Revelation of John 21

Foforuna Kolanga Nia Foforuna Malau Iahi Peka

1Ianimu tuna ghe nake finini nga ara kaike foforuna kolanga nia kaike foforuna malau iahi peka, vununa ia va kenuna kolanga nia ia va kenuna malau iahi peka dike to ogoro va nogha. Nia ia tahi neke to ogoro haro, e ghua. 2Nia ara nake finini ia foforuna Zerusalemu ia malau beana, la kave sipa hinae mehana ka God ka ia nona malauo fate, taghe ta ghua nia kaike fotati ta poko va veveha mala dufuina keranau, neke ghua. 3Nia ara nake nomohi kaike leo ta faa ngengene ghuana iahi ka ia nonohe ginitaukela, “!Fini! Ia Suga Tapole ta Maduana ka God to au ghatunaina ka vari hoataidi ira nona noni, e age au taremehadi ghu manei. Maneri edi age nona noni manei nia taghonai God ge age au taremehadi ghu maneri age nodi God na, e ghua. 4Manei e age guranga va karangori ira kolodi hibadi. Maneri e deo boka ke age lemedira, ba muko hihingodira, ba nakeledira, ba vavahagaladira, vununa ira leghutau ta muko ka ia sesepana malau iahi peka to ogoro toghunai.”

5Ia neke noheo ka ia nonohe ginitaukela neke kahe ghua iahi, “!Fini, ara nato va foforuri vahina leghutau nga!” Ianimu tuna ghe neke kahe ghua nga iahi, “Kangava hinaei iahi, vununa ngengene irahi mu edi hohoghodi, e boka mala rangerangeri ghu.”

6Nia manei neke kahe ghua molamo iahi, “To hokoto. Ara mu ia Alofa nia ia Omega, ia Tatanigaina nia ia Va Nonoghana. Ka heiri ira ta parangoso, ara a age vanadi kakato ketuhu ka ia ketuhu ta futu meha ka ia ketuhuna doli! 7Heiri ira ta posi va gima ka ia nodi va hohoghona ta fihiki kairi ghu ira muko, edi age hio kadolori vahina leghutau ta veha irahi nga, nia ara ga age nodi God ghu maneri nia maneri gedi age tuugu ghu ara, e ghua. 8Nga ira ta maughedi va hohoghonauna ara, ira ta deo gedi leghuau ghu ara, ira ta riva ghidi ira puhi ta muko, ira ta vari atungu, ira ta zave taremehadi ira noni taka keradiau ghu, ira ta vari basa, ira ta va totoanai nguzunguzu nia ira ta sesebo tudu e ghua mu, God e age kai laori ka giliona ia lokana totoi ta saliga ka ghahipa heko ta burungu. Iahi mu ia va paluna leme.”

Ia Foforuna Zerusalemu

9Ianimu tuna ghe neke la meha nga ka ara kaike ghu ka ira vitu engizeli ta posiri ira vitu sosa, ta foudu ka ira vitu va nonoghadi va kilasa neke kahe ghua ghu iahi, “O leghu mehau a va fini ghinigho ghu ia fotati, ta ghaseborona ia Rekahana Sipisipi.”

10Ianimu tuna ghe neke batu ghinagu nga ia Tarunga ta Maduana neke hure ghahe lao au ghu kaike engizeli ka kaike leghahai vuhuku ta toraina vona fateni, neke va fini ghinagu ghu ia malau beana leghaha Zerusalemu, la kave sipa hinae mehana ka God ka malaunao fate. 11Ia pelarana varanga ka God neke toraina va pelari malau leghaha ani, taghe pelarana ghahipa zasipa ia ta torai kalasa nia fini podoli taghe galasi ia ta ghua. 12Malau ani mu e kuru leghahai babarana ta vona, ta tazoi palu makatanana, taremehadi tazoi palu engizeli ta kopu ghidira. Ka makatana iranimu neke kakangava lao ira babaolodi ira tazoi palu butubutudi Isiraeli. 13Lito makatana visi fateo mo, lito ghu visi pelovona mo, lito ghu visi pelopeka mo nia lito ghu visi pakao mo, e ghua. 14Ia babarana malau leghaha mu dike riva ghini ka fatedi tazoi palu leghahai ghahipa pakaraina, ta au lao ka sopai ghahipari ira sopai babaolodi ira tazoi palu nona mane nonomoho ia Rekahana Sipisipi.

