Revelation of John 19

Ia Va Ghazaghaza Ka malauo God Fate

1Leghuna iahi, ara nake nomohi taghe kaike leghahai varigharana noni e ghua ka malauo God fate, dike kudo ghuana iahi,
“!Helahela ghini ia Lod!
Ia hio va doli, ia varanga nia mana, e nona ia noda God,
2vununa varifatera ka manei, edi hohoghodi nia lotoro.
Manei neto fatei ia leghahai ta kikirasei tabara,
vununa manei neke batu ghidi va zea
ira noni ka malau iahi peka
ka ira puhina ta muko, taghe kaike ta kikirasei tabara, ia ta ghua.
God neke va kilasi manei
vununa manei neke atunguri ira nona noniriva.”

3Nia maneri dike kudoni,
“!Helahela ghini ia Lod!
Ia gufu ka ia malau leghaha,
e ghahe vona toghunai!”

4Ira varadaki-rodana noni faa nia ira rodana va vuha dolidi, dike torongaghituturu hinae dike va totoana ghini ghu God, ia neke noheo ka ia nonohe ginitaukela. Maneri dike kahe ghua iahi, “!Amen! !Helahela ghini ia Lod!”

5Ianimu tuna ghe neke la meha nga ka ia nonohe ginitaukela kaike leo kahe ghuana iahi,
“!Helahela ghini ia noda God,
ghau haroharo ira nona noniriva,
ghau haroharo ta heluhelu ghini manei,
ira ta varanga nia noni gare!”

6Ianimu tuna ghe, nake nomohi nga ara kaike leghutau taghe kudona kaike leghahai varigharana noni, ba, taghe ghoghoghona ketuhu mafara nia taghe sorukaikedi saduru ta ghuana, kudo ghuana iahi,
“!Helahela ghini ia Lod!
Vununa ia noda Lod God Torai Mana e kopu.
7Ghita da va ghazaghaza nia va manemane
nia vanani varanga.
Vununa ia varihio ka ia Rekahana Sipisipi neto meha,
neto vatanai ghu taghonai ia fotati ta mala varihio ka manei.
8God neke vanani ira poko ta ghiho ngesele mala varihio dike riva ghidiro ka lineni,
mala va vonarira manei.”

(Ira poko lineni mu, e totoghaledi ira riva ta lotoro ka ira nona noni beana God.)

9Ianimu tuna ghe neke kahe ghua meha nga iahi ka ara ia engizeli, “!O kangavi iahi: God e age va beanari ira dike kudo hagheleriro ka ia mahai varigharana varihio ka ia Rekahana Sipisipi!” Nia ke kahe ghuani tuna iahi neke ghua, “Irahi mu ira ngengene hohoghodi ka God.”

10Ianimu tuna ghe, nake torongaghituturu hinae nga ara ka ghahenari nake va totoana ghini ghu. Ghe manei neke kahe ghua iahi ka ara, “Oka va totoana ghinagu ghu ara. Ara mu kaike nona noni riva ma God, varifata ma ka agho nia ira tahiu ta tuturi ghini kave ia nodi va hohoghona ka Zisas, e ghua. O va totoana ghini ma God lama. Vununa heiri haroharo ira ta tuturi ghini Zisas mu, edi riva ghini ianimu ka ia mana ia Tarunga ta Maduana.”

Ia Ta Haghe Ka Ia Hose Ta Ghiho.

11Ianimu tuna ghe, nake finini nga ia malau ka God fate tobehena, ka neke tetuo kaike hose ta ghiho aianimu. Ia babaolona neke hagheo ka hosena mu, “Ia ta riva vanani tudu God nia ta hohoghona,” e ghua ghini. Ka ia fafata fateri manei ira noni nia magarari ira kana, ira va fafahaka ka manei mu lotoro. 12Hibanara manei mu, taghe ngizalana totoi edi ghua, nia va vonari tuna tehi tarapae ginitau ka paunani, neke ghua. Kaike babaolo neke kakangava laona ka manei, ghe e deo hei neke avohina fafahakanana, nga taghonai lama ta avohina. 13Manei neke va vona poko ta va luduru boesi ka busaka, nia babaolonana mu “Ia Saorona God.” 14Ira punugaradi ka malauo God fate ta va vona poko lineni ta ghiho ngesele ta ghighiho, dike haghe ka ira hose ta ghiho, dike leghui ghu manei. 15Neke kave mehana ka manganani mu kaike leboto sisilufu mala magara ta ngaru, mala paufurira manei ira leghu soloso nga. “Manei e age kopu ghidi maneri ka leghahai mana.” ▼

▼19:15 Samu 2:9

Manei e age va kave mehai ia haala ta mamaghuana ka God ta Torai Mana, taghe kolona gerepi ta ologho kavenia ka kaike leghutau mala rivai waeni, e ghua. 16Ta kakangava laona ka nona pokosodu ani nia ka kakabolonani mu iahi:

MANE GINITAUKELA FATEDI IRA MANE GINITAUKELA NIA LOD FATEDI IRA LOD.

17Ianimu tuna ghe nake finini nga kaike engizeli tetuna ka ia taunu, neke kudo lao ghu ka ira leghu memeha ta alava nga fateni: “Varighara meha ka leghahai mahai varighara ta va tanai iahi God. 18O meha o mahairi ghu ira vilahadi ira mane ginitaukela, ira vilahidi ira manefaadi mane magara nia ira vilahidi ira mane magara, ira vilahidi hose nia ira ta haghe ka hose ari, nia ira vilahidi ira leghu noni nga ira ta kalasa nia ira noni mala varituhu, ira noni ta varanga nia noni gare.”

19Ianimu tuna ghe, nake finini nga ia va vuha ta mamaghuana nia ira mane ginitaukeladi ka malau iahi peka nia ira punugara ka maneri, varighara mala magarina ia neke hagheio ia hose nia ia punugara ka manei, e ghua. 20Ia neke hagheio ia hose ta ghiho neke sakomo hioi ia va vuha ta mamaghuana nia ia nona porofeti ta sesebo e ghua. Porofeti ta sesebo iahi neke riva ghidi ira hahaima leghaha vananina ia va vuha ta mamaghuana mala seborina ira dike hioio ia zago va ghila ka manei ka ira raedi dike va totoana ghinio ghu ia nguzunguzuna. Maneri palu haro dike dolidi ma neke fera ghidi kai lao ghu manei ka giliona ia lokana totoi ta saliga ka ghahipa heko ta burungu. 21Ia mane neke noheo ka ia fatena hose neke atungi ia kamotona punugara ka ia leboto sisilufu mala magara neke kave mehao ka ia mangana manei. Ira leghu memeha nga dike la ghaniri tinidi ta leme ari dike toraina pote ghu.