Mat 9 | KjiSC | STEP | Zisas neke haghe vona ka ia koaka neke fera kadolo ghu ka ia loka, ke leghu laona ka ia toraina nona malau leghaha taghonai.

Matthew 9

Zisas Ne Va Vehai Ia Mane Taka Boka Rizui Ghu Ia Tinina

Maki 2:1-12; Luku 5:17-26

1 Zisas neke haghe vona ka ia koaka neke fera kadolo ghu ka ia loka, ke leghu laona ka ia toraina nona malau leghaha taghonai. 2 Ne au ghu manei aianimu, dito la hio mehai ghu ka ia natu keha nonira kaike mane ta leme ia keha pelona tinina. Ne fini laori ghu ira nodi va hohoghona, Zisas neke kahe ghua iahi ka ia mane ta fogari, “!Tuguo, o hioi gigimauna! Ira sasakeu to kalasa,” neke ghua ghini.

3 Kehara ka ira mane ta vari va kakahe ghini ia vetula, dike kahe ghua iahi ka vari taghodighi, “!Iahi mu toraina lausasaba ghini mamu God, vununa taghe taghonai mu God ne ghua manei ka nona ngengene idi!” dike ghua.

4 Zisas to avoho laori ma ira nganganadi, neke kahe ghua ghu iahi, “?Heve no ghua ghau ghe, no nganari nga kokolodi ngangana ta muko iramu?” neke ghua ghidi. 5 “?Heve mo ta nanamona kaheina ara: ‘Ira sasake ka agho to kalasa’, a ghua, ba, ‘Tetu vona, o ghaghahe ghu’, a ghua? 6 A va fini ghini ghau ghu ara ia Tuuna ia Noni, ta kuru au mana mala kai haza sasakena ka malau iahi peka,” neke ghua ghidi. Ianimu tuna ghe neke fihiki lao nga Zisas ka ia mane ta leme ia keha pelona tinina neke kahe ghua ghu iahi, “!Tetu vona! Hio vonai nou natunia, o sura ghu ka nou sugao.”

7 Ia mane neto tetu vona ma, neke sura ghena ghu ka suganao. 8 Di finini ghu ira noni ta ghuana ianimu, maneri dike age maughedi dike helahela ghini ghu God, vununa God neke vanadi ira noni kokolona mana iahi.

Zisas Ne Kudoi Matiu

Maki 2:14-17; Luku 5:27-32

9 Ka ia sipana aianimu Zisas, ta ghaghahe ta hinae ghu ka ia hangana, manei neke finini Matiu nohe ta auna ghu ka ia nona suga mala hio takisi. “Meha leghuau,” neke ghua ghini lao. Matiu neto ke tetu vona ma toke leghui ghu Zisas.

10 Ka ia fafata ta mahai ta au ghu Zisas ka ia sugana Matiu, tehi mane ta mala hio takisi nia keha noni ta muko babaolodira e ghua, dike la holara mahai taremehana haroma Zisas nia ira mane ta nonofoi, e ghua. 11 Di finini ghu ta ghuana ianimu, ira Farisi dike notohori ira nona mane ta nonofoi, “?Heve ne ghua mane vari va kakahei iamu ka ghau ghe, ne mahai taremehadi nga kokolodi noni ta muko iramu?”

12 Ne nomohi ghu iahi Zisas, manei neke ungene tughuri, “Ira noni ta doli veha mu edika kuhanai dokita ghu, nga ira ta fogarari lama. 13 Ghe o lao, o la hadu kavei ghu fafahakanana ia Kakangava Ta Maduana ta kahe ghua iahi, ‘Eka ghua ghu ira veala ka ghau na kabai ghidira ara, nga ira varisute ka ghau mo,’ ^{▼▼Hosea 6:6} ia ta ghua. Ara mu aka meha ghidi mo ira noni ta lotoro, nga nake meha mala kudori ira noni ta auri sasake, mala edi taghuru kairi ghu ira puhidi ta muko.”

Ia Notohona Ia Filui Mahai

Maki 2:18-22; Luku 5:33-39

14 Kaike ravata ira mane ta nonofoi Zone Ia Ta Rivai Seselebeana dike meha ka Zisas dike notohi ghu, “?Heve na ghua ghai nia ira Farisi ghe, na filui mahai nga, nga mane ta nonofoigho nira agho mu, ta deo idi ma ghedi filui mahai ghu?” dike ghua ghini.

15 Zisas neke ungene tughuri, “?Heve, ira noni ta lao ka ia varihio mu, edi muko hihingodi mo ka ia fafata mahai varighara va manemane taremehana maneri ia mane ta varihio? Ghe kaike ravata, ia mane ta mala varihio, edi age hio kai tadi mala va lemeina. Ka ianimu ghe gedi age filui mahai taremehana muko hihingo nga maneri.

16 “E deo hei ta sikatina ia poko ta sesepa ka kaike rekuna poko ta foforu, vununa ia foforuna poko sisikata e age vivighoho nia ke va faa laoini tuna ia rekuna, e ghua. 17 Nia e deo hei mu, ta oranga lao waeni ta foforuna ka ira mala nakai waeni ta sesepa ta riva ghidi ka kafudi gouti. Neto ghua la ianimu, ira kafudi gouti edi age pohopo e oranga ghu ia waeni, nia age ngovalari tuna ira kafudi gouti, e ghua. Nga waeni ta foforu mu, e toraina sutei ka foforudi mala nakai waeni ta riva ghidi ka kafudi gouti. E ghua ma ianimu ghe, ge age veha nga ia waeni nia ira mala nakai waeni ta riva ghidi ka kafudi gouti, e ghua.”

