Rev 2 | KjiSC | STEP | Ia mane neke kahe ghuani iahi, “Agho o kangava laoi leta iahi ka ia engizelina ia suga taraina Efesasi. Iahi mu ia nonomoho ka ia ta posiri ira vitu babaghunu ka ia kame mautuna, ia ta ghaghahe ka vari hoataidi ira vitu leghutau ta golu mala va nohedi zuta:

Revelation of John 2

Ia Nonomoho Maladi Ira Noni Ka Ia Suga Tarai Aianihi Efesasi.

1 Ia mane neke kahe ghuani iahi, “Agho o kangava laoi leta iahi ka ia engizelina ia suga taraina Efesasi.
Iahi mu ia nonomoho ka ia ta posiri ira vitu babaghunu ka ia kame mautuna, ia ta ghaghahe ka vari hoataidi ira vitu leghutau ta golu mala va nohedi zuta: 2 Ara na avohori mo leghu ta riva ghidi nga ghau. Ara nato finini ta riva va faana ghau, nia ta tetu va gimana ghau ka ira leghu vavahagala nga, e ghua. Ara na avohi mo ta taga teturira ghau ira noni ta muko. Ghau noto va sisiva ghidi haroma ira noni ta kahei, taghodi mu mane nonomoho ira ta ghua, ghe ta deo ma. Ghau noke hadu kaveri ghu dike sesebona maneri. 3 Ghau no tetu va gima ka ia va vavahagala vanagu ara deona ghe goke bualefo ghu.
4 Ghe iahi mu ne zea vanaguna ara ka ghau. Ghau e deo goto namaha ghinagu ghu ara ghatunaina, taghe noke ghuao namaha ghinaguna ka ia tatanigaina. 5 !O ngana laoi ko agho ta riufuna ia namaha ka agho ka kaike malau ta toraina vona! O taghuru kairi ira sasakemu o riva ghini ghu heve noke kusu riva ghinio ka ia tatanigaina. Noto deo la ghau go taghuru kairi ghu ira sasakemu, ara a la meha ghatu a hio kaini ghu ia leghutau mala va nohena zuta ka ghau ka ia mala auna. 6 Ghe leghutau ta veha iahi ne kuru ghauna nga ghau: Ghau no sokeri ira riva ka ia pukuna ta leghui ia vari va kakahei ka Nikolasi, taghe ta hakohako ghidi haro ini la ara ira riva ka maneri.
7 Hei neto au talingana la, manei e toraina nonomoho va veha ghu ka heve ne kahe laoina ia Tarunga ta Maduana ka ira suga tarai. Ka heiri ta posi va gima ta paufuri ghu ira muko, ara a age va malumuri ta mahainina ia fuana hekena doli, ka ia nunuma God.”

Ia Nonomoho Malana Ia Suga Taraina Samana

8 “O kangava laoi leta iahi ka ia engizelina ia suga tarai aianihi Samana.
Iahi mu ia nonomoho sipa mehana ka ia ta Kenu nia ka ia ta Leghu, ia neke lemeo nia neke meha doli leghuo. 9 Ara na avohori mo ira vavahagala nia au malanga ka ghau—!ghe ghau mu no taghotagho mo! Ara na avohori mo ira leghutau ta muko dike va kahe ghini ghauro ira ta kahei taghodi mu noni Ziu ira ta ghua ghe ta deo ma; maneri mu kaike pukuna noni ta nona Satana. 10 Oka maughemu ghu ka heve leghutau tato namo vavahagala ghinina ghau. Ia Faghinadi ira nazahi e age kai laori kehara ka ghau ka pipiliga mala va sisiva ghini ghauna, o age au vavahagala ghu ka giliodi tazo ravata. Ghe noto tetu va gima la ghau ka ia nomu va hohoghona, va malumu ghauna ghe taghomu ka leme, ara a age vanamu ia tabarana doli soduai.
11 !Hei neto au talingana la, manei e toraina nonomoho va veha ghu ka heve ne kahe laoina ia Tarunga ta Maduana ka ira suga tarai! Ka heiri ta posi va gima ta paufuri ghu ira muko, maneri e deo gedi age hioi ghu ia vavahagalana ia va paluna leme.”

