Mat 27 | KjiSC | STEP | Ka ia torai fufughona, ira hiama ta kenu nia ira keha noni babatu e ghua, dike au varighara dike vato ghini ghu ia ghaghahena mala va lemei maneri Zisas.

Matthew 27

Zisas Di Hio Laoi Ka Paelati

Maki 15:1; Luku 23:1,2; Zone 18:28-32

1 Ka ia torai fufughona, ira hiama ta kenu nia ira keha noni babatu e ghua, dike au varighara dike vato ghini ghu ia ghaghahena mala va lemei maneri Zisas. 2 Ianimu tuna ghe dike piligai nga dike hio laoi ghu ka Paelati, ia gavana neke auno Zerusalemu dike faetio ira manefaadi Romu mala kopuna Zudia.

Ia Leme Ka Zudasi

Ira Riva 1:18-19

3 Zudasi neke namaha seboio Zisas, ne avohi ghu tato va tanai atungina maneri manei, neke age puina muko hihingo ghini heve neke to riva ghinio. Hiori tuna ira litofulu kunegeledi siliva, geke va leghuri ghu ka ira hiama ta kenu nia ka ira keha noni babatu, neke ghua. 4 “Ara mu nato age sasake, vununa ara nake namaha seboi ia mane ta kalasa ghena,” neke ghua.

“?Heve a ghua ghu ghai? Iamuhu mu puhi ka taghou,” dike ghua ghini. 5 Zudasi ne la kai hinaeri ira rongo ka giliona ia Ringifota ta Maduana God, ghe neke kave lao nga, neke la liligho va reketi ghu taghonai.

6 Ira hiama ta kenu dike la sene vonari ira rongo, ghe dike kahe ghua nga iahi, “Rongo iahi mu neke mala tabarana vari atungu; e deo ghu gada boka nai taremehadi ghu ghita ira rongona ia Sugana God,” dike ghua. 7 Va puhini tuna rongo ianimu gedi mala tabarana ghu kaike galahena kava ka ia mane ta rivai raro ka kava kiriufu mala bekudira ira noni mehadi, dike ghua. 8 Ianimu la ghe, neke va kudo ghini “Galahena Kavana Busaka” nga, e dufu ghu ka toraina ravata iahi.

9 Iahi mu ne age va ghorevurai neke kusu kahe kenu ghua ghinio iahi Zeremaea ia porofeti, “Di hiori ira litofulu kunegele ta siliva, ia tabara dike nainio kehara ka ira noni Isiraeli mala tabarina manei, 10 rongo ianimu dike mala tabara kava ghu ka ia mane ta rivai raro ka kava kiriufu, taghe neke ungene va gigimaio ka ara ia Lod.” ^{▼▼Fini Zakaraea 11:12,13; Zeremaea 19:1-13; Zeremaea 32:6-9}

Paelati Ne Notohi Zisas

Maki 15:2-15; Luku 23:3-5,13-25; Zone 18:33–19:16

11 Zisas neke tetu ka kenuna Paelati ia mane gavanana Romu nia notohi tuna neke ghua Paelati. “?Agho lamu ghu mu ia mane ginitaukeladi ira Ziu?” neke ghua notohona ia mane gavana.

“Uve, taghe ta kaheinia lamu agho,” neke ghua ungene tughuna Zisas.

12 Dike leghu ma ta va kahe ghini mo ira hiama ta kenu nia ira keha noni babatu e ghua ghe, Zisas deo ghe geke ungene tughuri ghu. 13 Notohi tuna neke ghua Paelati, “No nomohori mo agho leghu ta va kahe ghinigho idi nga maneri?” neke ghua ghini. 14 Ghe Zisas e deo ghe kaike ngengene tei neke kahei ghu, neke puina age nona fere fuludu ghu Paelati.

