Rev 4 | KjiSC | STEP | Leghuna iahi ara nake mato nake fini laoi ghu kaike makatana la tobehe mehana ka malauo God fate, nake nomohi ghu ia leo nake kusu nomohio la, ngengene mehau taghe kigolona kufili ta ghuana. Neke kahe ghua ghu iahi, “o vona meha aiahi a va fini ghinigho ghu heve ta toraina la au mehana ghatu leghuna iahi.”

Revelation of John 4

Ia Va Totoana Ka Malauo God Fate

1 Leghuna iahi ara nake mato nake fini laoi ghu kaike makatana la tobehe mehana ka malauo God fate, nake nomohi ghu ia leo nake kusu nomohio la, ngengene mehau taghe kigolona kufili ta ghuana. Neke kahe ghua ghu iahi, “o vona meha aiahi a va fini ghinigho ghu heve ta toraina la au mehana ghatu leghuna iahi.” 2 Ka fafata ianimu lama to batu ghinagu ghu ia Tarunga ta Maduana, nake fini laoi ghu ka malauo God fate kaike nonohe ginitaukela la nohe mehana kaike noni ka gilionani. 3 Ia ta nohe meha ka nonohe ginitaukela ani mu, e pelara taghe ira ghahipa zasipa nia kaniliani e ghua. Kaike solodara ta pelara taghe kaike ghahipa emarolidi e ghua neke pelara lilohina nonohe ginitaukela ani. 4 Keha varadaki rodana nonohe ginitaukelani mu dike au lilohina nonohe ginitaukela iahi, edi nohe lao ghu varadaki rodana manefaa. Maneri haroharo dike va vona poko ta ghiho nia va vona tarapae ginitau ta golu ka paudi ari, dike ghua. 5 Dike kave mehana ka nonohe ginitaukela ani mu, ira kafilidi kapi, nia gululudi saduru, e ghua. Ka kenuna nonohe ginitaukela ani mu, vitu zuta dike helupura. Irahi mu ira vitu Tarunga ka God. 6 Ka kenuna nonohe ginitaukela ani mu, taghe kaike tahi ta mailo galasi e ghua ta podolo meha harona.

Ka torai hoatana lilohona nonohe ginitaukela ani mu, rodana va vuha dolidi ta hibadi kamoto kenudi mo nia leghudi mo e ghua dike aura. 7 Ia va kenuna va vuha dolina mu taghe kaike laioni e ghua, ia va paluna mu taghe kaike bulumakau e ghua, ia va litona mu e kuru hihilina taghe noni e ghua; nia ia va rodanana mu, taghe kaike sinagi ta alava elehe, e ghua. 8 Rodana va vuha dolidi irahi mu dike sopa onomo laedi nia ira leghu pelodi tinidi nga tuna gedi ke fouduai hibadi ghu e ghua, geta ghua ghu ghe ka pekadi laedi ari. Redu ravata maneri edi toraina deo gedi nodo ghu kahe ghuana iahi:
“ Maduana, Maduana, Maduana
mu ia Lod God ta torai mana,
neke au mehao sepao, ta au ini ghatunaina, nia ia ta meha keha nareo.”

9 Rodana va vuha dolidi irahi edi vanani varanga, va vonavona nia kudoveha manei ia ta nohe ka ia nonohe ginitaukela ia ta au toghunai. Leleghu fafata riva ghini iahi maneri, 10 ira varadaki rodana manefaa edi torongaghituturu hinae ka kenuna manei ia ta nohe ka ia nonohe ginitaukela, va totoana ghinina ia ta au toghunai. Ianimu tuna ghe, gedi va fara laori nga ira nodi tarapae ginitaukela ka kenuna ia nonohe ginitaukela, kahe ghuadira iahi,
11 “E fatau mo agho Lod nomai God,
ta hio varangana, va vonavonana nia gigimana.
Vununa agho noke va vuharira vahina leghutau nga
dike vuha ghu ka ia nou lao nanafa,
vanadina ia au nia doli.”