna Zisas?” neke ghua ghidi. Taho kave vanani lao tuna litofulu kunegeledi siliva, dike ghua. 16 Ka fafata ianimu ta vai vona ghu, Zudasi neto ke tataniga haduhadui ia malau nia ia fafata ta veha, mala namaha seboina Zisas ta vanadi laona ghu ira ta kana ghini.

Ia Va Sasaighona Ka Ia Lod

Maki 14:12-26; Luku 22:7-20; Zone 13:21-30

17 Ka ia va kenuna ravata ka ia Mahai Ngana Leghuna ia Bereti ta Falao Kakato, ira mane ta nonofoi dike meha ka Zisas dike notohi ghu, “?Hae mo no kabai ghinina agho ta la va tanaina ghai ia mahai va sasaighonana Ghahe Fuludu?” dike la ghua ghini.

18 “Ka ia la haghelemu ka ia malau leghaha, ghau o la finini ghatu kaike mane,” neke ghua ghidi. “O va kahe ghini, ‘Ia Mane Ta Vari va Kakahei ne ghua iahi: To dufu tuna ia fafata ka ara ta mala age mahainina ia mahaina Ghahe Fuludu ka sugana agho taremehadi ira nogu mane ta nonofoau, ne ghua’” o la ghua ghini. 19 Riva ghini tuna taghe neke va kahe ghidiro Zisas, dike ghua ira mane ta nonofoi, dike la va tanai ghu ia va sasaighonana Ghahe Fuludu aianimu.

20 Ka ia saighona, Zisas nia ira mane ta nonofoi e ghua, dike la nohe hinae dike mahai ghu. 21 Ka ia fafata mahai ta au ghu maneri, Zisas neke kahe ghua iahi, “A va kahe ghini ghau ghu ka ia hohoghona, kaikeu ka ghau, e age namaha seboau ara ghatu.”

22 Maneri dike age puina muko hihingodi, dike sopai notohi ghu manei, kahe ghuana iahi, “?Lod, hei mo baini, ara?”

23 “Kaikeu ka ghau ta mahai taremehagu ara ka disi iahi, e age namaha seboau ara ghatu. 24 Vununa ara, ia Tuuna Noni mu, a toraina mala age leme, taghe neke kahe kaveio sepaoni ka ira Kakangava Ta Maduana. Ghe ka lelemeanara ka mane ta age namaha seboau ianimu ara ghatu. !E veha fuludu ka mane ianimu, geke deo la ma ge doli meha ghu!”

25 Zudasi ia ta age namaha seboi Zisas neke notoho molamo, “?Mane Vari Va Kakahei Agho, hei mamu, eka ghua ghu ara?”

“To kaheinia lamu taghou,” neke ghua ungene tughuina Zisas.

26 Ka ia fafata mahai maneri, Zisas neke hioi ia bereti neke kudo vehai ghu God. Ianimu tuna ghe neke kipei nga, neke vanadi ghu ira mane ta nonofoi, neke kahei ghu, “Hioi o mahaini ghu, vununa iahi mu tinigu ara.”

27 Ke hioi tuna manei ia panikeni waeni, ge kudo vehai ghu God neke ghua, ghe neke vanadi nga. “Ketuhi, ghau haroharo,” neke ghua ghidi; 28 “vununa iahi mu ia busakagu mala zagona ia varivehai foforu vari hoataina God nia ira nona noni, e oraha vanadi ghu tehi nonini mala kai hazarira ira sasake ka maneri. 29 A va kahe ghini ghau ghu, ara e deo ke age ketuhinani waeni iahi, e vuhai dufu ghu ia ravata ta ketuhu foforuna waeni ara taremehamu ghau ka ia nona Ravutu nogu Mama.” 30 Ianimu tuna ghe dike koze ghini nga kaike himu, dike kave lao ghu ka ia Vuhukuna Olivi.