15 Ka leleghu mahai varigharana Ghahe Fuludu, ia mane gavanana Romu e fani va kavei tudu kaikeu ka ira mane ta pipiliga ta faeti ia varigharana noni. 16 Ka fafata ianimu, kaike mane pipiliga ta avohi fuludu maneri, babaolonana Barabasi, neke auna. 17 Di varighara meha ghu ira tehi noni, Paelati neke notohori, “?Hei mo no kabai ghinaguna ghau ta va kave vanamuna ara; Barabasi, ba Zisas ia ta va kudo ghini ia Mesaea?” 18 Paelati neke puina avohi fuludu ta kakabai ghinina maneri Zisas, ghe dike hio vonai nga ka taghonai.

19 Ne nohe ghu Paelati ka ia nonohe mala varifate, to va ghahe mehai ghu kaike nonomoho ia ghaseborona: “Oka va riva ghini ghu kaike leghutau tei ghu mane ta kalasa ghena iamu, vununa reduo, ara nake toraina age pisipasa vahagalau fuluduna ka kaike epu baghunai ghinina manei.”

20 Ghe ira hiama ta kenu nia ira keha ta babatu e ghua, dike va hugahugari ira varigharadi noni ta mala va kaveina Barabasi mo, ta nainina ghu Zisas ka leme. 21 Ghe Paelati neke notoho leghurini, “?Hei mo ka palu mane irahi no kabai va kave vanamuna ara?”

“!Barabasi mo!” dike ghua kudo leghudira.

22 “?Heve ghu ngaini ta age va riva ghinina ara Zisas ia Mesaea, ta ghua ghini iahi?” neke ghua Paelati.

“!Tupila ghini ka hekefalahata!” dike ghua kudo haroharodira.

23 “?Ne heve nga? ?Heve mo neke riva ghini va mukona manei?” neke ghua notohona Paelati.

Ghe maneri dike kudo va fafaa laoni tuna, “!Tupila ghini ka hekefalahata!” dike ghua.

24 Ne fini ghu Paelati tato deona heve ta boka ke riva ghininani, nia tato age tatanigaina ia magara e ghua, manei neke hio ketuhu ka kaike disi neke tihiri ghu ira kamena ka kenuna ia varigharana noni, ghe neke kahe ghua nga iahi, “!Ara mu a kalasa ghegu ka ia leme mane iahi! !Puhi ka ghau mu ianimu!”

25 Ira leghu noni nga dike kudo leghu laoni, “Veha mo e zoghu meha ghu ka ghai nia ira nomai rekaha e ghua, ia leme ka manei,” dike ghua lao.

26 Va kave vanadi tuna Barabasi, neke ghua Paelati. Ianimu tuna ghe, neke va kahe ghidi nga ira nona mane magara ta puruasiminina Zisas, ghe neke vanadi lao nga tuna mala tupila ghinina ka hekefalahata.

Ira Mane Magara Di Va Sire Ghini Zisas

Maki 15:16-20; Zone 19:2, 3

27 Kehara ka ira mane magara Paelati, dike hio laoi Zisas ka ia malau mala audi taghodi, dike la tetu lilohi ghu ia kamotona punugarana mane magara. 28 Dike hio kai tana ira pokona, ghe dike va vona ghini lao nga tuna kaike poko sodu ta omoꞌomo taghe ira ta auri la ira mane ginitaukela. 29 Maneri dike riva ghini kaike tarapae ta fihui ka lolozo dike va vona ghini lao ghu ka belehunao, ghe dike va posi ghini lao nga tuna kaike heke ka kame mautunao. Ianimu tuna ghe dike torongaghituturu nga kenuna mo dike vela ghini ghu, “!Heluhelu ghinigho, agho ia mane ginitaukeladi ira Ziu!” dike ghua ghini. 30 Ianimu tuna ghe dike kamusi nga. Hio tana tuna ia heke gedi botai ghu ka belehunao, dike ghua. 31 Leghuna ia vela ghini, maneri dike hio kai tana ia poko sodu ta omoꞌomo, dike va vona vanani leghu lao ghu ira nona poko taghonai. Ianimu tuna ghe dike batu ghini kave lao nga, mala la tupila ghinina ka hekefalahata.

