Filimoni Flm Filimoni Ia Leta Ka Polo Vanani Filimoni Ia Leta Ka Polo Vanani Filimoni Va Kenuna Tuturi Ghinina Leta Iahi

Ia Ponoena Va Fafahaka Ghinina Leta Iahi

Filimoni mu kaike mane neke au ka ia malau leghaha Kolosi. Ka ia fafata ghahe la sigho Filimoni ka ia malau leghaha Efesasi, haeba manei neke la dufui Polo neke laono aianimu ka ia va litona ghaghahe manei mala va ongahina ia Nonomoho Ta Veha. Ka ia leghuna nomohi manei Polo tuturi beanana, Filimoni neke age va hohoghona ka Zisas, ghe neke leghu lao nga tuna Kolosi. Ia suga ka manei mu neke toraina faa fuludu, dike la au varighara ghu aianimu ira nonidi Kolosi ta va hohoghona ka Zisas. Haeba Afia mu neke ghaseborona ka manei nia ia tuunamane tuna geke kaike mane babatu ghu ka ia kiloau aianihi Efesasi, neke ghua.

Kaike ghu ka ira noni mala vari tuhu neke riva vananio Filimoni mu Onesimasi. Manei neke sikori keha leghutaura ka Filimoni neke pelo lao ghu ka ia malau leghaha Romu. Onesimasi mu neke dufui Polo ka ia fafata au manei ka pipiliga. Haeba manei mu neke lao la hadu toka ka Polo, vununa haeba ka ia neke nomohio manei Filimoni turi ghinina Polo. Polo neke tuturi vanani beana ghu manei ghinina ia Nonomoho Ta Veha, neke age va hohoghona haro ghu molamo Onesimasi ka Zisas. Onesimasi mu neke kaike vehana mane mala toka ghu ka Polo. Vununa Onesimasi mu ghatunaina neke to age kaike mane ta leghui Zisas, dike avohi ghu Polo ghe Onesimasi mu taghe lotorona leghutau ta mala riva ghinina mu, Onesimasi e ke leghu lao ka Filimoni. Polo neke fangai manei ta mala kai hazarira ira leghutau ta muko neke to riva ghidiro Onesimasi. Polo neke kabai ghini Filimoni ta hioina Onesimasi, eka ghua ghu ma taghe kaike mane mala varituhu mala riva vanani ta ghua ghinina, nga taghe kaike tahina mane ka Kraes e ghua ghini haroma molamo.

Ne va kakahe ghini ghitana leta iahi mu, ira noni ta vanadi tabara ira ta riva vanadi, ira ta tagho bisinisi, ira ta babatu, nia ira uke nia ira mama e ghua mu, edi hio suteri ira noni ta au ka pekadi maneri. God mu e age vanada tabara ghu ghita leghuina taghe heve da ghua ghita hio suterira ira tadi au ka pekana ia mana mala kopu ghita.

Hei Neke Kangavina Leta Iahi

Ka ia va nonoghana ia va litona ghaghahe riva beana ka Polo, ira mane magaradi Romu dike sakomo hioi manei dike hio laoi ghu Romu la nakainina ka pipiliga. Polo neke kangavi leta iahi ka ia fafata auna ka pipiliga aianihi Romu.

Ka Fafata Neke Kangavina

Ka ia kusu auna Polo ka pipiliga ka ia malau leghaha Romu, manei neke kangavari gaha leta: Ira leta vanadi ira noni ta leghui Zisas ka ira malau leghaha Kolosi, Filipae, Efesasi, Leodisia nia ia leta vanani Filimoni, e ghua. Polo ne tuturi ghini ia nona leta ka ira nonidi Leodisia ka ia leta ira nonidi Kolosi. Fini ka Kol 4:12-16. Ghe ia leta to kakai sepaoni. Leta iahi ka Filimoni mu haeba neke kangavi ka vari hoataina 60 nia 61 komuhu leghuna ia urahana Zisas (A.D. 60-61). Iahi mu neke 30 komuhu mo leghuna ia tetuleghu ka Zisas ka ia leme. Manei neke fangai Tikikasi ta hio laorira lito leta; kaike ghu ka Filimoni, kaike ghu malana Kolosi nia keha nenemana letana tuna, malana Efesasi, e ghua. Polo neke tuhu laoi Onesimasi taremehana Tikikasi. Polo neke avohi e dodoliana ka Onesimasi ta ghahe taremehanana Tikikasi, vununa dike au ira mane ta haduri ta mala sakomo hiori ghu ira noni mala varituhu ta pelo ghahe. Leghurira ira vetuladi Romu ghu mu, ia noni mala varituhu ta pelo ghahe mu e boka toraina va kilasa va mukoi mo, ba, e boka haroma ghe atungina.

