Rev 15 | KjiSC | STEP | Ianimu tuna ghe, nake finini nga ara ka malauo God fate kaike va ghilani ta tongovona nia fefereana. Vitu engizeli dike posiri ira vitu va nonoghadi va kilasa. Ka ia hokotodi maneri ta age noghana ia haala ka God.

Revelation of John 15

Ira Vitu Engizeli Taremehadi Ira Vitu Va Kilasa

1 Ianimu tuna ghe, nake finini nga ara ka malauo God fate kaike va ghilani ta tongovona nia fefereana. Vitu engizeli dike posiri ira vitu va nonoghadi va kilasa. Ka ia hokotodi maneri ta age noghana ia haala ka God. 2 Nia ara nake finini molamo kaike leghutau taghe tahi ta galasi ta heni taremehana totoi e ghua. Dike tetura ka fatena tahi ta galasi ani mu ira leghu noni dike paufio nga ia va vuha ta mamaghuana nia ia nguzunguzuna nia ia nabana ia babaolona, e ghua. Maneri haroharo dike posi leghutau mala hilava ta kuru vulohodi neke vanadiro God. 3 Nia maneri dike koze ghini ia koze ka Mosese ia maneriva ka God nia ia koze ka ia Rekahana Sipisipi e ghua, ta koze ghua iahi:
“Varanga nia namanama mu ira riva ka agho,
Lod God torai mana.
Lotoro nia hohoghodi ira puhiu agho,
ia mane ginitaukeladi ira soloso.
4 Lod leghu noni nga edi age va vonavonaigho nia va varangigho,
Vununa agho lama ta maduanana.
Ira leghu soloso nga edi meha
va totoana ka kenuu agho,
vununa ira riva ta lotoro ka agho toke va podolori.”

5 Leghuna iahi ara nake mato, nake finini ghu ka malauo God fate tobehena ia ringifota ta maduana ka God, ka giliona ia Suga Tapole ta Maduana. 6 Ira vitu engizeli dike posiriro ira vitu va kilasa, dike la kave meha ka ia Ringifota ta Maduana God. Maneri dike va vona pokosodu ta ghiho ngesele, nia dike va vona liloho lilihiti ta golu ka fafatadi hihingodiari e ghua. 7 Kaike ghu ka ira rodana va vuha dolidi, neke sopa kaikeri sosa ta golu ira vitu engizeli. Sosa irahi mu dike foudui haala ka God ia ta au toghunai. 8 Ia Ringifota ta Maduana ka God neke fouduai gufu ka ia pelarana varanga God nia ka ia nona mana, e ghua. E deo hei neke boka la haghelena ka ia Ringifota ta Maduana God, dike vuhai hokoto ghu ira vitu engizeli oranga kaverira ira vitu va kilasa.