Ia Rekaha Ghase Ta Leme Nia Ia Fotati Ta Fogara

Maki 5:21-43; Luku 8:40-56

18 Neke kahe ghua ngama iahi Zisas, neto ke meha torongaghituturu hinae ghu kenuna mo manei kaike mane babatu ka ira Ziu kahe ghuana iahi, “Ia tuugu ghase neke bake leme ghena lao mo; o meha ko agho o age posini ghena ghu, e mala ke age doli ghena ghu manei,” neke ghua ghini. 19 Tetu vona tuna dike ghua Zisas nia ira nona mane ta nonofoi e ghua, di leghu laoi ghu manei.

20 Ka ia ghaghahe ta lao ghu maneri, kaike fotati ta dufui fogara kolotibo giliona tazoi palu komuhu, neke la vona meha leghuna mo, neke la posini ghu ia va kukuruna poko sodu ka manei. 21 “Ga boka posi laoi lama ara poko sodu ani ka manei, ara ato ke age veha ghegu ma,” neke ghua ka ia nganganana.

22 Ne fihiki leghu ghu Zisas, manei neke finini ia fotati, neke va kahe ghini lao ghu, “!Tuugu ghaseo, oka anga gheu ghu! Ia nou va hohoghona neto va vehaighona.” Ka fafata ianimu lama neto ke age veha ghena ghu fotati ani.

23 Ne la sabara ghu Zisas ka ia sugana ia manefaa, manei neke la finiri ira ta kakato koze leme ka mala ufu nia ia varigharana noni dike ngilingoele va fafaaro, e ghua, 24 neke la kahe ghua ghu iahi, “!O kave ghau aiahi! Rekaha ghase iahi e deo ge leme ghu. Manei mu ne suna epu ghena ma,” neke la ghua ghidi. Ghe maneri dike paghoi. 25 Di kave lao ghu peghuruo ira leghu noni nga, Zisas neke haghele lao gilio, neke la posini ghu ia kamena nia tetu vona tuna manei neke ghua. 26 Ia nonomohona hahaima iahi, neke age ongaha ka hori kamoto ianimu.

Zisas Ne Va Vehari Palu Mane Ta Kivi

27 Leghuna ia ghahe kaini malau ianimu Zisas, palu mane ta kivi dike ghahe leghu laoi leghuna mo dike kudo lao ghu, “!Tuuna Deveti, dudumana ghini ghai!” dike ghua kudodira.

28 Ne la haghele ghu gilio Zisas ka ia suga, ira palu mane ta kivi dike la haghele molamo aianimu. Notohori tuna neke ghua Zisas, “?Ghau palu no va hohoghonai mo ta boka va veha ghauna ara?” neke ghua ghidi.

“Uve, Lod,” dike ghua ungene tughuna.

29 Ianimu tuna ghe neke posi laori nga manei ira hibadi, neke kahe ghua ghu iahi, “Vununa ka ia nomu va hohoghona, o ke age veha ghemu ghu,” neke ghua ghidi. 30 Selu laoi ma ianimu, dito ke age vovoho fifini ghu palu mane idi. Ghe Zisas neke toraina kahe ghidi va gigima, “Oka va kahe ghini ghu hei noni, ghinina iahi,” neke ghua ghidi. 31 Ghe maneri dike to kave lao ma, dike la va ongahi ghu ia nonomohona manei ka ira leghu pelodi nga ka hori ianimu.

Zisas Ne Va Vehai Ia Mane Ta Melu Ngengene

32 Di kave lao ghu palu mane iranimu, keha nonira dike la hio mehai ka Zisas kaike mane ta melu ngengene, vununa neke sukui nazahi. 33 Ne tavusu kaini ghu Zisas ia nazahi, to tatanigai ngengene ma ia mane, dike age nodi fere ghu ira leghu noni nga. “E toraina deo nga gake fani fini ghemai ghu kokolona leghutau iahi aiahi Isiraeli,” dike ghua nodi ferena.

34 Ghe ira Farisi dike kahe ghua iahi, “Ia faghinadi ira nazahi konia neke vanani mana mala tavusu kai nazahina Zisas,” dike ghua.

Zisas Ne Dudumana Ghidi Ira Noni

35 Zisas neke ghaheri ira leghu malau leghaha nga nia ira leghu rekahadi malau nga e ghua, vari va kakaheina ka ira suga mala varighara ira Ziu nia tuturi beana ghinina ia Nonomoho Ta Veha ghinina ia Ravutu, e ghua. Zisas neke va vehari haro molamo ira noni ta auri leghu kokolodi lelemeana nga nia fogara nga, e ghua. 36 Ne finiri ghu manei ira noni ta varighara, manei neke toraina age ngana dudumana ghidi ghena fuludu, vununa maneri dike toraina hangapuaha nia ngana melu ghedi dike ghua, taghe ta ghua nia ira sipisipi ta deo hei ta kopuna ghidira. 37 Kahe ghua tuna iahi ka ira nona mane ta nonofoi neke ghua Zisas, “Ira ghanona ia nunuma ne puina tehi fuludu, ghe ira maneriva e deo gedi tehi ghu. 38 Verevere fangai ghu ia Lod ta kutamana ia nunuma, e va ghahe lao maneriva ghu, mala la hio varighara ghidi mehana ira fuadi tato ghano.”