Torai Papataidi Nganganara Ka Leta Iahi

Leta iahi lamu ghu mu ta toraina ponoena ka ira leghu leta nga Polo. Polo ne toraina banabana faete va veharira ira ngengene ka manei, ngengenena ka ia namaha, va vonavona nia varisute e ghua, neke fangai ghu Filimoni taka halina ghu ka Onesimasi, nga ta mala ke hio namaha leghuina manei mo, taghe kaike tahina mane ka Kraes ta ghua ghinina. E fotai ghu ka lito pagahaina. Ka ia kusu pagahaina mu, Polo ne kahei ia verevere kudo veha ghinina ia va hohoghona nia ia namaha ka Filimoni. Ka ia va paluna pagahaina, Polo ne fangai Filimoni ta kai hazarira ira va zezea ka Onesimasi taghe neke ghuao la Zisas neke kai hazariro ira sasake ka Filimoni. Ka ia va litona pagahaina, Polo ne naini taghonai ta mala tabararira ira kaoni ka Onesimasi, va ngana ghini leghuna Filimoni ta kurui kaonina manei ka Polo, vununa Polo neke batu ghini laona Filimoni ka ia va hohoghona ka Zisas.

Ira Papataidi Tuturi Ka Giliona Leta Iahi

1. Va Kenuna Pagahaina: Polo Ne Riva Ghini Ia Tarai Kudo Veha Ghini Filimoni 1:1-7

2. Va Paluna Pagahaina: Polo Ne Fanga Lao Ka Filimoni Vanani Onesimasi 1:8-16

3. Va Litona Pagahaina: Polo Ne Riva Ghini Kaike Naiungene Ka Filimoni 1:17-25

Philemon

Va Kenuna Pagahaina: Polo Ne Riva Ghini Ia Tarai Kudo Veha Vanani Filimoni 1:1-7

Ira Ungene Veha Ka Polo

1Leta iahi mu na kangavi ara Polo. Ara mu na au ghu aiahi ka pipiliga, vununa ka ia tuturi ghini beana ia Nonomoho Ta Veha ghinina Kraes Zisas. Leta iahi mu sipana haroma ka Timoti ia tahida mane ka Kraes.

Ghai palu na ungene vehaigho agho Filimoni ia nomai mane baere kenuna ta riva varighara taremehamai ghai palu vanani God. 2Ghai palu na ungene vehai molamo Afia ia tahida fotati ka ia va hohoghona, nia Akipasi ia taremehada taghe kaike mane magara ia ta ghua tetu ghinina ia Nonomoho Ta Veha taremehada ghita nia ira keha noni kiloau ta va totoana varighara ka suga nia agho, e ghua.

3Ara na verevere fangai God ia noda Mama nia ia noda Lod Zisas Kraes, e vanamu ghu ia varisute ta va meha kakatoi nia ia bule.

4Ara a kudo vehai tudu ma God ka ira nogu verevere, ghinighona agho Filimoni, 5vununa ara na nomohi ma na au ghu ia nou va hohoghona ka ia Lod Zisas nia ia namaha ka agho ta vanadi ira leghu nona noni nga God, e ghua. 6Ara na verevere fangai ia au vari parekete varighara ka agho taremehadira ira ta va hohoghona, e age va avoavohigho ghu agho va fafahakarira ira leghu va beana ta au ghita nga ka ira dolida taremehana Kraes. 7Ia nou namaha tahigu maneo, neto ke vanagu va ghazaghaza nia gigima e ghua, vununa agho noto ke va manemaneri ira hihingodi ira nona noni God.

Va Paluna Pagahaina: Polo Ne Fanga Lao Ka Filimoni Vanani Onesimasi 1:8-16

8Ne ghua mamu ghe na fangaigho nga ara ta mala riva vanaguna keha leghutaura. Vununa ara mu nona mane nonomoho Kraes Zisas, a boka mo ghu ara kahe va gigimaighona mala riva ghinina ia leghutau ta lotoro. 9Ghe vununa ka ia vari namahai ghita palu, na suna fangaigho ma ghu ara ia nou mane baere Polo, ia manekusu ta au ka pipiliga vanani Kraes Zisas ghatunaina.