15Ia engizeli neke turi taremehaguo ara neke posini kaike leghutau mala fafata ta riva ghini ka golu mala fataina malau leghaha ani nia ira makatanana nia babarana, e ghua. 16Malau leghaha ani mu e kuru rodana gheremena, ta varifata ia bobona ka ia soduna. Manei neke fatai malau leghaha ani ka ia mala fafata neke hadu kavei ghu neke palu togha rodana ghobi kilomitana ia soduna, bobona nia ia vonana e ghua. 17Ia engizeli neke fatai mo lamo ia babarana malau leghaha ani. Ia vonana babara ani mu neke onomo ngavuluai gaha mita. Ia ghaghahena fafata neke riva ghinina ia engizeli mu taghe ia ghaghahena ta fani riva ghini lama ira noni. 18Ia babarana mu, dike riva ghini ka ghahipa zasipa, nia ia malau leghaha kamoto tuna ka golu kakato ta dori podolo taghe galasi, e ghua. 19Ira ghahipa pakaraina ia babarana malau leghaha mu, dike va ridiradangari ka leghu kokolodi ghahipa ta vona tabaradi nga. Ia va kenuna pakaraina mu ka ghahipa zasipa, ia va paluna mu ka ghahipa safae, ia va litona mu ka ghahipa agete, ia va rodanana mu ka ghahipa emarolodi, 20ia va gahana mu ka ghahipa onikisi, ia va onomona mu ka ghahipa kaniliani, ia va vitunana mu ka ghahipa kirisolaiti, ia va hanana mu ka ghahipa berili, ia va leghahana mu ka ghahipa topazi, ia va tazona mu ka ghahipa kirisoperesi, ia va tazoi kaikena mu ka ghahipa zasiniti, nia ia va tazoi paluna tuna ka ghahipa amatisiti, e ghua.

21Ira tazoi-palu makatanana malau leghaha ani mu, dike riva ghidi ka bololodi davi. Kaike bololona davi ka kaike makatana dike ghua ghidi. Nia ia hangana ta faa ka malau leghaha ani tuna geke golu kamoto ghu neke ghua, taghe galasi ta fini podoli ta ghuana.

22Ara e deo gake finini ghu kaike Ringifota ta Maduana ka God ka giliona malau leghaha ani, vununa ia Lod God ta torai mana nia ia Rekahana Sipisipi e ghua ta au tudu aianimu lamu ghu mu, Ringifota ta Maduanana ka God ka malau leghaha ani.

23Malau leghaha ani e deo ge kuhanai ghini ghu ia taunu ba hihile ta mala pelara laona ka manei, vununa ia pelarana varanga ka God ne vanani fegalana manei, nia ia Rekahana Sipisipi tuna zutana ka manei, e ghua. 24Ira butubutu noni ka malau iahi peka edi age ghaghahe nia au ka giliona ia fegala ia malau leghaha, nia ira mane ginitaukela ka malau iahi peka edi age hagheli malau leghaha ianimu taremehadi ira leghu taghotagho nga ka maneri. 25Ira makatanana ia malau leghaha edi age tobehe ka ia kamotona ravata torai deona gedi age bakisi ghu, vununa e deo redu ta age auna mu aianimu. 26Ira leghu butubutu noni nga, edi age hio hagheleri ka ia malau leghaha ira sare nodi leghutau ta veha ta taghori maneri. 27E deo heve ta muko, ba e deo hei ta riva ghidi ira puhi ta hahaghavadi, ba ta sesebodi, ta boka age haghelena ka manei, nga heiri ira ta kangavari ira babaolodi ka ia bukana doli ia Rekahana Sipisipi lama, ta age haghelina ia malau leghaha.