Revelation of John 16

Ira Vitu Sosadi Haala Ka God

1Ianimu tuna ghe, nake nomohi nga kaike leo ta faa sipa mehana ka ia Ringifota ta Maduana ka God ta kahe ghua laona iahi ka ira vitu engizeli, “Lao o la oranga ghidi kave lao ghu ka malauna peka ira vitu sosa ta fouduai haala ka God,” neke ghua ghidi.

2Ia kusu engizeli neke lao neke la oranga ghini kave lao ghu ka malau iahi peka ia disi ka manei. Ira bigho ta mumukoana ta toraina karata dike podolora ka ira dike kururio ia zago va ghilaghilana ia va vuha ta mamaghuana dike va totoana ghinio ghu ia nguzunguzuna.

3Ia va paluna engizeli neke oranga ghini kave lao ia disi ka manei ka ia tahi, neke age fihiki taghe busakana noni ta leme neke ghua ghu, va lemerira ira vahina va vuha dolidi nga ka ia giliona tahi.

4Ia va litona engizeli neke oranga ghini kave lao ia disi ka manei ka ira ketuhu nahena nia ka ira ketuhu futu e ghua, dike age fihiki ghu ka busaka. 5Ianimu tuna ghe nake nomohi nga ia engizeli ta kopu ghidi ira ketuhu kahe ghuana iahi:
“Agho Ia Ta Maduana
ia ta au ghatunaina, neke au mehao sepao,
agho mu no totonu mo riva ghidira varifate irahi;
6vununa maneri dike atunguri
ira nou noni beana nia ira nou porofeti,
dike oraha kave ghu ira busakadi.
Ghatunaina mu agho noto vanadi busaka
mala ketuhina maneri,
taghe kaike va kilasa ta fatadi maneri.”

7Ianimu tuna ghe nake nomohi nga ara ia sopebeana ngengene ghuana iahi,
“Uve, Lod God Torai Mana,
hohoghodi nia totonu mu ira va kilasa ka agho.”

8Ia va rodanana engizeli neke oranga ghini kave lao ia disi ka manei ka ia taunu, neke va peparari ghu ira noni ia sisitona taunu taghe totoi ia ta ghua. 9Maneri dike age pepara ka ia ngizalana sisito, dike damu va mukoi ghu God neke vanadiro leghu va kilasa irahi nga. Ghe maneri dike pake gedi taghuru kairira ira sasakedi, ta va varangina ghu manei.

10Ia va gahana engizeli neke oranga ghini kave lao ia disi ka manei ka ia nonohe ginitaukela ia va vuha ta mamaghuana, neke age toufi ghu nagoromo ia kamotona ravutu ka manei. Ira noni dike tatanigai age ghaniri ghu ira lalamedi, vununa dike toraina vavahagala, 11dike damu va mukomukoi haro ghu ia God na ka malau beanao fate, vununa ka ira vavahagala nia bighodi, e ghua. Ghe dike pake ghedi taghuru kairira ira sasakedi dike riva ghidiro.

12Ia va onomona engizeli neke oranga ghini kave lao ia disi ka manei ka ia ketuhu leghaha Iufereti neke age karango ghu manei, mala va tanaina ia hangana maladi ira mane ginitaukela ta sipa mehadi fateo mo.

13Ianimu tuna ghe nake finiri nga lito tarunga ta muko taghe fifinidi kule ira ta ghua. Maneri dike paraku kave meha ka ia mangana ia va vuha ta mamaghuana, ka ia mangana ia daragoni, nia ka ia mangana ia porofeti ta sesebo, e ghua. 14Maneri mu ira tarungadi ira nazahi ta rivai hahaima. Lito tarunga ta muko irahi mu edi ghahe kave lao ka ira leghu mane ginitaukela nga ka malau iahi peka, mala hio varighara ghidi meha mala magarina God ia ta Torai Mana ka ia ravata ta fateri manei ira noni.

15“!Fini, ara na meha taghe kaike noni ta sisiko! Ara a va beani hei ia ta au afa ta au ghu, nia ta va vona poko ta au ghu e ghua, mala deona ge age ghahe sosole lao meha ghu ta haghava ghenana ghu ka kenudi ira noni.”

16Ira tarunga ta muko dike varighara ghidi meha ira mane ginitaukela ka ia malau Amagedoni ia ta ghua ghini ka ngengene Hiburu.

17Ia va vituna engizeli neke oranga ghini kave lao ia disi ka manei ka kolangana. Kaike leo ta faa neke la mehana ka ia nonohe ginitaukela ka giliona ia Ringifota ta Maduana God kahe ghuana iahi, “!To hokoto!” neke ghua. 18Ianimu tuna ghe neke age au nga ira kafilidi kapi, gululudi nia sorukaikedi saduru, nia kaike mamaghuanana kuzo e ghua. E deo kaike kuzo taghe manei ta ghuana neto ke dufuna taniga ia au mehana noni ka malau iahi peka. Iahi mu kaike kuzo neke toraina muko fuludu laori leghu kuzo nga. 19Ia leghahai malau Babiloni neke fota ka lito kipena, nia ira leghu malau leghaha ka ira soloso ka malau iahi peka dito ke age huara hinae haro, e ghua. God neke ngana leghuri ira leghu sasakena nga Babiloni, neke va ketuhu ghini ghu ia panikeni neke fouduo ka ia waenina haala manei. 20Ira ghizuna dike age pelo ghahe nia ira vuhuku dike age deo ghidi. 21Ira leghahai kipedi aisi ka kolangana ta nodi au ka gahafulu kilo kaikeu e ghua, dike zoghuri ira noni. Maneri dike damu va mukoi ghu God, vununa va kilasa neke vanadi iahi manei neke toraina muko fuludu.