Matthew 7

Oka Fateri Ghu Ira Keha Noni

Luku 6:37-42

1“Oka fateri ghu ira keha noni, mala eka age fate ghau la ghu God ghatu. 2Vununa heve ta va riva ghidira lama ghau ira keha noni mu, ta ke age va riva ghini ghauna ghatu God. Ira toraina puhi mala leghuri ta mala fateri ghau ira keha noni lama, ta ke hiori harona God ghatu, ta ke mala age fate ghauna ghu ghau.

3“?Heve ghu ghe, no mato laoi ngama agho ia foroku ta au ka ia hibana ia taremehau, noto deo la go ngalangadoi ghu gagolo ta au nia ka hibauna taghou? 4?Heve no ghua agho ghe no boka kahe ghua nga iahi ka ia keha taremehau, ‘Meha ko a hio kaini ghu foroku iamuhu ka hibauna?’ no ghua nga, ghe deo tuna go boka finini ghu gagolo ta au iamuhu ka hibauna taghou, ta ghua ini? 5!Agho ta tatangana kobiri! O kusu hio kainina nga agho gagolo ta au nia ka hibauna taghou, ianimu tuna ghe go boka fifini va veveha nga, go boka hio kaini ghu foroku ta au nia ka hibanana ia taremehau.

6“Oka vanadi lao ghu ira meusu heve ira ta maduana, maneri edi suna fihiki ma edi age magara ghau ghu ghatu. Oka fera ghidi lao ghu ira nomu bololodi davi ta torai mamalahu veveha ghedi ka kenudi ira vadu, maneri edi suna age mala deke dadalapa nodi ma ghatu.

Fanga, Hadu, Ketaketa

Luku 11:9-13

7“O fanga agho ghe, ge age vananigho nga. O hadu agho ghe, go age dufui nga. O ketaketa agho ghe, ge age tobehe vananigho nga ia makatana. 8Vununa heiri haroharo ta fanga mu edi age hihio. Heiri haroharo ta hadu mu edi age dufui ia ta kabai ghini. Nia ia makatana ge age tobehe vanadi ghu heiri haroharo ta ketaketa, e ghua.

9“?Hei ka ghau mu ta vanani ghahipana ia tuunamane, neto fanga ghena bereti la manei? 10?Ba, neto fanga ghena namari la manei, ta vanani lao adoghona? 11Ghau ira ta muko noto boka tufari ghedi leghutau ta namanama la ira nomu rekaha, ge heve soni mu nomu Mama ka malaunao fate, tufari leghutau ta namanamana ira ta fangai manei. 12O riva vanadi ira keha noni ira leghutau ta kabai ghidi ghau mala riva vanamuna maneri. Iahi lamu fafahakanana mu ia vetula ka Mosese nia ira vari va kakahei ka ira porofeti, e ghua.

Ia Makatana Ta Ghavoro

Luku 13:24

13“Ka ia makatana ta ghavoro lama mu, ta boka haghele podolo laona ghau gilio ka ia Ravutu God. Ia makatana mala haghele gehena mu e bobo nia ia hangana ta lao ka manei tuna ge nanamo ghu e ghua, e tehi ghu noni ta faetina hangana ianimu. 14Nga ia makatana ta lao ka ia doli mu e ghavoro, nia ia hangana ta lao ka manei tuna ge ghavoro mamarutana ghu, e ghua. Keha noni terira lama ta boka fini fatina ghu.

Ia Heke Nia Ia Fuana

Luku 6:43-45

15“O balau ghidi ira porofeti ta sesebo; maneri edi la meha taghe sipisipi edi ghua ka ghau, ghe ka giliodi maneri mu taghe ira wulufu ta lelemeana edi toraina ghua ma. 16Ghau o boka fini avohori mo ka ira heve ta riva ghidi maneri, taghe ta ghua nia lama ia heke ta boka fini avohi ka ia fuana. Ghau oka boka pisu gerepi ghu ka ira rekahadi heke ta kekere, ba oka boka pisu figi ghu ka ira heke ta kekere vunudi nia kaladi. 17Ia heke ta doli va veha mu e veha ira fuana, nia ia heke ta doli va muko tuna, ge muko ghu ira fuana, e ghua. 18Ia heke ta veha mu, eka boka kuru fuana ta muko ghu, nia ia heke ta muko tuna, eka boka kuru fuana ta veha ghu, e ghua. 19Ira leghu heke ta deo gedi kuru fuadi ta veha ghu mu, e taraha kai hinaeri, e kai laori ghu ka ia totoi. 20Taghe ira porofeti ta sesebo mu, o age fini avohori ghu ghau ka ira heve ta riva ghidi maneri.

Ira Ta Torai Nonofoi Hohoghona Zisas

Luku 6:46

21“Eka ghua ghu ira noni haroharo ta va kudo ghinagu nodi Lod ara mu, ta age haghelena ghatu ka malaunao God fate, nga heiri ira ta riva ghini lama ia nona lao nanafa nogu Mama ka malaunao fate. 22Ka ravata mala varifate ianimu, tehi noni edi age kahe ghua iahi ghatu ka ara, ‘Lod, Lod, ghai nake tuturi beana ghini ia nonomoho ka God nia nake tavusu kai nazahi nia rivai tehi hahaima nake ghua ka babaolou nia agho,’ edi age ghua. 23Ghe iahi mu heve ta va kahe ghidira ara ghatu, ‘Ara toraina deo kalasu kai gake avoho ghau ghu. O ghahe lao, ghau ira noni ta muko,’ a ghua ghidi ghatu.

Ira Palu Noni Ta Rivai Suga

Luku 6:47-49

24“Hei ia ta nomohori ta leghuri ghu vari va kakahei idi ka ara mu, taghe kaike noni ta avoavoho riva ghini kaike suga ka fatena kaike ghahipa, e ghua. 25Geta ghua mo ka ia zoghuna nanare ta tahu nia ka ologhona ketuhu, nia ka ia hoto va mukoi dafe ghe, e deo ghe ge age riufu hinae ghu, vununa ne riva ghini ka fatena kaike ghahipa. 26Nga hei ia ta nomohori ngengene irahi ka ara, ta deo ghu ge leghuri ghu mu, taghe kaike noni ta kingo ta riva ghini kaike suga ka fatena ia garanga, e ghua. 27Ka ia fafata zoghu va tahu hinaena ia nanare va ologhorira ira ketuhu, nia ka ia hoto va mukoi dafe e ghua, suga ianimu e toraina age riufu mugoro hinae ma.”

28Ne age nogha ghu Zisas ngengenena, ira varigharadi noni dike age toraina nodi fere ka ia vari va kakahei manei, 29vununa ia vari va kakahei ka manei taghe neke meha ka kaike noni ta torai kurui mana mala kopu neke ghua, neke age toraina haza ghu ka ira noni ta vari va kakahe ghini ia vetula beana ka God.