Rev 5 | KjiSC | STEP | Ara nake fini laoi kaike buka vividuhu ka ia kame mautuna ia ta nohe ka nonohe ginitaukela ani. Buka vividuhu ani mu e kuru kakangavana giliona mo nia peghuruna mo, ghe ge va kapata gimai nga ka vitu zagona.

Revelation of John 5

Ia Buka Vividuhu Nia Ia Rekahana Sipisipi

1 Ara nake fini laoi kaike buka vividuhu ka ia kame mautuna ia ta nohe ka nonohe ginitaukela ani. Buka vividuhu ani mu e kuru kakangavana giliona mo nia peghuruna mo, ghe ge va kapata gimai nga ka vitu zagona. 2 Nia ara nake fini kaike engizeli ta torai mana kudo va fafaa ghuana iahi, “?Hei mu ta fatana mala hio kairira ira zago kakapatana ia buka vividuhu mala viduhu tobehina?” 3 Ghe e deo kaike ghu ka malauo God fate, ba ka malau iahi peka, ba ka ia malaudi ira ta leme neke boka tobehina ia buka vividuhu neke izumina ghu.

4 Ianimu tuna ghe nake toraina nakele ghegu nga, vununa e deo hei neke dufuina hei kaikeu neke fatana ta tobehina ia buka vividuhu ta izumina ghu. 5 Kahe ghua meha tuna iahi ka ara neke ghua kaike ghu ka manefaa ari, “!Oka nakele ghu! Fini, ia Laioni ka ia butubutu Zuda, ta meha ka ia faana Deveti neto paufi ia magara. Manei e boka hio kairi mo ira vitu zago va kakapata e tobehi ghu ia buka vividuhu.”

6 Ianimu tuna ghe nake fini laoi nga ara kaike Rekahana Sipsipi tetuna ka kenuna ia nonohe ginitaukela ta au lilohi ira rodana va vuha dolidi nia ira manefaa, e ghua. Fifininana Rekahana Sipisipi ani mu taghe dike atungu va lemei neke doli leghu ghu, e ghua. Rekahana sipisipi ani mu neke kuru vitu gegehona nia vitu hibana. Vitu hibana ari mu ira vitu tarunga ka God neke va ghahe laoriro ka ira leghu pelodi nga ka malau iahi peka. 7 Manei neke lao neke la hioi ghu ia buka vividuhu neke auno ka ia kame mautuna ia neke noheo ka ia nonohe ginitaukela. 8 Hioi ne ghua ghu manei ia buka vividuhu, ira rodana va vuha dolidi, nia ira varadaki-rodana manefaa e ghua, dike torongaghituturu hinae ka kenuna Rekahana Sipisipi ani. Maneri haroharo dike sopa kaike leghutau mala hilava koze ta kuru vulohodi, nia dike posi sosa ta golu ta fouduai inisenisidi, e ghua. Irahi mu ira tarai ka ira nona noni God.

9 Maneri dike koze ghini ghu kaike koze foforuna ka ngengene irahi:
“Agho ne fatau mo ta hioina ia buka vividuhu
ta hio kairira ghu ira zago va kakapatana ta tobehina ghu,
Vununa agho mu dike atungigho, noke tabara vanani ghu God ka ia busakau
ira noni ka ira leghu butubutu nga, ngengene nga, noni nga, nia soloso nga, e ghua.
10 Agho noke meha kopu ghidi maneri taghe kaike mane ginitaukela nia noke vanadi ia papala hiama mala riva vananina ia noda God.
Maneri edi age tetu kopu ghatu ka malau iahi peka.”

11 Ianimu tuna ghe nake matoni nga ara, nake nomohori ghu ira leodi ira togha e togha engizeli ghu, ta deo ge boka tahori ghu. Maneri dike tetu lilohi ia nonohe ginitaukela, nia ira va vuha dolidi, nia ira manefaa, e ghua. 12 Maneri dike koze va fafaa ghua iahi:
“!Ia Rekahana Sipisipi dike atungio e fatana
ta hioina ia mana, taghotagho, avoavoho nia gigima,
nia va vonavona, pelarana varanga, nia helahela!”

13 Ianimu tuna ghe nake nomohori nga ira leghu va vuha nga ka malauo God fate nia ka malau iahi peka nia ka ia malaudi ira ta leme nia ka ia tahi e ghua koze ghuadira iahi:
“Ka manei ia ta nohe ka ia nonohe ginitaukela nia ka ia Rekahana Sipisipi
da helahela ghidi tudu maneri palu leleghu fafata,
da va vonavonari maneri palu,
nia helahela ghidi ka ia leghahai mana maneri palu.”

14 Ianimu tuna ghe, “!Amen!” dike ghua nga ira rodana va vuha dolidi, nia torongaghituturu hinae tuna gedi va totoana ghini ghu God nia ia Rekahana Sipisipi dike ghua ira varadaki-rodana manefaa.