Phili 3 | KjiSC | STEP | E ghua ghu ianimu, ghau noni taremehagu ta va hohoghona, o va ghazaghaza ghini ghu heve neto ke riva vanamuna ia Lod. Ghatunaina e deo ghu ara ge mamarutana vanagu ghu take kahe ghini ghau va gigima leghunani ghidira ira noni ta muko ta kabai ghini ghau papahe va ghilaghilana. Ara mu na riva ghini iahi malana ia veha ka taghomu.

Philippians 3

Va Litona Pagahaina: Polo Ne Va Kakahe Ghidi Ghinina Ia Meha Avohi Kraes 3:1-21

Ia Au Va Lotoro E Meha Ka Ia Va Hohoghonai Kraes

1 E ghua ghu ianimu, ghau noni taremehagu ta va hohoghona, o va ghazaghaza ghini ghu heve neto ke riva vanamuna ia Lod. Ghatunaina e deo ghu ara ge mamarutana vanagu ghu take kahe ghini ghau va gigima leghunani ghidira ira noni ta muko ta kabai ghini ghau papahe va ghilaghilana. Ara mu na riva ghini iahi malana ia veha ka taghomu. 2 O balau ghidi ira ta kahei, ghau o toraina hioi ia papahe va ghilaghila, ghe ge hio va doli ghau nga God, ira ta ghua. Noni irahi mu, edi rivai muko ma, nia taghe ira meusu mauke edi ghua. 3 Ghita mo mu ta nona noni hohoghonana God, vununa ghita da va totoana ghini God ka ia nona Tarunga, nga eka ghua ghu ira ta rangerange ka ia papahe va ghilaghilai ia tini. Ghita da va varangi Kraes Zisas nia ghita deo gada rangerange ghita ghu taghodai, ba ira heve ta boka riva ghidi ghita, 4 geta kuruau ghu ara keha va fafahaka ta veha ta mala va ghighiuna ka ira ghorevaha taghogu! Hei ka ghau neto kurui la va fafahaka ta mala va ghighiuna ka ira ghorevaha taghona, e tehi laoni va fafahakara ka ara mala ngana ghuana ianimu. 5 Ara mu nake hioi ia papahe va ghilaghila kaike kolabana leghuna ia doligu. ^{▼▼3:5 Dito taho ravata la ira noni Ziu, maneri edi tahoi ia va kenuna ravata taghe va kaikena ravata, neto dufu la kaike leghutau. Ghatunaina mu ghita da tahoi ia ravata leghuna dufuna kaike leghutau taghe va kaikena ravatana. Maneri dike papahe va ghilaghilai Polo ka ia va vituna ravata leghuna ia dolina manei. Ghe ka ira noni Ziu mu, iahi mu e va hanana ravata e ghua, vununa maneri dike tahoi ia torai ravata neke dolio manei, taghe va kaikena ravatana.} Ara mu tanigu ghu ka ira noni Isiraeli, nake torai pagusu meha ghu ka ia butubutu Benizemeni. Ara nake doli ka ia torai busaka Hiburu ka kaike fototatamana ta Ziu. Ara nake toraina leghu va vehai ghu ia vetula ka Mosese. Neke ghua mamu ghe, nake meha mane Farisi haro nga ara. 6 Ara nake fani ngana ghua iahi, ira dike leghuio Zisas mu e deo gedi ke va totoana ghini va lotoro ghu God leghuina ia vetula ka ghai, nake ghua. Ara nake toraina va vavahagalari ghu maneri, vununa ianimu lamu bana nga, neke kabai ghinaguna God ta riva ghinina ara, nake ghua ka ia nganganagu. E deo kaike ungene va gigima ghu ka ia vetula nake va kedeina ara leghu va vehaina, neke deo ghu hei, ta va tapata ghinaguna kaike zea ghu.

