Rev 1 | KjiSC | STEP | Iahi mu ia va podolo kave neke vananio God Zisas Kraes ta deo sepana ta toraina age dufu ghu ghatu mala va podolo vanadira manei ira nona noniriva. Zisas neke tuhu mehai ghu ia nona engizeli ka ara Zone ia nona maneriva mala va podolo vanaguna leghutau irahi.

Revelation of John 1

Zone Ne Tuturi Ghini Buka Iahi.

1 Iahi mu ia va podolo kave neke vananio God Zisas Kraes ta deo sepana ta toraina age dufu ghu ghatu mala va podolo vanadira manei ira nona noniriva. Zisas neke tuhu mehai ghu ia nona engizeli ka ara Zone ia nona maneriva mala va podolo vanaguna leghutau irahi. 2 Ara nake tuturi ghini kave ghu ia saorona God nia ira leghutau neke kahe mehariro Zisas Kraes ka ara e ghua, nake finiri ghu ara leghutau irahi.

3 God e va beani hei ia ta izumi buka iahi nia e va beani hei ia ta nomohi ta va hohoghonai ghu heve ne kaheina manei, e ghua. Vununa ia fafata to namo ka ta age dufuro ghatu leghu irahi nga.

Zone Ne Kakangava Lao Ka Ira Vitu Suga Tarai

4 Leta iahi mu na kangavi ara Zone maladi ira noni kiloau ka ira vitu malau ka ia babarana Esia:

Ia varisute ta va meha kakatoi nia ia bule vanamu ghau sipa mehana ka manei ia ta au ghatunaina neke au mehao sepao, nia ia ta meha keha nareo e ghua, nia sipa mehana ka ira vitu tarunga tadi au ka kenuna ia nona nonohe ginitaukela God e ghua; 5 nia neke mehao ka Zisas Kraes e ghua. Manei mu ia ta turi kave va lotori ia hohoghona ghini God ta boka mala va hohoghonai, ia va kenuna noni neke tetu leghuo ka leme, nia ia ta mane ginitaukela kaputuri ira leghu mane ginitaukela nga ka malau iahi peka, e ghua.

Manei ne namaha ghini ghita neke va kalasa ghita ghu ka ira sasakeda, ka ia leme neke veala ghinio taghonai. 6 Manei neke va kaike noni ghita neke meha mane ginitaukela kaputu ghita ghu, nia neke meha va nona hiama ghita mala riva vananina God ia nona mama. Nona manei mu ia pelarana varanga nia ia gigima ta au toghunai! Amen!
7 !O mato! Manei e la meha taremehadi ira toba.
Nia ira leghu hiba nga edi age finini manei,
geta ghua ghu ira dike va zoloio.
Nia ira leghu noni nga ka malau iahi peka edi age muko hihingodi ghatu, vununa ka ia ghini manei. !E age ghua ghu mamu ghatu! Amen.

8 “Ara mu ia Alofa nia ia Omega, ia ta Kenu nia ia ta Leghu,” ne ghua ia Lod God ta Torai Mana, ia ta au ghatunaina, neke au mehao sepao, nia ia ta la meha keha nareo.

Zone Ne Fini Hahaimana Zisas Kraes.

9 Ara Zone ia tahimumane nia ta kaike va hohoghona taremehamu ghau ka Zisas. Vununa ka ia au ghita ka pekana ia kopu Zisas, da au va vavahagala ghu ghita, ghe manei ne va gigima ghita da tetu va gima ghu. Ara mu dike va ghahe lao au ghu ka ia ghizunana Patimosi, vununa nake tuturi beana ghini ia nona saoro God, nia nake tuturi ghini Zisas, e ghua. 10 Ka ia nona Ravata ia Lod, ia Tarunga ta Maduana neke batu ghinagu nake nomohi ghu ara leghugu mo kaike leo ta faa taghe nakelena kaike kufili ta ghua, 11 kahe ghuana iahi, “O kangava hinaeri ka kaike buka vividuhu heve ta finiri nira agho, o va ghahe laori ghu ka ira vitu suga tarai: va ghahe laori Efesasi, Samana, Pegamamu, Taeataera, Sadisi, Filadelifia, nia Leodisia, e ghua.”

12 Ka ia fihiki mala finini hei mo neke ngengene mehauo, ara nake finiri vitu leghutau ta golu mala va nohe lao zuta. 13 Ka varihoataidi ira leghutau mala va nohe zuta ari mu, kaikeu taghe fifinina “kaike tuuna noni” ^{▼▼1:13 Daneli 7:13} e ghua, neke auna aianimu. Manei neke va vona poko sodu ta dufu lao ka tabalana ghahenari taremehana kaike sasi ta golu ta va lihiti lilohi ka fafatana hihingonani. 14 Ia belehuna nia ira kalana mu, dike ghiho taghe wulu, ba sinou dike ghua. Nia ira va fifinina tuna taghe fegalana totoi ta helupu gedi ke ghua ghu, dike ghua. 15 Ira tabalana mu taghe barasi dike toi va zilapi ka giliona totoi leghaha e ghua, nia ia leona tuna taghe urunguna piatana tokofo ge ghua ghu, neke ghua. 16 Manei neke posiri vitu babaghunu ka kame mautunani, nia kaike leboto sisilufu mala magara ta ngaru palu pelo ta kave mehana ka paetenani, e ghua. Nia ia hihilina mu taghe pelarana taunu ka ia hoatai ravata ge ghua ghu, neke ghua.

17 Ka ia fini laoigu, ara nake riufu maimanihi habara hinae peka ka kavana ka tabalana ghahenari taghe tato leme ta ghuana. Ianimu tuna ghe neke va fara mehai nga ka ara ia kame mautuna neke kahe ghua ghu iahi, “Oka maugheu ghu. Ara mu ia ta Kenu, nia ia ta Leghu. 18 Ara mu, Ia ta Doli; !Ara nake leme, ghe fini ko, ara mu nato doli toghunai! Nia ara a kuruau gigima mala tobehina nia bakisinina ia makatanana ia malaudi ira tarungadi ira noni dito ke lemero. 19 O kangava hinaeri ghu ira leghutau ta finiri ghau, ira leghutau ta dufu ghatunaina, nia ira heve leghutau ta mala age dufu ghatu, e ghua. 20 Iahi mu ia popoikana fafahakadi ira vitu babaghunu noke finiriro agho ka kame mautugu ini nia ira vitu leghutau ta golu mala va nohe zuta, e ghua: Ira vitu babaghunu mu, ira engizelidi ira vitu suga tarai, nia ira vitu mala va nohe zuta ta golu mu, ira vitu suga tarai, e ghua.”