Zisas Di Tupila Ghini Ka Hekefalahata

Maki 15:21-32; Luku 23:26-43; Zone 19:17-27

32 Ka ia ghahe ta kave lao ghu, maneri dike la dufu fati kaike manena Saerini, babaolonana Saemoni, dike va tutuufu ghini ghu ta hureina manei ia hekefalahata ka Zisas. 33 Ianimu tuna ghe dike dufu lao nga ka ia malau ta va kudo ghini Gologota, fafahakanana mu, “Malauna pau,” e ghua. 34 Aianimu dike la vanani waeni ta heni taremehana mereseni ta minga na, ghe leghuna va sisiva ghini, manei neke pake ghena ketuhina.

35 Leghuna tupila ghini Zisas ka ia hekefalahata, ira mane magara dike vari tufa ghidi ira pokona manei ka hilava daesi. 36 Ianimu tuna ghe dike nohe hinae nga aianimu, dike kakae ghini ghu. 37 Kaike takifi ta au lao ira kakangavadi ira ngengene dike mala va dedekio ia vari makutu ka maneri, dike va kapata laoina ka fatena mo ia belehuna Zisas: “Iahi mu Zisas, ia Mane Ginitaukeladi ira Ziu,” e ghua lao.

38 Keha palu mane ta sisiko dike tupila ghidi haro molamo ka hekefalahata ka ia mautuna mo nia mairina mo, e ghua Zisas. 39 Ira noni ta ghahe fuludu dike kudo ngovangovala laoi Zisas, dokadokana ira paudi ka vari velai, 40 dike kahe ghua ghu iahi, “!Agho ia ta age huara kai hinaei ia Ringifota ta Maduana ka God, nia ke va tetu leghui tuna ka giliona lito ravata e ghua, noke ghuao; hio va doligho taghou o hinae meha ghu ka hekefalahata iamu noto Tuuna la God!” dike ghua ghini.

41 Ira hiama ta kenu, ira mane ta vari va kakahei ghini ia vetula beana nia ira keha mane babatu e ghua, dike vela ghini haro molamo Zisas. 42 “!Manei mu ne boka mo hio va dolirira ira keha noni, nga deo ge boka hio va dolini ghu taghonai!” dike ghua ghini. “!Neto mane ginitaukelana la Isiraeli manei, geala e hinae meha ka hekefalahatana da va hohoghonai ghu ghita! 43 Manei mu ia ta va ghighiu ka God mala au taremehanana. Veha mo da fini ghu, ge boka meha hio va dolini la mamu God, vununa, ‘Ara mu ia Tuuna God’ neke ghua harono.” 44 Ira palu mane ta sisiko dike tupila ghidi harono ka ira nodi hekefalahata taremehana Zisas, dike kahe va mukoi haroma Zisas.

Ia Leme Ka Zisas

Maki 15:33-41; Luku 23:44-49; Zone 19:28-30

45 Ka ia hoatai ravata ta dufu ghu ka nakele lito ghu, ia malau kamoto neke age nagoromo. 46 E nona au bana nga ka nakele lito ghu, neke age kudo va fafaa ghu Zisas, “?Eloi, Eloi, ^{▼▼Ka keha kakangavara mu “Eli, Eli,” e ghua} lema sabakatani?” ia fafahakana mu, “?Nogu God, nogu God, ne heve ghe no ghahe kaiau nga?” ^{▼▼Samu 22:1} e ghua.

47 Kehara ka ira noni dike teturo aianimu dike nomohi Zisas, dike kahe ghua ghu iahi, “Manei ne kudoi Ilaiza ia porofeti” dike ghua ghu.

48 Kaike ghu ka maneri, magali neke ghua ma, neke purudu la hioi ghu kaike pusu la va ludurina ka waeni ta minga. Ianimu tuna ghe, neke nai laoi nga ka ia va kukuruna heke, neke va tuhu vona vanani lao ghu Zisas mala ketuhina manei. 49 Ghe ira keha noni dike kahe ghua iahi, “!Afana! Da fininina ge meha hio va dolini la Ilaiza ghatu,” dike ghua.

