Rev 3 | KjiSC | STEP | “O kangava laoi leta iahi ka ia engizelina ia suga tarai aianihi Sadisi. Iahi mu ia nonomoho sipana ka ia ta kurui ira vitu tarunga ka God, nia ira vitu babaghunu e ghua. “Ara na avohori mo vahina leghutau ta riva ghidi nga ghau, nia ira noni di kahei ghau no doli mo ta ghuana, ghe ghau mu no leme.

Revelation of John 3

Ia Nonomoho Maladi Ira Noni Ka Ia Suga Tarai Aianihi Sadisi

1 “O kangava laoi leta iahi ka ia engizelina ia suga tarai aianihi Sadisi. Iahi mu ia nonomoho sipana ka ia ta kurui ira vitu tarunga ka God, nia ira vitu babaghunu e ghua.

“Ara na avohori mo vahina leghutau ta riva ghidi nga ghau, nia ira noni di kahei ghau no doli mo ta ghuana, ghe ghau mu no leme. 2 !O baghunu! Va gigimai ia va hohoghona ta auigho nga agho, ghe go toraina leme nga, vununa ara nato finiri ira riva ka ghau ta deora gedi hokoto ghu ka ia nahalina ia nogu God. 3 O ngana laoi ghu ia vari va kakahei noke hioio nia nomohio ghau. O posi va gima o fihiki leghu meha ghu ka ara taghuru kairira ira sasakemu. Noto deo la ghau go baghunu ghu, ara a la meha taghe kaike mane ta sisiko a ghua deona go avohoau ghu ghau ka fafata heve ta la mehana ara.

4 “Ne ghua mo ghe, kehara ka ghau aiamuhu Sadisi e deo gedi va sotari ghu ira nodi poko. Maneri edi age ghaghahe taremehagu ara va vona pokotini ta ghighihona, vununa maneri di fata ta ghuana ianimu. 5 Heiri ta posi va gima ta paufuri ghu ira muko mu, edi age va vona pokotini ta ghiho taghe maneri la. Ara toraina deo ga age guaha kairi ghu ira babaolodi ka ia bukana doli, nga ara a age kahe kavei ka kenuna nogu Mama nia ira nona engizeli e ghua, ta nogura ara mu maneri. 6 Hei neto au talingana la, manei e toraina nonomoho va veha ghu ka heve ne kahe laoina ia Tarunga ta Maduana ka ira suga tarai.

Ia Nonomoho Maladi Ira Noni Ka Ia Suga Tarai Aianihi Filadelefia

7 “Kangava laoi leta iahi ka ia engizelina ia suga tarai aianihi Filadelefia. Iahi mu ia nonomoho sipana ka ia ta Maduana nia hohoghona, ia ta posini ia kii ka Deveti ta kurui mana mala kopu ghinina ia ravutu ka malauo God fate. Heve ta tobehina manei e deo hei ta boka bakisinina nia heve ta bakisinina manei e deo hei ta boka tobehina, e ghua.

8 “Ara na avohori mo leghu ta riva ghidi nga ghau, nato tobehe vanamu ghu kaike makatana ta deo ge boka bakisini ghu hei noni. Ia gigima ka ghau mu e rekahana ma, ghe ghau no sutei mo ia nogu saoro, nia e deo go kahei ghu ta zea ghinaguna ara e ghua. 9 !Fini! Ira noni ta sesebo ta nona Satana ta kahei taghodi mu noni Ziu ira ta ghua ghe ta deo ma, ara a la va mehari edi maimanihi hinae ghu ka tabalau nira. Maneri haroharo edi age avohi ta namaha ghini ghauna ara.

10 “Vununa ghau no leghui ia nogu ungene va gigima mala tetu va gima tudu ma ta laona ghu, ara a age kagara ghini ghau ghu ghatu ka ia fafatana mamarutana ta la meha ka fatena malau iahi peka mala va sisiva ghidira ira leghu noni ta au nga ka malau iahi peka. 11 Ara mu e deo sepana a meha ghu. O posini ma au ghu ia nomu va hohoghona, e deo ghu hei ta hio tamuna tabaramu nira. 12 Heiri ira ta posi va gima ta paufuri ghu ira muko, maneri mu taghe ira sutuna ia Ringifota ta Maduana ka God edi ghua au tuduna aianimu. Nia ara a kangava laoi ka fatedi maneri ia babaolona ia nogu God, nia ia babaolona ia malau leghaha ka ia God ara, ia foforuna Zerusalemu ia ta la hinae meha fate ka ia nogu God. Ara a kangava laoi molamo foforuna babaologu ini ka tinidi ari. 13 Hei neto kuru talingana la, manei e toraina nonomoho va veha ka heve ne kahe laoina ia Tarunga Ta Maduana ka ira suga tarai.

Ia Nonomoho Maladi Ira Noni Ka Ia Suga Tarai Aianihi Leodisia

14 “O kangava laoi leta iahi ka ia engizelina ia suga tarai aianihi Leodisia. Iahi mu ia nonomoho sipana ka ia ta va kudo ghini Amen, ia ta va hohoghona nia ta turi kave hohoghona, nia ia tatanigaidi ira leghu neke va vuhariro nga God, e ghua.

15 “Ara na avohori mo ira leghu ta riva ghidi nga ghau. Ghau e deo go dangava ghu ba kaporo ghu. !Hera ka suna dangava nga ma, ba kaporo nga ghau! 16 Ghe ghau no au ka vari hoataina dangava nia kaporo deona go dangava ghu ba kaporo ghu, a kamusu kai kave ghau ghu ghatu ka paetegu ini! 17 Ghau mu no kahei ta taghotaghona taghomu ta kuru ghauna ghu vahina leghutau ta kuhana ghidi nga ghau. Ghe ghau e deo go avohi ghu ta muko hihingo, haghava, kuma, kivi nia sosolena ghau. 18 Ara a toraina tatangana ghau ta meha tabara goluna ka ara- golu ta va mamalahui ka totoi. E ghua ghe go taghotagho nga. Nia o tabara pokotini ta ghighiho, mala poikarira sosolemu ta hahaghavana nira. Nia o tabara mereseni hiba molamo maladira hibamu nira, o mala boka fifini ghu, e ghua. 19 Ara a buruari nia va kilasari heiri haroharo ta namaha ghidi ara. Ghau o ngana tahuau ghu ara o taghuru kairi ghu ira sasakemu.

20 “!Fini! Ara na tetu ka ia makatana na ketaketa ghu; hei neto nomohi la leoguini neto tobehi ghu ia makatana, ara a haghele lao a la mahai varighara taremehana ghu nia manei ge mahai taremehagu ghu ara, e ghua. 21 Heiri ta posi va gima ta paufuri ghu ira muko, ara a va malumi manei ta mala nohena ka gheremegu ini ka ia nogu nonohe ginitaukela, taghe nake ghuao la ara nake posi va gimao ka ia nogu va hohoghona fihiki kairira ira muko, nake nohe hinaeo ghu ka gheremena nogu Mama ka ia nona nonohe ginitaukela. 22 Hei neto kuru talingana la, manei e toraina nonomoho va veha lao ka heve ne kahe laoina ia Tarunga ta Maduana ka ira suga tarai.”