Rev 14 | KjiSC | STEP | Ianimu tuna ghe nake matoni nga ara, nake fini ghu ia Rekahana Sipisipi tetuna ka ia vuhukuna Zaeoni, au taremehanana manei ira kaike mola, rodana vuro, rodana togha (144,000) noni ta au lao ka ira raedi ia babaolona ia Rekahana Sipisipi, nia ia babaolona nona Mama, e ghua.

Revelation of John 14

Ia Rekahana Sipisipi Nia Ira 144,000 Noni

1 Ianimu tuna ghe nake matoni nga ara, nake fini ghu ia Rekahana Sipisipi tetuna ka ia vuhukuna Zaeoni, au taremehanana manei ira kaike mola, rodana vuro, rodana togha (144,000) noni ta au lao ka ira raedi ia babaolona ia Rekahana Sipisipi, nia ia babaolona nona Mama, e ghua. 2 Nia nake nomohi kaike leo ka malauo God fate, taghe ghoghoghona kaike ketuhu mafara ta zoghu, nia taghe gululuna kaike saduru, ia ta ghua. Nakenakele nake nomohina ara mu taghe tehi noni ta hilava ghidi ira nodi leghutau mala hilava ta kuru vulohodi, neke ghua. 3 Maneri dike koze ghini kaike koze foforu ka kenuna ia nonohe ginitaukela God, nia ka kenudi ira rodana va vuha dolidi, nia ka kenudi ira varadaki-rodana manefaa, e ghua. E deo hei ta boka avohina koze iahi, nga ira kaike mola, rodana vuro, rodana togha (144,000) noni neke hio va doliriro God ka malau iahi peka lama ta boka avohina. 4 Irahi mu ira mane dike mamalahu ghediro, vununa deo kaike fafata ghu dike zave taremehadi fotatina maneri. ^{▼▼14:4 “vununa deo kaike fafata ghu dike zave taremehadi fotatina maneri.” Fafahakanana mu maneri dike leghuri ira puhina God nia e deo kaike fafata dike va totoana ghidi ghu ira god ta sesebodi e ghua.} Maneri mu dike kupi ghu. Maneri dike ghahe leghui hae ta laona ia Rekahana Sipisipi, dike tabara va ilolo kaveri ghu ka ia kamotona noni ta muko, taghe ira fua kenudi ka ia nunuma ta mala kudoveha lao ka God nia ka ia Rekahana Sipisipi, edi ghua ghu. 5 E deo gedi ke sesebo ghu dike toraina lotoro maneri ka ia nahalina God, e ghua.

Ira Lito Engizeli

6 Ianimu tuna ghe, nake finini nga kaike engizelini alavana ka kolangana fate hioina ia toghunaina Nonomoho Ta Veha, mala tuturi vanadi kavera ira noni ta nona malau iahi peka, ka ira noni ka ira leghu soloso nga, butubutu nga, ngengene nga, nia noni nga, e ghua. 7 Manei neke kudo ghua iahi, “O heluhelu ghini God nia va varangi e ghua, vununa ia fafata mala varifate ka manei to dufu. O va totoana ghini manei neke va vuhario ira leghutau ka kolangana, malau iahi peka, ia tahi, nia ira leghu ketuhu futu nga, e ghua.”

8 Kaike va paluna engizeli neke leghuina ia kusu engizeli neke kudo ghua ghu iahi, “!Babiloni neto riufu! Ia malau leghaha neto riufu, vununa manei neke va ketuhu gogosuri ira leghu soloso nga ka ia waenina ngagungagui zave manei,” neke ghua.

9 Ianimu tuna ghe neke leghuri nga kaike va litona engizeli kudo ghuana iahi, “Hei ia ta va totoana ghini ia va vuha ta mamaghuana nia ia nguzunguzuna, ba ira ta hioi ia zago va ghila ka manei ka ira raedi ba ka ira kamena mu, 10 maneri haro edi age ketuhi ia waenina haala ka God. Ia vavahagala ka maneri e toraina age tahu, e deo ghu God ge age dudumana ghidi ghu. Manei e age va kilasari ka giliona totoi nia ghahipa heko ta ngizala ka kenudi ira engizeli beana nia ia Rekahana Sipisipi, e ghua. 11 Heiri ira ta va totoana ghini ia va vuha ta mamaghuana nia ia nguzunguzuna manei, nia ta hioi ia zago va ghilana ia babaolona e ghua mu, edi au vavahagala redu ravata. Nia ia gufuna ia totoi ta va vavahagalari maneri e deo ge age nogha ghu.” 12 Vununa ka va fafahaka iahi, edi toraina tetu va gima ghu ira nona noni beana God, ira ta leghuri ira ungene va gigima ka God nia ta au va hohoghona ma ta au ghu ka Zisas e ghua. 13 Ianimu tuna ghe nake nomohi nga kaike leo sipana ka malauo God fate kahe ghuana iahi, “O kangava hinaei iahi: Tatanigai ghatunaina e vai vona ghu, ia Lod e age va beanari ira ta leme, vununa maneri di leghui tudu manei.”

“Uve,” ne ghua ungene tughuna ia Tarunga ta Maduana, “Maneri edi age maghoso ka ira riva ngazuluai maneri nia edi hio taremehadi haro ia tabarana riva va veha, e ghua.”

Ia Varifate Ka Malau Iahi Peka

14 Ianimu tuna ghe, nake fini nga kaike toba ta ghiho nia kaike noni taghe kaike tuuna noni e ghua nohena ka fatenani. Kaike tarapae ginitaukela ta golu neke va vonaina ka paunani nia kaike leboto peleku ta ngaru neke posinina ka kamenani, e ghua. 15 Ianimu tuna ghe neke la kave meha nga kaike engizeli ka ia Ringifota ta Maduana God, neke kudo va fafaa lao ghu kata nohe ani ka tobana, “O tataniga va rivai nou leboto pelekunia, vununa ia fafata mala haharui to dufu; ira fuana malau iahi peka to ghano.” 16 Ianimu tuna ghe neke va purua ghini nga malau iahi peka ia ta nohe ka tobana ka ia nona leboto ta peleku haharuinina malau kamoto iahi peka.

17 Keha engizelinani neke la kave mehana ka ia Ringifota ta Maduana ka malauo God fate, neke posini haro ghu kaike leboto peleku ta ngaru. 18 Ianimu tuna ghe neke la sipa meha nga ka sopebeana ani keha engizelinani, ia ta fini kopu ghini ia totoi ka ia sopebeana. Manei neke kudo ghua lao iahi ka ia engizeli ta kurui leboto peleku ta ngaru, “O va rivai nou leboto ta pelekunia, mala hio varighara ghidira ira meruhu gerepi ka malau iahi peka, vununa fuadi gerepi nira to ghano.” 19 Ia engizeli neke va purua ghini lao ia nona leboto peleku ka ia malau peka, neke varighara ghidi ghu ira gerepi nia kai laori tuna ka ia leghutau mala rivai waeni, neke ghua, taghe kaike va ghilaghilana ia haala ka God. 20 Maneri dike deke dadalapa va kaveri ira kolodi gerepi ka ia leghutau mala rivai waeni peghuruna ia malau leghaha. Busaka neke ologho kavena ka ia leghutau mala rivai waeni neke nona au ghu ka lito ghobi kilomita ologho varihaunana nia palu mita rokasanana, neke ghua.