Zisas Ne Kusu Kahe Kenui Ia Tuufu Sesebo Ka Pita

Maki 14:27-31; Luku 22:31-34; Zone 13:36-38

31 “Ka toraina redu iahi, ghau haroharo o age pelo kaiau ara,” neke ghua ghidi Zisas. “Vununa ka ira Kakangava Ta Maduana ne kahe ghua iahi,
‘God e age va lemei ghatu ia ta kopunai sipisipi,
edi age pirara ghu ira sipisipi ta leghui.’ ^{▼▼Zakaraea 13:7}

32 Ghe ka ia leghuna tetuleghu ara ka ia leme, ara a kusu age mo Galili kenumu ghau, mala age dufu ghauna aianimu.”

33 Kahe ghua tuna iahi neke ghua Pita, “Geta pelo kaigho ghu maneri haroharo, ghe ara mu ta toraina deona ghatu.”

34 “Pita,” neke ghua Zisas, “ghe ge nakele nga ia kokorako ka toraina redu iahi lama, agho o age kahei ghatu lito fafata, ta deona go avohoau ghu ara.”

35 “!Deo!” neke ghua Pita tuufunana. “!Geta age leme taremehau ghu ara ghe, toraina deo ga boka age kahe ghua ghu ianimu ara!” Ira keha leghu mane ta nonofoi nga, dike kahe ghua haroma molamo.

Zisas Ne Tarai Aiani Getisemeni

Maki 14:32-42; Luku 22:39-46

36 Ianimu tuna ghe, neke hiori nga Zisas ira nona mane ta nonofoi, dike lao ghu ka ia malau ta va kudo ghini Getisemeni neke va kahe ghidi ghu, “O nohe aiahi, a la taraina ara aianihi.” 37 Manei neke hioi Pita, nia Zemesi ghe Zone ira palu tuunamane Zebedi e ghua, ghe manei neke to age tatanigai muko hihingona taremehana toraina pisipasa ghena fuludu. 38 Ianimu tuna ghe neke va kahe ghidi nga manei, “Muko hihingo ta au ini ka hihingoguna ne toraina faa vanagu fuludu, nato nogu leme ghini ghu. Au aiahi, o au mato taremehagu ghu.”

39 Manei neke ghahe varihau lao birusuna tei, ghe neke la kai hinaei nga taghonai ka kavao habara kokopona, neke tarai ghu. “Nogu Mama, to boka la, o hio kai tagu panikenina vavahagala iahi. Ghe eka ghua ghu heve ia ta kabai ghini ara, nga heve ia ta kabai ghini agho mo.”

40 Ianimu tuna ghe, neke leghu lao nga ka ira nona mane ta nonofoi, neke la finiri ghu dike to epuna maneri. Kahe ghua tuna iahi ka Pita neke ghua, “?To deo ma ghe go boka baghunu ghu ka kaike aoa tei ghu, mala mato taremehaguna ghu ara?” neke ghua ghini. 41 “O mato o au ghu, nia tarai e ghua, ghatu e age paufu ghau auau. !Vununa ia tarunga ne ohoꞌoho, ghe ia tini ne paeke!”

42 Ianimu tuna ghe neke ghahe kairini nga kaike fafatani, neke la tarai ghu manei, “Nogu Mama, to mala hagheli la mamu ara vavahagala iahi, veha mo e age hokoto ghu ia nou lao nanafa.” 43 Neke leghu lao ghu manei, neke la finirini tato epu melukaina maneri, vununa to deo ma gedike boka tobeheri ghu ira hibadi.

44 Ke leghu laoni tuna ia va litona fafata geke la tarai ghu, kaherira ira tarai neke kusu la kaheriro, neke ghua. 45 Ianimu tuna ghe, neke leghu lao nga ka ira mane ta nonofoi, neke la kahe ghua ghu iahi, “?No epu maghoso ngama ghau? !Fini! Ia fafata to dufu mala vanadi laona ira ta kururi sasake, ia Tuuna Noni. 46 Tetu vona da age ghu. !Fini, ia mane ta mala va laoau ara ka ira kana to au iahi!”

