Mat 28 | KjiSC | STEP | Ka ia fufughona Sade, ka ia dori vari zeaina nga, Mere tanina Magidala nia ia keha Mere e ghua, dike kave lao mala la fininina ia lianga beku.

Matthew 28

Va Vituna Pagahaina: Ira Hohoghodi Ghinina Ia Mane Ginitaukela 28:1-20

Ia Tetuleghu Ka Ia Leme

Maki 16:1-10; Luku 24:1-12; Zone 20:1-10

1 Ka ia fufughona Sade, ka ia dori vari zeaina nga, Mere tanina Magidala nia ia keha Mere e ghua, dike kave lao mala la fininina ia lianga beku. 2 Heve ba, ne ghua ma neto dufu ghu ia leghahai kuzo, vununa ia engizeli ka ia Lod neke hinae meha ka kolangana, neke meha va pidu kavei ghu ia ghahipa, ghe neke nohe lao nga fatena. 3 Ia hihilina engizeli neke kafili taghe kapi ne ghua, nia ira nona poko tuna gedi ghiho ngesele taghe posana tokofo gedi ghua ghu dike ghua. 4 Ira mane dike kopu ghinio lianga beku ani dike puina maughedi fuludu fini laoina manei, dike riufu hinae taghe noni ta leme dike ghua ghu.

5 Ngengene lao tuna ka ira fotati neke ghua ia engizeli. “!Oka maughemu ghu! Ara na avohi mo ta haduina ghau Zisas dike tupila ghinio ka ia hekefalahata. 6 !Manei e deo ge au ghu aiahi! Manei mu neto ke tetu leghu ka ia leme, taghe neke kusu kaheio la taghona. O meha o fini ghu hae neke epuo manei. 7 O magali lao, o la va kahe ghidi ghu ira nona mane ta nonofoi tato ke tetu leghuna manei ka ia leme. Manei to kusu kenu age mo aianihi Galili kenumu ghau. Aianimu ta la fininina ghau manei ghatu. O nganai ghu tato va kahe ghini ghau ini ara.”

8 Ira vuro fotati magali ma dike to ghahe kaini ghu ia lianga beku taremehana torai maughedi, ghe maneri dike va ghazaghaza haro molamo, dike purudu la va kahe ghidi ghu ira nona mane ta nonofoi.

9 Heve ba ne ghua ma neto la dufu fatari ghu Zisas kahe ghuana iahi manei, “!Bule ka ghau!” neke ghua ghidi. Lao tuna ka manei gedi la posi va gima ghu ka ira ghahena, va totoana ghinina, dike ghua. 10 Ianimu tuna ghe neke va kahe ghidi nga Zisas, “!Oka maughemu ghu! Lao, o la va kahe ghidi ghu ira tahigu mane, edi lao ghu Galili. Aianimu ghe, gedi age finiau nga maneri,” neke ghua ghidi.

Ia Turi Ka Ira Mane Magara Ta Kopu

11 Ka ia fafata ghahe laodi ira vuro fotati, ira keha mane magara dike kopu ghinio ia lianga beku, dike leghu lao ka ia malau leghaha dike la va kahe ghidi ghu ira hiama ta kenu ira vahina leghutau dike dufuro nga. 12 Kudoi tuna dike ghua kaike haedu ka ira leghu hiama ta kenu nga taremehadi ira keha noni babatu, dike vato ghini ghu ta mala vanadina kaike rongo leghaha ira mane magara dike kopuro. 13 Dike kahe ghua ghu iahi ka ira mane magara, “Ta kaheina ghau mu, ira nona mane ta nonofoi dike meha ka ia redu ka ia fafata epu ghai, dike meha sikoi ghu ia tinina, o ghua. 14 Neto nomohi la iahi ia mane gavana, ghai ta tetu ghinina, e mala va hohoghona ghu manei, nia to lotoro ma tuna vahina leghutau nga, e ghua.” 15 Ira mane magara dike veha vanadi mo ta ghuana ianimu, dito ke hio tadi ghu ira rongo, la va ghuduvina tuna heve dike va kahe ghidiro maneri. Ia tuturi ka maneri neke ongaha varihau ka ira noni Ziu nia maneri edi turi ghini ngama edi au ghu ka torai ravata iahi, e ghua.

Zisas Ne Podolo Ghidi Ira Nona Mane Ta Nonofoi

Maki 16:14-18; Luku 24:36-49; Zone 20:19-23; Ira Riva 1:6-8

16 Ianimu tuna ghe dike lao nga Galili ira tazoi palu mane ta nonofoi, dike lao ghu ka ia vuhuku ta mala lao neke ghua ghidiro Zisas. 17 Di la finini ghu Zisas, maneri dike la va totoana ghini, ghe kehara ka maneri mu dike ngana palupalu ngama.

18 Ghahe namo lao tuna ge va kahe ghidi ghu neke ghua Zisas, “Leghu mana nga ka malauo God fate nia ka malau iahi peka e ghua mu, to ke vanagu ara. 19 O lao ghu ka ira leghu noni nga hae ghe hae ghu, o la seselebeanari ghu ka ia babaolona ia Mama, ia Tuuna nia ia Tarunga Ta Maduana, mala meha nogu noni mala nonofoauna maneri. 20 Va kakahe ghidi edi leghuri ghu maneri vahina leghutau nga nake ungene va gigimario ara ka ghau. Nia o nganai, ara mu a au tamu tudu ma e age vuhai nogha ghu malau iahi peka.”