Rev 20 | KjiSC | STEP | Ianimu tuna ghe, nake finini nga kaike engizeli la hinae mehana ka malauo God fate taremehana kaike kii malana ia golava ta lao gilioni, nia kaike seni leghaha ta tahu e ghua posirira ka kamenani

Revelation of John 20

Ira Kaike Togha Komuhu

1 Ianimu tuna ghe, nake finini nga kaike engizeli la hinae mehana ka malauo God fate taremehana kaike kii malana ia golava ta lao gilioni, nia kaike seni leghaha ta tahu e ghua posirira ka kamenani 2 Manei neke sakomo hioi ia daragoni ia adoghona sepao ta va kudo ghini ia Faghinadi ira nazahi, ba Satana, neke piliga va gimai ghu ka seni ka giliodi kaike togha komuhu. 3 Ia engizeli neke kai laoi manei ka giliona ia golava ta lao gilioni, ghe neke bakisini nga neke loke kaputi ghu, mala e deo ghu Satana ke boka seborirani ira butubutu noni, e vuhai hokoto ghu ira kaike togha komuhu. Ka leghuna ianimu ia engizeli e ke age va kavei manei ka kaike birusuna fafata tei.

4 Ianimu tuna ghe, nake finiri nga ira nonohe ginitaukela, nake finiri ghu ira neke vanadi mana mala varifateo God nohedira aianimu. Nia ara nake finiri haro ira tarungadi ira noni dike kodaka kairiro ira paudi, vununa maneri dike tuturi ghidi ira leghutau ta hohoghona ghini Zisas nia ghini ia saorona God, e ghua. Maneri deo gedi ke va totoana ghini ghu ia va vuha ta mamaghuana, ba ia nguzunguzuna, nia maneri deo gedi ke hioi ghu ia zago va ghila ka manei ka ira raedi ba ka ira kamedi. Maneri dike doli leghu haroharo, dike tetu kopu taremehana ghu Kraes ka giliona kaike togha komuhu.

5 (Ira keha leghu dike lemero nga mu, e deo gedi ke tetuleghu ghu, neke vuhai hokoto ghu ira kaike togha komuhu.) Iahi mu ia va kenuna tetuleghu. 6 Maneri dike holararo ka ia va kenuna tetuleghu mu edi maduana, neke va beanari ghu God. Ia va paluna leme ta deo va nonoghana e deo ge age dufu ghu ka maneri, nga maneri edi age nona hiama God nia Kraes, edi age tetu kopu taremehana ghu Kraes ka giliona kaike togha komuhu.

Ia Paufi Satana

7 Leghudi kaike togha komuhu, ia engizeli e age va kavei Satana ka neke au pipiligao manei, 8 e kave lao ghu manei ghatu ka ira rodana lobosaidi ka malau iahi peka la seborira ira butubutu noni ta va kudo ghidi Gogo nia Magogo. Maneri mu edi tehi fuludu taghe ira garanga ka ia tapuruna tahi edi ghua. Manei e age hio varighara ghidi maneri mala magarana. 9 Ara nake finiri ghu ghaherina maneri ira leghu pelodi nga ka malau kamoto iahi peka, dike la au lilohi ghu ia malau leghaha ka God ta au ira nona noni taghona. Ghe totoi neke la sipa meha ka malauo God fate neke la saligari ghu.

10 Nia ia Faghinadi ira nazahi ia neke seboriro maneri, God neke kai laoi manei ka ia lokana totoi ta saliga ka ghahipa heko ta burungu ka neke kai laoio ia va vuha ta mamaghuana nia ira porofeti ta sesebo, e ghua. Aianimu ta age au vavahagala toghunaina maneri redu ravata.

Ia Va Nonoghana Varifate

11 Ianimu tuna ghe nake finini nga kaike leghahai nonohe ginitaukela ta ghiho nia nake finini haro God neke noheo aianimu, e ghua. Malau iahi peka nia ia kolanga mu, dike pelo kaini ka ia ta au manei, deona ke fini leghurirani. 12 Nia ara nake finiri ira dike lemero, ira ta varanga nia noni gare e ghua, tetudira ka kenuna ia nonohe ginitaukela God. God neke tobeheri ira buka ka neke kangava hinaeriro ira dike riva ghidiro ira leghu noni nga. Ianimu tuna ghe neke tobehini nga kaike bukani, ia buka ta au lao ira babaolodi heiri ira ta age au toghunai taremehana God. Ira leghu dike lemero nga mu, God neke fateri maneri leghurira ira heve dike riva ghidiro maneri ta kangava hinaeri ka ira buka. 13 Ia tahi neke va malumu kaveri ira ta leme dike auro ka giliona manei, nia ia leme nia ia malaudi ira ta leme e ghua dike va malumu kaveri ira ta leme ka giliodi maneri neke sopai fateri ghu God leleghuna ka heve dike riva ghidiro maneri. 14 Leghunana, ia leme nia ia beku mu, God neke kai laori ka ia lokana totoi. (Lokana totoi iahi mu ia va paluna leme.) 15 Ianimu tuna ghe neke kai laori nga God ka ia lokana totoi, heiri dike deo babaolodiro ka ia bukana doli.