Mat 8 | KjiSC | STEP | Ne la ghahe hinae meha ghu Zisas ka ia tabafena vuhuku, ira tehi noni dike la leghu mehai.

Matthew 8

Va Litona Pagahaina: Ia Mana Ka Ia Mane Ginitaukela 8:1–11:1

Zisas Ne Va Vehai Ia Mane Ta Dufui Lepa

Maki 1:40-44; Luku 5:12-14

1 Ne la ghahe hinae meha ghu Zisas ka ia tabafena vuhuku, ira tehi noni dike la leghu mehai. 2 Heve ba ne ghua ma, neto la meha ghu ka Zisas kaike mane ta lepa, neto la torongaghituturu ghu kenuna mo, kahe ghuana iahi, “Lod, noto lao nanafau la agho, o boka va vehau mo,” ne la ghua.

3 Zisas neke haghara lao neke posini ghu, “Ara na lao nanafagu mo. !Oke veha gheu!” neke ghua ghini. Selu laoi ma ianimu neto ke age mamalahu ghena ghu ia mane ka ia fogara lepa. 4 Ianimu tuna ghe, neke kahe ghua nga iahi Zisas ka manei, “O lao lotoro ka ia hiama e la finigho ghu manei noto ke veha mamu agho, ta ghuana. Oka va kahe ghini ghu hei noni ghinina iahi. Nga hio taremehau lao ira nou veala ka ia Sugana God aianihi Zerusalemu, leghuina taghe neke ungene va gigimaio Mosese, mala avohigho ghu maneri haroharo to veha gheuna mamu agho.”

Zisas Ne Va Vehai Ia Nona Maneriva Ia Manefaadi Ira Mane Magaradi Romu

Luku 7:1-10

5 Ne haghele lao ghu Zisas aianihi Kapaniumu, kaike manefaa ka ia punugarana Romu neke la dufui manei ne la fanga toka ghu, 6 “Lod, ia nogu maneriva ne fogari ghena, ne epu ghu ka vavagenao ka sugao ara, deona ghe ge boka rizu ghu toraina vahagali ghena fuluduna,” ne la ghua.

7 “Ara a lao mo, a la va vehai ghena ghu ghatu,” ne ghua Zisas.

8 Ghe ia manefaana kaike pukuna ka ia punugara neke kahe ghua iahi, “!Lod, ara e deo ga fata ghu ta hio mehaighona agho ka ia giliona suga ara, nga o suna ngengene ma agho, eke age veha ghena ghu nogu maneriva ani! 9 Ara mu kaike mane ta au molamo ka pekana ia mana mala kopu ira nogu manefaa ta kenu, nia e au molamo ira mane magara ka pekagu ara, e ghua. ‘O lao,’ nato ghua la ara ka keha mane iahi, manei e lao; nia, ‘O meha,’ nato ghua la ara ka keha mane ani, manei e la meha. Nia, ‘O riva ghini iahi,’ nato ghua ghini la ara ia nogu noni mala varituhu, manei e la riva ghini ghatu.”

10 Ka ia fafata nomohi iahi Zisas, manei neke age toraina nona fere fuludu, neke kahe ghua ghu iahi ka ira noni dike ghahe leleghuio, “!A va kahe ghini ghau ghu ka ia toraina hohoghona, ara toraina deo kalasu kai ga finini ghu kokolona leghahai va hohoghona iahi ka hei noni ka ia malau kamoto Isiraeli! 11 Nia ara a toraina va kahe ghini ghau ghu, tehi noni tadi la mehara ghatu fateo mo nia pakao mo, tadi age nohe taremehadira ghu Ebarahamu, Aesake, nia Zekopu e ghua, ka ia mahai varighara giliona ia Ravutu, ka malauo God fate. 12 Nga heiri ira ta mala au ka giliona ia Ravutu mu, e age kai kave laori ghatu peghuru ka ia giliona nagoromo. Aianimu ta age nakele ta ghani va ghiritina ghu maneri ghatu ira hingadi.”

13 Ianimu tuna ghe, neke kahe ghua nga iahi Zisas ka ia manefaana pukuna mane magara, “Ke leghu gheu ka nou sugao, heve ta va hohoghonai nia agho mu, e age va ghuduvu vananigho mo ghatu.” Ka toraina fafata ianimu lama neto ke age veha ghena ghu ia nona maneriva.

Zisas Ne Va Vehari Tehi Nonini

Maki 1:29-34; Luku 4:38-41

14 Ne la dufu ghu Zisas ka ia sugana Pita, manei neke fini ia nona vasagha Pita neke epuepu fogara ka ia vavage, torai faa vananina dangava. 15 Ne posi laoi ghu manei ia kamena, ia fogara to age nogha ma, nia to tetu vona ma tuna, geto ke va tana vanani mahai ghu Zisas, neke ghua.