7 Ghe ira leghutau ta toraina tongovodi, nake kusu ghua ghidiro ara, e deo lighorodi nato age ghua ghidi ara ghatunaina, vununa ka heve neke to va podolo vanaguo Kraes. 8 Eka ghua ghu ma leghu iranimu nga, nga ira leghutau haroharo ta fani nganai va ghighiu lao ara, mala hio va doliauna God nake ghuao mu, to age toraina deo lighorodi ma ka ia va fata ghidi lao ara, ka heve ia ta toraina au lighorona fuludu lao, ia varangana avoho va vehai Kraes Zisas ia nogu Lod. Vununa ghini manei, nato age nai kairi ghu ara vahina leghutau nga. Ara nato nganai kamotona iahi taghe penu ta ghuana, mala to boka la, a toraina nona kamoto ghu Kraes, 9 nia meha kaike taremehana tuna manei, e ghua ghu. Ara nato ke age nodo va sisiva au va lotoro taremehanana God ka ia leghui ia vetula. Nga God mo ne kaheina mu ta lotorona ara, vununa ara na va hohoghona ka Kraes. Ne hioau nga God taghe ta lotorona ara mu, vununa ghini ma nogu va hohoghona ini ka Kraes. 10 Taghe va gheghemana ghu ka ara mu, a kabai avohi Kraes, nia ia mana neke va doli leghuio manei ka ia leme e ghua, a mala holara vavahagala taremehana haro ghu manei. Ara na kabai meha taghe manei a ghua ka ira leghu puhi nga, geta ghua ghu ghe, ka ia age ohoꞌoho ghini leme leghuina ia nona lao nanafa God. 11 Ara a boka riva ghini mo ghu iahi, vununa ara na rangerangei mala age doli leghu harona taghogu ka ia leme!

12 Ara e deo ga kahei ghu nato ke riva va hokotori haro leghutau irahi ta ghuana, ba nato ke puina meha veha fuludu, ta ghuana. Ka ia faeteau ara manei, ia vatovato ka manei malaguna ara mu, ta mala meha taghe Kraes Zisas ta ghua laonani ara. 13 Ghau tahiguro ka Kraes, ara e deo nga ga sabara ghu ka va gheghema ianimu. Nga kaike leghutau mo na riva ghinina, ara nato ngana kairi ghegu heve ira ta au leghugu mo, na ghorevaha ghidi ghu heve ira ta meha kenugu mo. 14 Ara na toraina purudu lotoro lao ghu ka ia mala sabara, mala hioina ia tabara ka malauo God fate. Tabarana ghu mu, God ne kudo vona laoau ka nona malauo fate, vununa Kraes Zisas neke leme vanagu ara.

15 Ghita haroharo ta kuru ghita ia va hohoghona ta tahu, geala da ngana ghua haroma ghu ianimu. Ghe hei ka ghau neto haza la ia nganganana, God e age toka ghini ghau mo ghatu, va fafahaka vanamuna ia ghaghahena ngangana ta lotoro. 16 Ghe ghita geala da leghui ma da age ghu ia hohoghona tato kusu avohi ghita.

17 Ghau tahiguro ka Kraes, ara na kabai ghini ghau ta deke leghuauna ara, nia ta hio avoavohona ka ira keha noni ta toraina seseluri ira malaba ta lotoro, nake pata vanamuro ghai. 18 Ara nato ke fani va kahe ghini ghau mo sepao, nia ara a ke kaheini ka ia nakele muko hihingogu, ta tehira ira noni ta au kana ghini ia hekefalahata ka Kraes. 19 Ka ia va nonoghana God e age va mukori aianihi Gehena, vununa maneri di suna au mala hoviri ma ka ira heve ta ngagungagu ghidi ira tinidi, taghe ira nodi god ta ghua ghidira. Maneri edi hadu varanga ghidi ghu ira riva ta hahaghavadi ka taghodi, nganarina ma ira leghutau ka malau iahi peka lama. 20 Nga toraina malaudana ghita mu, ka malauo God fate ka ia ta au ia Lod Zisas Kraes. Nia ghita mu da toraina hagala ghini afa ghinina ia noda Va Doli, ia ta ke la sipa meha aianimu. 21 Ka ia nona mana mala kopuna ghidi manei vahina leghutau nga, manei e holarari ghatu tinida ta paeke idi ghita, mala taghe tinina ta varanga pelara ani taghonai ta age ghua ghidira.