Philippians 1

Va Kenuna Pagahaina: Polo Ne Tuturi Ghini Heve Neke Dufuna Ka Taghona 1:1-30

Ira Ungene Veha Ka Polo

1Leta iahi mu sipa mehana ka ghai palu Polo ghe Timoti, ira noni mala varituhu ka Kraes Zisas,

Na kangava vanamu age ghu ghau ira leghu nona noni nga God ta va hohoghona ka Kraes Zisas ka ia malau leghaha Filipae, nia ka ira noni babatu ka ia kiloau nia ka ira ta toka ghidi tudu maneri, e ghua.

2Ara na tarai fangai God ia noda Mama nia ia Lod Zisas Kraes e vanamu ghu ia varisute ta va meha kakatoi nia bule.

3Ka ia ngana ghau age ara leleghu fafata, ara a kudo vehai ia nogu God. 4Ka giliodi ira leghu nogu tarai malamu nga ghau leleghu fafata, ara a tarai taremehana va ghazaghaza tudu ma, 5vununa ghau noto ke holara riva taremehagu ka ia va ongahi ia Nonomoho Ta Veha ka ia fafata kusu nomohi ghau ta dufu ghu ghatunaina. 6Nia ara na torai avohi, God neke tataniga ghinio riva ta veha iahi ka ia va foforuri hihingomu nira, e riva ghini ma e lao ghu ghatu, e age vuhai va hokoti ghu ka ia ravata ta ke la leghu mehao Kraes Zisas.

7!Ghau mu e au tudu ma ka hihingogu ini ara! E veha ghu ta ngana ghua ghini ghauna iahi ara ghau haroharo. Vununa God ka ia nona varisute ne va malumu ghita ta riva varigharana ka ia tuturi ghini ia Nonomoho Ta Veha, geta au ghu ara ka pipiliga, ba, geta taga tetu ghini ghu ara ia Nonomoho Ta Veha va podolina ta hohoghonana manei. 8God ne avohi mo ta torai kabai fini ghauna ara, vununa ara na namaha ghini ghau haroharo ka ia namaha nona Kraes Zisas. 9Ara na tarai fanga, e mala age kodolo va faa ma e lao ghu ia namaha ka ghau ka ia avoavoho nia va fafahaka, 10o mala age boka faeti ghu heve ia ta toraina veha fuludu lao. Ianimu tuna ghe go age kalasa nga ghau ka ira leghu muko nga nia tapata nga e ghua, ta vuhai dufu ghu ia ravata leghu meha ka Kraes. 11Ira doli ka ghau mu, e age foudu ka ira fuadi ira riva ta lotoro, ia ta boka meha ma ka Zisas Kraes lama, malana ia varanga nia helahela ka God.

Ia Pipiliga Ka Polo Ne Va Ongahi Ia Nonomoho Ta Veha

12Ghau tahiguro ka Kraes, ara na kabai ghini ghau ta avohorira, ira leghutau nake vavahagala ghidiro ara, ne toraina age toka, va ongahina ia Nonomoho Ta Veha. 13Leleghonana mu ira mane magara haroharo ta kopu ka ia malau ginitau nia heiri haroharo aiahi e ghua, di avohi ta auna ara ka pipiliga, vununa ara na riva vanani Kraes. 14Vununa ghini au pipiliga iahi ka ara, neto ke age vanadi gigima laoni ghu ka ia Lod tehidira ka ira noni ta va hohoghona, mala torai age naduna nia ta deona gedi maughedi ghu e ghua tuturi ghinina ia saorona God.

