Rev 11 | KjiSC | STEP | Kaike engizeli neke meha vanagu kaike heke mala fafata, neke va kahe ghinagu ghu iahi, “O lao o la fatai ghu ia Ringifota ta Maduana ka God nia ia sopebeana e ghua, nia tahori ira ta va totoana ka ia ringifota ta maduana God, e ghua.

Revelation of John 11

Ira Palu Porofeti Ka God

1 Kaike engizeli neke meha vanagu kaike heke mala fafata, neke va kahe ghinagu ghu iahi, “O lao o la fatai ghu ia Ringifota ta Maduana ka God nia ia sopebeana e ghua, nia tahori ira ta va totoana ka ia ringifota ta maduana God, e ghua. 2 Ghe oka la fatai ghu ia galahena ta babara liloho ka peghuruna ia Sugana God, vununa neto ke vanadi ira noni taka Ziu ghu. Maneri edi age au kopu fatedi edi va vavahagalari ghu ira nonidi Zerusalemu ka giliona rodana ngavuluai palu hihile. 3 Ara a vanadi mana palu nogu mane porofeti ta va vona poko muko hihingo mala tuturi ghini kavena ia nogu nonomoho ka giliona kaike togha, palu ghobi, onomo-ngavulu (1,260) ravata.”

4 Palu mane porofeti irahi mu, ira palu heke olivi nia ira palu mala va nohe zuta e ghua, ^{▼▼11:4 Fini Zakaraea 4:1-14.} edi tetu ka kenuna ia Lod na malau iahi peka. 5 Hei kana ta kabai ngovalarira maneri palu ghu mu, totoi e kave meha ka mangadiari maneri palu e atunguri ghu. Taghe iahi e ghua atungina mu hei ia ta kabai ngovalari maneri palu. 6 God neke vanadi mana maneri palu mala kaputina ia kolanga, mala eka zoghu la ghu ia nanare ka ia fafata ta tuturi ghini kave maneri palu ia nonomoho ka God. Nia edi kururi mana mala fihikirira ira kolo ka busaka nia ta mala va meharira ira leghu kokolodi lelemeana ta mamaghuana nga ka malau iahi peka, ka ia fafata ta kabai ghini maneri palu.

7 Ka ia fafata ta age va hokoti ira palu porofeti ia tuturi ghini kave ia nonomohona God, ia va vuha ta mamaghuana ta kave meha ka ia golava ta lao gilioni e age magarari maneri palu e paufuri ghu, nia atunguri tuna, e ghua. 8 Ira tinidi edi age libo ka ira malau ta tobehe ta varighara ira noni ka ia malau leghaha Zerusalemu, ka dike tupila ghinio ia nodi Lod. Babaolo dike mala kudo va fata ghini laona maneri malau leghaha iahi mu, Sodomu ghe Izipi. 9 Lito ravata fotana, ira noni ka ira leghu noni nga, butubutu nga, ngengene nga, nia soloso nga, e ghua. edi age mato laori ira tinidi. Maneri deo gedi age va malumi ghu hei noni ta gilu ghidira. 10 Ira nonidi ka malau iahi peka edi age puina va manemane, vununa palu porofeti irahi to leme. Maneri edi age mahai varighara va manemane nia edi age vari tufai namaha e ghua, vununa palu porofeti irahi dike toraina va kilasari ira noni ta au ka malau iahi peka.

11 Ghe leghuna lito ravata fotana, ia mamafana doli sipana ka God neke hagheleri ira tinidi maneri palu dike tetu vona ghu ka ira ghahedi. Heiri dike fini laoriro dike toraina maughedi. 12 Ianimu tuna ghe dike nomohi nga palu porofeti idi kaike leo ta faa ka malauo God fate, “Vona meha aiahi,” neke ghua ghidi. Ira dike kana ghidiro maneri palu dike mato ma dike vona ghu ka kaike toba maneri palu ka malauo God fate.

13 Ka toraina fafata ianimu lama neke au ghu kaike kuzo ta torai mamaghuana neke huario kaike hori ka ira tazo horina ia malau leghaha. Vitu togha noni dike lemera ka kuzo ianimu dike toraina age maughedi ghu ira noni dike deoro lemedira, dike va varangi ghu maneri ia God na fate.

14 Ia va paluna lelemeana ta mamaghuana mu to fuludu, ghe ia va litona lelemeana ta mamaghuana, magali ma e la meha ghu ghatu.

Ia Va Vituna Kufili

15 Ianimu tuna ghe, neke ufui nga ia nona kufili ia va vituna engizeli, nake nomohori ghu ara ira leo ta faa ka malauo God fate ngengene ghuana iahi:
“Ira vahina leghutau nga ka malau iahi peka,
edi age au ka pekana ia kopu ia Lod God,
nia ia Mesaea ka manei,
edi age tetu kopu toghunai ghu,” dike ghua.

16 Nia ira varadaki-rodana manefaa dike nohero ka ira nodi nonohe ginitaukela ka kenuna God mu, dike torongaghituturu maimanihi hinae va totoana ghinina God, 17 kahe ghuana iahi,
“Ghai na kudo vehaigho Lod God ta torai mana,
ia Lod ia ta au ghatunaina,
neke au mehao sepao,
vununa agho noto ke hioi ia nou mana leghaha
noto tatanigai tetu kopu ghu.
18 Ira soloso dike halari ka agho,
to meha ghu ia haala ka agho.
ia fafata to meha mala faterira ira ta leme,
nia mala tabararira ira nou noniriva, ira porofeti
nia ira nou noni dike heluhelu ghinio ia babaolou,
ira ta varanga nia noni gare.
Ia fafata to meha mala ngovalarira
heiri ira ta atungu noni ka malau iahi peka.”

19 Ianimu tuna ghe neke tobehe nga ia ringifota ta maduana ka God ka nona malauo fate, nake fini ghu ara ia Bokesena Varivehai aianimu. Ianimu tuna ghe dike au nga ira kafilidi kapi, piatadi saduru ta gululu nia kaike kuzo nia nanarei kipedi aisi, e ghua.