Zisas Di Sakomi

Maki 14:43-52; Luku 22:47-53; Zone 18:1-12

47 Neke ngengene ngama Zisas, neke to sabara ghu Zudasi, ia keha mane ka ira tazoi palu mane ta nonofoi. Leghahai varigharana noni ta posi leboto sisilufu mala magara nia papakure e ghua, dike au taremehanara. Ira hiama ta kenu nia ira keha noni babatu e ghua, dike tuhu laorira maneri. 48 Zudasi neke to kusu va kahe ghidi maneri ia va ghilaghila ta mala riva ghini manei ghatu: “Mala avohina ghau ghatu hei ta mala sakomina mu, ara a la vanani mane ianimu ia angoho va vonavona,” neke ghua ghidi. 49 Zudasi neke toraina ghahe lotoro lao ka Zisas, ghe neke la kahe ghua nga iahi, “!Mane Vari Va Kakahei Agho!” neke la ghua, ghe neke angohi nga tuna.

50 “Mane baere, oto magali riva ghini agho heve noke meha ghinina,” neke ghua Zisas.

Ianimu lama dito rauku laoi ghu Zisas ira keha mane, dito sakomi ghu. 51 Kaike ghu ka ira mane ta au taremehana Zisas, neke koroho kavei ia leboto sisilufu mala magara, neke salo kaini ghu kaike talingana ia nona maneriva ia hiama pauna.

52 “O nakai kaini leboto sisilufu mala magara iamu,” neke ghua Zisas. “Heiri ira ta posi leboto sisilufu mala magara mu, edi age leme ghatu ka ia leboto sisilufu mala magara. 53 ?E deo go avohi ghu ghau mu, ta boka kudo laona ara ka nogu Mama, ta va meharina ghu manei ghatunaina lama tazoi palu leghahai punugaradi engizeli mala magara? 54 ?Ghe neto ghua la ianimu, heve e ghua ghe ge age ghuduvu nga mu ira Kakangava Ta Maduana ia ta kahei, iahi mu e toraina mala dufu ka ghaghahena iahi, ia ta ghua?”

55 Ianimu tuna ghe neke kahe ghua nga iahi Zisas ka ia varigharana noni, “?Ara ba keha noni ngongovala ta mamaghuana no ghua ghe, no posi meha leboto sisilufu mala magara nia papakure, no ghua nga mala meha sakomoauna? ?Neke heve ghe, noke deo nga go sakomoau ghu ka ia Sugana God? Ara nake au ma aianimu leleghu ravata vari va kakaheina. 56 Ghe leghu irahi nga mu to dufu mamu, taghe mala va ghuduvurira heve dike kangavariro ira porofeti ka ira Kakangava Ta Maduana.” Ka fafata ianimu lama, dito age ghahe kaini haro ghu Zisas ira mane ta nonofoi pelo kainina.

Zisas Ka Kenuna Ia Nonohe Faghina Kamoto Ira Ziu

Maki 14:53-65; Luku 22:54, 55, 63-71; Zone 18:12-14, 18-24

57 Ira dike sakomio Zisas dike batu ghini lao manei ka ia sugana Kaefasi ia hiama pauna, ka dike varighararo ira ta vari va kakahe ghini ia vetula beana nia ira keha noni babatu, e ghua. 58 Ghe Pita neke ghahe leghu laori mo leghuni, neke la dufu ghu ka ia tatalana suga ta babara ia hiama pauna. Haghele lao tuna ge la nohe taremehadi ghu ira noniriva, afa ghinina heve mo ta age dufuna ghatu ka Zisas, neke ghua.

59 Ira hiama ta kenu nia ia Nonohe Faghina kamoto ka ira Ziu e ghua, dike va sisiva haduri keha noni ta va sura ghini sebona Zisas, edi boka mala va lemei ghu. 60 Dike lao ghu tehi noni ta turi sebo, ghe deo ma geke toraina gigima ghu mala hioina manei ka varifate. Va nonoghanana ghe, dike la meha nga palu mane 61 kahe ghuana iahi, “Mane iahi neke kahe ghua iahi, ‘Ara a boka huari mo ia Ringifota ta Maduana ka God, nia ke va tetu leghui tuna leghuna lito ravata, e ghua,’ neke ghua.”

