Phili 4 | KjiSC | STEP | Ianimu la ghe na namaha ghini ghau nga ghau tahiguro ka Kraes, na kabai ke fini ghau ghu. Ghau no vanagu va ghazaghazana, ghau lamu ghu mu tabaraguna ghu ara ka ia riva tato va hokoti ara. O toraina tetu va gima ghu ka ia Lod, ghau tahiguro.

Philippians 4

Va Rodanana Pagahaina: Polo Ne Va Kakahe Ghidi Ta Mala Aurina Ia Bule Ka Kraes 4:1-23

Bule Taremehadi Ira Keha Noni

1 Ianimu la ghe na namaha ghini ghau nga ghau tahiguro ka Kraes, na kabai ke fini ghau ghu. Ghau no vanagu va ghazaghazana, ghau lamu ghu mu tabaraguna ghu ara ka ia riva tato va hokoti ara. O toraina tetu va gima ghu ka ia Lod, ghau tahiguro.

2 Ghau palu Iuodia ghe Sinitiki mu, nona ia Lod, ara na toraina papada ghau ghu taka vari tuufuai ta auna ghu. 3 Ara a fangaigho ghu agho ia mane baere ka ara, ta toka ghidira maneri palu. Palu fotati irahi mu, dike riva va gigima taremehagu ara mala va ongahina ia Nonomoho Ta Veha, dike riva taremehana haroma ghu Kilimane, nia ira leghu dike riva taremehaguro nga ara e ghua, ira ta au ka ia bukana doli ^{▼▼4:3 Kaike buka ta kangava laori God ira babaolodi ira nona noni. Irahi edi age au toghunai taremehana manei ka nona malauo fate.}, ira babaolodi.

4 O au va ghazaghaza tudu ma ka ia Lod. !Ara a ke kaheini, o au va ghazaghaza! 5 Va fini ghidi heiri haroharo ta bulena nia vari susutena ghau. Ia Lod to namo meha.

6 Oka hangapuaha ghini ghu kaike leghutau tei ghu, nga ka ira leghu nomu tarai nga mu, o fangai God heve ia ta malanga ghini ghau, fangai tuduna ka ia kudoveha, ka ira hihingomu. 7 Noto riva ghini la ghau iahi, ia bule ka God ia ta torai hauai va fafahakina ka ia avoavoho ia noni, e age kagara ghini ghau ka ira ngangana ta anga ghemu, ia ta va mamaghu ghau, vununa ghau mu nona Kraes.

8 Va nonoghanana, ghau tahiguro ka Kraes, va fouduri ira nganganamu ka ira leghutau ta veha ta boka mala helahela ghidi, ira leghutau ta hohoghodi, heheluana, lotoro, kalasa, namanama, nia ngangaguana, e ghua. 9 Ghau o riva ghidi tudu ma ira leghutau nake va kakahe ghini ghauro ara, noke hioriro ghu ghau ka ara. O riva ghidi ghu ira leghutau noke nomohoauo kaherira ara, nia noke finiauo riva ghidira ara, e ghua. Leleghonana mu, God ia ta vanamu bule, e age au taremehamu ghatu.

Polo Ne Kudo Vehari Ira Tufa Ka Maneri

10 Ara na torai kudo vehai ia Lod nia na helahela ghini manei e ghua, ka ta ke ngana hetau niani ghau. Toraina hohoghona fuludu noke ngana hetau ma noke mehana ghu ghau, ghe neke suna deo ghau ma ia fafata ta veha, mala va podolina ia nomu toka. 11 Ara mu na malangai leghutau ghe na kahe ghua nga iahi, eka ghua la ghu. Ara nato ke sikolu ghini ta mala hoviauna ka ira heve leghutau ta kuruau, nia ka ira heve leghutau ta dufuau, e ghua. 12 Ara na avohi mo heve e ghua mu auna ka ara, nato malanga la, nia heve e ghua mu auna ka ara, neto tehiau la leghutau. 13 Ara ne kuruau mo gigima ka ia mana ta vanagu Kraes, ta mala talarira vahina kokolodi fafata ta dufu nga. 14 Ghe neke puina veha fuludu ka ghau, noke toka ghinagu ghu ka ira mamarutana ara.

15 To puina avoho va vehai nia lamu taghomu ira tanimu Filipae mu, kiloau iamu lama ka ghau neke toka ghinaguna ka rongo ka ira ravata tatanigaidi nake tuturi ghini beanao ara ia Nonomoho Ta Veha, ka ia ghahe kainigu Masedonia ia babarana ka ghau. 16 Geta ghua ghu ka ia fafata auguna nga ara Masedonia, nake auo ghu ka ia malau leghaha Tesalonaeka, ghau noke va meha vanagu toka mo keha fafata terira. 17 Ara a kahei iahi o mala va meha vanagu toka tudu ghu ghau, e deo ga ghua ghu, nga ara na kabai ghini ta hioina ghau ia va beana ta la meha ka ia varisusute.

18 Ara nato hio va hokotori vahina leghutau nga, nia e tehi laoni, e ghua. Ara na torai age hoviau ghu ka ira tufa noke vanagu taremehana mehao ghau Epaforodaetasi. Maneri mu taghe kaike veala kudoveha ta torai longara veveha e ghua, ianimu e veha vanani ghu God hioina. 19 Nia ia God ka ara, e age vanamu ghatu ira vahina ta malanga ghidi nga ghau ka ira nona taghotagho ta tehi kakai, vununa ka heve neke riva ghini va hokotono Kraes Zisas. 20 Ghita da helahela ghini tudu ma God ia noda Mama. Amen.

Va Nonoghadi Ungene Veha

21 Vanadi nogu ungene veha idi ka ira leghu nona noni nga God ta taghori Kraes Zisas. Ira ta va hohoghona ka ia Lod ta riva taremehagu irahi ara, di va ghahe age nodi ungene veha ka ghau. 22 Ira keha leghu nona noni nga God nia ira ta riva ka ia malau ginitau Sisa aiahi e ghua, di va ghahe age ungene veha ka ghau.

23 Ara na tarai e age vanamu ghu ia Lod Zisas Kraes ia varisute ta vanada kakato.