Mat 4 | KjiSC | STEP | Leghuna ianimu, ia Tarunga Ta Maduana ne hio laoi Zisas ka ia malau koroghana ta karango, e mala boka ghu ia Faghinadi ira nazahi auauina manei.

Matthew 4

Satana Ne Auaui Zisas

Maki 1:1-13; Luku 4:1-13

1 Leghuna ianimu, ia Tarunga Ta Maduana ne hio laoi Zisas ka ia malau koroghana ta karango, e mala boka ghu ia Faghinadi ira nazahi auauina manei. 2 Manei neke la filui mahai ka giliodi rodana ngavulu ravata nia rodana ngavulu redu, neto ke puina kovoro ghu manei. 3 Lao tuna ka Zisas ge la kahe ghua ghu iahi neke ghua Satana, “Noto Tuuna la agho God, fihikiri ghahipa irahi ka bereti,” neke la ghua ghini.

4 Ghe Zisas neke ungene tughui, “!Deo! Ka ira Kakangava Ta Maduana ne kahe ghua iahi, ‘Ira noni mu, edika mala doli ma ghu ka bereti lama, nga maneri edi toraina doli ka ira leghu ngengene neto ke kaheriro nga God.’ ^{▼▼Ngengene 8:3}”

5 Leghuna ianimu, ia Faghinadi ira nazahi neke hio laoi Zisas ani Zerusalemu ia malau beana leghaha, neke la va tetui ghu ka ia fatena lobosaina riringina Suga ka God. 6 ghe neke kahe ghua nga iahi, “!Noto Tuuna la agho God, o paraku hinae! Vununa ira Kakangava Ta Maduana di kahe ghua iahi,
“‘God e ungene va gigimari ghatu ira nona engizeli mala kopu ghinighona agho,
edi age posi vonaigho ghu ka ira kamedi,
mala eka tutu ghinigho la ghu ghaheu nira ka ira ghahipa.’ ^{▼▼Samu 91:11, 12}”

7 Ghe Zisas neke ungene tughuini, “Ghe ne kahe ghua molamo iahi ka ira Kakangava Ta Maduana, ‘Oka nakaini ghu ia Lod ia nou God ka ia va sisiva ghini.’ ^{▼▼Ngengene 6:16}”

8 Leghuna iahi, ia Faghinadi ira nazahi neke hio laoini Zisas ka ia vuhuku ta toraina vona, neke va fini ghini ghu ira leghu veveha ta varanga nga ka ira leghu soloso nga ka malau iahi peka. 9 “Ara a vananigho haro leghu irahi nga ghatu, noto suna maimanihi hinae lama agho, va totoana ghinaguna ara,” neke ghua ghini.

10 “O ghahe lao Satana,” neke ghua Zisas va kahe ghinina, “Ira Kakangava Ta Maduana di kahe ghua iahi, ‘Agho o torai va totoana ghini ma ia Lod ia nou God, nia riva vananina ma manei lama, e ghua.’ ^{▼▼Ngengene 6:13}”

11 Ianimu tuna ghe neke ghahe nga ia Faghinadi ira nazahi, dike meha ghu ira engizeli la toka ghinina.

Va Paluna Pagahaina: Ia Turi Ghini Kave Ia Mane Ginitaukela 4:12–7:29

Zisas Ne Tataniga Ghini Ia Nona Riva Beana

Maki 1:14-15; Luku 4:14,31

12 Ne nomohi ghu Zisas dike to nakainina maneri Zone ka pipiliga, manei neke ghahe kaini Zudia neke leghu lao ghu Galili. 13 Ghe manei e deo ke la aunana Nazareti ka neke mala laono, nga neke lao Kapaniumu mo ka ia gheremena Lokana Galili, ka ia hori Zebulani nia Nafutali. 14 Taghe iahi mu neke age va ghuduvi heve neke to kaheio porofeti Aesaea kahe ghuana iahi:
15 “Ka ia hori ia butubutu Zebulani nia ia butubutu Nafutali
ka ia hangana ta lao visi ka ia Lokana Galili, pakaona mo ia Ketuhu Zodani,
ani Galili ka ta auro ira noni taka Ziu ghu,
16 ira noni ta au ka nagoromo
edi age finini ia fegala ta pelara.
Nia ka heiri ira ta au ka ia malauna leme ta nagoromo,
kaike fegala e age pelara lao ka maneri.” ^{▼▼Aesaea 9:1, 2}

17 Ka ia fafata rizu ta la au ghu Zisas ani Kapaniumu, manei neke to tatanigai tuturi beana, kahe ghuana iahi, “Taghuru kairi ira sasakemu, o fihiki lao ghu ka God, vununa ia Ravutu ka malauo God fate to namo meha.”

Ira Kusu Mane Ta Nonofoi Zisas

Maki 1:16-20

18 Kaike ravata, ne ghahe leghui ghu Zisas ia tapuruna Lokana Galili, manei neke finiri palu tatahina mane, Saemoni, ia ta va kudo ghini Pita, nia Aduru e ghua, dike voloizoghu namari ka ia loka, vununa maneri mu mane habuhabu. 19 Kudo laori tuna neke ghua Zisas, “O meha leghuau, a va kakahe ghini ghau mala habuhabu noni ghu ara.” 20 Ianimu lama dike to nai kairi ghu ira nodi volo, dito leghui ghu.

21 Kenu lao mo birusuna tei ka ia tapuruna loka, Zisas neke la finiri molamo ira keha palu tatahina mane, Zemesi ghe Zone, dike au ka giliona kaike koaka taremehana nodi mama Zebedi, sikatari ta aura ghu ira nodi volo. Manei neke kudori molamo maneri palu ta la leghuina. 22 Selu laoi ma ianimu dito la leghui ghu manei, ghahe kainina ia nodi koaka, nia nodi mama e ghua.

Ia Riva Beana Ka Zisas Ani Galili

23 Zisas neke ghahe kamoti Galili vari va kakaheina ka ira suga mala varighara ira Ziu, tuturi beana ghinina ia Nonomoho Ta Veha ghinina ia Ravutu, nia ke va veharira ira noni dike dufuriro leghu kokolodi lelemeana nga nia fogara nga, e ghua. 24 Ia nonomohona manei neke age ongaha kamoto ka ia babarana Siria, dike la hio mehari ghu maneri ira noni ta auri leghu kokolodi fogara nga, ira ta toraina faa vanadi vavahagala, ira ta sukuri nazahi, ira ta dufuri kudoko nanazara nia ira taka boka rizu ghu e ghua, ghe manei neke age va vehari ghedi haroharo. 25 Leghahai varigharadi noni dike ghahe leleghuina Zisas hae tei neke laona manei mu: ira nonidi ani Galili, ka ira Tazo Malau Leghaha, nia ira tanidi Zerusalemu, tanidi ka ira leghu pelodi nga Zudia, nia tanidi fateo mo ka ia keha pelona Ketuhu Zodani, e ghua.