Revelation of John 18

Ia Riufu Ka Babiloni

1Leghuna iahi ara nake finini keha engizelinani la hinae mehana ka malauo God fate. Manei e kurui mana leghaha, neke va fegali ghu malau iahi peka ka ia pelarana varanga manei. 2Manei neke kaini kaike leghahai kudo kahe ghuana iahi:
“!Babiloni neto riufu!
!Ia leghahai malau ta Varanga neto riufu!
Manei to meha malau mala audi ira nazahi,
nia malau mala poikadi ira tarunga ta muko,
malau mala poikadi ira memeha ta muko,
nia mala poikadi ira leghu va vuha ta mumukoana nia sota e ghua.
3Vununa ira leghu soloso nga dito ketuhi
ia waenina ngagungagui zave ka manei.
Ira mane ginitaukeladi ka malau iahi peka
dike zave taremehana manei,
nia ira ta tatabara nia tatabarai leghutau ka malau iahi peka
dike age taghotagho ka ia manadi ira doli ta mitirimatara ka manei.”

4Ianimu tuna ghe nake nomohi nga keha leonani ta la mehana ka malauo God fate kahe ghuana iahi,
“O ghahe kaini Babiloni, ghau ira nogu noni,
Oka holara lao ghu ka ira sasakena manei,
mala oka holara la ghu ka ira va kilasa manei;
5vununa ira sasakena manei to vari papaukuai
to dufu ghu ka malauo God fate,
e deo ghu God boka ngana kairira
sasake neke riva ghidi iranimu manei.
6Ghau o va riva ghini malau leghaha ianimu
taghe heve neke va riva ghidiro manei ira keha.
Ghe ghau o va riva ghini manei
palu fafata tehi fuludu laorira ira neke riva ghidiro manei.
Heni vanani ketuhu ta palu fafata gigima fuludina
ia ketuhu neke heni vanamuno manei.
7Ghau o vanani va tehi vavahagala nia muko hihingo manei,
taghe ta varifata lao ka ia varanga nia doli
ta mitirimatara neke vananio la taghonai.
Vununa manei ne va varangi ma ne au ghu taghonai:
‘Ara mu ghase ginitaukela ta nohe ka nogu nonohe ginitaukela ini.
Ara mu eka fotati nabokogu ghu;
ara e deo boka age muko hihingoguna.’
8Vununa ne ghua ianimu,
e age zoghui ghu va kilasa ka giliona kaike ravata.
Leme, nakele ado’ado nia songe
ta age dufuna ka manei.
Manei e age saliga va nogha ka totoi,
vununa ia Lod God ta fatei manei e torai mana.”

9Ira mane ginitaukela ka malau iahi peka dike rivai puhi ta muko taremehanao manei, nia dike auro ka doli ta mitirimatara taremehana manei edi age nakele ado’ado nia muko hihingodi finina maneri ia gufuna totoi ta saligai Babiloni. 10Maneri edi age tetu varihauni, vununa di maughini ghedi ia leghahai vavahagala ta dufu ani ka manei. Edi age kahe ghua ghu iahi:
“!Lelemeana, Lelemeana
ka agho ia leghahai malau,
agho Babiloni ia leghahai malau ta varanga!
Vununa ka kaike aoa ma,
to va kilasigho ghu agho God.”

11Ira ta tatabara nia tatabarai leghutau ka malau iahi peka, edi age nakele ado’ado nia muko hihingodi ghini manei, vununa to deo hei ta tabara tadira ira kako ka maneri. 12E deo hei ta age tabara tadira ira golu, siliva, ghahipa ta vona tabaradi, ira bololodi davi ta mamalahu veveha ghedi, ira poko ta ghiho ngesele dike riva ghidiro ka lineni, ira poko ta omo’omo, poko lemeleme ta vona tabaradi ta va kudo ghidi silika nia poko busaka ta vona tabaradi, ira leghu kokolodi heke ta hurangi vevehadi nga nia ira leghu kokolodi leghutau ta riva ghidi nga ka keona elefaniti nia ira ta riva ghidi ka heke ta vona tabaradi, ka barasi, aeana nia mabolo, e ghua. 13Nia e deo hei ta age tabara tadira ira leghu mala va lingilingi nga, ira keha kokolodi inisenisi, ira sedi ta va kudo ghidi maa, ira waeni, oelena olivi, falao, witi, bulumakau, sipisipi, hose, ira mala haghe ta korohori ka hose, nia ira noni mala varituhu ta tatabara ghidi maneri, e ghua.