62 Ianimu tuna ghe, neke tetu vona nga ia hiama pauna, neke kahe ghua ghu iahi ka Zisas, “?Heve, e deo agho go ungene tughuri ghu turi ta va zutu ghinigho irahi maneri?” 63 Ghe Zisas neke vanemoho ma neke au ghu. Kahe ghua lao tuna iahi neke ghua ia hiama pauna, “Ka ia babaolona ia God ta doli, agho o toraina va kahe ghini ghai meha ka ia va bebereana, neto agho la mamu ia Mesaea, ia Tuuna God,” neke ghua ghini.

64 “Uve, taghe ta kahei nia lamu agho,” neke ghua ungene tughuna Zisas. “Ghe a va kahe ghini ghau ghu ghau haroharo: Ghatunaina e vai vona ghu, ghau o age finiau ara ia Tuuna Noni, ta nohena ka ia kame mautuna God ia ta Toraina Mana, nia ke leghu mehanana ka ira toba ka kolangana, e ghua.”

65 Ianimu lama neto rekui ghu ia poko ka taghona ia hiama pauna, kahe ghuana iahi, “!Manei deo ge heluhelu ghini ghu God! Ghita e deo ke kabai noni mala vanada turinani. Ghau haroharo to nomohi ia lausasaba ka manei. 66 ?Heve ka ira ngangana mu ghau?”

“!Manei to hotoi, e toraina mala leme ghu mamu!” dike ghua kudodira.

67 Ianimu tuna ghe dike kamusi nga ia hihilina, dike dupai ghu. Kehara tuna gedi tapali ghu, 68 kahe ghuana iahi, dike ghua, “O va kahe ghini ghai, agho ia Mesaea. ?Hei neke ruzaighona?”

Pita Ne Kahei Ta Deona Ge Avohi Ghu Zisas

Maki 14:66-72; Luku 22:56-62; Zone 18:15-18, 25-27

69 Ne nohe ghu Pita peghuru ka giliona ia galahena ta babara, kaike ghaseriva neke la kahe ghua iahi ka manei, “Agho haro lamu kaike ghu ka ira dike au taremehanao Zisas ia tanina Galili,” neke la ghua ghini.

70 Ghe Pita neke sesebo ka kenudi maneri haroharo, kahe ghuana iahi, “Ara e deo ga avohi ghegu ghu heve no turi ghinina ghau,” neke ghua ghidi.

71 Ianimu tuna ghe neke lao nga Pita ka ia gheremena makatanana ia galahena ta babara. Kaike ghaserivani neke la fini fatina, neke la kahe ghua ghu iahi ka ira noni aianimu, “Mane iahi mu neke au taremehana Zisas ia tanina Nazareti,” neke ghua ghidi.

72 Pita neke seseboni, ghe taremehana va bebereana. “Ara e deo ghe ga avohi ghegu ghu mane ianimu,” neke ghua ghidi.

73 Deo ma ge sepa ghu leghuna ianimu, to ke la meha ghu ka Pita ira dike teturo aianimu, dike la kahe ghua ghu iahi, “Agho mu toraina kaike ghu ma ka maneri. Ghai na avohigho mo, vununa leou nira agho taghe leona noni Galili ne ghua,” di ghua ghini.

74 “Ara a va bebereana ka God ta zea ghini gheguna mane iamu,” ne ghua ghu Pita, selu laoi ma ianimu neto ke nakele ghu ia kokorako. 75 Ka fafata ianimu lama neto ngana leghuri ghu Pita ira ngengene ka Zisas, neke kahe ghuao iahi, “Ghe ge nakele nga ia kokorako, agho o age kahei ghatu lito fafata, ta zea ghinaguna ara,” neke ghua ghinio. Ianimu lama neto kave ghu Pita, toraina nakele dudumana ghenana.