10Ara na fangaigho ghu ta kuruighona dudumana agho ka Onesimasi, ia nou mane mala varituhu. Manei mu taghe kaike torai tuugu mane a ghua ghini ara, vununa manei neke meha va hohoghona ka Kraes ka ia fafata va kakahe ghini ara ka giliona malau pipiliga ini aiahi. 11Sepao mu, Onesimasi neke deo lighorona ka agho, nga ghatunaina mu manei e toraina kuru lighorona ka agho nia ka ara, e ghua. 12Ara na va ghahe leghu agei Onesimasi ka agho, ia ta namaha ghini fuludu ara ka hihingogu kamoto ini.

13Ara nake torai kabai ghini ta posi leghu taremehaguna manei, e boka mala holarigho ghu agho toka ghinaguna, ka fafata au iahi ara ka pipiliga, vununa ara nake tuturi beana ghini ia Nonomoho Ta Veha. 14Ghe ara e deo nga ga posi leghui ghu manei aiahi, vununa agho e deo nga go va uvei ghu ta mala ghuana ianimu. Ara e deo ga kabai va tuufu ghinigho ghu ta mala toka ghinaguna, nga na kabai ghini ia toka ka agho ta mehana ka ia toraina lao hihingo taghou. 15Haeba fafahakanana ghe neke ghahe kaigho nga manei birusuna fafata tei mu, o mala boka ke hio leghui ghu agho mala au taremehau fuludaina, neke ghua. 16To deo mu taghe kaike mane mala varituhu ia ta ghua manei, nga e veha fuludu laoini ia noni mala varituhu. Manei mu toraina kaike tahida mane ka Kraes. Ara na toraina namaha ghini fuludu manei, geala agho mu e fuludu laoni ghu namaha ghinina manei. Vununa manei mu eka suna nou mane mala varituhu ma ghu agho, nga e tahiu mane haro molamo ka ia Lod.

Va Litona Pagahaina: Polo Ne Riva Ghini Kaike Naiungene Ka Filimoni 1:17-25

17Noto nganai la ghu agho nia ara e ghua mu da kaike mo ka ia riva vananina Kraes ta ghuana, agho o ghua haroma ghu ke hio namaha leghuina Onesimasi, taghe ia ta ghua la agho hio namahauna ara. 18Neto ke riva ghidi va zea la manei keha leghutau ka agho, ba neto kaonigho la manei keha leghutaura, o nai hinaeri ka ara mo. 19Ara, Polo, na kangavina iahi ka ia torai kamegu taghogu, “Ara ta age lifu leghuina.” Ghe go ngana kai la ta kaoniau haro nia agho malana ia foforuna doliu agho ka ia tarunga, vununa ara nake toka ghinigho agho ta va hohoghonana ka Kraes. 20Uve, tahigu maneo ka Kraes, o riva vanagu ko leghutau ta fangai iahi ara vananina Onesimasi. O riva ghini iahi vananina ia Lod. Agho o age va manemaneau ara noto riva vanagu la agho leghutau iahi, taghe kaike mane taremehagu noni ta va hohoghona ka Kraes ta ghuana. 21Ka ia kangavi ara leta iahi, ara na va hohoghonai ta age riva ghinina agho ghatu heve ta fangaigho ini ara nia fuludu laoini heve ta kahei ini ara, e ghua.

22O va tana vanagu ko kaike ringifota mala maghoso, vununa ara na rangerangei God e age ungene tughuri ira nomu verevere, edi va kaveau ghu ka pipiliga ira noni nia va malumuau tuna ta ke magali leghu agena ara ka ghau, e ghua.

23Epafarasi, ta au taremehagu ini ka pipiliga ka ia leghui manei Kraes Zisas, ne va ghahe age nona ungene veha. 24Maki, Arisitakasi, Dimasi nia Luku e ghua, ira mane taremehagu ta riva varighara taremehagu ara, di kahe ghua haro molamo.

25Ara na tarai e age vanamu ghu ia Lod Zisas Kraes ia varisute ta vanada kakato.