Ia Nonomoho Malana Ia Suga Taraina Pegamamu

12 “O kangava laoi leta iahi ka ia engizelina ia suga taraina Pegamamu:
Iahi mu ia nonomoho ka ia ta kurui kaike leboto sisilufu mala magara, ta ngaru palupelo. 13 Ara na avohi mo ta auna ghau ka ia malau ta au ia nonohe ginitaukela ka Satana. Ne ghua mo ianimu ghe, ghau no va hohoghona ma no au ghu ka ara. Nia ghau e deo goke tarukaini ghu ia nomu va hohoghona ka ara, geta ghua ghu ka ia fafata atungi maneri Anitipasi ia ta tuturi hohoghona ghinagu ara, ka ia malau ghau ta au Satana.
14 Ghe di au nga keha leghutau teri ta deo ge veha vanagu ghu ara ka ghau: Keha nonira ka varihoataimu ghau no leghui ia vari va kakahei ka Balamu ia neke va kakahe ghinio Balaki, mala batu ghidi laora ira nonidi Isiraeli ka sasake. Manei neke va hugahugari maneri ta mahainina ia ghano dike veala ghini laono ka ira nguzunguzu, nia ta zave lao mehana, e ghua. 15 Taghe iala molamo, keha nonira ka varihoataimu ghau no leghui ia vari va kakahei ka ia pukuna noni Nikolasi. 16 !O taghuru kairi ghu ira sasakemu! Noto deo la, ara a magali meha ka ghau ghatu, a magarari ghu noni iranimu, ka ia leboto sisilufu mala magara ta kave meha ka paetegu ini.
17 !Hei neto au talingana la, manei e toraina nonomoho va veha ghu ka heve ne kahe laoina ia Tarunga ta Maduana ka ira suga tarai! Ka heiri ta posi va gima ta paufuri ghu ira muko, ara a age vanadi ia popoikana ghano ^{▼▼2:17 Ka ia audi ira noni Isiraeli ka ia malau koroghana ta karango rodana-ngavulu komuhu, God neke valihari maneri ka ghano neke sipa meha fate ia dike va kudo ghini “mana” maneri. Fafahakanana “mana” mu, ira leghutau ta veha ta naiungene ghidi God mala vanadira ira nona noni.} ta va kudo ghini ‘mana’. Ara a age va sopa kaikeri ghahipa ta ghiho ^{▼▼2:17 “ghahipa ghiho” Ia torai fafahakana hoghona mu e marutana va fafahakana. Ka ia nganganadi ira noni mu, ia ghahipa ghiho mu e mala va malumuri heiri ira ta hioi kaikeu ta mala la haghelena ka ia ravutu God.} ta kakangava lao kaike babaolo foforuna ^{▼▼2:17 “ira babaolodi foforu” Ia babaolo foforu ka ia ghahipa ta ghiho mu, ia babaolona Kraes, ba God, ba ia babaolo foforu ta vanani God kaike noni mala va podolonana ne foforu ia puhina manei ta ghuana. Sepao laoni God neke riva ghini iahi ka Ebarahamu nia Zekopu e ghua (fini ka Tatanigaina 17:5, 32:28).} ta deo hei ta avohina, nga taghonai ia ta hioi lama.”

Ia Nonomoho Malana Ia Suga Taraina Taeataera

18 “Kangava laoi leta iahi ka ia engizelina ia suga tarai aianihi Taeataera.
Iahi mu ia nonomoho ka ia Tuuna God ta zilapa taghe totoi ta helupu ta ghua ira nahalina, nia ta kafili taghe barasi ta va motongi ta ghua ira tabalana: 19 Ara na avohori mo ira leghutau ta riva ghidi ghau: ia nomu namaha, ia nomu va hohoghona, ia nomu riva nia ia tetu va gima ka ia vavahagala ta hakei ghau. Ara na avohi mo ta riva va faa fuludu laoina ghau ia kusu riva ka ghau.
20 Ghe iahi mu na deona ara ga va manemane ghini ghu ka ghau: Ghau no va malumi ta au taremehamuna nga Zezibolo ia fotati neke sesebono va kudo ghinina taghonai kaike porofeti ka God. Manei e va kakahe ghidi nia batu ghidi va zea ira nogu noniriva, ka zave lao meha nia ka mahai ghano neke veala ghidi laoro ka ira nguzunguzu, e ghua. 21 Ara nake vanani fafata ta mala taghuru kairira manei ira sasakena, ghe manei deo geke kabai nai kaini ghu ia zave lao meha ka manei. 22 Ara a age kai laoi ghu manei ka fatena kaike vavage ka ia ta la vavahagala va muko manei nia heiri dike zave taremehanao manei e ghua, dito deo la gedi taghuru kairi ghu ira sasakedi. 23 Ara a age bota va lemeri ira rekaha ka manei. Ianimu tuna ghe gedi age avohi nga ira leghu suga tarai nga mu ara lamu ia ta fini podolori ira nganganadi nia ira ta kabai ghidi maneri, ta ghuana. Ara a age vanani ghu ghatu kaikeu kaikeu e ghua ka ghau ia tabara ta leleghu ka heve riva neke riva ghidiro manei. 24 Nga ka ghau haroharo ta au aiamuhu Taeataera ta deo go leghui ghu ia vari va kakahei ka Zezibolo, ta deo ghu go sikolu ghini ghu ia vari va kakahei, ‘ira toraina popoika ka Satana’ ia ta ghua ghini maneri mu, ara a kahei ka ghau ta deo auna ara heve keha leghutaurani take va hure ghini ghau agena. 25 Nga o posi va gima ma o au ghu ka ia nomu va hohoghona a vuhai ke la meha ghu ara.
26 Ka heiri ta posi va gima ta riva ghidi ghu ira nogu riva dufuna ka ia va nonoghana mu, ara a age vanadi ia mana mala kopu ghidi leghu soloso nga ka malau iahi peka.
27 ‘Maneri edi age kopu ghidi ghatu ira soloso ka ia mana ta puina gigima,
age va mugoro taghe piatana panikeni ghahipa ta ghua ghidira.’ ^{▼▼2:27 Samu 2:9}

28 !Ara a age vanadi ia mana mala kopu ta varifata ka nake hioio ara ka nogu mama, nia ara a age vanadi haro molamo ia babaghunu leghu fugho! ^{▼▼2:28 “babaghunu leghu fugho” Kraes e age vanadi heiri ira ta tetu va gima babaghunu iahi mala va podolo kaveina ta age kopu ghinina ghatu maneri taremehana manei malau iahi peka.} 29 !Hei neto au talingana la, manei e toraina nonomoho va veha ghu ka heve ne kahe laoina ia Tarunga ta Maduana ka ira suga tarai!”