14Maneri edi age kahe ghua iahi ghatu, “Ira vahina leghutau ta veha nga noke puina kuhanai taghoriro agho mu, to age ogoro va nogha ghedi. Nia ira vahina leghutau ta veha nia vona tabaradi ta taghori agho ghatunaina edi age deo ghidi fuludai deona ke boka hio leghurira agho.”

15Ira dike tatabararo nia tatabara ghidiro leghutau irahi dike age taghotaghoro ka manei mu, edi age tetu varihau lao, maughini ghedina vavahagala ani ka manei. Maneri edi age nakele ado’ado nia muko hihingodi 16kahe ghuana iahi,
“!Lelemeana, lelemeana
ka agho ia leghahai malau Babiloni,
Agho ta va vona poko ta ghiho ngesele
ta va kudo ghidi lineni, poko omo’omo nia poko busaka,
nia agho ta kafili palamu
ka golu, ghahipa ta vona tabaradi nia bololodi davi ta mamalahu veveha!
17Ghe ka kaike birusuna fafata tei ma,
dito age nogha purukutu ghedi ghu ira taghotagho!”

“Ira ta posi gili nia ira leghu noni ta ghahe nga ka ira vaka, ira mane kuru nia heiri haroharo ta hio rongo ka ia riva ira vaka, edi age tetu varihauni. 18Nia ka ia fafata finini maneri ia gufuna totoi ta saligai Babiloni, maneri edi age kahe ghua iahi, ‘E deo keha malau leghahanani taghe tongovonana malau leghaha iahi ta ghuana,’ edi age ghua. 19Maneri edi age va barasa ghidi kofele ira paudi mala va podolina ia muko hihingo ka maneri, edi age nakele adoꞌado ghu kahe ghuana iahi:
“!Lelemeana, Lelemeana
ka agho ia leghahai malau.
Ira leghu dike tagho vakaro nga,
dike age taghotagho ka ira vahina nou leghutau ta veha nga agho!
!Ghe ka kaike birusuna fafata tei ma,
dito age nogha purukutu ghedi ghu!”
20“!Ghau ira ta au ka malauo God fate, o va ghazaghaza!
!Ghau ira nona noni God, o va ghazaghaza haro!
!Ghau ira mane nonomoho nia ira porofeti, o va ghazaghaza haro!
Vununa God neto fatei manei
ka ira leghutau neke va riva ghini ghauro manei.”

21Ianimu tuna ghe, neke posi vonai nga kaike engizeli ta torai mana, kaike ghahipa taghe faana kaike leghahai ghahipa mala va namuku witi e ghua, neke fera ghini lao ghu ka tahio kahe ghuana iahi,
“Taghe iahi e ghua agho ia leghahai malau Babiloni,
age fera ghinigho hinae va mukona maneri
ta torai deo kalasukaina ghu ke age finigho leghunani.
22Ka giliou agho, e deo hei take age nomohorinani maneri
hilava ghidira ira mala hilava
ta kuru vulohodi, ira ufu papaka, ira kufili, nia ira kozedi ira noni.
E deo noni ta vovoho riva ghidi ira sopai kokolodi leghutau
take age aunani ka agho.
Ia gheseghesena ia leghahai ghahipa mala va namuku witi
e toraina deo ke age nomohinani ka agho.
23Ia fegalana zuta
e toraina deo ke age pelaranani ka giliou agho.
Nia e deo varihio
ta ke age riva ghininani aiamuhu.
Sepao ira dike tatabararo nia tatabarai leghutauro
dike faghinara ka malau iahi peka,
nia agho noke sebori ira leghu butubutu noni nga
ka ira basa agho.
24Ka giliona Babiloni dike orahana
ira busakadi ira porofeti nia ira nona noni beana God,
ira leghu dike atunguriro nga ka malau iahi peka.”