Philippians 2

Va Paluna Pagahaina: Polo Ne Va Kakahe Ghidi Ta Nganganana Nia Riva Taghe Kraes Ta Ghuana 2:1-30

Ia Au Unuhu Ta Hohoghona

1Ia doli ka ghau ka Kraes e va gigima ghau, nia ia namaha ka manei e va kakapoto ghau, e ghua. Ghau no kaike ka ia riva varighara taremehana ia Tarunga nia ghau no au ghau dudumana nia varisute, e ghua. 2Vununa leghu irahi nga mu di hohoghodi, na kabai ghini ghau ghu ta toraina vanaguna ia va manemane ta kamoto, kuru ghitana kaike ngangana mo ka ia vari namahai, nia riva varighara ka kaike hihingo mo malana kaike va fafahaka mo.

3Oka luluto ghu, ba hadu varanga ghu, nga o nai hinae ghau taghomu, nia toraina va vonavonari tuna ira keha noni fuludu lao ghauna taghomu, e ghua. 4Agho oka matoi ma ghu heve ia ta toraina veha vananigho taghou lama, nga geala o matoi haro molamo heve ia ta veha ka ia keha noni. 5Au dolina ka ghau mu, geala e varifata lao ka ia au doli Kraes Zisas.
6Kraes taghonai neke God tudu ma ka ira leghu ghaghahedi nga.
Ghe manei e deo geke tuufu ghini ghu ta mala au tuduna ka papala taghe God ta ghua ianimu.
7Nga manei neke nai kairi vahina leghutau nga,
neke hioi ghu ia au dolina ia noni mala varituhu
neke meha noni ghu.
8Nia ka ia podolo ka hihili noni manei, manei neke nai va hinaei taghonai,
neke torai nomohi ghu God, la dufuna ghe ka ia leme,
ia leme ta hahaghavana ka ia hekefalahata.
9Ianimu la ghe, neke nai vonai nga God manei, ka ia papala va nonoghana fateni,
neke vanani ghu ia babaolo ta varanga fuludu laorira ira keha leghu babaolo nga.
10Ka ia va vonavonai ia babaolona Zisas, edi age torongaghituturu hinae ghu heiri haroharo,
ka malauo God fate, ka malau iahi peka nia ka ia malaudi ira ta leme, e ghua,
11mala heiri haroharo edi age kahe kavei ghu Zisas Kraes mu ia Lod, ta ghuana,
mala vanani varangana God ia Mama.

12Ghau noni taremehagu, ghau noke leghui tudu ma God ka ia fafata au tamu ara. Nia ghatunaina, ka ta deo ini ara ga au tamu ghu, e toraina tongovona fuludu laoni ta ungene nonomohona ghau. O riva ma o lao ghu ka ia torai heluhelu nia mamaghu, riva va hokotorira ira leghutau ta lotoro, maladira ira noni neto ke hio va doliriro God, 13vununa God e riva tudu ma ka giliomu nira ghau mala va ohoꞌoho ghauna ta boka riva ghinina ghu heve ia ta veha vanani taghonai God.

14Ka ira leghu ta riva ghidi nga ghau, oka gumigumi ghu, ba vari tuufuai ghu. 15E ghua ianimu ghe, go age boka nona rekaha ta kalasa nga, nia ta lotoro nga e ghua God. Ghau mu no au ka vari hoataidi ira noni ta viriarugha ira dolidi nia tato nonidi ka rivai puhi ta muko, e ghua. Ghau o toraina au va veha la pelarana ka vari hoataidi maneri, taghe ira babaghunu ta pelara ka kolanga ta nagoromona fate. 16Va kahe ghidi ira noni ghinina ia Nonomoho Ta Veha, ia ta mala vanadi ia doli soduai, mala ka ia leghu mehana Kraes, a boka age va ghazaghaza ghu ara, vununa e age va podoli ghatu, ta deona geke pepesana ghu ira leghu ghorevaha nga, nia riva nga e ghua, ka ara. 17Ia nomu va hohoghona ka ia Lod nia ia nomu riva e ghua mu, taghe kaike veala ta riva ghini lao ka manei, e ghua. Nia dito atunguau la ara maneri, ia doli ka ara mu taghe kaike veala ta nakai varighara taremehadi ira veala ka ghau, e ghua. Taghe ianimu ge ghua la, ara a puina age va manemane ghu, taghe ghau ta va manemane niala ghidira ira nomu veala ta riva ghidi. 18Taghe iala molamo, ghau geala o va manemane nia va ghazaghaza taremehagu ghu ara.

Timoti Ghe Epaforodaetasi

19Neto lao hihingo la ka ia Lod Zisas, ara na rangerange ta va ghahe magali ageina Timoti ka ghau ghatu, a boka mala va manemane haro ghu molamo ara ka ia age nomohori ira nonomohomu ta veha ghau. 20Ara na kabai va ghahe agei Timoti, vununa e deo heini ta auna aiahi ka ara, taghe Timoti ta ghuana, ta torai ngana tahu ghau hohoghonana. 21Ira keha leghu noni nga mu, edi rugusi ghidi ma ira ta ngana tahuri taghodi lama, nga e deo mu ka ira heve ta ngana tahuri Zisas Kraes. 22Ghe ghau to avohi heve kokolona noni mu Timoti, e ghua. Taghe ta ghua nia kaike rekaha mane, ta riva taremehana nona mama neke torai ghua manei, riva taremehaguna ara ka ia va ongahi ia Nonomoho Ta Veha. 23Ara na rangerangei ghu ta tuhu vanamu agena manei, ka ia age hadu kavei ara, heve ne age va puhinina ia koti. 24Ara na va hohoghonai molamo ta age va malumuauna ia Lod, ta va kaveauna ghu ka ia pipiliga, mala magali age sigho ghini ghauna taghogu.

25Ka nganganagu ini ara, e veha ta ke toraina va leghu vanamu agena ara Epaforodaetasi. Manei mu kaike tahigu mane ta hohoghona ta riva taremehagu ara, nia toraina kaike mane magara ka ia va hohoghona, e ghua. Ka ia fafata hagalai toka ara, ghau noke tuhu mehai manei ka ara, taghe kaike nomu mane mala hio nonomoho, noke ghua ghini. 26Manei ne toraina hagala ghini fuludu ta fini ghau haroharona, ne puina anga ghena fuludu ghu, vununa noke nomohio ghau neke fogari manei, ta ghuana. 27Manei neke fogari ghena mamu, neke bini leme mo ghu. Ghe God neke dudumana ghini manei nia ghinagu ara e ghua, neke deo ghu torai va faa vanagu meha muko hihingona ara.

28Ara na toraina kuhana ghini fuludu ghu mala tuhu ageina ka ghau manei, mala ka ia ke age fini leghui ghau, o age va manemane ghu, nia a nodo ghu tuna ara age anga ghini ghauna, e ghua. 29O hio namahi ghena ghu ka ia Lod ka ia toraina va ghazaghaza, nia va vonavonari haro ira noni taghe manei ira ta ghua, e ghua, 30vununa manei neke bini leme mo ka ia riva vanani Kraes, mala vanaguna ara ia toka, noke deono ghau go boka vanagu ghu.