15E hohoghona mu ta kabai tuturi ghini beanana Kraes kehara, vununa maneri edi kakabai ghinagu ara nia edi kabai varighohi, e ghua. Nga kehara mu edi tuturi ghini beana Kraes vununa di kabai vari tokai. 16Maneri edi namaha ghini Kraes nia maneri edi avohi neke vanagu rivana ara God mala taga tetu ghinina ia Nonomoho Ta Veha. 17Nga ira ta kakabai ghinagu ara mu edi tuturi beana ghini ia Nonomoho Ta Veha ghinina Kraes, vununa edi kabai varanga fuluduau ma ara. Maneri e deo gedi tuturi beana ghu ka ira ngangana ta totonu. 18Ghe ianimu, e deo ne heve ta ghuana. Leghutau ta tongovonana mu, ira noni di tuturi ghini beana Kraes ka ira leghu ghaghahedi nga, geta lotoro ba zea ira va fafahaka. Vununa ghini iahi, a age va ghazaghaza ghu ara ghatu.

Uve, ara a age va ghazaghaza ma a au ghu, 19vununa ara na avohi ka ira nomu tarai toka ghinagu ghau, nia ka ia toka ta va mehai ia Tarunga ka Zisas Kraes e ghua, ta age hio va doliauna ghatu.

20Ara na torai fini kenui nia rangerangei, ta torai deona ara ga age riva ghini ghu kaike leghutau ghu ta mala va haghavauna, nga ara a age au va nadu tudu ma vananina Kraes, taghe nake ghua nake mehao la sepao, nia ta age va vonavonai tuduna Kraes ka ia doli ara e ghua, geta doli, ba leme ara. 21Vununa ka ara mu, nato doli la, e malana Kraes, nia nato leme la, e age veha fuludu laoini ta doli ta auna ghu ka malau iahi peka. 22Nga nato doli la ara nato lao ghu, ara a boka age riva ghidi mo ira riva ta kuru lighorodi vananina ia Lod. Ara e deo ga torai avohi ghu heve mo ta faetina. 23Ara mu to vari koroho ghinagu ka palu pelo. Ara na torai kabai ghini fuludu ta ghahe kainina doli iahi ta au taremehanana ghu Kraes, ia leghutau ta toraina veha fuludu lao, 24ghe e torai ke tongovona fuludu laoni ta doli ta agena ghu ara, vununa ghau haroharo no kuhana ghinagu nga ara.

25Vununa ara na torai avohi ta ghuana iahi, nato avohi ghu ara, ta age au hinaena ghatu. Ara a au taremehamuna ghau haroharo a age ghu, mala toka ghini ghauna ta kodolona, ta kuru ghauna ghu va ghazaghaza ka ia nomu va hohoghona. 26Mala nato ke la leghu meha la ara ka ghau, e age tehi laoni ghu ia fafahakana ta mala va ghazaghaza ghau, ghinina heve neto ke riva vanaguna ara Kraes Zisas.

27Geta heve ta dufuna ghe, leghutau ta tongovonana mu, ia ghaghahena doli ka ghau mu e toraina vanani va vonavona ia Nonomoho Ta Veha ghinina Kraes. Mala geta age sigho ghini ghau ghu ara, ba, geta deo ghu ghe, ara a age nomohi mo ghatu ta tetu vari vavatana, ta taga ghini varigharana ghu ghau ta mala age hiorira ghu keha noni mala va hohoghonaina ia Nonomoho Ta Veha. 28Oka maughidi ghemu ghu ira noni ta kana ghini ghau. Gigima iahi lamu ghu mu, kaike va ghila mala va podolina edi mala age muko ghini taghodi, ta ghuana, nia ta va podolina ka ghau ta mala age hio va doli ghauna taghonai God, e ghua. 29Oka maughidi ghemu la ghu, vununa God neto ke vanamu ghau ira palu mana. Mana irahi mu e mala riva vanani Kraes, ka ia va hohoghonai manei lama eka ghua ghu, nga e mala vavahagala vanani haro molamo manei. 30Ghita mu da au ka giliona magara varighara iahi. Ghau noto ke finiau mo vavahagala vananina ara manei sepao, nia ghau no avohi mo ta auna nga ara ka hoataina ghorevaha leghaha iahi, e ghua.