Rev 17 | KjiSC | STEP | Kaike ghu ka ira vitu engizeli dike posiriro ira vitu sosa neke meha kahe ghua iahi ka ara, “Meha, a va fini ghinigho ghu ara ia va kilasana ia ta fuludu ka ia fotati ta kikirasei tabara, ia ta nohe ka fatedi tehi ketuhu nahena.

Revelation of John 17

Ia Fotati Ta Kikirase Nia Ia Va Vuha Ta Mamaghuana

1 Kaike ghu ka ira vitu engizeli dike posiriro ira vitu sosa neke meha kahe ghua iahi ka ara, “Meha, a va fini ghinigho ghu ara ia va kilasana ia ta fuludu ka ia fotati ta kikirasei tabara, ia ta nohe ka fatedi tehi ketuhu nahena. 2 Ira mane ginitaukeladi ka malau iahi peka mu dike to zave taremehana manei. Nia ira noni ka malau iahi peka mu taghe dike age gogosu ka ia ketuhi ia waeni ka manei, edi ghua. Ia waeni ka manei mu totoghaledi ira zave ta muko ka manei dike leghuriro maneri.”

3 Ianimu tuna ghe neke batu ghinagu nga ia Tarunga ta Maduana neke hure ghahe lao au ghu kaike engizeli ka ia malau koroghana ta karango. Aianimu nake la fininina ara kaike fotati nohena ka fatena kaike va vuha ta mamaghuana ta busaka ta vitu pauna, nia tazo gegehona. Ira ngengene ta damu va mukoi God ta kakangava laona ka ira leghu pelona tinina nga manei. 4 Fotati ianimu neke va vona poko ta omo’omo nia busaka, nia neke kafili palamu ka golu, nia ka ira ghahipa ta veveha ghedi nia bololodi davi ta mamalahu veveha ghedi, e ghua. Manei neke posini kaike panikeni ta golu ta foudu ka ira leghutau ta mumukoana nia ka ira zave ta sota neke riva ghidiro manei. 5 Ka raenani mu e au lao kaike kakangava ta poika ia fafahakana:

“BABILONI IA TA VARANGA,

IA NODI UKE IRA TA KIKIRASEI TABARA

NIA IRA NODI UKE IRA LEGHU PUHI TA MUKO NGA KA MALAU IAHI PEKA,” e ghua lao.

6 Ara nake fini ia fotati neke ketuhu gogosuna ka busakadi ira nona noni beana God ira dike tetu tuturi ghinio Zisas.

Ara nake puina nogu fere fini laoiguna manei. 7 Ianimu tuna ghe neke kahe ghua meha nga iahi ka ara ia engizeli, “?Ne heve ghe no nou fere nga?” Ara a va kahe vananigho ghatu ia fafahakana ta poika ghinina fotati iahi nia ia va vuha ta mamaghuana ta vitu pauna nia tazo gegehona e ghua, ia ta va haghei manei. 8 Ia va vuha ta mamaghuana noke fininio mu neke doli sepao, nga ghatunaina mu to leme. Ghe manei e deo sepana eke la kave meha soni mo ghu ka ia golava ta lao gilioni, God e age va muko purukuti ghu manei ghatu. Nia ira nona noni malau iahi peka neke deoro God geke kangavari ghu ira babaolodi ka ia bukana doli, ghe neke va vuhaio nga malau iahi peka mu, edi age nodi fere ka ia finini maneri podolonana ia va vuha ta mamaghuana, vununa neke leme sepao nia ke doli tuna nia ke la leghu mehani tuna, ne ghua.

9 “Iahi mu e kabai ghini ghu hei ia ta avoavoho ta va fafahakina: Ira vitu pauna mu, ira vitu voruhu ta nohe lao ia fotati ka ira fatedi. Nia e va ghaghao lao molamo ka ira vitu mane ginitaukela, e ghua. 10 Gaha mane ginitaukela mu to ke leme, ia va onomona mu e kopu ghatunaina nia ia va vituna e la meha nga e ghua. Ghe kopuna ka manei mu, e toraina deo ge sepa ghu. 11 Ia va vuha ta mamaghuana neke dolino sepao, ghe neke lemeno mu, e va hanana mane ginitaukela. Manei mu e nodi ira vitu mane ginitaukela, God e age va muko purukuti ghu manei ghatu.

12 “Ira tazo gegeho noke finiriro agho mu, tazo mane ginitaukela ta deo nga gedi tetu kopu ghu. Ghe ka kaike ponoena fafata ma, tadi age tetu kopuna maneri taremehana ia va vuha ta mamaghuana. 13 Mane ginitaukela irahi mu edi age auri kaike ngangana mo nia edi age vanani lao ia va vuha ta mamaghuana ia nodi gigima nia mana mala kopu e ghua. 14 Maneri edi age varighara mala magarina ia Rekahana Sipisipi, ghe ia Rekahana Sipisipi e age paufuri maneri, vununa manei mu ia Lod fatedi ira leghu Lod nga, nia ia mane ginitaukela ka fatedi ira leghu mane ginitaukela nga, e ghua. Nia heiri tadi au taremehana manei ka ia magara mu ira ta kudori, faeteri manei nia edi va hohoghona edi leghui tudu ghu manei, e ghua.”

15 Ianimu tuna ghe neke kahe ghua meha nga iahi ka ara ia engizeli, “Ira ketuhu noke finirio agho ka neke noheo gheremedi mo ia ta kikirasei tabara mu, ira noni ka ira leghu soloso nga nia ngengene nga, e ghua. 16 Ia va vuha ta mamaghuana nia ira tazo gegeho noke finiriro agho mu edi age kikipana ghini ia fotati ta kikirasei tabara. Maneri edi age hio ghahe tana vahina leghutau ta taghori nga manei edi va sosolei ghu. Ianimu tuna ghe gedi age ghanini nga ia vilahina gedi saligai ghu ia tinina kamoto ka totoi. 17 Maneri dike riva ghua ghini ianimu, vununa God neke nakai laoi ngangana ianimu ka ira hihingodi mala riva ghinina maneri ia nona lao nanafa. Maneri haroharo dike kaike nganganadi ghu mala vanani laona ia va vuha ta mamaghuana ia mana mala kopu ka maneri, e vuhai age ghuduvu ghu ira ngengene ka God. 18 Ia fotati noke fininio agho mu ia leghahai malau ta kopu ghidi ira mane ginitaukelana malau iahi peka.”