Rev 22 | KjiSC | STEP | Ianimu tuna ghe neke va fini ghinagu nga ia engizeli ia leghahai ketuhuna ia kolona doli ta toraina fegala mailo, la ghasolo mehana ka ia nonohe ginitaukela nona God nia nona ia Rekahana Sipisipi, e ghua.

Revelation of John 22

1 Ianimu tuna ghe neke va fini ghinagu nga ia engizeli ia leghahai ketuhuna ia kolona doli ta toraina fegala mailo, la ghasolo mehana ka ia nonohe ginitaukela nona God nia nona ia Rekahana Sipisipi, e ghua. 2 Manei neke ologho hinae ka ia hoatana hangana ka giliona ia malau leghaha. Ka ira palu pelona ketuhu leghaha mu, dike dolira ira hekena doli, ta kaike fata fua ka kaike hihile, taghe tazoi palu fafata fua ka kaike komuhu. Ira kaladi heke ari mu neke mala va vehari ka fogara ira leghu noni nga ka ira leghu sopai soloso nga.

3 Ia vavahagala nia leme dike dufuro ka ira noni sepao vununa ka sasake, e deo ge boka age dufuri ghu ira noni ka foforuna malau leghaha ianimu. Ia nonohe ginitaukela ka God nia ka ia Rekahana Sipisipi mu ta age aura ka giliona malau leghaha ianimu, nia ira nona noniriva God gedi age va totoana ghini ghu manei, e ghua. 4 Maneri edi age finini ia hihilina manei, nia ia babaolona manei gedi age kangava laoi ghu ka ira raedi maneri, e ghua. 5 Aianimu e deo redu ta boka age auna. Maneri e deo gedi age kabai ghini ghu ia fegalana zuta, ba ia fegalana taunu, vununa ia Lod God e age vanadi fegala maneri. Nia maneri tuna gedi age tetu kopu toghunai ghu, edi ghua.

Ia Meha Ka Zisas

6 Ianimu tuna ghe neke kahe ghua nga iahi ka ara ia engizeli, “Ngengene irahi mu edi hohoghodi, e boka mala rangerangeri ghu. Nia ia Lod God, neke vanadio ira porofeti ia nona Tarunga, neto tuhu laoi ia nona engizeli mala va podolo vanadira ira nona noniriva heve ta toraina mala magali dufuna ghatu.”

7 “!Nonomoho meha!” ne ghua Zisas. “!E deo sepana a la meha ghu ara! God e age va beanari ira noni dike nomohoriro ira ngengene ka buka iahi ta kahe kenuri ira leghutau ta age dufu ghatunaina nia keha nareo e ghua.”

8 Ara Zone nake nomohori nia finiri leghu irahi nga. Nia ka ia nomohori nia finiri ara, nake torongaghituturu maimanihi hinae ka ghahenari ia engizeli neke va podolo vanaguro leghutau irahi, nake bini va totoana ghini mo ghu ara. 9 Ghe manei neke kahe ghua meha iahi, “!Deo, oka va totoana ghinagu ghu ara! !O va totoana ghini ma God! Vununa ara mu kaike nona noniriva ma God, taghe taghou nia ira tahiu porofeti, nia ira noni haroharo ta leghuri ira heve ta kangavari ka giliona buka iahi, e ghua. O va totoana ghini God lama.”

10 Nia kahe ghua meha tuna iahi ka ara neke ghua, “Oka sute poikari ghu ngengene irahi ka bukana, vununa ia fafata to namo ka ia ta age dufu meha leghu irahi nga. 11 Ghau ira ta rivai muko mu, ghau o rivai muko ma o lao ghu, nia ghau ira ta mumukoana nia sota mu, o au mumukoana nia sota ma o lao ghu, nia ghau ira ta lotoro mu, o au va lotoro ma o lao ghu, nia ghau ira ta maduana mu, o au maduana ma o lao ghu, e ghua.”

12 “!Nonomoho meha!” ne ghua Zisas. “!E deo sepana a la meha ghu ara! Ka leghu mehaguo, ara a meha sopai tabarari ira noni, leleghuna ka heve dike riva ghidiro maneri. 13 Ara mu ia Alofa nia ia Omega, ia Kenuna nia ia Leghuna, ia Tatanigaina nia ia va Nonoghana.”

14 God e age va beanari heiri ira ta tapala va ghighihori ira nodi pokosodu. Maneri edi fata ta mala haghele fuluduna ka ia makatanana malau leghaha ta la mahainina ghu ia fuana ia hekena doli. 15 Nga ka peghuruna malau leghaha ani mu, ta aura ira ta riva ghidi ira puhi ta muko, ira ta basa, ira ta zaveri ira taka keradiau ghu, ira ta vari atungu, ira ta va totoanai nguzunguzu, nia ira ta fuludu ka sesebo, e ghua.

16 “Ara Zisas nato tuhu agei ia nogu engizeli, mala kahe kaverira leghu irahi nga ka ghau ira noni kiloau ta va hohoghona. Ara mu ia zaghara ta pagusuna meha Deveti, nia ia Babaghunu Leghufugho ta pelara.”

17 Ia Tarunga ta Maduana nia ia fotati ta mala varihio ka ia Rekahana Sipisipi dike kahe ghua iahi ka Zisas, “!Meha!” Ghau haroharo ta nomohori ira ngengene ka buka iahi o toraina kahei molamo “!Meha!” ta ghuana. Nia ghau ira ta parangoso, o meha. Noto kabai ghini la ghau ia kolona doli, o meha hioi, vununa kolona doli ianimu e mala hio kakatoi ma. 18 Ara Zone, na kahe ghini ghau va gigima, ghau ira ta nomohori ira ngengene ka buka iahi ta va podoli heve ta age dufuna keha nareo. Hei neto nakai haghele laori la ka giliona buka iahi keha ngengenerani, God e age va fate vanani lao ira vitu va kilasa nake turi ghidiro ara ka buka iahi. 19 Nga hei neto hio kai ngengene la ka buka iahi, ia ta va podoli heve ia ta age dufuna keha nareo, God e deo ge age va malumi ghu manei ta mahainina ia fuana ia hekena doli, nia e deo ge age va malumi ghu ta la haghelena manei ka ia Malau Leghaha ta Maduana, e ghua, ta turi ghidi ka buka iahi.

20 Zisas neke kahei ta hohoghodira leghutau irahi. Nia manei neke kahe ghua molamo iahi, “Uve, e deo sepana ake la leghu meha ghu ara.”

Amen. Meha agho Lod Zisas.

21 Ara na tarai fangai ia varisute ka God ta vanada kakato e age au ka ira nona noni beana God.