16 Ka ia saighona mehana, maneri dike hio mehari ka Zisas ira tehi noni ta sukuri nazahi. Kaike fafata ngengene mo ka manei, neto tavusu kairi ghu ira tarunga ta muko, ke va veharira ira noni haroharo dike fogarariro. 17 Manei neke riva ghini iahi mala age va ghuduvina ia saorona ia Lod neke kangavio ia porofeti Aesaea, kahe ghuana iahi,
“Manei neke hio kai tada ira fogara ka ghita
nia neke va veha ghita ka ira leghu kokolodi lelehana ta lelemeana nga e ghua,” ^{▼▼Aesaea 53:4} ia ta ghua.

Ia Tabarana Nonofoi Zisas

Luku 9:57-62

18 Ne age finini ghu Zisas la tehi mehadira ira varigharadi noni, manei neke va kahe ghidi ira nona mane ta nonofoi ta kadolo laona ka keha pelona loka ani mo. 19 Ianimu tuna ghe neke la meha nga ka manei kaike mane ta vari va kakahei ghini ia vetula beana, neke kahe ghua ghu iahi, “!Mane Vari Va Kakahei Agho, hae tei ta laona agho, ara a meha taremehau haroma ghatu,” ne la ghua ghini.

20 Ghe Zisas neke kahe ghua iahi, “Ira fokisi mu edi au korosadi, nia ira memeha gedi kuru sugadi ghu e ghua, nga ia Tuuna ia Noni mu, e deo malauna ta boka la epu hinae ta maghosona ghu manei.”

21 Kaike ghu ka ira mane ta nonofoi neke kahe ghua iahi, “Lod, o va malumuau ko, a kusu la gilu ghini ghu nogu mama.”

22 Ghe Zisas neke ungene tughui, “!O leghuau ara! Valeghudi ira ta leme ka ira tarungadi edi gilu ghidi ghu ira nodi noni ta leme taghodi.”

Zisas Ne Va Bulei Ia Tapaoho Ka Ia Lokana Galili

Maki 4:35-41; Luku 8:22-25

23 Ianimu tuna ghe, neke haghe vona nga Zisas ka ia koaka leghui harona ira nona mane ta nonofoi, dike tatanigai fera kadolo ghu ka ia Lokana Galili. 24 Heve ba ne ghua ma, neto raza ghu ia leghahai tapaoho ta mamaghuana ka ia loka, dike posa haghele ghu ira oloꞌolobaghe ka ia giliona koaka. Ghe Zisas neke epu ghena. 25 Ianimu tuna ghe dike vuhuku lao nga ira mane ta nonofoi, dike la va baghuni ghu Zisas kahe ghuana iahi, “!Lod, o hio va doli ghita! !Ghita nga dato age namo luduru lomoho!”

26 Ghe Zisas neke ungene tughuri, “?Heve ghe no puina maughemu nga ghau? !Maughegu nga la mo ka puina rekahanara va hohoghona nia ka ghau!” Ianimu tuna ghe neke tetu vona nga manei neke buruai ghu ia dafe nia ira oloꞌolobaghe, neke age au ghu ia leghahai bule.

27 Maneri haroharo ka koakana dike age puina nodi fere, dike kahe ghua ghu iahi, “?Mane hevena mamu baini mu iahi?” dike ghua. “!Ira dafe nia ira oloꞌolobaghena ghe, tadi nomohini manei!”

Zisas Ne Tavusu Kai Laori Ira Nazahi Ka Ira Vadu

Maki 5:1-17; Luku 8:26-37a

28 Ne la sabara ghu Zisas ka ia keha pelona loka ta namo lao ka ia malau leghaha Gadara, palu mane ta sukuri nazahi dike la kave meha ka ira lianga mala gilui noni dike la dufui ghu manei. Palu mane irahi mu dike puina lelemeana fuludu, e deo ghu hei noni neke boka ghahe fuluduna ka kobosona ianimu. 29 Kaike kudo lao mo tuna dike ghua, “?Agho ia Tuuna God, heve no kabai ghinina agho ka ghai? ?Agho mu o kusu meha va vavahagala ghai ghe ge dufu nga ia torai fafata neke nakai vanamaio?” dike ghua ghini.

30 Kaike totopa vadu popohi, eka suri hau lao ghu ka maneri, dike mahai dike auna ghu aianimu. 31 Papadi tuna Zisas dike ghua ira nazahi, “Noto tavusu kai kave ghai la, o va ghahe lao ghai ka totopa vadu popohi ianihi,” dike ghua ghini.

32 “!Lao!” neke ghua ghidi Zisas. Ianimu tuna ghe dike kave nga ka ira palu mane, dike la haghele ghu ka ira vadu. Ia kamotona totopa vadu popohi, dike rukufu rurutu hinae ka ia tabafena vuhuku ta didighili, dike la sopitili lomoho ghu ka ia loka. 33 Ira ta kopunai vadu, dike pelo dike lao ghu ka ia malau leghaha, la turi ghidira leghu irahi nga nia heve neke to dufuna ka ira palu mane dike sukuriro nazahi, e ghua. 34 Ira noni haroharo ka malau leghaha ianimu dike kave lao, dike la dufui ghu Zisas. Maneri dike la papadi manei ta ghahe kainina nodi kobosona ani.