50 Iamu tuna ghe, neke nakele va fafaa leghuni nga Zisas, neke hingo kaini ghu ia va nonoghana dafe ka manei. 51 Ka toraina fafata ianimu, ia poko riringi leghaha ta tuta, ta rekete hinae ka vari hoataina ia Ringifota ta Maduana God nia ia ringifota ta maduana mala saliga inisenisi ka ia giliona Sugana God, neke reku fota palu tataniga fate zalupu ghu peka. Ia kava neke age kuzo, dike kipe fota ghu ira ghahipa mafara. 52 Ira lianga beku dike kipe tobehe dike tetu leghu ghu tehini ka ira nona noni God dike leme ghediro, 53 leghuna ia tetuleghu ka Zisas. Maneri dike kave kairi ira bekudi, dike la haghele ghu ka giliona Zerusalemu, ia malau beana leghaha, dike la podolo ghu ka tehi nonini.

54 Ia manefaadi ira mane magara nia ira keha mane magara dike au taremehanao manei dike kopuna ghinio ghu Zisas, dike finini ia kuzo nia ira leghu neke dufuro nga e ghua, dike toraina age maughedi fuludu ghu. “Hohoghona fuludu, mane iahi mu neke toraina Tuuna mamu God,” dike ghua ghu.

55 Tehi fotatini dike aura aianimu dike la mato meha ghu varihauni. Maneri dike leghu mehai Zisas sipadi Galili mala toka ghinina manei. 56 Dike meha taremehadira mu, Mere tanina Magidala, Mere ia nodi uke Zemesi ghe Zosepu, nia ia nodi uke Zemesi ghe Zone ira palu tuunamane Zebedi, e ghua.

Zisas Neto Gilu Ghini

Maki 15:42-47; Luku 23:50-56; Zone 19:38-42

57 Ka ia saighona mehana, kaike mane nonofoi ta taghotagho tanina Arimatia, babaolonana Zosepu, 58 neke lao ka Paelati, neke la fangai ghu ia tinina Zisas. Tetu tuna Paelati, ge va malumi ghu ta mala vanani laona Zosepu, neke ghua. 59 Hioi tuna ia tinina Zisas ge va piha ghini ghu ka kaike poko ghiho lineni ta sodu, neke ghua Zosepu. 60 Ianimu tuna ghe neke hio laoi nga neke la nakaini ghu ka giliona ia nona lianga beku ta foforu taghonai dike tohaio ka ghahipa mafara. 61 Mere ia tanina Magidala nia ia keha Mere e ghua, dike nohe mo aianimu kakae kadolo laona ka lianga beku ani.

62 Ia keha ravata ka ia Ravata Mala Maghoso ira Ziu, ira hiama ta kenu nia ira mane Farisi e ghua dike varighara lao ka Paelati. 63 “Manefaa agho, ghai na ngana leghui neke kahe ghuao iahi mane ta sesebo ianimu ka ia fafata dolina nga: ‘Leghuna lito ravata, ara a ke age tetu leghu ka ia leme.’ neke ghuao. 64 A fangaigho ghu ghai ta kahe va gigimaina agho mala kagara ghinina lianga beku ani, e vuhai dufu ghu va litona ravata ianimu. Ghatu edi la meha ira nona mane ta nonofoi, edi meha sikoi ghu tinina ani manei nia kahei tuna neto ke tetu leghu ka ia leme ta ghuana, e ghua. Sesebo ta va leleghu iahi mu e toraina age muko fuludu laoini ghatu ia va kenuna.

65 “Ne veha mo, hiori kehara ka mane magara nira ghau o la toraina kopuna ghini va veha ghu ka ira gigima avoavoho taghomu.” neke ghua ghidi Paelati. 66 Ianimu tuna ghe dike toraina kaputu va gimai nga ia lianga beku, nakai ghini va ghilaghila harona. Nakairi tuna ira mane magara mala kagara ghini va vehana, dike ghua.